1 PETER
Lat Inan Nil Peter.angan Ump
11Ngay Peter.ang lat inan umpang niiyant. Nil Jesus.angana mi'anya ngay yipam wik nungantaman waa'-waa'āng niiyantana. Niiyaniy kech wun-wunaniy aak puul niiyantam anpalana, paa we'-we'araman aak thon-thonang ngul wun-wunaniya -- aak namp Pontus-a, Galatia-a, Cappadocia-a, Asia-a, a' puth Bithynia. 2Niiy inan puth ngaantam-ngeey-ngeeyān thampa: keenkanamana, nil piip God.angan mi' niiyang pam wanch nungantam iiy-iiyān. A' nil Ngeen-Wiy Min nungantamang pokkapang kiikath niiyang God.antan, niiy yipam ngeey-ngeeyān nunang Jesus.an a' monkan-wak-wakān nunang, nil God.angan yipam ke'-ngul ngaantam-ngeey-ngeeyow way niiyantam anangana, nil puth Jesus.ang theetath nungamangwey ngampara. A' ngay thawāng God.antana ngangk minangam pi'-pi'ow niiyang, niiy yipam ngangk minangam wun-wunān.
Ngamp Mee'miy Nil God.angan Kan-Kanam Ngul Kalow Ngampang Nungantang Wunāmpa
3Ngamp thankyou thawāmp nungant God.antana, piip Lord Jesus Christ.antamana. Nil ngangk mam ngampang, a' woyan way anpalan weentath ngampang, ngamp yipam pam wanch nungantam iiy-iiyāmp. Inaniya ke' ngamp putham ngul yimanangan aak-ngeey-ngeeyampa. Puth anpalana, ngamp mee'miy nil God.angan mulaman kan-kanam ngul ekathow ngampang a' kalow ngampang aak nungantangan wun-wunāmpa, puth ka'athangaman nil Christ.an mulaman ekathan. 4A' ngamp mee'miy nil God.angan minam pi'-pi'ow ngampang, a' puth yota ngul thee'-thee'ow ngampar nilan in kenyan pi'-pi'an pam wanch nungantamakana. Yotam in kenyana an kan-kanam min a! Ke' way-wayamantan, ya'a, minam anman wun-wuntan aak umpuyama. 5Niliya pi'-pi'an thanang ngampar, ngamp wee'-wee'anangan Christ.an ngangkangan pi'-pi'anamp nunangana. A' nil God.aniya thayan paththam, nil minam pi'-pi'an ngampanga. Aak inan minchow ngulan-a, nil yotam al-alantana pam wanch ngul meen-meenathowa, anangana nilan kaa'-piichanath thanang.
6Yaa, niiy ngangk min wun-wunāna! Way ngul nathan wampow niiyantana aak ingana, pam wanchangan nath way yump-yumpayn niiyantana, thaa'-thengkathayn niiyang thakana, a' niiy natha ngangk way ngul iiy-iiyāna. 7Way inangan wampow niiyantana nil God.angan yipam thathow niiyang niiy nath kan-kanam ngangkangaman pi'-pi'aniy nunang Christ.an, nath ya'a. In aak yimanang wunana: nil pamangan yuk gold nath uwiy-a, a' nilaniya thumang ngul kiingkiy yipam thathow an yaaka' kan-kanam mina, nath ya' yaaka'a. An nungkway yuk goldan min paththam-a, an ke' wun-wuniy min aak umpuyamana, ya'a, puth nil pamana ngangk min wun-wuniy yuk gold aakanakana. An kanaka yuk goldan mina. Puth ngamp Jesus anmanwey monkan-wak-wakāmpan-a, an ep-paththama min paththama! Puth nanpalana, nil God.an ngangk min paththam wun-wunow. Wayan wampow ngamparan-a, ngamp paththam wayana thaamp-thaampāmpa, ke'-ngoongkam ngangk thayanam anman iiy-iiyāmp. Nil God.angan thath-thathan ngampangana way anangan kan thaamp-thaampanampan-a, nilana ngangk min wun-wunana. Amanam ngulan-a, nil Christ.an palaman wampowan-a, nil God.angan yipam thaa'-kuump-kuumpow ngampang, a' thawowa ngampan minaman iiy-iiyampa a' nil min paththam iiy-iiyow ngampara. 8-9Nungkway ngamp ke' thathimp nunang Christ.an-a, ngamp puth kaangk wun-wunāmp nungant, a' putha ngangkang thamp pi'-pi'anamp nunang, putha ngamp monkan-wak-wakanamp nunang. Anpalana nil God.angan minam pi'-pi'ow ngampang a' kalow ngampang ngul aak nungantang wun-wunāmp, ke'-paala ngamp ngangkam nyiinanampa, ngangk ngamparan min-minam paththam yam pekan wun-wunana.
10Keenkanamana, nil Christ.an ke'aman yippak wamp aak iikanakan-a, than prophetsangan lat ngench thayanana minam thath-thathin a' than puth ngaantam-ngeey-ngeeyin nil God.angan kaa'-piichanathow ngampangana, a' pam wanch nungantaman waa'-waa'ow niiyang ngulana, niiy Jews ya' anangana. Than wik inangan waa'-waa'in ngula. 11Than kaangk thiichayn aak ngeenan wampowa a' puth want-wanttakan wampowa. Puth Ngeen-Wiy Min Christ.antamang ngangk thanttamangan waa'-waa' thantana nil Christ.an want-wanttakan uthamow yuk wuuyanangana, a' nil koyam ngulan ekow mulamana, a' keny koyam ngulan matow moom pi'anan iiy-iiyow God.antangana. 12Puth God.angan waa'-waa' thant wik inanganiy thanttakam thonakam ya'a, puth niiyant yotamantana. A' niiy nyiingk-nyiingk ngeeyan wik inana Christ.antaman, pam wiy al-alantamana wik nungantaman waa'-waa'in niiyantana. Nil God.angan Ngeen-Wiy Min nungantaman kuch thant anpal kenyana, ngangkang yipam ngoonchow thanttanga, nanpalan than wik minan engkanang ngul waa'-waa'in niiyantana. Than ngaantiyongkangan kaangk wik inangan mee'miy wun-wunayn, puth ya'a.
Niiy Ke'-Ngoongkam Woyan Min Anan Wak-Wakāna
13Yaa, niiy ke'-ngoongkam woyan min wak-wakān, putha kuchek min wun-wunow niiyantana a' niiy inman thonakam ngaantam-ngeey-ngeeyāna: nil Christ.an palaman wampowan-a, God.ana min iiy-iiyow ngamparana. Yaa, niiy ngangk minangam kuup-kuupān iikanakana. 14Niiy wik ngeeyān nunang God.ana, puth niiy pam wanch nungantama, woyan wayan ke' wak-wakān, ke' niiy keenkan wak-wakana, niiy ke'aman yippak mee'miy nunang God.ana. 15Nil God.ana way ke'am iiy-iiyan, ya'a, nil min-minam anmana. Yaa, niiy minan iiy-iiyāna ke' nil anmana, puth nil ump niiyang niiy yipam monkan-wak-wakān nunangana. 16Inan wik God.antam lat ngench thayan anpalan, “Ngay minam anman iiy-iiyanga, puth nanpalana niiy thampana min anman iiy-iiyāna.”
17Ngamp mee'an wuth-wuthanamanampan God.antan-a, ngamp piip waa'-waa'anamp nunang a! Yaa, ngamp aak ingan yippak wun-wunanamp-a, ngamp God.an ngaantam-ngeey-ngeeyāmp nunang, a' putha ngangk min yump-yumpāmp nunang. Nil puth ngulan thawow pam wanch thon-thonantan than nath min iiy-iiyinweya, nath ya'a, way iiy-iiyin. Nil mee'miy yotam anangana ngampan yump-yumpamp, a' nil mee'angaman ngul thaw-thawow ngampar ma'mangkamantana, wiyantan thonakam ya'a, nil puth pam wanch ko'alam ke'am kaangkiyath thananga, ya'a, yotam ma'mangkamantan thaw-thawow. 18Ngamp mee'miy God.angan kaa'-piichanath ngampang woyan way anpalan, than wuut mangk ngamparam al-alangan woyan wayan wantin ngamparana. Woyan inan min ya'a, ngamp nath wak-wakimpan-a, ngamp puth way iiy-iiyimpa. A' ngamp mee'miy nil God.angan wukal ke'am thee', ya'a, nil yipam kaa'-piichanathow ngampangana, an ya'a, wukal anangan yaam min ke' wun-wuniythan, an ya'a, an ngul way-wayamayna. 19Nil puth God.anganiya puk nungantam kaa'-thonaman kuchana nil chaapar nungantaman theetathow ngampar nil alangan yipam kaa'-piichanathow ngampangana. Nil Christ.angan way thonam ke' yumpanam, ya'a, nilam thonakam pam mina. Yaa, anpalaniya, chaapar nungantamangan kaa'-piichanath ngampang. Nil God.an keenkanaman thaw thant Jews.antana, “Niiy minh lamb min-puyana pal kalān altar aakanakan nangan mulathāna yipam chaapar nungantaman ukow, ngayang yipam kon-ngathow way niiyantamana.” Yaa, nil Christ.aniya, ke' minh lamb min paththam yimanangan. 20Nathpalman-a, nil God.angan aak inan ke'an yippak yump-a, nilan Christ.an mi' nunang nil yipam kaa'-piichanathow ngampang. Kaap thon-thonangan want-a, puth nil Christ.an nyiingk-nyiingk wamp-wampa uthamowan ngamparana. 21Puth nanpalan ngampaniya ngangkangan pi'-pi'anamp nunang God.ana. Puth nilan Christ mulaman ekath nunang, a' moom pi'an yumpan nunang aak in kenyan iiy-iiyow nungantanga. Ngamp nanpalan mee'miy ngula nilan min iiy-iiyow ngampar, a' ngamp ngangk minangam kuup-kuupāmp nungant.
22Niiy wik God.antaman kanam minam ngeey-ngeeyana an wik kan-kanama, a' anpalaniya niiy woyan wayan kanam wantan, ngangk niiyantamana kan-ngul pach iiy-iiyaniy wik min God.antaman ngeey-ngeeyan, anpalana. Niiy puth kaangk wun-wunān Christians wiy al-alantan thamp, niiy yaan-yaanangana ke' kaangk wunān thant ya'a, niiy kan-kanam paththam kaangk wun-wunān thant. 23Ngamp wik God.antam kanam ngeey-ngeeyamp, a' anpalaniya an aak yimanang wunana, an ke' ngamp putham ngul aak-ngeey-ngeeyampa, ngamp puth piip thonangan ngul uwampa. God.an puth piip ngamparama. Puth nilaniya ke' mul wuniya, nil ke' pam wanch ngamp yimanangan ya'a. Wik nungantam anangan ngangk niiyantamang wun-wuntan, wik ananganiya aak umpuyam wun-wunayn, ke' wayamayn. 24Wik lat ngench thayanangan inan waa'-waa'an:
“Ngamp yotam inangan yaam ke' man-yetham iiy-iiyāmp,
ngamp puth mul ngul wun-wunāmpa, ke' wak yimanangan uthamantan.
Pam wiy anangan nath pi'an-a, thanchiy iiy-iiyiythan, nath ma'mangkiy iiy-iiyiythan,
puth ngul-ngulana, than ke' pach yimanangan kathamantan, a' uthamantan ngul.
25Puth wik God.antam anangana ep-paththam,
aak umpuyam wun-wunayn, ke' wayamayna, ya'a.”
A' wik min inangan nganan waa'-waa'an niiyantana, an wik God.antama.