Ngamp Pam Wiy Anangana Erkam Ke' Ngeeyāmp Thananga
41Ngurp ngatharam niiyalang, niiy wik erkaman-a, ke' ngeeyān thanang pam wiy anangana, niiy kan thathān thananga, a' ngaantam-ngeeyān thanang nath yaaka' kan-kanam wik waa'-waa'antan Ngeen-Wiy Min God.antamana, nath ya' yaaka', nath wik oony way pi'an alantaman waa'-waa'antana; puth pam yot anangan nath-nathan kan iiy-iiyantan a' waa'-waa'antan thanttakama ke' wik God.antaman waa'-waa'antan, puth an ya'a, yaan wik uuy-uuyamantana, than wik oony way alantaman waa'-waa'antana. 2Ngamp want-wanttak mee'miy wik God.antam kan-kanaman waa'-waa'antan a? Ngamp inpalan ep mee'miy wunāmpa: than wee'-wee'anangana Jesus Christ.an waa'ayn nunanga nilan kan-kanam ke' pam ngurp ngamp yimanangan wamp aak iikanakan-a, an than kan-kanama wik God.antaman waa'-waa'antan ngampara. 3Than wee'-wee'anangana nath Jesus.an waa'ayn nunang nilan ke' pam ngurp ngamp yimanangan ke'aman wamp aak iikanakan-a, an than Ngeen-Wiy Min God.antaman ngangkangan ke'am pi'-pi'antan, ya'a, an than oony wayan ep ngangkangan pi'-pi'antana. Nil oony way alangan Jesus.an um thaamp-thaampan nunanga. Niiy puth kan ngeey-ngeeyana, than puy-palan wampantan, um thaampayn nunang Jesus.ana, -- yaa, than wiy al-alangan kan-ngul um thaamp-thaampantan nunanga.
4Ngurp ngatharam niiyalang, niiyaniy puth-a, puk God.antam iiy-iiyaniya, niiy puth wik ke'am ngeey-ngeeyaniy thanang ya'a pam wanch wiy anangan than Jesus Christ.an um thaampantan nunanga; puth nil Ngeen-Wiy Min God.antamana ngangk niiyantamangan wun-wunana, an nil pi'an a' thayan paththam iiy-iiyana; nil oony way pi'anana, nilan ngangk pam wanch nungantamangan wun-wunan-a, an nil ep micha. 5Than pam ananganiya Jesus.an um thaamp-thaampantan nunangana, than aak inman ngaantam-ngeey-ngeeyantana aak in kenyan ya'a. Than wik God.antaman ke' waa'antan, ya'a, than aak inam pekan waa'-waa'antana; than pam wanch ma' oony way alantangan iiy-iiyantan-a, than ngeey-ngeeyantan thananga, puth aak thant inam pek, aak in kenyan, ya'a. 6Puth ngamp inanganiy-a, an ep puk God.antam iiy-iiyanampa. Ngamp want-wanttak mee'miy pam wanch nath puk nungantam God.antam iiy-iiyantan, nath ya'an yaaka'a, puk nungantam oony way alantaman nath iiy-iiyantana? Ngamp inpalan ep mee'miy wunāmpa: than wee'-wee'anang piip God.ana kan-kanaman ngaantam-ngeeyantan nunang-a, an than ep wik ngeeyantan ngampangan. A' wee'-wee'anang piip God.an ke'aman ngaantam-ngeeyantan nunang-a, an than wik ke' ngeeyantan ngampang thamangan, ya'a.
Nil God.an Kan-Kanam Kaangk Wun Ngampara
7Ngurp ngatharam niiyalang, ngamp ngangk minangam iiy-iiyāmp ngamparakama; nil puth God.an nathpalman kaangk wun ngampara. Than wee'-wee'anangana pam wanch wiyantan ngangk minangaman iiy-iiyayn-a, an than puk God.antam iiy-iiyantan, a' thanan-a, mee'miy nunang ngula. 8Than wee'-wee'anangana ngangk minangaman ke'aman iiy-iiyantan wiyantan-a, yaa, an than God.an ke'am thiichantan nunang, ya'a. A' nil God.an-a, kan-kanam kaangk paththam wunan pam wanchantana. 9Nil ke'-paal nhengk nungantaman kaa'-thonaman kuch nunang aak iikanakana, ngamp yipam aak umpuyangaman wunāmp nungantanga. Nilan puth yimanangan meenath ngampara nilan kaangk wunan ngampar paththam. 10Nil God.an kan-kanam kaangk wunan ngampara, ngamp kaangk wunanamp nungant many-manya, nil ngampangan-a, ep kaangkiyathan ngampanga, nil nhengk nungantaman ke'-paal kuch ngampar, uthamow way ngamparamakana, nil yipam piip God.angana ke'-ngul ngaantam-ngeeyow way ngamparamana, ya'a.
11Ngurp ngatharam niiyalang, nil inan God.an kaangk anman wunan ngampara, ngamp puth-a, yimanangan kaangk wunāmp ngamparakamana! 12Ngamp pam wanchang ke' anman thathanamp nunang God.ana ngurpa, puth ngampwey ngangk minangam iiy-iiyimpwey pam wanchantan-a, yaa, nil ngangk ngamparangan wun-wunowa, ma'-aath-aathow ngampang, yipam kan-kanam paththam kaangk wunanamp thant wiyantana.
13Niliy God.angan-a, Ngeen-Wiy Min nungantaman kan kuch ngampar, ngangk ngamparangan wun-wunowa, ngamp ke'-paal mee'miy ngul ngamp God.antangan wunanampa, a' puth God.aniy-a, ngangk ngamparangan wun-wunana. 14Ngan puth nhengk God.antaman mee' nganttamangan thathan nunang, a' ngan wiyantana waa'an nil God.angan nhengk nungantaman kuch ngampar uthamow way ngamparam yotamantakamana. 15Nil wee'angan Jesus kan-kanaman waa'iy nunang puk nhengk God.antaman-a, nil God.an ngangk nungantamangan wun-wunana. Nil pam alantangan nil God.an anman iiy-iiyan nungantang.
16Ngamp kan-ngul mee'miy, a' ngaantam-ngeeyanamp nil God.an kan-kanam kaangk wunan ngampara. Nil paththam kan-kanam kaangkiyathan ngampang God.anganiya. Than wee'-wee'anangan ngangk minangaman iiy-iiyantan pam wanch wiyantan-a, an nil God.an iiy-iiyan nungantang anman, a' ngangk nungantangan wun-wunana. 17Nil puth God.an ngangk ngamparangan wun-wunan a' nil ma'-aath-aathan ngampang kan-kanam kaangkan wunanamp pam wanch wiyantana. Ngul-ngulan-a, aak anan wampow nil Jesus.angana umangan than-thanathow ngampanga. Ngamp nath kan-kanam kaangk wun-wunanamp pam wanch wiyantan-a, ngamp aak an-aniyangan winynyang ke' mo'āmpa, ngamp ngangk thayanam iiyāmpa, ngeenama, ngamp puth aak inganiya God.antangan iiy-iiyanampa ke' Christ yimanangan iiy-iiyan nungantangana.
18Nil God.an kan-kanam paththam kaangk wunan ngampara, ngampan ke'-paal ke'-ngul winynyang mo'āmp nungantam, ya'-ngula. Ngamp nath kaangk wunanamp nungant God.antan-a, ngampaniya ke'-ngul winynyang mo'impantama, a' ke'-ngul ngaantam-ngeeyimp ke' nil ngampang kuchowa aak wayakana. Puth ngamp kan-kanam paththam kaangk wunimp nungant-a, nil ke' kuchiy ngampang, ya'a. 19Nil ka'athamaniy-a, kaangk wun ngampara, ngamp puth-puthangkan-a, kaangk wunāmp nunganta. 20Wee'-nathwey thawiya, “Ngay kaangk wunang God.anta,” puth nilana ngangk-wayangam kal-kaliy thanang Christians wiy anangan-a, an nil yaan thaa'am thonakam thaw-thawana, wik uuy-uuyamana. Nil Christians wiy anangan thath-thathan thananga, puth nil ngangk kulangam kal-kalan thanang. Puth nungkway nil God.an ngurp ke'am anman thathanam nunang-a, nilan yaan thonakam thawan ke' nil kaangk wunan nunganta. An ya'a! Ngamp pam wanchantan nath kaangk ke'an wunanamp thant-a, an ngamp God.antan kaangk ke'am wunanamp nungant puth-puthangk ya' anman. 21In puth kan-kanam wik thayan nil Jesus.an thaw ngampara: than wee'-wee'anangana kaangk wunayn God.antan-a, an than Christians wiy al-alantan kaangk wunayn thant thampanga.