Niiy Ngul Wukalakan Ngeenak Yangkamaniya?
51Ngay kan thawāng niiyant al-alantanweya ma'mangkiyan iiy-iiyaniya. Ngangk way paththam wunow niiyant, a' niiy peey-peeyāna, puth aak way anan yaam ke'anam wampow niiyant. 2Way min niiyantamana yaaman ke' wun-wunayn aak umpuyamana ya'a, an ngul wayamayn, a' way min niiyantam min-miniy anangan-a, ngo'arang mamow. 3Niiy ngul wukalakan ngeenak yangkamaniya! An puth wukal niiyantaman kan-ngul wayamin, ngo'arang kan mam thanang. Puth nanpalan niiy way paththam ngul weemana! Nil God.angan kan thath wukal niiyantaman ngo'arangan mamanwey, nil puth wayathow niiyang niiyan yangkamaniy way minakana. Niiyiya ma'mangkiy yumpwuniy a' yuk way min min-miniy anangan pi'-pi'aniyweya, ngul an min niiyant ey? Ya' paththam. Aak anan thinth ngulan wampowa nil God.angan um nungantangan thanathow niiyangana, ngul an min niiyant ey? An ya'a! Niiy puth yangk mo'-mo'aniya! 4Niiy inan ngeeyāna: niiy mee' thenchan thanang pam anangan workan iiy-iiyantan aak paddock niiyantamanganwey, may niiyantaman yalmathantan. Niiy puth wukal ke'am thee'an thanta, ya'weya. Than wik many thuuch-thuuchina! Niiy ke' ngeeyan thananga. Thaniya wik pech-pechinweya a' nil God.angan moom wuut pi'an paththam alanganiy ngeey thananga! 5Niiyiya yuk way min yot pi'-pi'aniy aak ing pekana, niiyiya ke' minh bullock kempathiy yimanangan weemaniy, puth yuk way min yotamangan ke' kempathiy yumpantan niiyang. Than pamangan ma'-yotam minh bullock kempathiyan mul-mulathantan minh mungkanakan. Inan puth yimanang thamp nil God.angan ngul wayathow niiyangan, anpalan niiy yangkan mo'-mo'aniy yuk way minakan. 6Niiyana pam min-miniy anangan aak-ya'angan waa'-waa'an thanang, putha wiy anangan thamp niiyaman mul-mulathan thananga, puth thananiya ke'am thaampin niiyang ya'a.
Niiy Ke' Eenchān Woyan Min God.antam Anpalana
7Niiyalang, ngurp ngatharam-ang, niiy ke' eenchān woyan min God.antam anpalana, puth murkanam anman minam monkan-wak-wakān nunang aak-aakanakaman nil Jesus Lord ngamparaman palaman wampowa. Nil pam farmer alangan may kaanch anangan kanan kaampan-a, pamana kuup-kuupan ngul may kaanch anangan yiikan ngulan pentayn a' may thamp ngulan pi'ayn. A' nilan kuup-kuupan ngakan wampow thampa, may anangan yipam pi'an a' menchan weemayn. Nil paman-a, ke'am eenchanwey, ya'a. 8Aak inana yimanangan wunan, ngamp ke' eenchāmp woyan min piip God.antam amanamana! A' puth ngampaniya ngangk thayanam iiy-iiyāmp, puth ngampan ngaantam-ngeeyāmp nil Christ.an yaam ke'anam palaman wampow ngampar.
9Ngurp ngatharam niiyalang, niiy wik inan thamp ngeeyān ngatharam. Niiy Christians wiy anangan ke' waa'ān thanang, nil puth piip God.angan yipam ke' wayathow niiyang. Puth aakan yaam ke'anam wunowa nil Christ.an palaman wampow a' um nungantangan thanathow ngampang ma'mangkamana, mep-mepow ngampang way yot ngampan yump-yumpamp. Nil Christ.an yaam ke'anam puy-palan wampan ngampar! 10A' ngampan ngaantam-ngeeyāmp thanang pam prophets al-alangan keenkanaman wik min God.antaman waa'-waa'in pam wanch wiyantana, a' puth ngampiya woyan thanttam anman wakāmpa. Than pam wanch wiyang wayan yump-yumpin thant-a, than aak thaampina, a' than puth ke'am thawin, ya'a, thanwey-a, ke'-ngoongkam anman monkan-wak-wakin nunang God.an. 11Ngamp ngaantam-ngeeyāmp thanangan puth than ngangk minangaman iiy-iiyina, thanan puth aak thaampina a' thanana ke'-ngoongkam anman monkan-wak-wakin nunang God.ana aak wayan wamp thant. Niiy puth wik kan ngeeyan pam Job alantamana. Nungkway aak way yotan wampin nungant-a, nilan aak thaampweya, ke'-ngoongkam anman ngaantam-ngeey nunang God.ana. Anpalana, nil God.an min iiy nungant, a' ngangk min paththam yump-yumpana. A' nil God.an min kan-kanam paththam iiy-iiyan ngampara, a' ngangk mam-maman ngampanganiya.
12Ngurp ngatharam niiyalang, puth niiy in ngeeyāna, inan wik thayana: nil pam thon nath thawiywey, “Ngay in kan-kanam paththam thawang piip in kenya,” than yipam wiyangan ngaantam-ngeeyayn nunang an ke' kan-kanam thaw-thawan. Wiyiya thawantana “piip in keny” yimanangana, wiyiya thawantana “aak in keny,” nath “aak in pek.” Wik inangan way niiyant. Niiy ke' thaw-thawān yimanangana. Niiy wik kan-kanam anman thaw-thawān. Niiy nathwey thawin “Ee'-a,” yaa, niiy “Ee'” anman thawān. Niiy nathwey thawin, “Ya'-a,” yaa, niiy “Ya'” anman thawān. Niiy puth yimanangan thawāna, nil God.angan ke' yipmam wakow niiyang a' kul ke' thamp yipam thawow niiyanta.
13Nil puy wee'ant nathan aak wayan wampantweya? Nil puth mee'-wuthanamow God.antana. A' nil puy wee'-nathan ngangk min paththaman iiy-iiyana? Nil aak path-pathow God.antan, a' thaa'-kuump-kuumpow nunanga. 14A' nil puy wee'-nathan weechan nunanga? Nil wik kuchow thant pam wanch churchan pi'-pi'antan al-alantana, thananwey ngul erkam iiyayn nungant alpan alantan a' mee'-wuthanamayn nungant a' than minh kamang nampayn nunang, anpalaniya than thawayn God.antana pam alpanan miyalathow nunanga. 15Than kan-kanaman ngangkangaman pi'-pi'antan nunang God.an-a, nil ngul ngeeyow thanang a' miyalathow nunang, nil alpanana miyal paththam ngul iiyowa. Nil alpan alangan wayan yump-yump-a, nil God.an ngul kon-ngathowana. 16A' ngay inan thawang niiyanta: niiy waa'ān niiyantakamana way niiyan yump-yumpana a' mee'-wuthanamān niiy-niiyantakamana a' nil God.angan ngul ma'-aathow niiyangwey niiy yipmam wayan wantāna a' monkan-wakān nunangana. Than pam wanch min wee'-wee'anang nathan mee'-wuthanamayn God.antan-a, nil God.angan ngul ngeeyow thanang a' kan-kanam paththaman ma'-aathow thanang than ngeenakan thawantan nungantwey. 17Nil pam Elijah.ana ke' ngurp ngamp yimanangana. Nilana mee'-wuthanama a' thaa' thay-thayanam thaw God.antan nil ngakan ke' kuchow thanta, a' anpalaniya nil God.angan puth ke'am kuch thant ngakanweya, kaap ma'-ko'alamana ngak ke'am wamp-wamp thant. 18A' anpalana nil Elijah.an putham ngul mee'-wuthanama God.antan ngakan yipam kuchowa a' yaam ke'anamana ngak pi'an paththam uk-uk inpal kenyana, a' anpalana yuk-a, puth may anangana kan-ngul em-emin putham ngulaniy.
19Ngurp ngatharam niiyalang, niiy wiyiya koyam yaaka' weentan God.antamana. Nil wee'angweya palaman weentathow niiyang woyan min aakanakan God.antamakan-a, an min-minam paththama. 20Puth niiy inan ngaantam-ngeeyāna: nil wee'angan ma'-aathow pam anana nil wayan yump-yumpan-a, a' koyaman weentathow nunang woyan min God.antamakan-a, an nil kaa'-piichanathan nunang anpalana aak way aakanakan ke' yipam iiyow aak umpuyamakana. A' nil God.angan ngul kon-ngathowan way nilan thaa'-thaa'an yump-yumpana, nil pam anman koyaman weentwey God.antan.