191A' anpalaniy-a, ngay wik ngeeyangan ke' pam wanch puk thaa'-wantanam yimanangan aak in keny heavenangan thaw-thawin. Thanan othamayanan thaw-thawina, “Ngamp God.an thaa'-kuumpāmp nunanga! Nil ilangan kaa'-piichanathan ngampanga! Nilam thonam thayan paththam a' putha min-minam paththam thampa! 2Nil mak paththam wayath thanang aak pi'an Babylon angana, thanan puth way anman yump-yumpina, maarich thakan kee'-kee'ina, puth way wiy-wiy thakan yumpina. A' putha than pam wanch wiy anangan mee'-wichin thanang way yumpayn thampa. Nil God.angan wayath pam wanch anangan aak pi'an Babylon.angan wunin, than puth pam wanch God.antam puungk wiy anangan mul-mulathin thanang.” 3A' than pam wanch thaa'-wantanam anangan aak in keny heavenangan putham pechina, a' thanan thawina, “Ngamp God.an thaa'-kuumpāmp nunanga! Thum thok aak pi'an Babylon amanaman anman kenya mat-matan aak umpuyama.” 4A' than pam wuut manth-thayan twenty-four anangana puth pam four ke' minh anangan-a, thaniya aakang keekin a' thaa'-kuumpin nunang God.an, nil anman chair wuut pi'anangan nyiin-nyiina. A' thanan thawin, “Yey, kan-kanama! Ngamp thaa'-kuumpāmp nunang Goda!”
Aakan Kan Wampant Lamb Alantan Wanchan Ngentowa
5Anpalana ngay wik ngeeyangan thaw chair pi'an anpalana, nilan thawa, “Niiy ma'mangkam wee'-wee'anangan pam wanch God.antaman-a, niiy paththam thaa'-kuumpān nunanga! Niiy puungk wiyiya pam pi'-pi'anam iiy-iiyaniy, puungk wiy niiy ya'a, puth niiy ma'mangkam inangan niiy wee'-wee'anangan wik ngeeyaniy nungantam God.antamana, niiyiya thaa'-kuumpān nunang!” 6A' amanamaniya ngay wik wolmp ngeeyangan ke' wik pam wanch thaa'-wantanamantama, an ke' yeelal thompangan thuth-thuthan yimanangana, an ke' ngakan peeyan othamayanana yimanangan muut pi'anana. A' putha ngay ngeeyangan thanan thawina, “Niiy thaa'-kuumpān nunang Goda, puth niliya moom wuut pi'an paththama, aak umyompanamanta, a' putha nil thayan paththam thampa! 7Ngamp ngangk minangam iiy-iiyāmpa, puth thaa'-kuump-kuumpāmp nunang God.an nil puth pi'ana! A' putha aakan kan wampant nhengk God.antam alantana wanchan ngentow. Nhengk God.antamana ke' lamb yimanangan. Wanch nungantamangana ma'min yump nungantakam. 8Nil Lamb alangana kulich mina thee'ant wanch-kunchantan ngoonchowana, kulich pach, ya' parkant.” (Kulich min inan waa'ana an ke' mina than pam wanch God.antam al-alangan yump-yumpin aak ingman earthangana.)
9Anpalaniya nil ngaantiyongkan thaw ngathara, “Wik inana nint umpāna: nil God.angana pam wanch puungk wiy anangan ump thananga may pi'anan mungkanakan nil puth Lamb alangan wanchan ngentow. Than anangan pam wancha ngangk min-minam paththam iiy-iiyayna!” A' amanamaniya nil ngaantiyongkan thawara, “Inaniy wika kan-kanam paththam God.antama.” 10Puth ngayaniya tha' nungantang angman pungkang nyiinangan, ke' thaa'-kuumping nunanga, puth nilan thaw ngathara, “Ke' thaa'-kuumpān ngayanga! Ngay moom ya'a! Ngay yimanang thamp work iiy-iiyang God.anta ke' nint yimanangana. Ngay putha ke' kuunch niiyantam yimanangan, niiy anangana wik Jesus.antam anangan ngangkangaman pi'-pi'aniy nilaman waa'-waa' ngampar. Nungamang thonakama thaa'-kuumpāmpan Goda!”
Nil puth Jesus.angan wik kan-kanam paththam anangan waa'-waa'a. Nil ke'am wik nguncha ya'a. Than wikan waa'antan God.antaman-a, thananiya wik kan-kanam paththam anangan waa'antan Jesus.antam anman.
Nil Pam Anan Yaraman Pachangan Nyiinana
11A' anpalaniya ngay aak ing kenyan heavenangan thathangan thaa' pa'ant wuna, a' yaraman pach thathangan. Nil pam wee'angan matan yaramananiy-a, namp nungantan-a, inan “Man thonam”. Nil pam alangaman pam wanchan thanathow um nungantangan a' thaw-thawow thant thampwey, a' niliy thampa warak iiyowa, kul pi'anak aak umyompanam. Nilam thonakam minam anman yumpow. 12Mee' nungantamana an ke' thum ngantha, a' kuchek nungantamangana aniya kuchek olk yot-yotam ngoonch thanang. A' putha wee'ang nath nampan umpa kemp nungantangana, an than ma'mangkam anangan mee'miy ya', nampan want-wanttakana umpina. Nilam thonakam ep-paththam mee'miya. 13Kulich nilan ngooncha chaapar thethang ngathant kulich inaniy. Puth thananiya namp inan waa'in nunang, “Wik God.antama.” 14A' than soldiers al-alangana monkan-wakin nunang aak heaven anpalan, thananiya yaraman pachangan matin yotamana a' putha kulich mina a' pach paththam ngoonchina. 15Thaa' nungantam anpalan penta nhengk-peempan ongk pepana. Nhengk-peempan alangana, an nil maalathow thanang, pam wanch puk aak nath-nathan wuntan aak umyompanaman than nunangan thaamp-thaampina, a' moom pi'an iiyow thant. Puth nil piip God.an thayan paththam, a' man kul wampowant, than puth way yump-yumpin. Man kul paththam wampowant God alantan puth anpalan, nil pam anan wik God.antaman waa'antan nunang-a, nilan aak wayathow thant, amanamana nil wayathow thanang thampa. 16Namp thonangan nunganta angman kulich nungantamang wunpin a' namp thoniya angman pemar nungantamang wunpina. A' namp inan nungantiya: “Nil wuut pi'an paththama ke' ngamp yimanangan nil ya'a.”
17Amanamana ngay ngaantiyongk thathangan than-than kinchang. A' nil wik othamayan pech thanta minh panch al-alantan keny kechan mo'-mo'in yuw wakanana al-alantan wik pech. A' nilan thaw, “Awey, karpam yalmathwuna may pi'anak God.antamak! 18Pal wampiya a' mungkān kemp pam pi'-pi'anam al-alantamana, a' putha moom pi'-pi'anam soldiersantam anangan kemp thanttamana, putha soldiersantama, putha yaraman al-alantaman kempa, a' putha kemp pam al-alantaman mungkān yaramanangan matantan a' putha pam wanch ma'mangkamantam kemp mungkāna, puth anangan thana work wukal ke'anangan iiy-iiyantan thant wiyantan kemp thanttam thamp munkāna, a' than slaves ya'ana, putha pam wanch pi'-pi'anam anangana a' putha pam wanch pi'-pi'anam ya'ana! Kemp thanttam ma'-mangkamantam niiyiy mungkāna!”
19Anpalana ngay minh kulliyan thathangan puth pam pi'-pi'anam aak imanamana world a' soldiers thanttam thamp thathangan thanang. Thananiya karpam yalmathwin kulak nungant pam thonam alantan yaraman pachangan nyiin-nyiin man-mangkangana, putha soldiers nungantam al-alantan thamp. 20Nil pam anan yaraman pachangan nyiin-nyiina putha pam nungantam anangana thampa, thananiya mamin nunang minh kulliyan a' putha pam anan thampa nil way-wayan thaa'-aath-aath thanang wik God.antamana. Pam way anana, nilaniya ka'athaman work pi'-pi'anam meen-meenath pam wanchant mee' minh kulliyantanga, puth anpalan nil mee' thench thananga pam wanch way anangan minh kulliyan monkan-wak-wakin nunang, a' puth kompan pi'anan kal-kalin nungantam minh kulliy alantaman a' puth yuk ngeen-wiy nungantaman thaa'-kuumpin.
Pam anman yaraman pachangan nyiin-nyiin-a, a' puth pam wanch nungantam anangan-a, thananiya mamin pulang pam kucham anangana a' thum karkanang angan thee'in pulang pul man-yethaman yippaka. Thum ananiya an ke' wo'uw we'ar yimanangan pench-pencha, a' thum thokaniya ke'a thup-thupaniy pent-pent thum anpalana. 21A' amanamaniya thanana pam soldiers anangan ngul mulathin thanang pam kucham al-alantamana, thaniya mulathin thanang nhengk-peempan ongk pepanang thaa' anpalan pent nungantama nil yaraman pachangan nyiin-nyiin. A' than panch ma'mangkam al-alangana mungk-mungkin kemp pam al-alantamana a' thip oth ngul weenin.