Aak Heaven Nyiingkanaman Putha Aak Earth Nyiingkanaman
211A' ngay aak heaven nyiingkanaman thathangan, putha aak earth nyiingkanaman thamp. A' heaven ka'athaman wun-a, puth aak earth ka'athaman wun-a, an lam-lam ya'ampul, puth ngak wo'uwangan yim-yimanangam lam-lam ya'am. 2A' ngay aak ngench thayan anan thathangan thamp aawuch thaa'-wantanaman than-thantan, aak Jerusalem nyiingkanamana, pal uk-uk inpal kenyana. Nil piip God.angan kuch-kucha, puth nilana umputh kanam aak anan ma' min yump, ke' wanchangan paman ngentowan, kulich min-minam paththam ngoonch umang yipam iiyow pam nungantamakana. 3Ngay wik ngeeyangan othamayanan thaw chair pi'an anpalana, nilan thawa, “Aak piip God.antamana aak inman pam wanchantang! Niliya thanttang wunow, a' thananiya pam wanch nungantam iiyayn. Nilam piip God.ana angman thanttanga wunow, a' niliy puth God thanttam iiyow. 4Nil mee' kam ngul e'athow mee' thanttam anpalana. A' pam wanch puk manyiy ke'-ngul uthamayn ya'a, thananiya ke'-ngul ngangk wayan iiyayn an ya'-ngul, a' thanana ke'-ngul peeyayn ya'a, a' putha thanang ke'-ngul weechow a' ke'-ngul thaa'-eenchayn thamp, puth ka'athaman aak wun-a, an ya'-ngul kanam minch.”
5A' nil anan thaw chair wuut pi'anangan nyiin-nyiina, “Ngay inmana way min ma'mangkamana nyiingkanam ngul yumpānga!” A' putha nilan thaw ngatha, “Inana umpān latanga, puth wik inangana an kan-kanam paththama, ngay ke' wik uuy-uuyamanga, ya'a, niiy ngaantam-ngeeyān an kan-kanama ngayan thaw-thawanga.” 6A' nilan thawa, “Wik ngayan thaw-thawangan-a, an kan-kanam wamp. Ngay inman thaw-thawang ngay keenkam man-yetham anman wun-wunanga, aak ka'atham earth inan yippak ke'aman wun. Ngayiya man-yetham wun-wunang, a' ngayiya man-yetham anman aak umpuyam wun-wunāng. Nil wee'-nathwey ngakaman uthamiw-a, ngay ngul thee'āng thant ngakana. Thananiya ngakan ke' piiyiythan wukalangan an ya'a; ngay ngangk minangam thee'āng thant ngakana. Ngak ananiya an ke' ngak mee' pich-pichana murkanam anmana, than yipam pam wanchana man-yetham aak umpuyam wun-wunayna. 7Nil wee'-nathweya woyan ngatharam anman wak-wakiy putha ke'an wantiy ngayangan-a, ngayaniy-a, min anman iiy-iiyāng nungant, ngayiya God nungantam iiyānga, niliya puk ngatharam iiyow. 8Puth pam wanch wayanang anangan-a, thum karkan aakanakan iiyayna. Than pam wanch wiy al-alangan too want-wantantan ngayang puth nanpalan than winynyang mo'antan pam wanch wiyantaman, a' putha pam wanch wiy al-alangan ke'aman ngangkangan pi'-pi'antan ngayangana, puth wiy al-alangana pam wanch mulathantan thananga, puth wiy al-alangana ngangk kulangam wantantan nunang God.ana, a' putha wiy al-alangan maarich yaaman kee'-kee'athantan, puth wiy al-alangan ma'-wopangan pekantan pam wanch pukana, a' wiy al-alangan yuk ngeen-wiy yukaman yumpantan anangan thaa'-kuumpantana, puth wiy anangana ma'-yotaman wikan uuy-uuyamantana -- ma'mangkam ananganiy than-a, thum karkanang pench-penchayn, ke' wo'uw wuut pi'an we'ar yimanangan angan pench-penchayna, a' thokaniya thup-thupaniy pent-pentan thum anpalana. Aak anganiya pam wayanang anangana putham uthamayn a' ke'-ngul man-yethamayn.”
Aak Wuut Pi'an Nyiingkanam Jerusalem.ana
9Ka'athamana than ngaantiyongk seven al-alangan yuk bowls anangan kal-kalina. Thanan man kul piip God.antaman yeechin bowls amanamana aak iikanakan earthak, puth thanana aak way kuyam wampathin thant pam wanchantana, weech-weech thanang, thaa'-eench-eenchin thakan. Amanamana, nil piip God.angan ke'-ngul aak wayan kuch thant, ya'a. Nil ngaantiyongk thonamana wamp ngathar, a' thaw, “Awey, pal iiya, ngay meenathāng nungk wanch anana nil Lamb alangan ngentowana.” 10Anpalan-a, nil Ngeen-Wiy Min God.antamana wamp ngathar, an ke' pithang yimanangan wamp ngathar, a' anpalaniya nil ngaantiyongk alangan maayanya, a' aak yoyk achantang paththam aakanakana kalanya. A' nilana aak Jerusalem anan meenath ngathar, aak wuut pi'an ngench thayan paththaman, pal uk-uk inpal kenyan God.antamana. 11An park-park paththam, mee' mungk-mungka, an puth anpalan uk piip God.antam, nil min-minam paththaman a' wuut pi'an thampa. Ananiy park-park ke' yuk glass kinchang yimanangan park-park, mee' mungkanya. 12Wallana wuut pi'anan, nath kenya, a' putha thaa' gate.ana twelve, puth ngaantiyongk twelve thaa' anangan pi'-pi'in. Thaa' gate.angan namp pam twelve al-alantan umpin thant pam wuut mangk aak Israel anpalan. Than pam twelve inanganiy-a, an wuut mangk thanttam, ma'mangkamantam, pam wanch aak Israel punchan al-alantaman. 13Pal kaawangk anganiy-a, thaa' gates three, a' pal yiipangk anganiy-a, three thampang, puth pal kungkangk anganiy-a, three thampang a' pal kuuwangk anganiy-a, three thampang. 14Wall achantangana aak Jerusalem angan-a, kenyangk than-than kunttow twelve pampang angana. Nil piip God.angana namp ump-ump kunttow twelve pampang angana, namp al-alantaman pam twelve ngurp Lamb alantamana, than pam anangaman nilaman kuch thanang wik nungantaman waa'-waa'ayna.
15Nil ngaantiyongk anman ka'athaman thawar-a, nil yuk ongk ma'ang pi'-pi' goldaman yumpin, nil yipmam mipangow aak pi'anana, putha thaa' gate anangana, a' walls anangana. 16Aak ananiya aawuch thaa'-wantanaman than-thantana an wuut pi'an paththam aaka, a' putha we'ara. Nil ngaantiyongkangan anan mip-mipang, yuk nungantam alangan, an wuut pi'an paththama, a' ongka two thousand and four hundred metres, putha we'ara two thousand and four hundred metres a' achantangana yim-yimanangmana two thousand and four hundred metres. 17A' putha ngaantiyongk alangana wall yoon anangan mipang thampa, aniya sixty metres aakaman kenyakam. 18Nil piip God.angan wallana kunttow min-minam paththamana al-alantaman yumpa, mee'an mungk-mungk, putha aak pi'an Jerusalem nyiingkanaman-a, an goldam yump thamp, min-minam paththamana mee'an mungk-mungkan ke' glassang yimanangan. 19-20Kunttow pi'-pi'anam anangan wallangan pek-pekamana an min-minam paththam than-thanin, ach-umpanaman puth kunttow manyiy min-miniy thamp angman makin thanttang. Wiyiya ke' kangk erp yimanangana, wiyiya ke' yuw in kenyan, wiyiya ke' thupan yimanangan, wiyiya wewm-a, wiyiya ngotan, wiyiya purple-a, putha ke' wiy thampangan ke' wak erpana, puth wiy-wiyam thampana. 21Thaa' gates twelve anangan God.angan yump thanang yuk pearls wuut pi'-pi'anam anpalana, a' nilan thaa' thon-thonana yuk pearl thonam anpalman thonakam yump. Woyan aak wuut pi'an aakanakan-a, nil piip God.angan goldam yump, ke' glass louvresang yimanangan thaa' puyan thathanamp.
22Puth ngay ke'am thathang aawuch ngench thayanan aak wuut pi'anang angana than yipam pam wanchangan thaa'-kuumpayn nunang God.ana. An ya'-ya'ama, puth pul God.ang a' Lamb.ang aak anman wun-wunpula, a' than pam wanch anangan koochanam iiyayn pulant thaa'an kuumpayn pulanga. 23Thanan puth kinch-a, kepan ke'-ngul pi'iythan aak pi'an Jerusalem.angan, an puth God.antaman nganth kan park-parkana aak umyompanam angana, putha nil Lamb.an yimanangan tham nganth thamp. 24Pam wanch puk aak nath-nathan wuntan aak umyompanamana than nganth aak pi'an alantaman iiy-iiyayna a' putha than pam pi'-pi'anam anangana aak thon-thon nath-nathpalana than way min min-miniy thanttam anangan wampathayn aak wuut pi'anakana. 25A' thaa' gates anangan aak wuut pi'anangan-a, aniya thaa' pa'ant wun-wunayn kinch ongkana; a' than pam wanch anangan aak nganthang angman nyiin-nyiinayn aak umpuyama, ngaa'an ke' chintiy thant, nganth God.antam anman kan park-parkan. 26Than yotangan pam wancha way min min-miniy anangan paththam wamp-wampathayn aak wuut pi'an aakanakana, than aak nath-nathan wuntan wik thaa'nganth wiy-wiyam thakan thaw-thawantana. 27Than pam wanchangan way min wayanang anangana ke' wampathayna, ya'a. Than pam wanch wee'-wee'anangan way-wayam paththaman yump-yumpantan-a, an than ke' ngoonchayn aak anganiya. Than pam wanch wee'-wee'anangan wikan uuy-uuyamantan-a, an thaniya ke' ngoonchayn thamp. Than anangaman thonakam ep-paththam ngoonchayn aak angana namp thanttam lat pi'anang Lamb.antangan wun-wuntana an thanam ep-paththam ngoonchayn aak wuut pi'anang Lamb.antangan a' aak umpuyam wunayn nungantang.