Nil Lord.an Kan-Kanam Palaman Wampow
31Ngurp ngatharam niiyalang, ngay ka'athaman lat umpangan niiyant a' putha ngay inan putham ngul lat umpang niiyant puth ngay kaangk niiyana minangam ngaantam-ngeeyān wik anangana, way-wayana ke' ngaantam-ngeeyāna. 2Ngay kaangk niiyana kuchekangam pi'-pi'ān wik anangan than prophetsan thaw-thawin keenkanaman a' putha wik thayan anangan Jesus.antama moom ngamparamantamana, nil alangaman ngampangan kaa'-piichanath. Nil God.ang pam yot kuyam kuch thanang than yipam wik nungantaman waa'-waa'ayn niiyantana.
3Niiy wik inan min-min ngeeyāna: aak thinthaman wampow nil Christ palam ngulan wampow-a, pam wanch way anangan ngul wampayn, a' thaa'-thengkathayn ngampang a' thanan anman way yumpayn, maarich kee'-kee'ayn thakan, puth than kaangk way anman yumpayn. 4Putha than ngulan thawayn ngampar, “Nil Christ.an palam ke' wampan ey! Nil puth kaa'ngak nil palaman wampowa, ngul nil wanttin e? Kaath piip ngamparam anangan kanam uthamin, nil puth Christ.aniya palaman ke'am yippak wampa. An nil palaman ke' wampowa ya'a! A' putha God.an thawa aak earth inman ngampan wunanamp-a, nil epankathowa -- an puth ya'a, aak keenk nathpalman nil piip God.angan aak inan ka'athaman yump-a, a' in-inmana, aak inaniya anman wun-wunan”, thanan yimanang ngulan man-aathayn ngampang. 5Puth thananiya ke' ngaantam-ngeeyin wik inangan: aak keenkana nil piip God.an wik thonakaman thaw-a, a' aakan paththam wun aak in keny heavenana putha aak inman earthana. Nil aak earth inan ngakam anpalan pent a' ngak aak earthaman-a, God.angan yaarkath pulang. 6Ngul-ngulana nilan ngak pi'an ngul kuch aak iikanakaman, a' pam wanch puk thakan wayath thanang. 7Aakan ngul wampana nil ngulan than-thanathow ngampang yotam um nungantangana, a' nil thanang pam wanch puk anangan than kaangk ke'an nungantamana kuchow thanang aak way aakanakan. A' amanamaniya nilan thumang aak inan earthan wayathow ngul, puth aak in keny thaman wayathow, kincha, yuw-a, a' wiy anangan thakan wayathow. Nil God.an yimanangan thawa. Puth nil kuup-kuupan yippaka nil thanang pam wanchan wayathow aak-aakanakan.
8Niiyalang, ngurp ngatharam-ang, niiy inan min-min ngeeyāna: nil piip God.angan-a, wiy-wiyam ngaantam-ngeeyan, ke' ngamp yimanangan ngaantam-ngeeyanamp, ya'a. Ngampiy nathweya ngaantam-ngeeyimp kaap one thousandana ke' aak yaamakamweya, puth nil God.angan nath ngaantam-ngeeyan an ke' aak otang nungant, ke' kinch thonamang yimanangan, niliya nil-nil ngaantam-ngeeyan. A' puth ngampiy nathwey ngaantam-ngeeyimp kinch thonamang ke' aak otangama, puth nil God.angan nath ngaantam-ngeeyan an ke' aak yaamakam, ke' kaap one thousand yimanangan. 9Niiy nath yimanangan ngaantam-ngeeyaniya, “Nil Lord.an yaam kuup-kuupana, nil nath ke' yumpiya wik anan nilaman thawa.” Puth ya'a, niiy in ngeeyāna, nil Lord.an-a, itangam ke'am iiy-iiyan ya'a, nil niiyanta paththam kuup-kuupan, nil puth kaangk niiy yotaman way anangan too wantān ngul a' nungantang ngul iiy-iiyānwey. Puth nilan kaangk ke' aak nungantam anpalan kuchow niiyangan.
10Nil Lord.an kan-kanam palaman wampow. Nil palaman wampow-a, an niiyangan ma'-pil-wayathowa ke' pam ma'-kuchana yimanangan wampow aak ngaa'angana. Aak an-aniyangan-a, an ngampaniy muut ngeeyāmp ke' wunt pi'an wampow a' yaam ke'anamana, kincha, thunpa putha wiy anangan ke'-ngul wunayn aak ing kenyana, ma'mangkam anangana pench-penchayn thum wuut pi'anang, aak ingman earthangan-a, ngak thakana penchayn thampa, aak ya'-ya'am wunowa. 11Ee'a, an kan-kanam paththam ma'mangkam anangan thum pi'anang ngul penchayn. Yaa, ngamp puth want-wanttak iiyāmpa? Ngampaniya woyan min koochanam iiy-iiyāmp Christ.antangana, wik nungantaman ngangkangam pi'-pi'āmp a' nunang anman monkan-wak-wakāmpa. 12Ngamp yippak kuup-kuupanampan nungant Jesus.ant palaman wampow-a, ngamp ngangk minang iiyāmp a' wik nungantaman waa'āmp. Nil palaman ngul wampowa, a' aak an-aniyangan-a, kinch-a, thunp-a, puth yuw in kenyan an thum wuut pi'anang ngul penchayn a' minchayn ngul, yuk way min ma'mangkam aak earthang inmana wukow a' michamayn ngul, aak karkan anpalmana. 13Nil puth God.an thaw nil earth nyiingkanaman ngul yumpowa, putha yuw-a, kinch-a, a' wiy anangan thampa nyiingkanam yumpow thanang. Puth ngampaniy Christians.ana aak-aakanakan kuupāmp. Aak an-aniyangan-a, pam wanchana minam ngul wun-wunayn, wayana ya'-ngul.
14Ngurp ngatharam niiyalang, ngampiya kuup-kuupāmp aak-aakanakamana, yaa, puth anpalan-a, ngampan ngangk thayanam ngul iiy-iiyāmp Christ.antangan, nil yipam thathow ngampang min anman iiy-iiyanamp, wayan ya', ngamp ngangk minangam nungantang iiyāmp. 15-16Ngamp inangan min-min ngeeyāmpweya: nil moom ngamparam Jesus.ana palam wampow, puth nil yippak kuup-kuupan nil yipam wiy thamp pam wanch kaa'-piichanathow thanangweya. Kuunch ngamparam Paul alangan wik inaniy ma'-yotam ump ngampar thampa. Niliya pam God.antama a' piip God.angan kuchek waap min-minam thee'ant nil yipam wik minan umpow ngampar. Wik wiy anangan nilan ump-ump lat nungantamangana an wik engkanang ke'am wuntan ya'a, an wik wuthanang. Pam puungk wiy al-alangana wik nungantam anangana way-way waa'-waa'antan an puth anpalanwey than woyan min anpalan waank ngul thechantan. Wik wiy anangan thamp piip God.antamana lat ngench thayanangan-a, an yimanangan way-way waa'-waa'antan. A' wik God.antaman minam ke'am ngaantam-ngeeyantan. Anpalan puth-a, nil God.angan kuchow thanang aak wayakana.
17Puth ngurp ngatharam niiyalang, niiy puth kan mee'miy teachers wayanang anangan wampayn niiyanta. Yaa, niiy puth min-minakam pi'ān niiyantakam, wik thanttam ke' ngeeyān, than yipam way-wayan ke' thaa'-aathayn niiyanganwey a' puth mee'-wichayn niiyang woyan min Christ.antam anpalanwey woyan way aakanakana. Niiy anman ngangk thayanam monkan-wak-wakan nunang Christ.ana. 18Niiy woyan chip-chipamana ke' thanān niiy ke'-ngoongkam anman iiy-iiyān woyan minang Christ.antamangan, niiy yipam puy-puyam thiichān nunang min-minweya, an niiyan thathān ngula nil kan-kanama puy-puyam min iiy-iiyan ngampara. Nil Jesus Christ.an moom ngamparama a' putha nilaman kaa'-piichanath ngampang way ngamparam anpalana. Ngampiya thaa'-kuumpāmp nunanga, a' putha aak umpuyam thaa'-kuump-kuumpāmp nunang.
Yey, kan-kanama! Anmanweya,
Peter.