Nil Jesus.angan Kan-Kanam Ma'-Aath-Aathan Ngampanga
21Ngurp ngatharam-ang, niiy ke' puk ngatharama! Ngay wik inangan umpang niiyanta, niiy yipam wayan ke'-ngul yumpāna. Puth ngamp wee'-wee'anangana way nathan yumpimp-a, nil pam thonam nanman Jesus Christ.an thaa'-pant ngul thawow ngampar God.antana. Nil Jesus Christ alangan-a, min anman yump-yumpana, mee' God.antangan. 2Puth nil God.an-a, ngangk way iiy-iiyan ngamparama, wayan yump-yumpanampa, nil kaangk kuchow ngampangana, nil puth Jesus.aniy-a, uthama ngul way ngamparam aakanakan nil God.angana yipam way ngamparaman ke'-ngul ngaantam-ngeeyowa, way ngamparaman thonakam ya'a, puth pam wanch yotantamana.
3Ngamp puth want-wanttakan thiichāmp ngamp kan-kanam God.an mee'miy nunang a? Inana, ngamp wik nungantaman ngeey-ngeeyimp-a, yaa, an ep ngamp mee'miy nunang, God.ana. 4Thonamwey thawiya, “Ngay in ep God.ana mee'miy nunanga,” nil ya'a, nil puth wik nungantamana ke'am ngeeyana -- an nil yaan wik uuyaman thonakama, kan-kanama ke'aman thaw-thawan, ya'a. 5Puth ngamp wee'-wee'anangan wik nungantaman ngeey-ngeeyanamp-a, yaa, ngamp anman ngangk minangaman iiy-iiyanamp nungant God.antaniya, kan-kanam paththam kaangk wunanamp nungant. Ngamp puth nanpalan mee'miy wunamp ngampa God.antang kanam nenchanamp. 6Ngamp wee'-wee'anangan waa'wimpa, “Ngay ep nenchanang God.antanga,” yaa.wey, ngamp puth ke' Jesus Christ yimanangan iiyāmpa.
Ngay Wik Thayan Thawāng Niiyanta
7Niiyalang, ngurp ngatharam-ang, ngay inan wik thayan umpang niiyanta, niiy ngeeyāna! Ngampaniy-a, ngurp ngamp iiyāmpa, ngangk min iiyāmp ngamparakama! Wik inan putha wik nyiingkanam ya'a, in wik keenkanama niiy nathpalman ngeey-ngeeyana. 8Puth nungkway wik inan keenkanaman-a, ngamp nyiingk inan min-minam ngul ngaantam-ngeeyanamp, in ke' wik nyiingkanam ngul ngaantam-ngeeyanampa. Nil puth Jesus.aniy-a, ke' nganth pi'an park-parkana. Nil kan-kanam kaangk wunan ngampar, a' meenathan ngampar want-wanttakan kaangk wunāmp ngamparakama. An ke' ngaa'an kan ya'-ya'aman, puth nganthan pach-pachamana.
9Nil wee'wey thawiya, “Ngay nganthang iiy-iiyanga,” nil ya'a, puth ngangk kulangam kal-kalan Christians wiy anangan-a, an yaan muukamana, an ke' nil aak ngaa'ang yimanangan yippak iiy-iiyana. 10Nil wee'wey kaangk wunan Christians wiyantan-a, an nil ke' nganthang iiy-iiyan yimanangan, ke' woyan mee' minang thathan, ke' keekiya. 11Puth nil wee'angwey Christians wiy anangan ngangk-wayangam kal-kaliy thanang-a, an nil ke' aak ngaa' nyimang yimanangan woyan pal-puy iiy-iiyan, nil woyan ke' thathiy wanttinakan iiyowa, puth aak ngaa' nyimangana, nanpalan ke' thathiy, an puth nil woyan minana ke'-ngul thathiy, ya'a.
12Ngurp ngatharam-ang, ngay lat inan ump-umpang niiyanta, puth nil God.angan ke'-ngul ngaantam-ngeeyow niiy wayan yump-yumpana, nil puth Jesus.angan theetath nungamang way ngamparamakana. 13-14Ngay puth wik inangan thaw-thawang niiyanta, pam wuut manth-thayananta, puth niiy ep thiichaniy nunang, Christ.ana, nilan man-yetham nathpalman wun-wunan, aak inan ke'an yippak wuna. Puth niiy pam komp inangana, ngay niiyant thaw-thawanga, niiy kaangk ke'-ngul wik ngeeyān nunang oony way pi'anan, nil moom niiyantam ke'-ngul iiyowa, ya'-ngula, niiy ma'aman pentān nungantam, oony way pi'an alantamana. Niiy puth thayanam iiy-iiyaniy ngul, wik God.antaman ngangkangan pi'-pi'aniya. A' ngay niiyant thamp thawanga, puk manyiyant, niiy puth thiichaniy nunang God.an, piip ngamparamana.
15Ngay wik inangan thaw-thawang niiyant, ma'mangkamanta: aak inana, ke' ngaantam-ngeey-ngeeyāna! Woyan wayana wiy al-alangan ep anman wak-wakantana; puth ngampaniya woyan way inana ke' ngaantam-ngeeyāmpa, ya' anman, God thonakam ngaantam-ngeey-ngeeyāmpan! Niiy natha aak inan thonakam kaangk wunin-a, niiyan God.antamana kaangk ke'-ngula! 16Yotam aak ingan umyompanamangan-a, way anman iiy-iiyantana; than kaangk wuntan maarich kee'anakana, putha way min al-alangan ngangk mungkantan thananga, an puth than ulp-ulpanang iiy-iiyantana, ke' pam pi'an ngaantam-ngeey-ngeeyantan thanttakama. Puth way yotam inangan thanan yump-yumpantan-a, inpal keny ya'a, piip ngamparamantam ya'a, an aak imanamana epa. 17Puth aak inana, yaam ke' wunowa, aak kan-kanang wampan aak inan minchowa; way anangan pam wanch al-alangan yumpantan-a, an yimanangan minchayna. Puth ngamp wee'-wee'anangan wik God.antaman ngeey-ngeeyāmp-a, an ngamp God.antangan anman wun-wunāmp ngulakama.
Pam Way Paththam Puy-Palan Wampana
18Niiyalang, aak kan-kanang wampan aak inan minchowana. Niiy putha kan ngeeyanweya, pam puy-palan wampana, pam iniy-a, ngangk kul tham iiy-iiyan Jesus.ant, thaamp-thaampan nunanga. Wiy anangan thama kan wampin, pam yota, yimanangan ngangk kul tham iiy-iiyantan Jesus.antana, thaampantan nunanga. Ngamp puth nanpalan mee'miy ngula aakan kan-ngul thinth wampan aak inan minchowana. 19Pam inangana, ka'athaman ep yaan iiy-iiyin ngamparanga, yaan thaw-thawin ke' ngurp God.antaman, nil ya'a; than puth ngurp God.antam iiy-iiyiythanwey-a, an kan-kanam yaam iiy-iiyiythan ngamparangana -- an puth ya'a, too wantin ngampang. Ngamp nanpalan mee'miy ngul thanang ka'athaman yaan iiy-iiyin ngamparanga, an puth kan-kanam ya'a.
20Puth niiy an ep yimanangan ya'a, nil puth God.angana, Ngeen-Wiy nungantaman kuch niiyanta, ngangk niiyantamangan wunow, nil wik kan-kanam anangan thaa'-aath-aathan niiyanga, ke'am wik uuyaman, ya'a, an niiyan puth-a, kan-kanam mee'miy ngul wik God.antamana. 21Ngay puth lat inangan umpang niiyanta, niiy puth wik God.antamana mee'miy ngul, niiy puth ngoongk-ngoongkam ya'a. Nil pam wik uuyamanan-a, an wik God.antam ke'am waa'an ya'a. Niiy mee'miy God.an kan-kanam thaw-thawan, nil ke' wik uuy-uuyaman, ya' anman.
22Than wee'-wee'anangwey Jesus.an waa'iythan nunangweya nil God.angan ke'am kuch nunang ya'a, than yaan wik uuy-uuyamantana, pam than anangana Jesus.an thaampantan nunanga, ngangk kulan ngangkangan pi'-pi'antan nungantana, an than man-mangkam thee'antan pulanta, piip God.anta, putha nhengk nungantamakan Jesus Christ.antana. 23Than wee'-wee'anangan thawiythanweya nil God.angana Jesus.an ke'aman kuch nunang-a, nil God.an ngangk thanttamangana ke' wunana, ya'a; puth than wee'-wee'anangan thawiythanweya nil God.angana Jesus.an kuch nunang-a, an nil piip God.an ep ngangk thanttamangan wun-wunana, an puth pul Jesus.anganiy-a, ke' thonam yimanangan iiy-iiyanpul, karpama.
24Yaa, wik God.antaman niiy nathpalman ngeey-ngeeyana, niiy murkanim anman ngangkangan pi'-pi'āna! Niiy wik God.antam anangana ngangkangaman pi'-pi'inwey-a, pul piip God.angan anman wuniypul ngangk niiyantamangana, pul nhengk nungantamangana. 25Nil puth Christ.angan nathpalman kaa'ngak ngampang ngampan ngulakaman wunāmp God.antangana.
26Ngay pam anangan nyiingkan waa'-waa'ang niiyanta, than kaangk mee'-wichayn niiyanga woyan wayakana. 27Puth niiyantan-a, nil God.angan Ngeen-Wiy nungantamana kan kucha, ngangk niiyantamang nanman pi'-pi'aniy nunanga. Yaa, an puth wiyangana ke'-ngul thaa'-aathiythan niiyangan puth nil Ngeen-Wiy Min God.antam alangan kana, yot thaa'-aath-aathan niiyang, meenathan niiyanta. Nil wik kan-kanama waa'-waa'an niiyanta, nil ke'am wik uuy-uuyaman niiyanta. Niiy putha wik nungantaman ngeeyāna, a' nangman ngangkangan pi'-pi'ān nunang, Jesus.ana.
28Ngurp ngatharam-ang, puth inan ngeeyiya, niiyan kan Jesus.an ngangkangan pi'-pi'āna! Nil palaman wampow-a, niiyana ngangk thayanam yipam iiyān nunganta, a' winynyang ke' mo'in nungantama, ngul-nyaa' ke' iiyin nungantama, ya'a. 29Ngamp puth kan thiichampa God.an nil min-minam paththama, min anman iiy-iiyana, yaa, ngamp mee'miy ngula pam wanch wee'-wee'anangan min-minam iiy-iiyantanan-a, an puth thanana puk nungantam iiy-iiyantana.