Nil Pam Melchizedek.ana Priest Iiy-Iiy God.antana
71Aak keenkanamana nil pam Melchizedek.ana pam pi'an king iiy-iiy aak namp Salem angana. Niliya priest thamp iiy-iiy God.antana, moom wuut pi'an paththam. Aak an-aniyangana, Abraham wee'anangana a' puth kings a' soldiers thanttam anangana than pek-pekwin, a' piik-piikwin thanttakam. Than Abraham wee'anangana mul-mulakaman piik-piikin thanang a' anpalaniya, than kan-ngul iiyin koyam aak thanttamakan. Woyan ompamangan-a, nil Melchizedek.angana uw nunang Abraham.an. A' nil thawant Abraham.antan, “Ngay kaangk nil God.an min anman iiy-iiyow nungkar a' ma'-aath-aathow nintang.” 2Nil Abraham.angana yuk way min yot kal thanttam aak nungantamakan pam pi'-pi'anam kings wiy al-alantamana. A' nilana yuk way min puungk wiyana nungant thee' Melchizedek.antan. Namp inan Melchizedek.ana yimanangan wuna pam pi'an kinga min paththamana. A' putha thanan waa'in nunangweya king mina, pam wanch minaman ma'-aath-aathan thanang ngangk minangaman iiy-iiyayn thanttakamana. Puth aak nilan pi'-pi'a, Salem.ana, aak namp inana yimanangan wuna “aak enyana.” 3Wuut mangk Melchizedek.antamana an wee'-natha? A' putha kaath piip nungantamana wee'-nathwey pula? Puth lat ngench thayanangan ke'am waa'an ngampar ya'a. Nil aak ngeen nath aak-ngeeya? A' putha nil aak ngeen nath uthame? Puth lat ngench thayanangana ke'am waa'an ngampar ya'a. An nil ke' priest anman iiy-iiyow aak umpuyama; ke' nil puk nhengk God.antamana yimanangan iiy-iiyana.
4Nil pam Melchizedek.ana pam nil pi'an paththama. Nungkway pam Abraham.ana wuut mangk pam wanch God.antamakan-a, nil Melchizedek.angana ke'am way minan thee' nungant Abraham.antan, ya'a, nil Abraham.angana ep way min thee' nungant Melchizedek.antan. Puth nil Melchizedek.ana pam pi'an paththama, Abraham.ana ya' pam manya. 5Aak keenkanamana nil Moses.angana wik thayan God.antamana want thant Jews.anta. Nilan thawa pam Jews al-alangana way min thee'-thee'ayn pam pi'an priests al-alantana. Pam priest ananganiy Jews thamp iiyinwey. Pam wanch Jews al-alantana wuut mangk thonam anman thantwey Abraham.an. Nil pam Levi.ana puk nhengk Jacob.antamana niliya wuut mangk ilantaman wampa. Nil pam inan Levi.ana wuut mangk thanttam pam priests ma'mangkamantam Jews.antaman. Puk nhengk wiy anangan Jacob.antamana ke' iiy-iiyiythan priestana ya'a. 6Puth nungkway nil Melchizedek.ana wuut mangk Levi alantaman ke'am wamp-a, nil Abraham.angana way min ep thee'ant. A' anpalan-a, nil Melchizedek.ana wik min inangaman thawantwey Abraham.antan, “Ngay kaangk piip God.an min iiy-iiyow nungkar.” Nil piip God.an ka'athaman thawant Abraham alantana, nilaniya wuut mangk pam wanch yot thaa'-wantanamantam weenowa, puth nil Melchizedek.ana ep pam wuut pi'an paththam, nil Abraham.an ya'a. 7Yaa, an puth ngampaniya mee'miy ngula, pam ilantamana Melchizedek.ana wuut pi'an paththam, nil Abraham.ana ya'a, nil puth wik min anangan thaw nungant, nil Abraham.an ep ke'am wik min thawa Melchizedek.antana.
8Than pam wanch Jews al-alangana way min may thakan thee'-thee'in pam priests al-alantan. Puth nil Abraham.angana way minan Melchizedek.antan thee'. Puth lat ngench thayanangan waa'ana nil Melchizedek.ana in-inman man-yetham anman iiy-iiyan, puth than priests anangan ep ya'a, kanam uth-uthamin. 9-10A' putha niiy in ngeeyāna; nil Abraham.ana wuut mangk Levi alantamana a' putha pam priests ma'mangkam al-alantamana. Than pam wanchangan way min thant pam priests al-alantan thee'-thee'in. Nil puth Abraham.angan way min nungant Melchizedek.antan thee'-a, an ke' than priests ma'mangkam al-alangan way minan thee'-thee'in nungant Melchizedek.antan nil puth Abraham.ana wuut mangk thanttama.
Nil Piip God.angana Pam Priest Thonangan Ngul Kuch Ngampar, Christ.ana
11Nil pam Levi.ana wuut mangk thanttama, Moses a' Aaron wee'anang thanttam a' putha thanttam priests wiy al-alantam thamp. Nil Moses alangana wik thayan God.antam want ngampar. Puth than priests al-alangan wik thayanan pam wanch anangan thaa'-aath-aathin thanang. Puth than priests al-alangan ngul ngampang kaa'-piichanathiythan ey? Ya'a! A' putha wik thayan alangan ngul ngampang kaa'-piichanathiy ey? An ya'a. Puth nanpalan nil piip God.angana pam priest thonangan ngul kuch ngampar, Christ.ana, ke' pam Melchizedek anman. 12-14Nil Jesus.an ep-paththam pam priest iiy-iiy, puth wuut mangk nungantamana Judaha, nil Levi.an ya'a. Nil puth Moses alangan ke'am waa' kampan Judah.antam pam priestsan iiy-iiyayn, ya'a. Thananiya ke'am minhan kiingkin God.antan, yuk altar angan, ya'a, pam kampan Levi alantamangana epa minh kiingk-kiingkin altar angan piip God.antana. Puth nil piip God.angan kuch nunangan Jesus.an pam priest iiyow, nil puth ke' priests wiy anangan ya'a, nil priest wiy-wiyam iiy-iiy. Nanpalan-a, ngamp mee'miy nil God.angan wik thayan keenkanaman wiy-wiyam yump. Yaa, ngamp yimanang ngulan-a, wik Jesus.antam ngeey-ngeeyāmpa, wik thayan keenkanaman ya'a. 15Ngamp puth mee'miy nil Christ.ana pam priest ke' wiy anangan ya'a, nil pam priest wiy-wiyama, nilaniya ke' pam Melchizedek.ana. 16Wuut mangk Christ.antaman pam priests ke'am iiyin, ya', puth nanpalan ke'am nil Christ priestan iiy-iiya. Nilaniya priesta iiy-iiy nil puth mulaman thayan paththam koyam eka a' man-yetham ngul wun-wunan aak umpuyam. 17Wik piip God.antaman lat ngench thayanangana waa'an ngampar Christ.antaman. Nil God.an thawa nungant Christ.antan pam pi'an priestan iiyow aak umpuyam, ke' nil anman Melchizedek.ana.
18Nil Christ kanan wamp-a, nil piip God.an thawa than pam priests anangana ke'-ngul work iiy-iiyayn nungant ya'a, puth thananiya ke' kaa'-piichanathiythan pam wanch anangan, ya'a. Puth namanaman nil piip God.angan wik thayan priests al-alantaman epankath thanttam. 19Nil piip God.an thawa pam thon alangan ep-paththama Christ.angan kaa'-piichanathow pam wanchana a' putha ma'-aathow thanang thampa, thananiya yipam ke'-ngul waank thechayn nungantam God.antamana, ya'a, puth thintham wampayn nungant.
20-21Nil piip God.an wik thayanam thaw nungant Jesus.antana,
“Ngay in kan-kanam thawang nungk,
ngay ke'-ngul wik thon ngulan epankathinga, ya'a.
Nintiya pam pi'an priest aak umpuyam iiy-iiyān.”
Nil piip-kunch God.ana wik yimanangan thaw nungant Jesus.antan, puth nil pam priests wiy al-alantana ke'am wik yimanangan thaw, ya'a. 22Puth nil God.ana kan-kanam Jesus.antan thaw nilan priest pi'an ngamparaman iiyow aak umpuyaman, a' puth thaa'-pant thaw-thawow ngamparamweya, puth nanpalan ngamp mee'miy nil God.angan wik min inan ngul pi'ow. Nilan puth ngampang kaa'ngak ngamp nungantang aak umpuyaman wunāmp.
Nil Jesus.ana Ke' Uthamiya, Ya'a, Nilam Anman Priest Min Paththam Iiy-Iiyan Ngampar
23A' putha thon inan waa'āng niiyant: pam priests anangana ke'am man-yetham aak umpuyam wun-wunin ya'a, than uth-uthaminweya. Pam priests yot workan iiy-iiyina, puth thananiya uth-uthamin ngul. 24Puth nil Jesus.ana ke' uthamiya ya'a. Than wiy ngulan priest ke' iiy-iiyiythana ngampar ya'-ngula, nil Jesus anman priest ngamparan iiy-iiyow. 25Yaa, puth nanpalana, nil Jesus.angan kan-kanam kaa'-piichanathiy ngampanga, in-inman-a, a' ngulakam, than wee'-wee'anangan ngangkan thee'ayn nungantan, a' wampayn nungant God.antan-a, an nil ep kaa'-piichanathow thanang. Nil puth Jesus.an aak umpuyam man-yetham iiy-iiyan a' thaa'-pant thaw-thawan ngamparam piip-kunch God.antan, nil ke' yipam wayathow ngampang, nil thaw-thawan piip-kunchantan ngangk mamow ngampang a' putha ma'-aathow ngampanga.
26Nil Jesus anman pam mina, nil ke'am way thakan ngaantam-ngeeyan, ya'a, nil pam way ke'am iiy-iiy ya'a. Nil ke' ngamp yimanangan ya' way yumpanampa putha wayan iiy-iiyanamp, nil ep pam min paththam anmana. Nil Jesus.aniya anam keny ngul wun-wunan piip-kunchantang. Niliya priest wuut pi'an paththam ngampara. 27Ngaa' thon-thonana, nil Jesus.angan minh ke'am kiingk-kiingkan, ya'a. Than pam priests yot al-alangana ep-paththam minh thumang kiingk-kiingkin -- ka'athaman-a, thanttakam kiingkin way anpalan thanan yumpin, amanaman-a, pam wanch wiy al-alantan ngul kiingkin, way anpalan thanan yumpin. Puth nil Jesus.ang thonakamiya ke'amim way yump, ya'a. Nil utham ngampar yuk wuuyanangana puth ngamp pam wanch way iiy-iiyamp, nil putha ke'-ngul uthamiya, ya'a. Nil ma'-thonam theetath nungamang, ma'-yotaman ya'a. 28Keenkanamaniya, piip God.angan wik thayan anangan waa' nungant Moses alantan. Anpalana nil Moses.ang pam wiy al-alantan work inan thee' thant priestsan iiy-iiyayn. Puth wiyiya, pam priests al-alangan wayim yump-yumpina, than pam min ya'a. Ngul-ngulana, nil piip God.ana putham ngul wik thayanam thaw, puk nhengk nungantamana pam pi'an priest anman ngul iiy-iiyow. Puth nilan way ke'am yump ya'a, nil anman pam min-minam paththam iiy-iiyow aak umpuyama.