Than Aak In Kenya Thaa'-Kuump-Kuumpantan God.an
41Yaam ke'anaman-a, ngay thonangan ngul pithanga, ke' thaa' dooran thaa' pa'antam yimanang wun aak heavenangana. A' amanamana ngath wee'-nath thawara a' wik nungantaman ke' trumpet yimanangan. Nil pam anmana, ka'athamana ngathar thaw. Nil thaw, “Pal iiya, a' ngay nungk meenathāng ngeen ngulan wampow.” 2A' erkam paththam Ngeen-Wiy Min God.antaman wamp ngathar, ke' pithang yimanangan thathang nunang. Anpalan-a, ngay kenyan thathangan-a, a' ngay chair pi'an thathangan ke' pam pi'an kings anangan nyiin-nyiintan yimanangan a' putha angman wee'-nathan nyiin-nyiin. 3Kaa'wal nungantaman ke' nganth ach-umpanam yimanangan parka, ke' kinchantam ngantha angan kunttow minang a' puth nga'alangkang park-park. A' chair pi'anang angman ke' ngooy yimanangan than-than, park-parka ke' kunttow min ach-umpanam yimanangana, kunttow greenan. 4Pungkalang angman chair pi'an alantangan twenty-four chairs wiy thamp than-thanin, thanan pam wuut manth-thayan twenty-four anangan nyiin-nyiinin. Thanan ngook pach ngoonchin a' kuchek thanttamaniya, kuchek olk yuk gold thampang ngoonchin. 5Chair pi'an anpalaniy-a, ngaay mal-mal thaw-thaw, a' ngak woo' thamp uk-uk a' peey-peey thamp. Puth thum nganth seven thamp pench-pench ke' thum uuchang yimanangan pench-pench angman chair pi'anang thinth -- nganth inanganiya, than oony min seven anangan God.antangan nyiintan. 6A' putha, chair pi'anantang umputh angmaniya, ke' wo'uw glass thamp yimanangan wun, pach min-minam paththama.
A' chair pi'an wonk-wonkang angman thampa, pam four ke' minh yimanangan thanin. Thanan mee' yot-yotam kemp wakanang pi'-pi'in, man-mangk a' um-ik wakanang. 7Nil pam thonaniy ke'a lion yimanangan; nil thonangananiy ke' minh calf yimanangan. Nil thonaniya ke' kaa'wal pam yimanangan; a' nil thonanganiy ke' minh kang-kang yimanangan mo'-mo'an. 8Than yotamaniya punth-paam six thampa, a' putha mee'-ath kemp thanttamangan pal-puy pi'in, kenyangk a' puth punth-paam pek-pekangk thampa. Than ngutang a' kinchangan aak-path-pathin, than ke'amim eenchin, thanan yimanang ke'-ngoongkam anman pathina:
“Moom pi'an ngamparaman Goda, nil thayan a' min paththama.
Ngamp thaa'-kuumpāmp nunanga!
Nilan puth aak nathpalman wun,
puth yimanangan nil man-yetham yippak wunan,
a' nilan aak umpuyam wunow.”
9Thanan anman aak path-pathantan, thankyou thaw-thawantan nungant, thaa'-kuump-kuumpantan nunang, pam nilan chair pi'anangan nyiin-nyiinan -- nil anman man-yethaman aak umpuyaman wun-wunan. 10Than al-alangan aakan pathantan-a, than wuut manth-thayan twenty-four anangana, pungkang thuchantan um pam alantangan chair pi'anangan nyiinan, a' thanan thaa'-kuumpantan nunang, puth nilan man-yetham anman aak umpuyam wunana. Than yuk kuchek olk thanttamana aakang wunpantan chair pi'an thinth angman, a' thawantan:
11“Moom nganttam! God nganttam! Ngan thaa'-kuumpanan nintang!
Ngan puth nintang min paththam ngaantam-ngeeyanan a' thayan paththam,
a' puth anpalmana ngan thaa'-kuumpanan nintang.
Nint puth ma'mangkam yumpan.
Nint thonamang ngaantam-ngeeyan way min ma'mangkam yumpanakaniy
a' putha ma'mangkam man-yetham pi'-pi'angana.”