Nil God.angan Aak Min Nungantamakan Kalow Ngampang Anangan Wik Nungantam Ngangkangan Pi'-Pi'anamp
41Nil piip God.an kan-kanam yimanangan thaw-thawan ngampar ngamp ngangk minangam wunāmp aak nungantamangan. Yaa, niiy in ngeeyāna: ngamp ke' eenchimp nungantama, nil puth ngul thaw ngampara, “Niiy aak ngatharamangan ke' ngoonchāna.” 2Puth ngampana wik min anangan God.antam kanam ngeeyampa ke' wuut mangk ngamparamangan wik minan ngeeyina. Puth ngangkangan ke' ngoonch thant, ya'a, an puth thanan ke'am minam ngaantam-ngeeyin wik anangan kan-kanamana, thanan ke'-ngoongkam iiy-iiyin. 3Puth ngampwey wik minaman ngeeyimp piip God.antaman-a, ngampaniya ngangk minangam iiyimp God.antang a' putha aak nungantamang wunimpa. Puth aak keenkanamana God.angan pam puungk wiy anangan waa' thanangweya thanan wik nungantaman man-ngeeyina, nil wik inangan thaw:
“Ngayan man kul paththam wampangan thant
a' ngay inan kan-kanam thawāng ngay ke' kaling thanang aak min ngatharamakana ya'a.”
Nil nathpalman keenkanaman aak inan yumpa, a' aak min nungantaman in kenyan yump, keenk yump pam wanch al-alantan. Nilaniya kuup-kuup ngul thanta, puth thanana ke'am iiyin aak min nungantamakana ya'a. 4Lat ngench thayanangan thawana, “Nil piip God.ana kinch sixangana workan iiy-iiya, aak inan yump-yumpa. Ngaa' thonang ngulan-a, nil kan-ngul work ke'anangan nyiin-nyiin, aak min nungantamang, nilan puth work nungantaman kanam minchath.”
5-6Pam wanch anangan wik min God.antaman ka'athaman ngeeyin-a, nil God.angan ke'am kal thanang aak min nungantamakan. Than puth wikan ngeengk-ngeengkin, than min-minaman ke'am ngaantam-ngeeyin ke'-paal thanana aak min God.antamakan ke'am iiy-iiyin, ya'a. Nil God.an aak keenkanaman thaw, “Ngay ke' kaling thanang aak min ngatharamakan, ya'a.” Puth nil God.ana kaangka pam wanch aak min nungantamakan iiyayn, nil putha pam wanch wiy anangan ep kalow thanang aak min nungantamakan. 7A' putha nil in-inman thaw-thawan ngampar. Wuut mangk ngamparam al-alangan wik ke'aman ngeeyin God.antamana, yaa, thananiy-a, aak pintalang angman uth-uthamin. Amanamana, kaap yotang kanan want thanang-a, God.ana wuut mangk ngamparam David alantan thaw-thaw a' nilaniya wik inangana lat ngench thayanangan ump-ump:
“Niiywey inman wik piip God.an ngeeyin nunang thaw-thawiy niiyant-a,
yaa, niiyaniya kuchek thayanan ke' iiy-iiyāna,
niiy wik ngeeyān nunang paththama.”
8Nil pam Joshua.angan kal thanang wuut mangk ngamparam anangan aak min Canaan aakanakana, puth aak anan ya'a ngampan ngangk aak umpuyaman wunāmp nungantang God.antangana -- nil God.angan aak in kenyan kaa'ngak ngampang. Nil ma'-yotam anman thaw-thawan ngampar wampāmp nungant nil yipam kalow ngampang aak min nungantamakan. 9Puth ngampa pam wanch God.antamana aak nungantang wunāmp ngul, ngampaniya ngangk min wunāmp ke' piip God.antan ngangk min wun work nungantaman kan-ngulan minchath. 10Ngamp aak God.antamak ngulan wampāmp-a, an ngampaniya ngangkang ngul thee'āmp workama, ke' nil God.an ngangkang thee' work ke'anangan ngul nyiinan. 11Ngampiya ke'-ngoongkam anman woyan min wak-wakāmpa, ngamp tham yipama ngangk minang wunāmp aak piip God.antangan. Ngampiya wik min God.antaman ke' ngeengkāmpa, ke' than keenkanamana pam wanchang wik kaangk ke' ngeeyayn piip God.antamana, a' anpalman than aak min God.antamak ke'am iiyin. Ngampaniya wik God.antaman ngeeyāmp paththama. Ngampwey wik ke'an ngeeyimp God.antaman-a, puth ngampaniya aak min God.antamakana ke' iiyimp, ya'a.
Wik God.antamana Ke' Nhengk-Peempan Ongk Pepan Paththam Yimanangan
12Nil God.an wik thawan ngampar-a, wik maal ya'a, wik thayanam thaw-thawan ngampar, waa'-waa'an ngampar woyan want-wanttakan ngangk minangaman iiyāmp nungantangan. Wik min God.antam anangana an ke' nhengk-peempan ongk pep-pepanam wonk kuchamang yimanangan. Ke' pamangweya nhengk-peempan pepanangweya pam thu'iy-a, yaa, an puyam pek kemp pamantangan ngoonchan, yaa, wik piip God.antamana yimanangan pek ngangkang ngoonchan pam wanchantangan ngamp wik min nungantaman ngeeyanamp. Wik God.antaman ngangk ngamparang ngulan ngoonchan-a, an ngamp mee'miy ngamp way anman yaaka' ngaantam-ngeey-ngeeyanamp, nath ya'a. 13Puth nil piip God.angan thath-thathan ngangk ngamparaman tham, ngampaniy putha ke'-ngul mo'imp nathan mee' God.antaman, nil kan thathan ngampang yotam want-wanttakan iiy-iiyanampa a' mee'miy thampa ngamp ngeenan ngaantam-ngeeyanamp kuchek waap ngamparamangana. Ngampan aak wuthanangan ke' ngoonchimp piip God.antamana ya'a. Ngampiya mee' nungantang iiy-iiyanamp wayan yumpanampa a' putha minan yumpanamp. Ngul-ngulaniya ngamp yotamana um nungantang ngul than-thanāmp.
Nil Jesus.ana Ke' Pam Pi'an Priest Ngamparam Yimanangan
14Ngampaniya Jesus.an puk nhengk God.antamana monkan-wak-wakanamp. Nilaniya kanam mat aak piip nungantam God.antamakana, a' nil thaa'-pant anman thaw-thawan ngamparam piip-kunch God.antan nil ke' yipam wayathow ngampang, an niliya ke' pam pi'an priest ngamparam yimanangan. Yaa, puth ngampaniya Jesus.an ke' wantāmpana, woyan min nungantam anman wak-wakāmp. 15Nil ngangk maman ngampang, puth nilan mee'miy ngampang, ngamp pam wanch karangk ya'a, ngamp micha. Puth nilan aak ingman thamp wun-wuna, ke' ngamp yimanangan aak inman wun-wunanamp. Oony wayangana a' putha pam wanchanga thaach-thaachin nunang way yot wiy-wiyam thakan yumpowa ke' than pam wanch wiyangan thaachantan ngampang way yot wiy-wiyam thakan yumpanakana -- puth nil Jesus.angana way ke'am yump ya' paththam. 16Nil Jesus.ana anman God.antang, yaa, ngampaniya ke' winynyang mo'āmp, ngamp thintham wampāmp nungant, a' ngangk thayanam wik thawāmp nungant. Nil puth pam min thayan paththam, puth ngampan ep mich pongam iiyanamp. Nilam thonamang ep ngangk thayanathiy ngampang. Than wiyangan thaachayn niiyangan way yumpanakan-a, nil ngul ma'-aathow niiyang a' niiyana aak thaampān, way anangan ke' yumpāna.