Nil Jesus.ana Pi'an Paththama, Nil Moses.an Ya'a
31Niiyalang, ngurp ngatharam-ang, niiy ngangk kanaman thee'an God.anta, niiyiy-a, pam wanch God.antam ngula. Nil ngampang ump, a' ngampana ngangk ngamparamang pi'-pi'anamp nunang ngul a' wiyant thamp waa'anamp nunang. Yaa, ngampana anman ngaantam-ngeey-ngeeyāmp nunang Jesus.ana, pam anman nil God.angan kuchan ngampar, nilama theetath nungamang ngampar nil yipam kalow ngampang piip God.antan. 2Nil work minam anman yump-yump work nil God.angan thee' nungant -- pam nil ke' Moses iiy-iiy yimanangana, work murkanim iiy, ke'im want, ke' Moses yimanangan iiy-iiy, pam wanch God.antaman keenkanamanim pi'-pi' thanang. 3Nil pam ma'-kunchang aawuch kaachiwwey-a, pam wanchangana thaa'-kuumpiythan nunanga, puth aawuch anan ke' thaa'-kuumpiythan ya'a, thananiya pam anan ep thaa'-kuumpiythan nunang. Nil Jesus.an ke' pam anana aawuch anan kaachan, ngampaniy ke' aawuch nungantam aak nilan wun-wunan. Ngamp ke'-paal Christ.an thaa'-kuumpāmp nunang, Moses.an ya'a. 4Aawuch ma'mangkaman ngampan thathanamp-a, than pamangan yumpin, puth nil piip God.angana way min ma'mangkam anana ka'atham nil yump. 5Nil Moses.angana pam wanch God.antam anangan minamim kal thanang, a' wik minamim waa' thant. Nil piip God.ant work iiy-iiy a' nil God.an wik anim waa'ant-a, Moses.angana wik anmanim waa'-waa' thant. 6Puth nil Christ.ana puk nhengk God.antama -- nilana work nungantaman min-minam yump-yump, a' nilaniya pam wanch God.antam anangan min-minam pi'-pi'an thanang ma'angam. Ngampwey nath ngangk thayanam anmanan monkan-wak-wakimp nunang Christ.an-a, a' puth ngangk minangaman ngaantam-ngeey-ngeeyimp nil kan-kanam ngul kalow ngampang aak nungantamakan-a, yaa, puth ngampaniy-a, pam wanch piip God.antam ngul iiyanampa, ke' aawuch nungantam aak nilan wun-wunan.
Ngampiya Wik Min God.antamana Ke' Ngeengkāmpa
7Ngampaniya wik inangan ngeeyāmpa, nil Ngeen-Wiy Min God.antam alangan keenkanaman waa' pam al-alantana, a' thanana umpin lat ngench thayananga, wik inangana:
“Nil God.anwey wik thawiy ngampar kinch inmanwey-a,
8yaa, ngampan wik ngeeyāmp nunanga,
ke' kuchek thayanan iiyāmp ke' wuut mangk niiyantaman yimanangana kuchek thayanan iiy-iiyin aak keenkana.
Nil God.angan wich thanang aak Egypt anpalan,
a' minam pi'-pi' thanang aak pintalangan
puth thanana kul thaw-thawin thaka
a' putha kuchek thayan yumpin thanttakam.
9Nil God.an thawa, ‘Nungkwaya thanana work wuut pi'-pi'anam anangan thath-thathin-a,
ngayan yump-yumpanga kaap thon-thonangana forty years.akam-a,
puth thananiya ke'-ngoongkam anman way yump-yumpin, than eenchathin nganyang.’
10Anpalan ngulan-a, ngayaniya nhinthan kan-ngul ngathanya,
puth ngayana kaangk ke'-ngul ngeeyāng wik thanttam anangan
a' ngayan thawanga, ‘Thanan puth kaangk way anman iiy-iiyayn,
puth thanan kaangk ke' wik ngatharaman ngeey-ngeeyayn, ya'a.’
11Yaa, ngayana man kul ngula paththam wampangan thant,
a' wik thayan inangan thawang, ‘Thananiya ke' iiyayn aak min aakanakana, ya'a.’ ”
Wik inangan nil God.an thaw.
12Ngay wik inan thaw-thawang niiyant al-alantan niiy ngangk kanaman thee'an God.anta: niiy kan min-minam ngaantam-ngeeyān niiyantakamana niiywey nath woyan min anman wak-wakina, nath ya'a. Niiy wayan ke' pi'-pi'ān ngangkangan a' Christ.an ke' man-ngeeyān nunang. An niiyaniy-a, puth God.an wantin nunanga yaaka' -- in way paththama. Nil God.aniya man-yethama, nil thath-thathan niiyanga. 13Yaa, ngaa' thon-thonana, niiy ngangk thayanathwun niiy-niiyantakam, niiy yipam wayana ke' iiy-iiyāna, ke' yipam God.an wantān nunang. Niiy wayan yump-yumpaniy-a, an way al-alanganiy-a, ak-wich-wichan niiyang, niiy yipam wik God.antaman ke'-ngul ngeeyāna. Niiy nath ngaantam-ngeeyina woyan wayan ke' min niiyanta, puth an min niiyant ya'a, an way paththam. 14Ngamp nathwey murkanam anman monkan-wak-wakimp nunang Christ.an-a, aak-aakanakaman ngamp mul ngulan wunāmp-a, yaa, an ngamp kan-kanam ke' kuunch Christ.antam iiyāmp.
15Than keenkana wik inan umpin lat ngench thayanangan:
“Nil God.anwey wik thawiy ngampar kinch inmanwey-a, wik ngeeyāmp nunang,
ke' kuchek thayanan iiyāmp ke' wuut mangk niiyantaman kuchek thayanan iiy-iiyin aak keenkan aak pintalang angana.”
Wik inangan lat ngench thayanang umpin. 16Puth than pam wanch anangan nil Moses.angan kal thanang aak Egypt.aman-a, than al-alanganiya wik God.antaman ngeeyin nilan thaw-thaw thant, puth thananiya kaangk ke' wik ngeeyayn nungantam ya'a, kuchek thayan ngul weenina. 17Kaap forty.akamana piip God.an eench-eench thanttam puth thanana way anman iiy-iiyin -- thananiya angman uth-uthamin aak pintalang angan. 18Nil piip God.an wik thayanam thaw pam wanch al-alantan than ke'aman wik ngeey-ngeeyin nunanga, “Niiy aak min aakanakan ke' iiyān, ngangk minangam ke' wunāna ngatharang.” 19An puth anpalana ngamp kan ngaantam-ngeeyanamp thananga thanan ke'-ngul iiyin aak min aakanakan, thanan putha ke'am min-minam ngaantam-ngeeyin nunang, ya'a, than man-ngeey-ngeeyin nunang.