2 JOHN
Inaniy Lat Thonangan Nil John.angan Ump Thantana
1. (1:1 - 1:3)
2. Ngamp Kaangk Wunāmp Ngamp-Ngamparakaman A' Wik God.antam Anman Ngeey-Ngeeyāmp (1:4 - 1:13)



2 JOHN
Inaniy Lat Thonangan Nil John.angan Ump Thantana
1Ngurp ngatharam niiyalang, ngay pam manth-thayan John.ang lat inan umpang niiyant yotamant church naakanakana. Nil piip God.angan kanam mi' niiyang pam wanch nungantakam yipam iiyāna! Ngay puth kan-kanam kaangk wunang niiyant yotam nal-nalantakamana. Puth ngayam thonakaman ya'a, puth wiy anangan thampa kan-kanaman ngangkangan pi'-pi'antan wik kan-kanam Christ.antaman-a, than thampa kaangk wuntan niiyantweya, 2puth anpalana ngamp karpam wik Christ.antaman ngangkang pi'-pi'anamp wik kan-kanam nungantam anangana a' puth ngampaniya wikan aak umpuyam ngangkang pi'-pi'āmpantama.
3Ngay kaangk pul piip God.angan a' Lord Jesus Christ.angan, nhengk nungantam alanganiy-a, ngangk minangam paththam iiy-iiyowpul ngamparana, a' ngangk mamowpul ngampang thama, puth ngangk min paththam yumpowpul ngampanganiya. A' ngamp kan-kanam ngul mee'miy weenāmp wik God.antamana, a' putha ngamp-ngamparakamana kaangk wunāmp ngul a' ngangk minangam iiy-iiyāmp ngamparakamaniya.
Ngamp Kaangk Wunāmp Ngamp-Ngamparakaman A' Wik God.antam Anman Ngeey-Ngeeyāmp
4Ngath ngangk min wunanweya ngay niiyang wiy anangan thath-thathangweya, an kan-kanam paththam wik ngeeyan nungantam piip God.antaman wik nilan waa' ngampar. 5Yaa, niiyiya ngurp ngatharama, ngay inan thaa'-mamanang thawang niiyanta niiyiya kaangk wunān niiyantakamana. A' inan wik nyiingkanam ya'a, ngayan ump-umpang niiyantanweya; wik inangana puth ngamp yotamangan ngeeyanampa aak keenkanam nathpalmana. 6A' ngampwey wik ngench thayan anangan piip God.antaman ngeeyimpwey-a, an ngampiya kan-kanaman kaangk wunimp ngamparakaman. Wik inan nilan waa' ngampar ngeeyanakan ngampara: ngamp yotamana kaangk anman wunāmp ngamp-ngamparakamana! Ngamp puth yotamangan wik ngench thayan inangan kan ngeeyampa aak keenkanam nathpalmana.
7Niiy kan inan ngeeyān thampa: than pam wanch yot nath ngulan iiyina thaa'-aath-aathayn thanang pam wanch anangan puth an than yaan muukamathantan thanang, an than way-way waa'antan thanta, puth than ke'am waa'antan nil Jesus Christ.an uk aak iikanakan ke' pam ngamp yimanangan wuna. Than yimanangan yaan muukamathantana pam wanch wiy anangana puth thananiya Christ.an ngangk-wayangam kal-kalantan nunanga, than kaangk ke' nungantama. 8A' niiyiya min-min thathān thanangana, niiyiy putha work pi'an iiy-iiyan nungant Jesus.antana, a' ngul-ngulanweya nil min paththam iiy-iiyow niiyant aak ing kenyana puth niiyan work minam iiy-iiyan nungant. Puth niiy nathwey wik thanttaman ngeeyān pam wanch way al-alantaman-a, nil puth God.an min ke' iiy-iiyiy niiyant aak ing kenyan ya'a.
9Nil puth Jesus Christ.angan wik nungantaman kan thaa'-aath ngampang. Ngamp nathwey wik way-wayan waa'-waa'imp thant wiyantan-a, yaa, puth ngampaniya God.an ngangk ngamparamangan ke'am pi'anamp nunang ya'a. Ngamp nathwey kan-kanaman waa'-waa'imp wik min Christ.antam anman thonakaman-a, ngampaniy putha God.an ngangkang pi'-pi'anamp nunang a' putha nhengk nungantamana Jesus Christa. 10Wiyiya natha pam wiy nath wampiythan niiyant a' wik waa'-waa'iythan niiyant. Than nath ke'an ngaantam-ngeeyiythan wik min nungantaman nil Christ.angan thaa'-aath-aath thanangan-a, yaa, niiyaniy putha ke' thaa'-palathān thanang aawuch niiyantamakana, a' ke' umang iiyān thant, puth-a, ke' pal kalān thanang. 11A' nil wee'angan umang wakow thanangan-a, puth nil thamp work wayan ma'-aath-aathan thananga.
12Ngay ke' wik yotam inangan waa'ing niiyanta, puth ngaya wik yotaman ke' umping niiyant, ya'a. Ngay nath ngul wampāng niiyanta a' wik thawāng niiyant yotamantana, a' puth ngamp yotamaniya ngangk min-minangam paththam ngul iiy-iiyāmpa.
13Pam wanch Christians wiy il-ilangana than thampang wik min kuchantan niiyanta, than niiyangana ngaantam-ngeey-ngeeyantana. Nil puth piip God.angana kan mi' thanang pam wanch nungantakam ngul iiy-iiyayn.
Anman kan,
John