51Aak keenkanaman-a, than pam priests iiy-iiyin, than work iiy-iiyin aak ngench thayanan pi'-pi'in, aak Jews.antam angana. Nil pam thonamana moom pi'an paththam iiy-iiy thanttaman, puth nilana work iiy-iiy pam wanch al-alantan. Nil piip God.angan work inan thee' nungant. Than pam wanchangan minh may thakan wampathin God.antan. Nil puth pam priest alangan chaapar minh al-alantamana a' putha may wiy anangan aak ngench thayan aakanakan kal, thee'ow nungant God.antan, nilan yipam piip God.angan ke'-ngul ngaantam-ngeeyow way thanan yump-yumpin. 2Nil pam pi'an priest ilanganiya mee'miy nungantakam nil pam thayan ya'weya, nil thamana micha, puth nanpalan nil ngangk maman thanang, pam wanch wiy anangan than ke'an mee'miy woyan min piip God.antamana, puth thanan woyan way anman wak-wakantan. 3Puth nil pam priest thampana pam thayan ya'a, nil mich, nil nanpalan may minh thakana thee'ow piip God.antan, nil yipam God.angana ke'-ngul ngaantam-ngeeyow way nilam thampan yumpa, a' putha pam wanchangan thamp way yumpin. 4A' niiy inan ngeeyān thampa: nil pamangana ke' mi'iy nungamang pam pi'an priestan iiyow, ya'a. Nilam thonakam God.angan mi'iy work iikanakan, ke' nil keenkan pam Aaron.an mi' nunang workan iiyow nungant. 5A' putha Christ.ang thampana ke'am mi' nungamang pam pi'an priestan iiyow ngampar, ya'a, nil piip nungantam God.ang thonakam mi' nunang a' pam wuut pi'an paththam yump nunang ngul. A' nil God.an thaw ngul,
“Nint nhengk ngatharama.
Ngay nintang inman mi'ang moom pi'anan iiyān.”
6A' putha wik thon inangan thaw nungant,
“Nintiya priesta aak umpuyam iiy-iiyān ke' pam anan Melchizedek.an.”
Wik yimanangan lat ngench thayanangan waa'-waa'ina.
7A' putha ngay in thampan waa'ang niiyanta: nil Jesus.an aak ingan wun-wun-a, nilan thaa'-mamanang thaw-thaw nungant piip-kunchantan ke' kuchow nunang uthamanakan, nil mee' peeyanang thaw nungant, mee' kam ukanang. Nilan puth mee'miy piip nungantaman Goda wuut pi'an paththam, kaangk nilwey kaa'-piichanathiy nunang mulaman-a, an epa kaa'-piichanathiy nunang, puth ya'a. Nil God.angan wik ngeey nungantam a' ngangk thayanath nunang, nil yipam ke'an winynyang mo'ow mulamana. Nil puth wik Jesus.antaman ngeeya, nil puth Jesus.an puk nungantam thaa'-thayan ya'a, nil wik erkamim ngeey piip nungantaman. 8Than pam wanchangan way anman ke'-ngoongkam yump-yumpin nungant, puth nil Christ alangana wik God.antamana kan-kanam paththam kuyam ngeey-ngeey. Nungkway nil nhengk God.antaman-a, nil God.angan ke'am weekan than pam al-alangan wayan yump-yumpin nungant, nil puth nhengk nungantam aak mak thaampow, nil yipam piip-kunchantam anman wik ngeey-ngeeyow. 9A' nil kan-kanaman pam min paththaman iiy-iiyana, yaa, nanpalana pam ilangaman Christ.angana kaa'-piichanathow ngampang a' yalmathow ngampang koyam God.antan, ngampan yipama ngangk aak umpuyam wunāmp aak min nungantang angan. Nil pam wanch anangan ngulakaman kaa'-piichanathow thanang wik nungantaman ngeeyantan. 10Nil puth piip-kunch God.angana pam pi'an priest waa'an, ke' pam anan Melchizedek.an.
Ngampaniya Woyan Min Anman Ke'-Ngoongkam Wak-Wakāmpa
11Ngay inan kaangk putham waa'āng niiyantaniya, puth ngay want-wanttakan wik engk-engkanangan waa'ing niiyant, niiy puth kuchek thinhanweya, ke' yippak minam ngaantam-ngeeyaniy ya'a. 12Puth niiyiya Christians nathpalman iiy-iiyan, an niiyaniy putha wik min God.antamana thaa'-aathin thanang wiy anangana puth ya'a, niiy ke'am thaa'-aathaniy thanang. Niiyaniya ke' puk many thaa'-paapiy weenan, niiy puth wik manyam anman thiichan. Than wiyangan putham mak thaa'-aathayn niiyang, wik anangan thaa'-aathayn niiyang niiy keenkanaman ngeeyana. Puth niiyan ke' thuut kaath pi'anantam yaam mungk-mungkaniya, ke' may minh thayan ke' yippakan mungkaniy yimanangana. 13Pam wanch anangan ke' puk many thaa'-paapiyan iiy-iiyantan-a, thaniya ke'-ke'am minam thiichantan yippak woyan min piip God.antamana ya'a, an than ke' pam wanchakam ke'am emin yimanangan. 14Puth than pam wanch wiy anangana ep-paththam minan ngaantam-ngeeyantan an than ke' pam wanch kanam emin than may minh thayan ngul mungkantan, ke' thuutana ke'am ngul mungkantan. Thananiya woyan min anan wakantan, a' minam ngaantam-ngeeyantan thama a' putha thiichantan woyan min God.antam wanttakan wuna, thanana ke'-paal ngaantam-ngeeyantan minan yumpantan-a, putha wayan yumpantan, puth thananiya min yumpanakan mi'antan ngul.