Aak Wuut Pi'an Babylon.an-a, God.ang Kanam Thuth, Aakang Ngul Keekin
181A' ngul anpalaniya ngay ngaantiyongk thonangan ngul thathangan inpal keny uk-uk heavenama. Nil moom pi'an paththaman. A' niliya park-parka, aak nath-nathaniya ya' park nganth nungantam anpalana. 2Nilana wik othamayan thawa, “Aak pi'an anan aawuch thaa'-wantanaman than-thanina, Babylon angana, kan way ngul, God.ang kanam thutha, aakang ngul keekina. An aawuch ya'-ya'am ngul! Aak anganiya pam wanch puk thaa'-wantanaman wun-wuninan-a, an ya'-ngul kanam minchin, anam thonakam oony way anangana wun-wuntana, putha oony way wiy kulliy anangana, a' putha minh panch wayanang anangan thamp. 3Aak anan way-wayam paththam wuna, puth than pam wanch aak angan wun-wunin Babylon.angan-a, than pam wanch anangan thaach-thaachin thanang, aak nath-nathpalan wamp-wampinan, than thamp yipam way yump-yumpayn, a' puth maarich kee'ayn thakana, ke' thanam yimanangan yump-yumpin. A' than pam pi'-pi'anamana aak umyompanam nathpalan wampinan-a, ngotan ngoonchin thanttangan angman maarich thakan kee'in thant. Pam wanch aak nath-nathpalan wampin aak pi'an Babylon.akan than yipam way min thanttaman thee'ayn pam wanch wiyantan wukalakweya, a' an than ma'mangkiy paththam yumpwin yimanangan, puth than pam wanch aak Babylon punchan anangan-a, yangk weenin, way min yot-yotam kuyam piiy-piiyina. Way min min-miniy yot al-alangana ngangk mungk-mungkin thananga.”
4A' anpalaniya ngay wik thonangan ngul ngeeyangan aak inpal kenyana, wik inangan thawa:
“Niiyala, pam wanch ngatharam-ang! Niiy aak pi'an nanan too ngul wantāna!
Yaarkathwun pam wanch way nal-nalantamana!
Niiy ke' ngotan ngoonchān thanttangan thanan way yump-yumpayn.
Niiy nath wayan yumpin ke' thanan yumpantan-a, nil piip God.angan niiyang wayathow thampa.
5Puth pam wanch al-alangan aak pi'an Babylon amanamana way yaam anman yump-yumpin, way thanan yump-yumpin-a,
an thaa'-wantanama an ke' wook yimanangan wump mat nath kenyakam yuwaka.
Nil puth God.angan konangam pi'-pi'an way thanttaman thanan yump-yumpina.
6Puth pam wanch anangana aak pi'anangan wuntan-a,
niiy puthangkan way yumpān thant ke' than wayan yumpin niiyant.
A' putha than pam wanch wiyantan way-wayamin thaka.
Puth niiyiya puthangkan wayamān thant paththam, way iiy-iiyān thanta.
A' puth-putham wayathān thanangana.
7Puth pam wanch anangan thana yangk-yangkaminan-a,
thananiy-a, ma'mangkiy yumpwina, a' thanana ulp-ulpanang ngul iiy-iiyin.
Niiy puth way yumpān thanta, a' ngangk way paththam yumpān thanang.
A' thananiya ulp-ulpanang thawin thanttakamana, yimanangan thawin,
‘Nganiya moom pi'-pi'anam ke' queen yimananganweya!
Nganana ngangk way ke' wunina ke' wukalongk yimanangana.
Puth wayana ke' wampiy ngant!’
Puth thaniya wik way-way thak thaw-thawantan.
8Puth amanamana, nil piip God.angan yaam ke'anam wayathow thanang kinch thonamang angmana.
A' nilaniya way yot kuch-kuchow thant, a' thananganiy-a, weech-weechow ngul,
a' ngangk way paththam ngul wunayn, a' putha thananiya may ke'anang wunayn.
Nil piip God.an min-minam paththam a' ma'-kunch thamp,
a' nilana um nungantang ngul thanathow thanang a' mep-mepow thanang thamp,
amanamaniya nil thumang ngul thee'ow thanang pench-penchaynwey.”
9Aak pi'an Babylon.ana, an ma'mangkam thumang pench-penchow, a' ya'-ya'am ngul wunow, a' putha thok wuut pi'an pent-pentow thum nganth anpalana. Than pam pi'-pi'anam anangan wayan yump-yumpin thanttangan-a, pam wanch aak pi'an Babylon anpalman-a, thananganiya mee'-kamang want-wantow, peey-peeyayn ngangk wayakama thum thokan thath-thathayna. 10A' thananiya kecham than-thanayna, an puth thanan winynyanga mo'ayn nil puth God.angan ngul nath wayathow thanang thampa. Thanan ngul thawayn, “In way-wayam paththama! Aak ananiya wuut pi'an paththam we'ar aawuch thaa'-wantanaman than-thanina a' putha aak kaangkiy thamp! A' nil puth piip God.angana yaam ke'anamana wayathow thanang1”
11Than pam anangan way minan kal-kalin wiyantan wukalakan-a, than thamp peeyayn thaa' yuk thuth-thuthayn aak pi'an aakanakana, puth pam wanch aak an punchan anangan ya'-ngula, pam wanch aak nath-nathpalana ke'-ngul aak pi'anakan iiy-iiyayn, way minan ke'-ngul sellimpung-pungayn thant wukalakanwey, an ya'-ngul. 12Aak anganiya an pam wanch ke'anang ngul, kanam minchin puth wee'angam gold thanttaman piiy-piiyiya, putha silvera, a' yuk kunttow min paththam anangan thampa putha pearls anangan thakana. A' an wee'angam puth piiy-piiyiy kulich min-miniy wiy-wiyam thakana, wewm-a, putha wiy-wiyam purple anangana thaka. A' putha an wee'angam piiy-piiyiy way min yuk min-minam awal min paththaman unch-unchan, yuk wiy-wiyam thakana, a' way min yuk cholaman yumpina, puth yukaman a' kunttowaman a' putha way min wiy-wiyam anangan thakana. 13Puth pam wanch ya'-ya'am ngula, way min opar thakan ke'-ngul piiyayna, putha awal min anangan perfumes thakana, a' puth opar wenchakana, a' putha minh kama may kiingkanakana, may kam wine-a, may aachich-a, a' may wheat-a, a' minh bullocks-a, puth minh sheep-a, a' yaraman anangan-a, putha wagons. An wee'angam piiyiy thananga? A' puth wee'angam wukalang piiyiy thanang pam wanch thanttam anangan, thanan mamin thanang workan iiy-iiyayn thant.
14Than pam wanch al-alangan-a, way minan kuyam kal-kalin than yipam sellimpungayn thant-a, putha thananiy thaw-thawin pam wanchantana aak anpalman, Babylon.aman, “Niiyiya yangk mo'-mo'an ngangk mungk-mungk niiyang way min yot min-miniy al-alangan niiy yipam pi'-pi'ān niiyantakamana, puth inmana way min min-miniy anangana an ya'-ngula. Niiyiy ma'mangkiy yumpwuna puth ulp-ulpanang iiy-iiyan way min niiyantam anpalanwey, puth way min yot anangana an ya'-ngula, a' niiyiya koyaman ke'-ngul uwin thanang ya'a!” 15Pam wanch anangan thana way minan kal-kalin wukalakana aak wuut pi'anang Babylon.angan-a, than ma'mangkiy ngul iiy-iyina, thananiya kecham ngul than-thanayna, puth thanan winynyang mo'ayn nil God.angan puth wayathow thanang thampa. A' thananiya ngangk way paththam iiy-iiyayn putha peey-peeyayn thamp. 16A' thaw-thawayn, “In way-wayam paththama! Aak ananiya wuut pi'an paththam! Pam wanch aak an punchan anangan-a, kulich min-miniy anangan kuyam ngoonch-ngoonchina, a' ngook min-minam paththam, wewm-a, putha wiy-wiyam purple anangana, a' putha thananiya rings yot-yotam ma'angan ngoonchina, a' man uch yot-yotam kal-kalin manangana, putha ma' punth kuuy yot-yotam kalina. A' brooches yot-yotam kal-kalin kulich thanttamangan-a, a' putha way min wiy anangan thakana. Way min goldaman yumpina, a' pearlsama, putha yuk kunttow min-minam paththam al-alantaman yumpin. 17A' yaam ke'anamana, way min yot thaa'-wantanamana an min ya'-ngul way ngul weenina, than kanam wayathin thanang!” Thanam wik yimanangan thawin.
Pam wanch yot chukkunangana than thampana kecham nyiin-nyiinin a' thath-thathin kecham anpalman pam moom chukkun al-alantamana, a' pam wanch than anangan chukkunangan mo'-mo'ina, a' putha pam anangan chukkunangan work iiy-iiyin minh nga'an mam-mamin-a, a' putha wiy anangan thaka. Than angman kecham thath-thathin. 18A' thananiya wik othamayan pech-pechin than thok wuut pi'anan thath-thathinana thum nganthan pench-pencha aak pi'an Babylon.ana. A' thananiy thaw-thawina, “Aak wuut pi'an yimanangan ke'am thathampa ke' aak Babylon inana.” 19A' thananiya kuchek thanttangan-a, kurk thee'-thee'inwey, puth thananiya ngangk way-wayam paththam weenina putha peey-peeyina, a' thawin ngul, “Inana way-wayam paththam thant pam wanch aak an punchanantana. Way-wayama! Ngamp puth ma'-yotam mo'-mo'anamp chukkun ngamparamangana a' way min yot-yotam kal-kalanamp thantan wukalan yipam thee'ayn ngamparwey a' ma'mangkiy yump-yumpin ngampanganiya, puth yaam ke'anamana, way min ma'mangkam thanttamana wayathin thanang. Ya'-ya'am ngul!”
20Niiy ngaantiyongk ma'mangkam in keny heavenangana, niiy ngangk minangam ngul iiyān puth aak Babylon.ana kanam pencha. A' niiy pam wanch God.antam anangan thamp ngangk min iiyān putha pam prophets anangan a' wiy anangan thak nilaman kuch niiyang wik inan waa'-waa'ān, niiy thamp ngangk min wunāna, nil God.angan kanam wayath thanang puth anpalana wayan yump-yumpin niiyantana.
21A' amanamana nil ngaantiyongk thonam thayan paththam alangan-a, kunttow way wuut pi'an anhan paththam maaya a' thee' ngul wo'uw wuut pi'an we'ar angan, a' thaw ngul, “Nil God.angana yimanangan keekathow aak wuut pi'an Babylon ananiya, ke' ngay yimanangan kunttow wuut pi'an inan ngak wo'uwangan thee'angan. Than pam wanchangan-a, ke'-ngul thathayn aak wuut pi'an Babylon.ana. 22A' putha than ke'-ngul ngeey-ngeeyayn muut-a, wik thak anangana aak pi'an anganweya. Puth pam wanchangan ke'-ngul kee'-kee'athayn guitars anangana an ya'-ngul, putha than ke'-ngul wuu'-wuu'ayn yuk flutes-a, putha trumpets thakana an ya'-ngula. A' than pam wanchangana ke'-ngul aakan path-pathayn aak Babylon angana. Aak anganiya an than ke'-ngul workan iiy-iiyayna an ya'-ngul, putha aawuch an ke'-ngul kaach-kaachayn thaka, putha way min thakana ke'-ngul yump-yumpayn aak anganiy thampa. Than ke'-ngul mayan nhanthathayn, an ya'-ngul. 23A' putha, nganth anangana ke'-ngul park-parkayn aak anganan ya'-ngul. Aak anganiya, than pam wanchana ke'-ngul ngent-ngentwayn thanttakaman an ya'-ngul. Aak anganiya than pam wanch anangan ma'mangkiy ka'athaman iiy-iiyin putha thay-thayanam paththam iiy-iiyin, ke' wiy anangan yimanang ya'a, puth inmana than pam pi'an thay-thayanamana ke'-ngul iiy-iiyantan, ya'-ngul, kanam minchin. Than pam wanchangan aakan punchanangana mee' thench-thenchin thanang, pam ke' punth kuuyang mee' thench-thenchin thanang, pam wanch wiy anangana, aak nath-nathpalan kuyam wamp-wampin aak Babylon.akana puth inmananiy-a, pam wanch aak an punchan ananganiya ya'-ngul, kanam minchinwey!”
24Nil piip God.angan ma'mangkaman wayath thanang aak Babylon anpalana puth ngeename? Pam wanch God.antam anangan mul-mulathin thanangwey anpalan. Thanan mulathin thanang pam wanch God.antam anangana puth wik God.antam anan waa'-waa'in thanta. Thanana pam wanch thaa'-wantanaman mul-mulathin thananga aak thon-thon nath-nathpalan wamp-wampin. Puth anpalana nil piip God.angan kan-kanam paththam wayath thananga.