Keenkanaman-a, nil God.an Thaw Thant Aak Ke' Ngorkal Yimanangan Yumpayn Nungant
91Aak keenkanaman-a, piip God.angan wik yump thanttang, pam wanch Jews al-alantangan. Nilan thaw thant aak ngorkalan yumpayn nungant, tabernacle.ana waa'antan. A' putha nil piip God.an thaw thant than want-wanttakan mee'-wuthanamayn nungant a' thaa'-kuumpayn nunang thak aak angan tabernacle.angan. 2Aak inan tabernacle.an-a, ke' tent pi'an yimanangan, a' aak pekana we'ar, aak room kucham thamp, a' thaa' thonam yumpin pentanakan um kaawa. A' aak room wonk kaawangkana, an aak ngench thayan waa'in. Aak room angana, wonk yiipangkan-a, yuk candles thum thamp than-thanin, a' putha table than-than angman kungkangka. A' may bread manch ke' may palow yimanangan table.ang wun-wunin. 3Aak tabernacle.ang pekana, than yuk curtain waanchin menh-menhangana yipam room kucham wunow. Room thonamaniy-a, wonk kuuwangkana, ananiy waa'ina aak ngench thayan paththaman. 4Aak anganiy-a, bowl thaa' we'ar wun-wun goldaman yumpin, than priestangan opar awal min kiingk-kiingkin yuk bowl angan piip God.antan a' putha yuk box angman than-than than pam wanchangan yipam ngaantam-ngeeyayn wik anana nil piip God.angan kaa'ngak thanang. A' yuk boxan-a, yuk goldangam kang. A' box ang pekan-a, yuk jar wun-wun goldaman yumpin, yuk jarangan-a, may manna wun-wun. (May inaniya nil piip God.angan kuyam kuch-kuch thant pam wanch Jews al-alantan, than may ke'anangan wunina, may manna inan God.angan kuch-kuch thant inpal kenyan, than aak pintalangan wun-wunin.) Yuk box anganiy-a, yuk pil thook Aaron.antaman thamp wun-wun, yuk angana kangk yiikan manyiy pent-pentin. A' putha yuk box anganiy-a, kunttow manch kucham thamp wun-wunpul. Nil piip God.angan ka'athaman wik thayan Ten Commandments anangan ump kunttow manch al-alantangana. 5Box kenyangk angana ngaantiyongk kucham than-thanpul pamang yumpin, pam wanchangan yipam ngaantam-ngeeyayn nil God.an thanttang wun-wunan, a' nil min-minam paththam, a' wuut pi'an paththam thamp. Punth-paam pulantamana we'arathpul keny-kenyangk yuk boxangan. Than pam priests al-alangana chaapar minhantam anangan ma' thethang mak-makin yuk boxan, nil piip God.angan yipam ke'-ngul ngaantam-ngeeyow way thanan yump-yumpin pam wanchangana. Ngay kaangka wik yot waa'-waa'ing niiyant aak tabernacle.aman, puth ya'a, anman kana.
6Than aak tabernacle.an kanaman minchathin-a, ngaa' thon-thonana pam priests anangana aakanakaman iiy-iiyin aak um kaawa, aak ngench aakanakan, a' than work anman iiy-iiyin. 7Nilam thonakam pam pi'an priest anman pekan ngoonchow aak um kuuwan aak ngench thayan paththam aakanakan, pam wiy-wiyan ya' ke' ngoonchiythan. Nil pam pi'an priestana ma'-yotamana ke'am ngoonch-ngoonch aak ngench thayan paththam aakanakan ya'a, nil kaap thonamangan wantow-a, an ep nil ngoonchow. Nilaniy kalowa minh bullockantam chaapara, a' putha goat alantaman chaapar, a' ma' thethang makow yuk box kenyangk angan, nil piip God.angan yipam ke'-ngul ngaantam-ngeeyow way nungantaman nilan yumpa, putha way pam wanchangan yump-yumpin thamp, an ke'-ngul ngaantam-ngeeyow. 8Puth anpalana nil Ngeen-Wiy Min God.antam alangan ma'-aathan ngampang ngamp yipam minam ngaantam-ngeeyāmp tabernacle.ana. Aak room mal kaawangkana angman yippak wun-wunow tabernacle angman-a, nil thonam anman pam pi'an priestana pekaniy ngoonch-ngoonchow um kuuw, aak ngench thayan paththam aakanakan, pam wanch wiy anangan ya'a, ke' yippak ngoonchiythan. 9Yaa, ngamp puth inan mee'miya: aak keenkanamana, pam wanch al-alangan yuk way min kalin nungant piip God.antan aak tabernacle.akan putha minh thakan kalin nungant a' putha chaapar minh al-alantaman thampa. Nungkway chaapar thakan kalin-a, pam wanch al-alantaman ngangk ke'am yippak pach wun chaapar minhantamangan an ya'a, ngangk thanttamana ngotan yippak wun-wun thantwey mee' piip God.antangan. 10Aak keenkanamana wik thayan God.antamanga waa' ngampar may-a, a' ngak thakan want-wanttinan mungkāmpa, puth ngampan want-wanttaka kempan pachathwump ngamparakamana, a' putha way min thakan want-wanttak pachathāmp. Wik inangan-a, God.an thaw-a, kemp ngamparam inangan waa'a, ngangk ngamparam ya'a. Keenkanaman-a, nil piip God.an thaw pam wanchantan wik thayan inangan minam pi'-pi'āna aak-aakanakaman nil Christ.an palaman wampow aak iikanakan.
Nil Christ.an Wamp Nil Yipam Woyan Min Paththam Meenathow Ngampar
11Nil Christ.an wamp ngampar nil yipam pam priest pi'an iiyow a' woyan min paththam meenathow ngampar woyan min piip God.antamana. Nil ke'am work iiy-iiyan aak tabernacle.angan pamangan yumpin aak ingana, ya'a. Nil Christ.ana pam priest pi'an ngampar, nil in keny work iiy-iiyan ngampar, aak tabernacle in kenyana, work min-minam paththam iiy-iiyan. 12Nil Christ.ana ke' priests wiy yimanangan ya'a, niliya an nil-nil, priest min paththam. Nil kaap thon-thonana, ke'am kal-kalan chaapar minh goatsantaman putha chaapar calvesantaman piip nungantamakan, ya'a. Nilaniya chaapar nungantam anman thee' piip-kunchantan God.anta, puth ma'-yotaman ya'a, nil ma'-thonam anman kan theetath nungamang way ngamparamakan utham yuk wuuyanangan ngamparweya, a' nil anpalaniya koyam ngul mat aak ngench thayan paththam aakanakan aak in kenyan, a' anman wun-wunan ngul, puth nilaniya kaa'-piichanath ngampang way ngamparam amanaman, ngamp ke' yipam ngul-nyaa' wunāmp mee' piip God.antangan, a' ngampaniya yipam aak umpuyangam wunāmp nungantang. 13Yaa, wik thayan keenkanamana yimanangan wun thant: pam wanch wee'an kemp pach ke'aman iiy-iiyin mee' God.antangan-a, yaa, puth wik thayan keenkanaman thawa pam priest alangan chaapar minhantaman ma' thethang mak-makow thanang minh goatsantama puth bullsantam alangan, a' putha thum kurk minh calf thumangan pench-pench-a, alangan thampa ma' thethang mak-makow thanang -- a' amanamana thanan ke' kemp pach ngul iiyaynweya. 14Puth in ngeeyāmpa: chaapar Christ.antamana an nil-nil, min paththam. Pam Christ anana min-minam paththam nilaniya, way ke'am yump, ya'a. Nil Ngeen-Wiy Min piip God.antamana, ngangk ngulakam wun-wunow man-yethamana, nilaniy-a, ma'-aatha nunang, a' putha ngangk thayanath nunang, nil nungamang yipam theetathow piip God.anta uthamow yuk wuuyanangan way ngamparamakan. Puth ngampaniya waank thech-thechanamp piip God.antaman ke'-paal Christ.an utham ngampar, chaapar nungantam alangana ep pachathiy ngangk ngamparaman. Puth anpalaniya ngampaniya ke'-ngul yipam yaaman ngul-nyaa'an ngeechanamp way ngamparam amanamana ngamp keenkan yump-yumpamp, ngampaniya ngangk minangam ngul iiy-iiyāmp piip God.antangan a' putha wik ngeey-ngeeyāmp nunang.
15Nil Christ.angan wik God.antam nyiingkanaman wampath. Nil wikan wampath yipam pam wanchangan ngeeyayn a' monkan ngul wakayn nunang. Ngamp pam wanchangan Jesus.wey monkan-wakimp nunangan-a, ngampaniya aak umpuyam man-yetham ngul iiy-iiyāmp nungantang ke' God.angan kaa'ngak. Wik nyiingkanam inangan nil God.angan ke'am waa' Moses.antan. Nil Christ.an utham-a, nilaniya kaa'-piichanathow thanang pam wanch God.antam anangan thama aak keenkanaman wun-wunin wik Moses.antam thonakaman ngeey-ngeeyin.
16A' niiy wik inan thamp ngeeyāna, nil pam nathwey thawiya than wee'-wee'anangan way min nungantaman uwayn nilan uthamowana. Yaa, nil pam uthamowan-a, pam wanch kampan nungantam anangana putha ngurp nungantam ananganweya than wik nungantaman konangam pi'-pi'ayn a' way minan aathwayn ke' nilaman thaw nil man-yethaman yippak iiy-iiy. Nil paman ke'aman yippak mul wun-a, than kampan nungantamangan way min nungantamana ke' yippak aathwuntan ya'a, puth nil mul ke'am yippak wun pamaniy. 17Nil paman man-yethaman yippak iiy-iiyan-a, than kampana putha ngurp nungantam al-alangan way min nungantama ke' aathwuntan yippaka. Nilwey mulan wunow-a, an ep-paththama way minan aathwuntan nungantaman. 18Aakan yimanang wun thanttam keenkanaman: nil piip God.an thaw Moses.antan than pam wanchangana minh mulathayn a' chaapar minh alantamana kalayn ngul aak altar aakanakan. Than ke'wey minhan mulathiythan-a, minh bullock a' goats anangan ke'an uthamiythan-a, thananiya pam wanch God.antam ke' iiyiythan ya'a. 19A' putha nil Moses.angan wik thayan God.antam anangana waa'-waa' thant pam wanchantan. Amanamaniya, thanana calves mulathin a' putha goats thamp mulathin thanang a' chaapar thanttamana kalin ngul a' nenchanathin angman ngakangan. A' nil Moses.angana yuk hyssop punth manyiy anangan maay thanang a' kath yuk wool wewmanga a' punchath ngul angan chaapar minhantamang. Amanananiya nil Moses.angan yukan wunyath chaapar thaman -- puth ka'athaman lat ngench thayan piip God.antam angan-a, yukan wunyath, a' pam wanchantang ngul wunyath. 20A' nil Moses.ana thaw ngul pam wanchantan, “Chaapar inan thathaniya, an meenathan niiyant niiyan pam wanch God.antam ngul iiyaniya. Nilan thawa ngampar yimanangan yumpāmpa.” 21A' amanamana nil Moses.angana aak tabernacle.ana chaapar alangaman ma' thethang mak-mak a' putha way min ngench thayan piip God.antam anangan thama ma' thethang mak-mak thanang chaapar alangaman a' putha aak tabernacle pekangkana ma' thethang mak-mak thama. 22Wik thayan keenkanaman thawana than priests al-alangan chaapar minh al-alantamana ma' thethang mak-makayn pam wanchantanga puth yuk way min al-alantangan thanan yipam pach wunayna mee' piip God.antangana. Chaapar thethangan ke'wey kuungkiy thanangan-a, yaa, piip God.ana ke' kon-ngathiy nunang way thanttam anpalan thanan yump-yumpin pam wanchangan.
Nil Christ.angan Chaapar Nungantaman Ma'-Thonam Anman Theetath Ngampar
23Aak tabernacle.ana putha way min anangan thama aak tabernacle.angan wun-wunin-a, an ke' maanyang thathanamp aak in kenyan heavenan want-wanttakan wunan. Than pam priests al-alangana chaapar minhantamang ma' thethang mak-makin thanang chaaparang minh goatsantamanga putha calvesantamang yipam way min anangan pach wunayn mee' piip God.antangan. An puth chaapar minh al-alantamangana pach ke' yumpiy aak piip God.antam in kenyan heavenana, ngampan yipam aak nungantamakan ngoonchāmp, an ya'a, an aak min paththam nil-nil, an puth Christ.an utham ngampar chaapar nungantamana theetath ngampar yuk wuuyanangana, ngampaniya epa aak heavenakan iiyimpa. 24Nil Christ.aniya ke'am ngoonch aak ngench thayanakan than pamangan yumpin, ya'a. Aak tabernacle.an thathanamp-a, an ke' maanyang thathanamp aak piip God.antam in keny heavenanga. Nil Christ.aniya aak piip God.antamak ep ngoonch, aak ngench thayan paththam a' God.antang ngul wun-wunan, putha nilaniya thaa'-pant thaw-thawan ngamparam God.antana. 25Than pam pi'an priests anangan ke'-ngoongkam iiy-iiyin kaap thon-thonangan aak ngench thayan paththam aakanakan chaapar minhantaman kal-kalin aak ngench God.antamakan. Puth nil Christ.anganiy-a, chaapar nungantamana puth-puthaman ke' theethathiy nungamangan ngamparakanweya ya'a. An anman kana ma'-thonama chaapar nungantaman theetath ngampar 26Nil piip nungantam God.an ke'am thaw nungant aak nathpalman puth-puthaman uth-uthamow, nil yipam chaapar nungantaman thaa'-thaa'angan theetathow ngampar, an ya'a. Nil ma'-thonam anman kan theetath nungamang ngamparweya, puth-puthaman ya'a. Nilaniy uk aak iikanakana, nil God.angan yipam way ngamparam anangana ke'-ngul ngaantam-ngeeyow puth nanpalan nilan Jesus.an utham ngamparwey, aak-ya'angan ke'am utham ya'a, nil chaapar nungantaman theetath way ngamparamak. 27Pam wanchan uth-uthamantanan-a, an than ma'-thonam anman uthamantan a' anpalaniya nil piip God.angana um nungantang thanathan thanang a' mepan thanang ngul, amanamaniya nil God.ana wiy al-alantan thawan nungantang angman wunayn, wiy ananganiya aak thonak kuchan thanang aak way aakanakan. 28Yaa, puth nanpalan nil Christ.angana ma'-thonam anman theetath nungamang ngamparan. Puth ngampana way yot yump-yumpanampa. Ke' ngampaman uthamimpwey-a, puth ya'a, pam nil Christ anman utham ngampar, nil yipam God.angan ke'-ngul ngaantam-ngeeyow way yot anangan pam wanchangan yump-yumpin. Nil puth Christ.an palam wampow. Puth nilan palaman wampow-a, an nilan ke'-ngul uthamow way ngamparamakan, ya'a, puth nilan wampowa pam wanch nungantam anangan kaa'-piichanathow thanang than anangan kuup-kuupantan nunganta.