Yuk Way Min Aak Inpalmana Niiy Ke' Ngangk Peeyāna
41Puth niiy ngeenama? yaaman thaa'-thayanamaniy a' pek-pekwuniya? Puth inpalana, niiyiya ma'-yotam kuchekangan way anman ngaantam-ngeeyaniywey, ngangk peey-peeyan niiyant way yumpanakana, niiy iingkamaniy thampang woyimpiy kee'anakana. 2Wiyiyweya niiy ngaantam-ngeey-ngeeyaniy ke' pam wanch wiyang yuk way min thanttaman ke' niiyant thee'iythan, puth ya'a, than ke' thee'iythan niiyant. Puth ngangk niiyantan way paththam wunan a' niiyan ngaantam-ngeeyaniy ke' niiy mulathin thanang a' way min ngulan maayin thanttaman. Niiy kaangk paththam wunaniy way minakan panch-panchamaniya. Niiy nathwey ke' uwin way minan-a, puth niiyiya kulak ngul wenkaniy thant a' pekwuniy, thaa'-thayanamaniy thaka. Puth niiywey ngeenam yuk way min ke'aman uw-uwaniya? Niiyan puth God.antan ke'am engkaniya! 3Wiyiy niiy nath nungant thawin, puth nilaniya kaangk ke' thee'ow niiyant ya'a, puth anpalan nil mee'miy niiyang niiy-niiyantakaman thonakam ngaantam-ngeey-ngeeyaniy ke'-paal niiy way minakan thawaniy nungant.
4Niiy paththam kan-kanam ke'am monkan-wakaniy nunang God.ana! An ke' wanch wayangan pam nungantaman wantan a' pam thonakan wenkan. Niiy yimanangan iiy-iiyaniya, niiy God.an ngangkangan ke'am pi'-pi'aniy nunang ya'a, puth niiy kaangk wunaniy wukalak a' puth way min aak inpalmakan. Ayyang, in ngeeyāna! Niiy wee'-wee'anangan-a, wukal-weenthan iiyaniy-a, puth way min aak inpalmakan kaangk wun-wunaniy-a, an niiyan-a, um thaampaniy nunang God.ana. 5Nil God.an thaw lat ngench thayanangan nil Ngeen-Wiy Min nungantaman kan kuch ngangk ngamparamangan ngoonchowa a' puth nil Ngeen-Wiy Min alangana kan-kanam paththam kaangk ngampan kan-kanam monkan-wakāmpana God.an, ngamp nungantakam anman kaangk paththam wunāmpanta. Niiy nath ngaantam-ngeeyaniy ke' nil God.an wik inangan yaan thaw-thaw ey? An ya'a! Nil kan-kanam anman thaw-thawan. 6Nil God.an thayan paththam a' ngangk minangam ma'-aath-aathan ngampanga ngamp yipam monkan-wakāmp nunangana. Than puth lat ngench thayanangan kan waa'in ngampar, “God.an kan-kanam min paththam iiy-iiyan thant pam wanch al-alantan than ke'an pi'an yumpwuntan, puth nil pam wanch wiy anangan ep thaampan thanang than ulp-ulpanangan iiy-iiyantana.”
7Yaa, niiyan putha ma' God.antang wantwuna. A' niiy thaampān nunang oony wayana yipam nil nath mo'ow niiyantamana. 8Niiy thinth-thinth wampān nungant God.antan-a, a' niliy puth-a, thintham ngul wampow niiyanta. Than wee'-wee'anangan way yump-yumpantan-a, than wantiythan ngula, a' putha than wee'-wee'anangan yaan-yaanangan monkan-wakantan nunang God.an-a, than kan-kanam paththam monkan-wakiythan nunang God.ana. 9Niiyiya ngangk way-wayam paththam wuninweya, puth-a, peey-peeyin thampwey, an puth ngeenama, niiy way thaa'-thaa'an yump-yumpaniya. An niiyiya ke' thengk-thengkina, niiyiya peey-peeyin paththam, an niiyiya ngangk minangaman ke' iiy-iiyina, niiyiya ngangk way-wayam paththam iiy-iiyina. 10Niiyiya thintham wampān God.antan a' thawān nungant niiy pam wanch min ya'ana, puth nilana konangaman ke' pi'ow way yot niiyan yump-yumpana, ya'a, an nil ngula ma' umangan pi'-pi'ow niiyang pur'pam.
Christians Wiy Anangan Ke' Waa'ān Thanang
11Ngurp ngatharam niiyalang, niiy Christians wiy anangan ke' waa'-waa'ān, wik way thakan ke' thawāna. Niiy wiy anangan waa'aniy thanang-a, an niiy wik thayan God.antaman pipaniy, a' thaampaniy thamp, a' puth niiy wik thayan nungantaman way waa'-waa'aniy thamp. A' nil wee'angan wik thayan God.antamana wik way-wayam paththaman waa'owwey-a, nilan ngaantam-ngeeyan nungantakaman nilan ke' wik mee'miyang yimanangan waa'-waa'ana, puth ya'a, nil ke'am wik ngeeyan nunang God.ana. 12Nil God.ang thonamang alangaman thonakam nilam wik thayan anman ep kan-kanam yumpan. A' nil puth thonamangan thanathow ngampang pam wanch um nungantangan thanāmp, mep-mepow ngampangana. A' nil thonamangan thonakamana kaa'-piichanathan ngampang puth al-alantaman ngamp wayan thaa'-thaa'an yumpanampa, a' puth nil thonam alangaman kuchow ngampang aak way aakanakan iiyāmpa. Ngamp ngaantam-ngeeyāmpa, ke' waa'āmp pam wanch wiy anangan. An nint ke' wee' e? pam wanch wuut pi'an ey? ke' God yimanangan ey? Ya'a, wiyan ke' waa'ān thanang.
In Way Ngampar Wik Ulp-Ulpanangan Thaw-Thawanampa
13A' ngamp inan thampang ngeeyāmpa. Wiyiya niiy nath yimanangan thawaniy, “Ngay kaangk mo'āng aak thonaka, nath inman mo'āng, nath ya'weya ngaa' thon ngul mo'āng, aak thonang ngul wun-wunānga. Ngay kaangk kaap thonamak angman wun-wunāng. Ngay work iiy-iiyāng a' wukal yot yumpānga.” 14Niiy yimanangan ke' thawāna! Niiy mee'miy ya'a aak want-wanttakan wunow ngaa' thon ngulana! Ngampaniya ke' thok ween yimanangan wun paampangana, a' amanamaniya ya'am ngulan weeman. Ngampana yimananga yaaman ke' wunimp aak ing pekan, ngamp puth ngoongk-ngoongkam aak ngeen nathan ngamp ya'amāmp aak imanamanwey. 15A' ngampan wik inangan ep thawimpa, “Nil Lord.an kaangkan wunow-a, an ep-paththam ngampana man-yetham iiyāmpa a' ngampaniya aak thon-thonak ep mo'āmpa.” 16Puth niiyiya ulpathwuniy niiyantakamana wik pi'an thawaniya. In way ngampar wik ulp-ulpanangan thaw-thawanampa.
17Ngamp kan mee'miy ngul ngamp min anman iiy-iiyāmpana. Ngamp nathwey min ke'an iiyimpan-a, an ngamp way-wayam paththam iiyanamp.