Niiy Ke' Thechān Christ.antamana, Niiy Ma' Nungantang Iiy-Iiyāna
21Niiyan puth pam wanch God.antam iiy-iiyaniy, niiy wayana too wantān. Niiy ngangk-wayangam ke' kal-kalān thanang wiy anangan, ke' wik uuy-uuyamān thant, ke' muuk-muukamathān thanang, ke' mee'-wun-wunān thant, a' aak-ya'ang ke' waa'-waa'ān thanang. 2Than puk manyiyang thuut anman kaangk mungk-mungkayn than yipam em-emayna, yaa, niiy yimanangan wik God.antam anangan niiy anman ngaantam-ngeey-ngeeyāna, niiy yipam ke' Christ yimanangan weenān a' God.antang ngul aak umpuyam wun-wunān. Wik nungantamana mina, an ke' may yimanangan ngangk ngamparamakan yipam thayanathow ngampang. 3Puth wik inangana lat ngench thayanangan waa'-waa'an, “Niiy mee'miy nil Lord.an min iiy-iiyan ngampar.”
4-6A' lat ngench thayanangan wik inangan thamp waa'-waa'ana:
“Ngay God.ang pam min kanam mi'ang nunang pam wanch ngatharamakana,
nilana pam thayan ke' kunttow yimanangan, than ke' yuupathiythan nunang, ya'a.
A' nil thampana ke' yuk aawuch pek-pekangkan wuuyanan wun-wuntana, mina a' thayan yimanangana.
Ngay paman ngul wunpāng nunang aak thanttamang Jews.antamang aak Zion.angan.
Than wee'-wee'ananganwey ngangkan thee'ayn nungantan-a,
nilan puth kan-kanam kalow thanang aak nungantamaka,
nil ke' muukamathiy thanangweya, ya'a.”
Than pam wanch wiyang man-mangkam thee'iythan nungant Christ.antana, kaangk ke' nungantamana, nil puth God.angan kan kaangkiyath nunang, mi' nunang ngampar. Yaa, niiy Christians anangana, ke' thechān Christ.antam, ma' nungantang iiy-iiyāna. Nil man-yetham iiy-iiyan a' nil thayan ke' kunttow yimanangan. Nil God.anganiy ke' aawuch yimanangan kaachan, ngampaniya ke' yuk nungant nilan uw-uwana, aawuchan yipam yumpow nungantakam. Niiy Christ.an mi'ān nunang moom niiyantakama, nil God.angan yipam karpam wunpow niiyang aawuch nungantamang angana a' Ngeen-Wiy Min nungantam kuchow ngampar nil yipam ngangk ngamparang wun-wunow. A' niiy thampaniya ke' workan iiy-iiyaniy nungantana, wik Ngeen-Wiy Min nungantam alantaman ngeey-ngeeyaniy a' work iiy-iiyaniy nungant. Work anpalan niiyan ngangk min yump-yumpaniy nunang God.an, puth niiyan karpam work iiy-iiyaniy Christ.antang. 7Niiy Christ.an ngaantam-ngeey-ngeeyaniy nunang nil minam paththam ngampar, puth than wiy al-alangan ke'am yimanangan ngaantam-ngeey-ngeeyantan nunang ya'a, than kaangk ke' ngangkan thee'ayn nungant. Puth lat ngench thayanangan wik inangan waa'-waa'ana:
“Than pamang aawuchan kaachantan-a,
wiyiya than nath yuk aawuch pekangkan wuuyanan wun-wuntan-a, piw thee'antan,
puth thanan ngaantam-ngeey-ngeeyantana ke' yuk way yimanangan.
Puth ya'a, yuk aawuch pekangkan wuuyanan wun-wuntan-a,
an min paththama, aawuchakan, thayan anman yipam wun-wunowa.”
An puth ke' yimanangan pam wanch wiy al-alangan kaangk ke' nunang Christ.an. Puth Christ.ana min-minam paththama, ke' yuk anman aawuch pek-pekangkan wuuyanan wun-wuntana, an way ya'a, an yuk min paththama.
8Lat ngench thayanangan wik inangan thamp waa'-waa'an:
“Niliya ke' kunttow yimanangan woyanang wun-wunan,
an ke' than pam wanch wiy anangan ke'-ngoongkam iiy-iiyantan
a' tha' thuth-thuthantana, a' aakang ngul keek-keekantanwey,
puth than wik God.antamana kaangk ke' ngeey-ngeeyayn.”
Nil puth God.an thawa, thanwey kaangk ke' wik nungantaman ngeey-ngeeyayna, thanan puth way-wayathwuntan thanttakamana. 9Puth niiy yimanangan ya'a, nil God.angan mi' niiyang nungantakama. Niiy ke' kuunch piip thonamantam yimanangan, God.antamana, niiyiya work iiy-iiyaniya moom pi'an God.antan, nil pokkap kiikath niiyang pam wanch nungantam iiy-iiyāna, niiy yipam wik nungantamana wiyantan waa'-waa'ān a' inan waa'ān thant nil min-minam paththam iiy-iiyan niiyantana, nil kan ump niiyang woyan way anpalan niiy yipam nungantang iiy-iiyān. An ke' niiy aak ngaa' anpalan iiy-iiyan aak thon aakanakan aak nganthan park-parkan. 10Ka'athamaniya, niiy pam wanch God.antaman ke'am iiy-iiyan, ya'a, puth niiy inaniya epa pam wanch God.antam ngula. Ka'athamaniya niiy ke' mee'miya ya'a nil God.angan ngangk mamow niiyangana, puth inan ep ngula niiy mee'miy ngul nil ngangk mam-maman niiyanganweya.
Nil God.an Moom Pi'an Paththam Iiy-Iiyan Ngamparana
11Yaa, niiyalang, ngurp ngatharam-ang, niiy nath way ngaantam-ngeey-ngeeyin yumpanakana, nath maarich kee'-kee'ina, nath kulak wenkin thakana, an niiyaniya too paththam wantāna, puth way-wayathiy niiyanga, yaam ke' ngaantam-ngeey-ngeeyān, puth aak ngamparamana aak in kenyana, ngamp yaanwey aak inganiy wun-wunanampa. 12A' ngampan puth wun-wunanamp pam wanch wiy al-alantangan Jews ya' anangana than ke'an yippak mee'miy nunang God.ana. Than wiyangan nath aak-ya'anganwey waa'-waa'iythan niiyangan-a, niiyaniya minam anman iiy-iiyāna, than wiyangan yipam thath-thathayn, a' than ngulana yipam God.an thaa'-kuump-kuumpayn nunang , aak an-aniyangan nil God.angan weentathow thanang ngul woyan min nungantamakan.
13Thon inan ngeeyāna: niiy wik ngeeyān thanttam pam pi'-pi'anam al-alantam aak ingana wun-wuntanana, niiy puth monkan-wak-wakaniy nunang Christ.an. Niiy wik ngeeyān nungantam moom pi'an king alantaman aak inan pi'-pi'ana, 14a' putha pam pi'-pi'an wiy anangan nil king alangan kuch-kuchan thanangan-a, niiy wik ngeeyān thanang thamp. Pam anangaman nil kuch-kuchan thanang aak thon-thonakan yipam way-wayathayn thanang pam wanch wayan yump-yumpantan, a' yipam thaa'-kuump-kuumpayn wiy anangan than minan iiy-iiyantan. 15Pam wanch way weenth al-alangan nath aak-ya'ang thak waa'-waa'iythan niiyang, puth than kaangk ke' thiichayn nunang God.ana. Puth God.angan kaangk niiy min anman iiy-iiyāna. Niiy nath minam ngul iiy-iiyinwey-a, ina ke' niiy thaa' appap yump-yumpaniy thanang thanan aak-ya'angan ke' yipam waa'-waa'ayn niiyang ngul. 16Yaa, min anman iiy-iiyān. Niiyaniy ke' thenchān way niiyantam anangana, niiyana wayan kan wantāna ke' than pam wanch wayanang al-alangan yump-yumpantan. Than puth pam wanchang ke' thaachayn niiyang wayan yump-yumpāna, ya'a, than puth moom niiyantam ya'a, nil God thonakama moom pi'an niiyantamana. Niiy nanpalana min ngul iiy-iiyāna, mee' nungantangana, ngangk minangam monkan-wak-wakān nunang. 17A' niiy ngangk minangam iiy-iiyān thant pam wanch yotamantana, a' minam pi'-pi'ān thanang Christians wiy anangana. Niiy anman ngaantam-ngeey-ngeeyān nil God.an moom pi'ana, ngangk way ke' yump-yumpān nunang. A' ngangk minangam iiy-iiyān pam moom pi'an king alantana.
Nil Christ.angan Woyan Meenath Ngampar
18Niiy pam wiyiy workan iiy-iiyaniy. Niiyiya ngangk minangam iiy-iiyān moom niiyantam al-alantanga. Than nath min iiy-iiyayn niiyanta, nath ya'a, way nath iiy-iiyayn niiyanta, niiy puth wik thanttaman ngeey-ngeeyān, man kulana ke' yump-yumpān thanang. 19Than nath aak-ya'angwey piik-piikayn niiyang, nath kuchayn niiyang aak thonakana. Niiy nath God anman ngaantam-ngeey-ngeeyān nunangan-a, a' puth kul ke'anang aak thaamp-thaampān-a, yaa, nil God.angan min waa'ow niiyang. 20Ngay puth wik engkanang thaw-thawang niiyantana. Niiy nath way yumpānan-a, a' than nath piik-piikayn niiyang-a, yaa, man kulan ke' wampow niiyant, puth aak thaamp-thaampānweya. Nil God.angan ke' thaa' kuumpiy niiyanga, ya'a -- than mak piikayn niiyang niiy puth way iiy-iiyan. Puth than nath aak-ya'ang piikiythan niiyanga. Niiy nathwey man kul ke'an wampinan-a, a' aak thaamp-thaampinan-a, yaa, nil God.angana thaa'-kuump-kuumpow niiyanga.
21Nil ka'athamana God.angan ump-ump niiyang woyan min nungantaman wak-wakān-a, nilan kanam thiich than wiy al-alangan ngula thaa'-thengk-thengkathayn niiyanga a' way iiy-iiyayn niiyant, puth nil kaangk niiy ke'-ngoongkam minam anman iiy-iiyān, puth nil Christ.angan woyan meenath niiyant niiy yipam monkan-wak-wakān nunang. Than aak-ya'ang way iiy-iiyin nungant Jesus.antan, a' nil mul wun niiyantana. 22Niliya mee' God.antang way ke' iiyanama, nil wik way thakan ke' thawanam, ya' anman. 23Than wik way thakana waa'-waa'in nunang, puth nilaniy puthangkan ke'am waa'-waa' thanang, ya'a. Than yuk wuuyanangan wunpin nunanga, a' mulathin nunang, nil puth puthangkan ke'am thaw nil way ngulan yumpow thantana, ya'a. Nil mee'miy God.an mina, puth nila ngangk pam wanchantaman thath-thathana. Nil Christ puth mee'miy nil God.angan ngul meenathow thant nil minan iiy-iiy. 24Nilaniya way ngamparak utham yuk wuuyanangana, ngamp yipam wayan want-wantāmp ngula, a' wik ngeey-ngeeyāmp nunang thonakam God.ana. Than kanam mulathin nunang, puth anpalan God.angan kaa'-piichanath ngampang woyan way anpalana. 25Ka'athamaniya ngamp ke' minh sheep anangan pam moom ke'anang yimanangan thaa' weep-weepampa, puth nil God.angan palam weentath ngampang ngamp yipam monkan-wak-wakāmp nunang Christ.an, nilan ke' pam moom min paththam ngampar. Niliya min-min pi'-pi'an ngampang, ma' wuuyan wunp-wunpan ngampar way anpalaniy.