Oony Way Satan.ana Kathayn Nunang A' Yaam Angman Wunow Kaap One Thousandakama
201Anpalaniya, ngay ngaantiyongk thathangan inpal keny uk-uk heavenama. Niliya yuk chol pi'an anhan ma'ang pi'-pi', a' putha yuk key thaa' tha'anakana aak awar thangk aakanakana. 2Nilana mam nunang thuuk kath keenkanaman, thuuk inana aak nathpalman wun-wun, nil Satan anman, oony wayana. Nil chol pi'anangan kathan thuuk anan, ngulakam wunow kaap one thousandakama. 3Nil ngaantiyongk alangan thee'an aak awar thangk pek kech aakanakana, a' thaa'ana ngath ngul, a' kenyangkana thayanam yump nil yipam thuukan ke' pentow anpalan, ke' yipam thamp pam wanchan muukamathow thanang aak nath-nathan wuntan umyompanamana. Niliya angman nyiin-nyiinowa awar thangkang ang pekan yuk chol pi'an thampan yaam angman wun-wunow kaap one thousandakama. Kaap one thousandan kanan minchow-a, nil ngaantiyongk alangana kuchow nunang manyama.
4Anpalaniya ngay pam wanch puungk wiy thathangan thanang nyiin-nyiinin chair pi'-pi'anamanga. Nil piip God.an thaw thant al-alantan pam wanchan um thanttangan than-thanathayn thanang a' mep-mepayn thanang. A' putha ngay oony thanttaman thathangan pam wanch mul al-alantaman than pam wanch kulliy al-alangan mul-mulathin thanangana, thananiya man thalakang umpin thananga puth thanana wik Jesus.antaman waa'-waa'in putha wik God.antaman thaa'-aath-aathin thananga. Thaniya ke'am thaa'-kuumpin minh kulliyan puth yuk ngeen-wiy nungantamana, putha than kompan minh kulliy alantaman-a, ma'-a, ngul-ngangkangan ke'aman kal-kalin. An thananiya koyam man-yethamina, a' than moom ngul iiyin karpam nungantang Christ.antangan a' putha than yaam aak wak-wakin nungantangan, kaap one thousandakama. 5Than pam wanch God.antamana ka'atham koyaman man-yethamin mulamana. Aak ngul-ngulana, kaap one thousandangan wantowan-a, pam wanch mul wiy anangan uth-uthaminan-a, nil God.angan koyam ngul ekathow thanang mulaman. 6Than anangan ka'athaman mulaman koyaman man-yethaminan-a, an than ngangk min paththama, than ananganiya kan-kanam paththam pam wanch God.antama. A' thananiya work iiyayn God.anta putha Christ.ant thampa. A' putha thananiya yaam aak pi'-pi'ayna karpam nungantang Christ.antangana, kaap one thousandakama. Than pam wanch inangan God.antamana, an ke'-ngul uthamayn puthaman ya'a, than pam wanch oony way Satan alantaman-a, ep-paththam puthaman uthamaynwey.
Nil God.angan Oony Way Satan.ana Thum Pi'an Karkanang Thee'ow Nunang
7Kaap one thousandan kanan minchow-a, an Satan.ana kuchayn nunang awar thangk pek kech anpalana. 8Amanamaniya nilana yoon ngul pentow a' pam wanch anangan muuk-muukamathow thanang pam wanch anangan God.an thaampantan nunanga, aak nath-natha wuntan aak umyompanamana, aak namp Goga anpalman putha Magog anpalman. Nil oony way Satan.angana karpam yalmathow thanang kul karkanakana. Thananiya thaa'-wantanam ke' ngaanh aak thompang yimanangan wun-wuntana. 9Than pam wanch ananganiya nath-nathan we'aramin aak umyompanaman. Thanan aak pam wanch God.antamakan iiyin, a' puth aak God.antamakan nilan kaangk wun aak-aakanakan. Than kuchwin kaaw kuuw kungk yiip a' menh-menhang wakan a' kan-ngul umang paththam kalin thanang pam wanch God.antaman. Puth yaam ke'anaman-a, nil God.angan thum nganth pi'an kuch aak inpal kenyan a' wayath thanang pam wanch wayanang anangan. 10Puth nil oony way anana, nilam thanang keenkanaman thakan muuk-muukamath thanang pam wanch anangan-a, nil God.angan thum pi'an karkan angan thee' nunang, thum ananiy ke' wo'uw we'ar wuut pi'an paththam yimanangan a' thokana thup-thupam kenyan mat-matan thum anpalan. Minh kulliy way anana a' putha pam anana wik way-way thampan thaa'-aath-aath thanang pam wanch anangan-a, pulanganiy-a, thum karkan pi'an ang pekan thee'in pulang ka'athangamana. Pulang weech-weechow pulang a' thaa'-eench-eenchowpulwey ngut ongkana, puth kinch ongkana. Pul ngulakamwey aak umpuyam thumang angman pench-penchowpul thaa'-eench-eenchowpul.
Nil God.angan Mep-Mepow Pam Wanch Ma'mangkaman
11A' anpalaniya ngay chair pach pi'an thathangan a' thonam wee'-nath angan nyiin-nyiin. A' aak inana putha aak yuw in kenyan ya' appenchpul nungantam, pam wanchangana ke'-ngul thathayn, ya'a. 12Puth ngay pam wanch mul ma'mangkam anangan thathangan thanang, pam wanch pi'-pi'anamana putha pi'-pi'anam ya' anangan thana, than ma'mangkamana angman umputh than-thanin um chair pi'an aakanakan. Nil anan nyiin-nyiin chairangan-a, nil lat wiy anangan thaa' pa'ant pi'-pi' a' anpalaniya nil lat thonangan ngul uw, thaa' pa'ant pi'-pi'. Lat thonam koy-koyyuwan maay-a, ananiya namp pam wanch al-alantaman wuntana than aak umpuyaman wun-wunayn God.antangan. Than ngaantiyongk al-alangan ka'athaman namp thanttaman ump-umpin lat wiy al-alantangan than ngeen thakan yump-yumpin aak ingman earthangana, than min nath yump-yumpinwey-a, ya'a natha, way nath yump-yumpina. Nil piip God.angan lat anangan thath-thath thanang, a' minam iiy thant al-alantan than minaman iiy-iiyina, a' nil way yump thant al-alantan than wayan yump-yumpina. 13Than anangan thompang kanaman uth-uthamina, thananiya, koyam ngul man-yethamin, a' than yotam mulan wunin-a, koyam mulaman ek-ekin, a' anpalaniya nil God.angan mep-mep thanang than nath wayan yump-yumpina, nath ya'a, min nath yump-yumpina. 14Than ngaantiyongk al-alangana pam wanch way ma'mangkam anangana thum karkanang wuut pi'an angan thee'in thanang angan pench-penchina, thum anan ke' wo'uw we'ar wuut pi'an paththam yimanangan. Aak anganiya than puthaman uthamayna, than pam wanch God.antam anangana ep-paththam puthaman ke'-ngul uthamayn ya'a. 15Nil God.angana lat nungantakam namp pam wanch nungantam al-alantaman thampa pi'-pi'an ananganiya ngangk aak umpuyam ngulan wun-wunayn aak God.antangan. Namp thanttam lat angan ya'an-a, than ngaantiyongk al-alangana thumang angan thee'ayn thananga.