Niiy Woyan Wayan Wantāna, A' Min Iiy-Iiyān Mee' God.antang
41Than way iiy-iiyin Christ.antan, a' mulathin nunang. Yaa.wey, niiy anman ngaantam-ngeey-ngeeyān nunang Christ.an than want-wanttakan iiy-iiyin nungant, anpalana, niiy ngangk thay-thayanathwun niiyantakam. Than nath kaangk ke'an niiyantamanwey-a, way yump-yumpayn niiyant Christians al-alantanwey-a, an kana, niiy ngangk thayanam iiy-iiyān niiy yipam way ke' iiy-iiyān. 2Niiy yippak aak ingan wun-wunaniy-a, woyan wayan wantāna, a' min anman iiy-iiyān mee' God.antangana. 3Ka'athamaniya niiy way iiy-iiyan ke' pam wanch anangan than ke'an mee'miy God.an ya'a, way al-alangan ngangk mungk-mungk niiyang, niiy maarich kee'-kee'an a' ngak way mungkan wun-wunan a' way anman iiy-iiyan, niiy pek-pekwun, a' wik way thak thaw-thawan, a' puth yuk ngeen-wiy anangan thaa'-kuump-kuumpan thanang a' monkan-wak-wakan thanang, puth than God ya'a. Puth niiya woyan wayana ke'-ngul wak-wakaniy, an ya'-ngul! 4Than pam wanch way anangan puth mee' ikin ngul puth niiy ke'-ngul ngotan ngoonch-ngoonchaniy thanttang, a' than thaa'-thengk-thengkathantan niiyang. 5Ngul-ngulaniya, than ngul umang than-thanayn God.antangana a' nilaniya mep-mepow thanang a' waa'-waa'ow thant way thanan yump-yumpin. Aakan thinth kan wamp-wampana nil wampathow ngampang court nungantamakan, pam wanch in-inman wun-wunanamp a' putha than aak keenkanaman uth-uthamin. 6Nil puth Christ.angan wik minan kan waa'-waa' thant than ka'athaman uth-uthaminana. Nungkway than mul wun-wunin way thanttam anpalan-a, ke' pam wanch yotan uth-uthamantanan-a, nil Christ.angan wik min waa'-waa' thant, nhinthan-maany thanttaman yipam ngulakam wun-wunayn ke' God.an yimanangan man-yetham wun-wunow aak umpuyama.
7Aak inan kan thinth ngul wamp-wampan aak inan kan-ngulan minchow. Niiyan puth kuchek minangam ngul iiy-iiyāna, ke' weenthamāna, niiy yipam minam mee'-wuth-wuthanamān piip God.antan. 8A' puth inan thamp min niiyanta: niiy kaangk anman wun-wunān wiyantana, wiy anangan ma'-aath-aathān thanang, niiy ke' eench-eenchāna, niiy minam pi'-pi'ān thanangwey. Puth ngamp nath kan-kanaman kaangk wun-wunimp thant wiyantwey-a, ngampan puth ke'-ngul ngaantam-ngeey-ngeeyanamp than wayan yump-yumpantan ngamparana, an kan-ngul kon-ngathow ngampanga. 9A' niiy ngangk minangam pi'-pi'ān thanang wiy anangan aak niiyantamangana, may a' yuk way min thakan thee'-thee'ān thant. Niiy ke' eenchān thanttama, min-min pi'-pi'ān thanangweya.
10Nil puth Ngeen-Wiy Min God.antam alangan ma'-aath-aathan ngampangan ngamp yipam wiy anangan ma'-aath-aathāmp thanang. Nil work thee'an ngampar thon-thonantan -- work wiyana nil pam wanch wiyant thee'an puth work wiy anangan thant thee'an pam wanch wiy al-alantan. Niiy workan iiy-iiyaniy-a, niiy niiyantakaman ke' ngaantam-ngeey-ngeeyāna, niiy wiy anangan ma'-aath-aathān thanang, a' niiy work niiyantaman minam paththam iiy-iiyān puth work inangana nil God.ang thee'-thee'an niiyant. 11Niiy Christians wiy al-alangan wik God.antaman waa'-waa'aniya, an work niiyantam, yaa, niiy kuchek niiyantam anpalana ke' wik thaw-thawāna puth wik God.antam anman waa'-waa'āna. Niiy wiyangan minam pi'-pi'aniy thanang pam wanch wiy anangan, an work niiyantam. Yaa, niiy God.ant thawān ma'-aath-aathow niiyang, nil thayan paththama, ngamp ya'a. Niiy nath work minaman iiy-iiyin God.antan-a, than pam wanchangan piip God.an thaa'-kuump-kuumpayn nunang puth inpalana niiy Christ.an monkan-wak-wakaniy nunang. Ngampan yimanangan God.an thaa'-kuump-kuumpāmpana, puth nilam anman thonam moom pi'an paththama. Yey, kan-kanama.
Aak Wayan Wampow Niiyant-a, Niiy Ngangk Minangam Anman Iiy-Iiyāna
12Niiyalang, ngurp ngatharam-ang, aak wayan wampow niiyant-a, niiy inan ngaantam-ngeey-ngeeyān: nil God.angan thath-thathan ngampang ngamp nath nunang anman monkan-wak-wakanamp, nath ya'a. Aak wayan wampow niiyantan-a, niiyan wik yimanangan ke' thawān ngangk ikanamana, “In way ngeen wampan ngathara?” Ya'a, niiy ngangk minangam anman iiy-iiyāna. 13Aak way nathan wampow niiyantan-a, ke' aak way nungantan wamp Christ.antan-a, niiy ngangk min iiy-iiyāna ke' nil Christ.an ngangk minangam iiy-iiy. Puth ngulana, nil palam wampow, a' meenathow nungamang nil moom pi'an paththama. Aak an-aniyangana niiyaniy-a, ngangk min paththam iiy-iiyāna. 14A' inan thampa: than wiyangan nath thaa'-thengk-thengkathayn niiyangan-a, puth inpalan niiyan-a, Jesus Christ.an monkan-wak-wakaniy nunang-a, inan puth meenathan nil Ngeen-Wiy Min God.antaman ngangk niiyantangan wun-wunan. Nil min a' pi'an paththama. Puth niiyana ngangk min anman iiy-iiyāna. 15Niiy way nath yump-yumpinan-a, thanan way yump-yumpayn niiyantana. Puth niiyana wayan ke' yump-yumpāna. Niiy pam wanch ke' mul-mulathāna, ma'-kuchan ke' iiy-iiyāna, a' putha niiy kul-weenthana ke' iiy-iiyān. 16Puth than nath way iiy-iiyiythan niiyantanwey-a, niiy puth Christians iiy-iiyaniy-a, niiyana ke' nyaa'-nyaa'an iiy-iiyān thanttamana, niiy thankyou thaw-thawān God.antan niiy puth pam wanch nungantam iiy-iiyaniya.
17Aakan kan wampan nungant God.antan pam wanch yotaman umang thanathow thanang puth wayan yump-yumpin. A' nil ka'athamana pam wanch nungantam anangan umang thanathow thanang, a' pam wanch wiy anangan-a, koy-koyyuw umangan than-thanathow thanang. Than pam wanch God.antam ya'ana, nilan wayathow thanang way thanttam anpalan thanan yump-yumpin. 18Wik lat ngench thayanangana inan thawa:
“An thayan paththam pam wanch min al-alantan weentayn God.antan a' aak iikanak kenyan iiyayna.
Puth pam wanch way anangan than ke'an kaangk God.ana, than aak wanttinak iiyayna?
Nil puth God.angana kuchow thanang aak way aakanakan,
aak anganiy-a, thanwey thaa'-eench-eenchayna.”
19Than ngamparan natha way yumpiythan puth ngamp Christians iiy-iiyanamp. Wiyiya nil God.an thaa'-pant ke' thawan ngamparamana, nil puth mee'miy an min ngampar ngangk thay-thayanathow ngampang. Yaa, ngampiya ma' nungantang angman wantwumpa, nil puth yump ngampang a' ngangk ngamparam minam ngul pi'-pi'an. Nil ke' muuk-muukamathiy ngampanga, nil kan-kanam paththam minam ngul pi'-pi'ow ngampang ke' nilaman thaw.