JAMES
Lat Inan Nil Ump James.anga
11Ngay James.ang lat inan umpang niiyanta, ngay puth piip God.ant a' Jesus Christ pulant moom ngamparamant. Ngay work pulant iiy-iiyanga. A' ngay lat inan niiyant umpang pam wanch Jews.antan niiy puth monkanan-wak-wakaniy nunang Christ.ana, aak umyompanaman wun-wunaniya.
Ngamp God.an Kan-Kanam Ngangkangan Pi'-Pi'āmp Nunang
2Ayyang, ngurp ngatharam niiyalang, aak wayan wampow ngampar-a, ngamp ngangk minangam anman iiy-iiyāmpwey. 3Ngeenama? Inana: ngampwey nath kan-kanaman ngangkangam pi'-pi'imp nunang piip God.an-a, nil ngul ma'-aathow ngampang a' ngangk thayanathow ngampang way anangan thaampāmpa, a' puth thayanam yipam iiyāmp. Ngampwey ngeechanimp ngamparakam way yumpanakan-a, nil ngul ma'-aathow ngampang way anpalan ngampana ke' yipmam way anangan yump-yumpāmp. 4Aak way nath wampiy ngampar-a, ngamp puth aak thaampāmpa a' thayanam iiyāmp a' monkan-wakāmpan Christ.ana, a' puth thayanam paththam ngul yipam iiyāmpa, a' ngampaniy kan-kanam paththam pam wanch min ngul iiyāmpa. 5Wiyiya ngamp want-wanttak yumpimpa, ngamp wiyiya woyan min wanttin wakimpa. Ngamp puth mee'-wuthanamāmp nungant piip God.antana nil yipam woyan min anan meenathow ngampar. A' nil kan-kanam ngul ma'-aathow ngampanganiya, puth piip God.angan nathpalman ma'-aath-aathan ngampanganiya min anman yump-yumpāmpa, a' nil puth ngampangan kuchek min paththam yumpowa. Nil puth ya'an ke' thawiy ngampara, ya'a, putha nil ke' wakiy ngampanganiya. 6Ngamp puth thawimp nungant nil ma'an-aathow ngampanganiy-a, ngampan kan-kanam ngaantam-ngeeyāmp nunangan puth nilan kan-kanam ma'-aathow ngampanganiya. A' ngampana ke' man-ngeeyāmp nunang God.ana. Nil wee'angweya God.an man-ngeeyiy nunang-a, an nil ke' ngak yeelal koyaman thuthana a' palaman enchanwey, wuntangan palam puyaman thee'an. 7-8Nil yimanangan ke' puth ngaantam-ngeeyow nil ke' piip God.angan ma'-aathiy nunangana, puth nil pamangan ke'am min-minam God.an ngangkangan pi'-pi'an nunanga, nil pal-puy ngaantam-ngeeyana, wiyiya nil God.an monkan-wakan nunang puth wiyiya, wantan nunang, ke'am monkan-wakan nunangana. Anpalan-a, nil God.angan ke' ma'-aathiy nunang.
Than Pam Wanch Ma'mangkiy Anangana Ke' Ngulakam Wunayn Ya'a
9Ngamp wiyiy pam wanch God.an ngangkangan pi'-pi'anamp nunang-a, ma'mangkiy ya'a, puth wukal ke'anangwey, puth kana, ngampiya ngangk minangam iiy-iiyāmp, puth nungkway ngamp wukal ke'anangwey-a, nil God.angan ep ngampanga pi'an thath-thathan. 10Ngamp pam wanch God.antamana wiy anangana ma'mangkiy. Ngamp tham ngangk kuupamāmpa puth nil piip God.angan kan thathan ngampang ngamp pam wanch pi'-pi'anam ya'a, ngamp work thonakaman nungant iiy-iiyanamp. Pam nil ma'mangkiyweya uthamow ke' pach anangan kangkangan emantanwey a' uthamantan ngulana. 11Kinch ngulan matana puth aakan wukan a' pach anangan wayamantan, a' puth pach anangan aakang enchantan ngula, an min yaaman ke' wuniythan. Aak yimanangan wunan nil pam ma'mangkiyan work iiy-iiyiy-a, wukal yump-yumpiy nungantakaman-a, kemp wayaman ngul a' michaman ngul a' puth uthaman ngula.
Nil Aak Wayan Wampow Ngampar-a, Ngamp Anman Ngangkangan Pi'-Pi'āmp Nunang God.an
12Aak wayan wampow ngampar-a, ngamp anman monkan-wak-wakāmp nunang piip God.ana, puth anpalaniya ngampaniya ngangk minangam ngul iiy-iiyāmp a' anpalaniy-a, ngangk aak umpuyam wunāmp God.antangana. Nil God.angan wik inan kaa'ngak pam wanch thant al-alantan than kaangkan wuntan nungant. 13Ngampwey nath ngaantam-ngeeyimp way yumpanakan-a, an ngamp yimanangan ke' thawāmpa, “Nil God.ang thaach ngayang wayan yumpānga.” An ya'a. Nilam thonakama wayan ke'am yumpa, an nil ke' ngaantam-ngeeyiy way yumpanakana, ya'a, a' putha nil ke'am thaachan pam wanch way yumpanakana, ya'a, ya'-ya'ama. 14Ngamp way yaaman ngangk ngamparangan pi'-pi'imp-a, a' puth anmanan ngaantam-ngeey-ngeeyimpan-a, anpalan ngamp wayan paththam yump-yumpimp. 15A' ngamp nathwey kaangk anman ngaantam-ngeeyāmp way yumpanakan-a, yaa, ngampana way paththam yumpanamp. A' ngamp nathwey puy-puyaman wayan yump-yumpimp-a, nil piip God.angan kuchow ngampangan aak wayakan, nil ke' kaliy ngampangan aak min nungantamakana.
16Ayyang, ngurp ngatharam niiyalang, niiy way-wayan ke' ngaantam-ngeeyān, nil piip God.angana ke'am thaachan ngampangan way yumpanakana, an ya'a! 17A' way min min-miniy yot anangana inpal kenyan kuchan piip God.angana. Nilam thee'an ngampar. Nil ngampang minam ma'-aathan. Nilan ke' ngantha anman ling-ling parkan. Nil kinch-a, a' kep-a, a' thunp, an nilam yump thananga. Than nganthan parkantan ngamparweya puth ma'-yotaman ya'a. Nil God.an yimanangan aak ke' wunan, nil murkanam min anman wun-wunan ngaa' thon-thonan, ke'am weentan, pikpungk ke'am thee'an ngampar, ya'a. 18Nil ngaantam-ngeey ngampangan puk nungantaman waa'ow ngamp puth wik nungantam kan-kanam anangan ngeeyanamp, yaa, ngampaniya ke' puk nungantam yimanangan iiyanamp. Than wiyang ngulana ngaantam-ngeeyayn nunang God.an-a, yaa, thanang thampa puk nungantaman waa'ow thanang.
Ngampiy Paththama Wik Piip God.antaman Ngeeyāmp
19Ngurp ngatharam niiyalang, niiy kan wik inan ngeeyāna: ngampiya, wik God.antaman erkam paththam ngeeyāmp. Ngamp ke'an nath ngeeyimp-a, an ngamp wiyan ke' thaa'-aathimp thanang. Ngampaman wik ngeeyimp-a, an ep ngamp wik waa'imp thant wiyantan. A' ngamparaniy-a, man kul erkaman ke' wampow. 20Man kulan wampan ngampar-a, an min mee' God.antangan ya'a. 21Way yot ngampan ngaantam-ngeey-ngeeyanamp-a, a' yump-yumpanamp-a, an ngampaniya too ngul wantāmpa! Kan-kanam paththam wantāmpa! Ngampiya nunang wik ngeeyāmpan God.an. Nilana wik min nungantamana kan waa' ngampar, puth ngampaniya wik nungantaman ngangkangam pi'-pi'āmp ngul. Ngamp wik min nungantam anangan ngeeyāmpa, yaa, nil ngul kaa'-piichanathow ngampang ngampan way anangan yump-yumpampa, anpalan.
22Ngampiya kan-kanam paththam wik min nungantaman wik ngeeyāmp a' minam ngul iiy-iiyāmp ke' nilan thaw ngampara. Ngamp nath wik ngeeyimp-a, puth min ke' nathan iiy-iiyimpwey-a, an min ya'a, ngamp yaan muukamanampa. 23Nil wee'-nathan yimanangan iiy-iiyowwey-a, an nil ke' pamang yuk glassangan kaa'wal nungamang thath-thathana. 24Nil yaam ke'am thathan nungamanga a' kan-ngul iiyana, a' yaam ke'anamana an kanam kon-ngath nunang kaa'wal nilan want-wanttakanwey. 25Puth ngamp yimanangan ke' iiyāmpwey ya'a. Ngampiya puth-putham lat ngench thayan God.antaman thath-thathāmp a' putha readimpungāmpa wik min anangana, ke' wantāmpa a' ke' kon-ngathow ngampang, ngamp kan-kanam paththam lat ngench thayanan thath-thathāmp, a' putha ngeeyāmp thampa a' min yumpāmp thampa, puth anpalaniya nil oony wayan moom ngamparaman ke'-ngul iiyowa, ngampan puth ngangk minangam iiyāmp.
26Ngamp nath ngaantam-ngeeyimpa ngamp ke' kan-kanam monkan-wakanamp nunang piip God.ana, puth ya'a, ngamp nath yaan muuk-muukamanamp. Ngamp natha ma'-yotaman wik wayanang anangan thaw-thawimp-a, pam wanch wiy anangan wik way thakan waa'-waa'imp thanang-a, ngampan puth kan-kanam ke'am monkan-wakanamp nunang piip God.ana, ngangkang ke'am pi'-pi'anamp nunang ya' paththam. 27Nil wee'angweya natha kan-kanaman monkan-wak-wakan nunang piip God.an-a, niliya minam iiyowa. Nil anangan paththam ma'-aathow thanangweya than ngangk wayan nyiin-nyiintana, puk kaath piip ke'anangana a' wukalongk ananganwey nil uw-uwow thanang a' nyiin-nyiinow thanttang. A' putha nil ke'a ngotan ngoonchow pam wanch wayanang al-alantangana, ke' way thakan yumpow ke' thanaman yumpantana, nilaniya ma'-yotamana wik nunang God anman ngeey-ngeeyowan.