Ngamp Wik Minam Anman Thaw-Thawāmp
31Ngurp ngatharam niiyalang, niiy yotamangan wik God.antaman ke' waa'-waa'āna churchangan, than ko'alamangan ep-paththama waa'ayn. Thanwey waa'iythan wik God.antaman-a, thananiya wik minam waa'ayn thant wiyantan. Than ke'wey min-minan waa'ayn wik God.antaman-a, nil God.angan kan-kanam paththam wak-wakow thananga, wiy anangana nil ke' wakiy thanang, ya'a. 2Ngamp yotam inangana ngamp wiyiya wik way-way thawanampa; nil wee' ke'aman thawan wik way thakan-a, an nil ep-paththam pam min-minam paththama, way ke'am iiy-iiyan, wik nilan thaw-thawana an minam anmana, nil oony way alangan ke' ma' mich wakiy nunang, ya'a, nil aak thaampan. A' um thaampan nunanga, oony wayana. 3Thaa'nganth inangan ngamparam manyiya, yaa, ngamp wik minam thawimpwey-a, yaa, ngampaniya pam wanch min iiy-iiyimpa. Wik way thakan thawimp-a, pam wanch way iiy-iiyimp. Thaa'nganth ngamparam inangan ke' bridle bit many yimanangan pamangan wunpantan thaa' yaramanantangan. Ngamp kuuy wanttinakan wichanamp-a, an than yaraman anangan aakanakan iiyantan. 4Ngamp chukkun anangan ngaantam-ngeeyāmp thamp. An puth wuut pi'-pi'anam thampanga, puth pam al-alangan weentathantan thanang yuk manyiy al-alangan yuk pal pekkuwan koy-koyyuw wun-wunan chukkunantangana. Wunt pi'an nathwey wampiy-a, penyiy nunang chukkunaniy-a, puth nil pam alangana weentathan yuk many thonakam alangan pal-pekkuwan wunan chukkunantangana, alangaman weentathan chukkun pi'anan. 5Thaa'nganth ngamparam inangana an many thampa ke' bridle bit many yimanangan yaramanantangan thaa'angan wunpantan, a' ke' yuka manyiya chukkunantangan wuntana. Ngampaniya minaman thawimp thant wiyantan-a, an ep-paththama, min iiyimpa. Ngamp wik way-wayan thawimpwey-a, puth ngampaniya wayathwimp ngamparakamana.
Pamangwey thum mee' kaliy-a, thum nganth many thee'iy ngul wakangan-a, aniya nhoom pi'an ngul penchan paththam, a' nganth anan puy-puyam ngul we'araman. 6An ke' yimanangan thaa'nganth ngamparamaniya, ke' thum yimanangana. Kul ngulan thawanamp-a, an ke' nhoom ngul we'aramana pench-penchan. Ngamp wik way thampangan thawimpan-a, ngamp puth wayathwimp ngamparakamana, an ke' thum yimanang puy-puyam aathan kemp ngamparamangana, a' kuchek ngamparamangan putha ngangk ngamparamangan a' ngampan puth pam wanch way kan-kanam ngul iiyanamp, erkam wik ngeeyanamp nungantam oony way alantaman, a' ngamp puth puy-puyam way-wayam paththam ngul iiy-iiyanamp. 7Ngamp maalathanamp thanang minh anangana, minh wiy-wiyam thakana, a' puth minh pancha puth thuuka puth minh nga' anangana wo'uwangan wuntana. Aak nathpalman in-inman pam wanchang maalathantan minh anangan. 8Puth ngampwey thaa'nganthan popam ke'an pi'impa, ya'a, an way-wayam paththama, an ma'-yotaman yuup-yuupamana. Nil thaa'nganth ngamparam ke' thuuk yimanangana thuuchan pal yuup, wik thakan kalan-a, kul thakan thawan, ke' opar way thuukantam yinang pam wanch wayathan thanang. 9Ngamp puth thaa'-kuumpanamp piip God.an a' thankyou thawanamp nungant, thon inanweya, thaa'nganth ngamparam il-ilangan-a, ngamp akwunamp. Nungkway nil God.angan yump ngampang ke' nilam anman-a, puth ngampiya akwunamp, a' thaa'-thengkathwunamp. 10Ngamp thaa' thonam alantaman thawanamp wik mina puth wiyiya wik way thawanampa, ngamp akwunamp thak. Ngurp ngatharam niiyalang, puth an min ya'a. 11Nil ngak mina a' putha ngak wulkachan pul karpaman ke'am pentanpul ngak pantam anpalan, ya'a! 12Ngurp ngatharam niiyalang, yuk kom alangana may kuump anangan ke' kaliy ya'a; a' putha kuuy may kaangkantam alangana may kom anangan ke' kaliy thama ya'a; puth thon inana ngak mina puth ngak wulkachan pul karpaman ke'am pentanpul ngak pantam anpalana ya'a. In puth yimananga, ngampaniya wik min a' wik way thonamang ke' thawimpa, ya'a.
Ngamp Thawāmp God.ant Kuchek Min Yumpow Ngampang
13Niiy wee'-wee'anangana kuchek minan iiy-iiyaniy-a, niiyiya min-minam iiyāna. Ke' thamp ulpān pam wanch wiyantamana, puth niiyaniya minam iiyān thant wiyantanwey. Niiy min yimanangan iiyinan-a, wiyangan thiichayn niiyan kan-kanam kuchek min paththam iiy-iiyaniywey. 14Niiyana kul kathan ke' ngaantam-ngeeyān a' ngangkangan yaam ke' pi'-pi'ān putha ke' mee'-wunān, a' niiy-niiyantakam thonakamana ke' ngaantam-ngeeyān. Niiy way-wayam yimanangan iiy-iiyinwey-a, an puth niiyiya ke'wey thaa'-kuumpān niiyantakaman putha kuchek minan ke' waa'wuna, an niiy wik uuy-uuyamaniy thonakama. 15Nil piip God in kenyan ke'am thaw ngampar mee'-wun-wunāmp ngamparakamana, ya'a, a' ke'am thaw ngampar ulp-ulpanangan iiyāmpa, ya'a, a' ke'am thaw ngampar wayan iiyāmp thant wiyantan, ya', nil oony way anana an ep-paththam nil thawan ngampar way yot inangan yump-yumpāmpa! 16Than pam wanch mee'an wun-wuntan-a, a' puth thanttakam thonakaman ngaantam-ngeey-ngeeyantan-a, man kul wampan thant a' kul yumpwuntan thanttakamana putha wiyant thakan way yumpantan. 17Puth nil piip God.an thaw ngampara ngamp minam iiyāmp, kul ke' thawāmp thant wiyantan, puth wik itam thawāmp thant, a' wik ngeeyāmp thanang thamp. Puth nil thaw ngampar thamp ngamp ngangk mamāmp thanangwey pam wanch puk wiy anangan a' min iiyāmp thantwey thamp. A' puth-a, ngamp kan-kanam woyan nungantaman wak-wakāmp, woyanamana mel ke' enchāmpa, ya'a. 18Ngamp ngangk minangaman iiyimp-a, a' kul ke'anangwey wun-wunimp-a, a' puth wiy anangan ma'-aathimp thanang ngangk kulaman nochathimp thanangwey-a, anpalan than wiyangan ngul thathayn a' than kaangk minam ngul iiyayn thampweya.