Ngamp Oony Wayan Thaamp-Thaampāmp Nunang Anmana
51Than wee'-wee'anangana Jesus.an ngaantam-ngeeyiythan nunanga nil pam anmana nil God.angan keenkanaman kaa'ngak nunang kuchowan ngampar-a, nil God.angana puk nungantam waa'ow thananga. A' than wee'-wee'anangan kaangk wuntan piip God.antan-a, yimanang than pam wanch nungantam al-alantan thamana kaangk wunayn thanta. 2Ngamp nathwey God.antan kaangk paththam wunimp-a, puth wik nungantaman ke'-ngoongkam ngeey-ngeeyimp-a, yaa, an ngamp mee'miy ngamparakam ngampan kan-kanam pam wanch nungantam al-alantan kaangk wun-wunanamp thanta. 3Ngamp puth God.antan kaangk wunimp-a, yaa, ngampaniya wik nungantaman ke'-ngoongkam anman ngeey-ngeeyāmpa! Wik nungantam anangan thayan ke'am wunan ngampar ya'a, wik min paththam anman wunan ngampar. 4Puth ngamp wee'-wee'anangan puk God.antaman iiy-iiyanamp-a, ngamp oony way pi'anan thaamp-thaampanamp nunanga, wik ke' ngeey-ngeeyanamp nunang, ya'a. Ngamp puth Jesus Christ.an ngangkangan pi'-pi'anamp nunanga, nilaniy-a, ma'-aath-aathan ngampanga yipam oony way pi'anan thaamp-thaampāmp nunanga, wik ke' yipam ngeeyāmp nungantamana. 5Nil puth wee'angam nath um thaampowan oony way pi'anan e? Ya'a! Ngamp-ngampaman ke' thaampimpana! Puth ngamp wee'-wee'anangan Jesus.an ngaantam-ngeeyāmp nunang nilan nhengk God.antaman-a, an ngamp ep um thaamp-thaampāmp nunang, oony way pi'ananiya.
Nil Jesus.an Kan-Kanam Nhengk God.antaman Uk Ngampar
6Nil Jesus Christ.ana aak iikanakan uk, a' nil John.angana kuchek ngakangan kuungk nunanga, puth inan thonakam ya'a, anpalan-a, than mulathin nunanga a' nil chaapar nungantaman theetath way ngamparamakana. Nil Ngeen-Wiy Min God.antamangana waa'-waa'an ngampar wik anangan Jesus.antamana kan-kanamana. Nil Ngeen-Wiy anana wik ke'am uuy-uuyamana, ya'a, nil kan-kanam anman thaw-thawana. 7-8Ko'alam il-ilangan-a, Ngeen-Wiy God.antamangan-a, puth ngakangan kootra kuungkan-a, puth chaaparan-a, al-alangan kan-kanam meen-meenathantan ngampara Jesus.an nhengk nungantam God.antamana. 9Ngamp wik ngeey-ngeeyanamp thananga, pam wanchangan waa'-waa'antan ngampara, puth wik nil God.angan waa'-waa'an ngampar-a, an min-minam ngeeyāmp paththama, nil puth pam pi'an paththam, nilaniy-a, kan-kanam waa'an ngampar nhengk nungantam alantamana. 10Than wee'-wee'anangan nhengk God.antaman ngaantam-ngeeyayn nunang-a, an than Christ.ana ngangkangan kan-kanam pi'-pi'antan nunang nilan nhengk God.antaman. Than wee'-wee'anangan God.an ke'aman ngaantam-ngeey-ngeeyantan nunang-a, an than yaan thaw-thawantan thanttakamana ke' Jesus.an nhengk God.antaman ke' ya'ana, nil God.ana ke' wik yimanangan uuy-uuyaman, puth ya'a, than pam anangaman yaan wik uuy-uuyamantan than-thanttakama puth thanan kan-kanam ke'am ngaantam-ngeey-ngeeyantan wik nil God.angan waa' kan-kanam nhengk nungantam alantamana.
11Nil God.angana wik inangan waa'a: nil ngangk ngulakam ngul thee'ow ngampar, nil Jesus.angan ma' nungantangan pi'-pi'ow ngampang, ngampaniy-a, nungantangan ngulakam wunāmpa, aak umpuyangama, puth nil kanam kaa'-piichanath ngampanga. 12Ngamp wee'-wee'anangan nhengk God.antaman ngangkangaman pi'-pi'anamp nunang-a, an ngamp aak umpuyangam ngul wunāmp God.antangana, puth ngamp wee'-wee'anangan ke'aman nhengk God.antaman ngangkangan pi'-pi'anamp-a, an ngamp aak umpuyangam ke' wunāmp God.antangan, ya'a.
Ngamp Ma' God.antang Ngulakam Wunāmpa
13Ngay lat inan umpang niiyanta niiy yipam mee'miy iiyān niiy ma' God.antangan ngul wunān ngulakamana, niiyan puth nhengk God.antaman ngangkangana pi'-pi'aniy nunanga. 14Ngamp nathwey puk God.antam-a, ngamp mee'miy nil kan ngeey-ngeeyan ngampanga, ngamp ke'-paal ngangk thay-thayanam thawanamp nunganta. Nil kan-kanam ngeeyan ngampang ngamp ngeenak nathwey thawanamp nunganta, ngampaniya puth wik minakan thawāmpant, ke' nil anana wik minan waa'-waa'an ngampara. 15Ngamp kan-ngul mee'miya, ngamp ngeenak nathan thawāmp nungantwey-a, nilan-a, ngul ngeeyow ngampanga. Ngamp inan thampan mee'miy ngula, ngamp ngeenak nathan thawāmp nungant-a, nilan-a, ngul thee'ow ngampara.
16Niiy nath Christian thonan thathin nunanga wayan yump-yumpan-a, niiyana mee'-wuthanamān nunganta. Anpalan-a, nil God.angan ngul kaa'-piichanathowa a' thayanathowana. Puth pam wanch wiy al-alangan puy-puyam paththam way yump-yumpantana, ke'-ngoongkam anmana. Than ke'-paal way-wayam iiy-iiyantana, than thanttakama woyan mulakan wak-wakantan, aak way aakanakana. Ngay ke' thawing niiyanta mee'-wuthanamān thantana. 17Way yotam anangan yump-yumpanamp-a, an way mee' God.antangana! Puth ngamp way anangan wantāmp-a, a' God.ant wampāmp-a, nil ke' ngaantam-ngeeyow way ngamparam anpalana.
18Ngamp puth mee'miy ngula ngamp wee'-wee'anangan puk God.antaman iiy-iiyanamp-a, an ngamp wayan ke' yump-yumpāmp, ya'a; puth nil nhengk God.antam alangana ep ma'-kee'-wunpan ngampara, nil oony way pi'an alangan ke' yipam wayathow ngampang. 19Ngamp puth mee'miy ngul ngampaniy-a, puk God.antamana, puth wiy anangan ya'a, nil oony way pi'an alangana ma' nungantangan pi'-pi'an thanang, yot anangana. 20Ngamp mee'miy ngul nil nhengk God.antamana inpal kenyan uk ngampara, ngamp yipam God.an min-minam ngaantam-ngeey-ngeeyāmp nunanga, puth kan-kanam thiichāmp nunanga, nil thonam anman God kan-kanam paththam, wiy ya'a. Yaa, ngamp iniy ngul-a, ma' pulantang iiy-iiyanamp, God.antang-a, putha Jesus Christ.antang, nhengk nungantamantanga. Nil inana kan-kanam God paththama. Nilam thonamangan ngangk ngulakaman pi'-pi'ow ngampanga.
21Puk ngatharam-ang, niiyiya yuk ngeen-wiy ke' thaa'-kuumpān thanang, ya'a, yuk wayanang al-alantaman niiy kecham iiyāna, ke'-ngoongkam anmana! Niiy God thonakam anman ngaantam-ngeey-ngeeyāna! wiy anangan ya'a!
Anman kan.
John