Ngay Wik Inan Thawang Ma' Pam Wanchantana
31A' inan ngeeyān thampa: niiy wanch thum anangan moom ke' iiy-iiyān thant pam thum niiyantamakana, ya'a, niiy paththam wik ngeey-ngeeyān thananga. Than wiyang nathwey wik God.antam kaangk ke'wey ngeey-ngeeyaynan-a, thanan ngul thath-thathayn niiyang minaman iiy-iiyāna, puth nanpalana than ngangk thee'iythan ngula nungantana Christ.antan. Niiy ke'a thaa'-ngoontanan thaw-thawān thantana. 2Than thath-thathayn niiyangan-a, thanan ngaantam-ngeey-ngeeyayn ngul niiy God anman ngaantam-ngeey-ngeeyaniy nunang a' min anman iiy-iiyaniy ngula. 3Niiy wanchangwey nath kulich min-minam ngoonchin a' bangles thampa putha man uch min ngoonchina, a' putha yangan thakan min-minam yump-yumpwina ke' menth-mentham yump-yumpwin niiyantakamana. Puth yimanangan ke' ngaantam-ngeey-ngeeyāna ya'a. Puth kulich anangan kathamantan; wiy anangan thampa ngul wayamantan. 4Niiy nath min-minaman yump-yumpwin-a, puth niiyana min anman ngaantam-ngeey-ngeeyāna, ngangk minangaman iiy-iiyān wiyantan, a' thaa' mich-micham thaw-thawān thantana -- inan puth mina mee' God.antangana, nil kaangk ngampangan yimanangan thath-thathowa. 5Keenkanamaniya, than wanch wiy al-alangan God.an monkan-wak-wakin nunang a' ngaantam-ngeey-ngeeyin nil kan-kanaman thaw-thaw thant. Thananiya wik pam thum thanttam anangan ngeey-ngeeyin, anpalana, thanan min-minam ngul iiy-iiyin. 6Nil wanch thum Abraham.antam Sarah.ana yimanangan min iiy-iiy, nil Abraham.an wik ngeey-ngeey nunang a' moom nungantaman waa' nunang. Yaa, niiy nath minan yump-yumpin-a, a' nath winynyang ke'an mo'-mo'inwey-a, yaa, niiy woyan Sarah.antam anman wak-wakān.
7Niiyalang, pam thumangana, niiy wik inangan ngeey-ngeeyān thampa: wanchiya kemp thayan ke' pam yimanangan ya'a. Niiy ngaantam-ngeey-ngeeyān thanang wanch thum niiyantam nanangan a' minam pi'-pi'ān thanang, puth niiy karp pam wanch God.antam, a' nil God.anganiya thanang thamp kalow aak nungantamakana. Niiywey minam ke'wey iiy-iiyin wanch thum niiyantamakan-a, yaa, niiyan ke'-ngul minaman mee'-wuthanamin God.antan, ya'a.
Than Nath Wayan Yump-Yumpiythan Niiyantan-a, Niiyiya Woyan Min Anman Wak-Wakāna
8A' niiy Christians yotamanganiya inan ngeeyāna: niiy ngangk minangam karpam anman iiy-iiyān, minam pi'-pi'wun niiyantakamana ke' niiy kampan niiyantam anangan pi'-pi'aniy thanang, niiy ngangk mam-mamān thanang wiy anangan a' ke' ulp-ulpāna! 9Nil wee'ang nathwey way yumpow niiyantan-a, aak-ya'angan-a, yaa, niiy puthangkaniya way ke' yumpān nungantana. Nil wee'an nathwey kulak wenkiy niiyantan-a, a' aak-ya'ang thak waa'-waa'iy niiyanganwey-a, yaa, niiy puthangkaniy ke' kul thaw-thawān nungantana, ya'a. Niiy God.antan mee'-wuthanamān nungant nil yipam ma'-aath-aathow nunang. A' nil God.angan ngul ma'-aath-aathow niiyang a' minam ngul iiy-iiyow niiyant, puth nilaniy naakanakan ump niiyang, nil yipam min anman iiy-iiyow niiyantana. 10Puth lat ngench thayananga wik inangan waa'-waa'ana:
“Niiywey nath kaangk ngangk min paththam iiy-iiyānan-a,
yaa, niiy puth way-wayana ke' thaw-thawān a' ke' wik uuy-uuyamān thant wiy-wiyantan.
11Niiy paththam way anangan want-wantāna, a' minam anman iiy-iiyān.
Niiy ke' kul uw-uwān thantana, niiy puth ma'-aath-aathān thanang wiy anangan
than yipam man um enyanamwey wun-wunayn thanttakamana.
Niiy ke' eenchān woyan min anan wak-wakāna.
12Puth nil God.anganiy minam pi'-pi'an pam wanch anangan than wikan ngeey-ngeeyantan nunang,
a' than mee'-wuthanamantanan-a, nil ngeey-ngeeyan thampa.
Puth nil man-mangkam ngul thee'an thant than wayan iiy-iiyantan.”
Than keenkanama wik inangan umpin lat ngench thayanangana.
13Ngamp min anman iiy-iiyāmpan-a, nil puth wee'anga wayathow ngampangana? An ya'a. 14Than nath aak-ya'ang wayan iiy-iiyiythan niiyantan-a, nil God.angana ngangk minangam ngul pi'-pi'ow niiyang. Niiy ke' winynyang mo'ān thanttamana, a' niiy ngangk wayana ke' iiy-iiyāna. 15Puth niiyaniya, Christ ngangkangam pi'-pi'ān nunang, a' monkan-wak-wakān nunang thonakama, nilam moom pi'an paththama. Niiy kan mee'miy nil God.angan minam pi'-pi'ow niiyangan, puth ngul kalow niiyang aak nungantamakana, yaa, niiy wik inangan ngaantam-ngeey-ngeeyāna niiy want-wanttakan koochanathān thant wiyantanweya. Anpalana wiy anangan aak ngeen nathan engkiythan niiyant wik God.antamakan-a, niiy erkam paththam waa'ān thantweya. 16Puth ulp-ulpanang ke' wik waa'-waa'āna ya'a, thaa' mich-micham thaw-thawān thantweya. Niiy puth ngaantam-ngeey-ngeeyān nil God.angan ngeey-ngeeyan wik ngampan thaw-thawanamp. Niiy nathwey wayan ngaantam-ngeey-ngeeyān-a, wayan erkam wantāna, minam anman iiy-iiyāna. Yaa, anpalana, than wiy anangan ngul-nyaa' iiy-iiyayn, than pam wanch al-alangaman thaa'-thengk-thengkathantan niiyang niiy puth minam monkan-wak-wakaniy nunang Jesus Christ.an. 17Niiy woyan min nath wak-wakinan-a, thanan nath way yump-yumpiythan niiyant. Wiyiya, nil God.ana thaa'-pant ke' thawiy niiyantam, nil puth mee'miy an kan-kanam min niiyant, yipam ngangk thay-thayanathow niiyang. Niiy nath wayan iiy-iiyinan-a, than puthangkana way nath iiy-iiyiythan niiyant, yaa, an kana, ke'-wiy-paththam, niiy ke' ngangk wayan iiy-iiyāna.
18Nil Christ.ana way ke'am iiy-iiy, ya'a, nil min anman, puth nilaniya utham way ngamparamak. Nil God.angan ke' ngampangan kuchiy-a, puth ya'a, nil Christ.an aak ngamparamang nilaniy uthama, nil yipam kalow ngampang nungant God.antan. Nil Christ.an ma'-thonam anman utham ngampar, nil ke'-ngul uthamiy puthamaniy ngula, ya'a. Puth nhinthan-maany nungantamana ke'am uthama, ya'a, nil God.angan man-yetham pi'-pi' nunang. 19Anpalana, nhinthan-maany nungantamanganiya, wik God.antaman waa'-waa' thant nhinthan-maany wiy al-alantan aak thonangan wunin, ke' jailang yimanangan. 20-21Nhinthan-maany inangamana pam wanch al-alantaman thanan keenkanaman wunin a' thaampin nunang God.an, aak an-aniyangana nil Noah.angan chukkun pi'anan yump. Nil God.an kuup-kuup thant wayan wantayn, wik nungantaman ngeey-ngeeyayna, puth ya'angam kuup-kuup thant. Pam wanch eight thonakam ngoonchin chukkunang angan. God.angan thanang thonakam kaa'-piichanath ke' yipam thuchayn. Ngampiya ke' pam wanch anangan keenkan wun-wunin chukkunangana. Nil puth God.angan kaa'-piichanathan ngampang way ngamparam anpalana ke' thanang keenkanamana kaa'-piichanath thanang ngakamana. Ngamp kanaman ngangkan thee'amp nungant God.antan-a, thananiya kootra ngakang kuungk-kuungkin ngampang, kemp punganakan, ya'a, puth aniya ngakangan kuungkin ngampangan-a, an ngangk ngamparam yam pekan yipam pach pi'-pi'āmpa. Nil God.anganiy ngangk ngamparaman pachathan a' kaa'-piichanathan ngampang puth anpalan nil Jesus.an mulaman ek 22a' putha nil koyaman mat ngula. Nil Christ.an moom pi'an ngul iiy-iiyan karpam nungantang God.antang, nil moom iiy-iiyan thant ngaantiyongk al-alantan a' oony min al-alantan thaka.