Ngamp God.an Ngangk Min Yumpāmp Nunang
131Ngay wik inan waa'āng niiyant: ngamp Christians inangan kaangk wunāmp ngamparakama, ngamp ke' kuunch yimanangan iiyāmpa, puth ke' eenchāmp. 2Than pam wanch Christians nath wampiythan aak niiyantamakanwey-a, niiyan nath ngoongk-ngoongkam thanang, puth niiyan min-minakam pi'-pi'ān thanang aak niiyantamanganiy. Wiyiy than pam wanch God.antam al-alangan pam wiy thamp pi'-pi'in thanang keenkanamana, pam than ke'aman thathin thanang. A' thanan ngoongk-ngoongkam than pam inangan than ngaantiyongk paththam God.angan kuch thanang ke' pam yimanangan. 3Puth niiyiya pam prisoners thamp ngaantam-ngeeyān thanang. Niiy ngangk mamān thanang ke' niiy thampan wun-wunaniy jailangan thanttang. A' putha, than pam wiyanga wayanang al-alangan Christians wiy anangan piik-piikantan thanang a' thaa'-thengkathantan thanangwey. Niiy ngaantam-ngeeyān thanangweya, Christians ananganiy a' min-minakam pi'-pi'ān thanangwey, niiywey ngangk mamān thanang, a' putha ngangk way tham wunow niiyant thanttam al-alantamana.
4An mina pama a' wanchan ngentwunpulana a' niiy pam wanch ma' thum yotamangan ngangk minangam iiy-iiyān niiyantakama, niiyana maarichan ke' kee'ān wiyantan. Nil God.ang pam wanch wayanang waa'ow thanang anangan maarichan kee'antan, aak wayak kuchow thanang.
5Niiy wukal-weenthan ke' iiyāna, ke' kaangk wunān wukal al-alantaniy, nath niiy wukal yot pi'-pi'aniya, nath niiy wukal many pi'-pi'aniya, niiyan ngangk minam anman iiy-iiyān. Puth nil God.an thaw, “Ngayan niiyang ke' wanting. Ngayan niiyang ngul ma'-aath-aathāng.” 6Yaa, puth ngampaniya, an ep ngamp ngangk thayanam thaw-thawāmpa:
“Nil Lord.angan ngul ma'-aath-aathow ngampang.
Ngampan puth ke' winynyang mo'āmp.
Than pam wanchangan ke' wayathiythan ngampang, ya'a!”
7Than pam wiy al-alangan wik Christ.antam keenkanaman waa'-waa'in niiyanta, an than ya'-ngula kan uth-uthamin. Niiy ngaantam-ngeey-ngeeyān thanang. Thanan woyan Jesus.antam anman wak-wakin aak-aakanakaman mul ngulan wun-wunin. Woyan min thanaman meenathin niiyant-a, anman wak-wakān. 8A' in ngeeyān thampa: aak keenka nathpalmana, aak inan ke'aman yippak wun-a, nil Jesus Christ.an ep man-yetham wun-wuna, nil in-inman yippak man-yetham wun-wunan a' aak umpuyam ngul wunow. A' putha nil wiy-wiyaman ke' weeniy, ya'a, an nil anman wun-wunow aak umpuyam, ke' nil anman iiy-iiyan. 9Than wiyangan wik thon nath waa'iythan niiyantwey-a, niiyan ke' wik ngeeyān thanang, than ke' mee'-wichayn niiyang woyan min anpalan. Thanan wik thayan nath thawiythan niiyanta, “Inan mungkāna!” or “Nanan ke' mungkāna!” puth wik nanangan Christ.antam ya'a. Niiy ke' wik way anangan ngeey-ngeeyān thanttama. An wik Jesus.antam ya'a. Niiyan ngangk thayan ke' iiyān puth niiyan wik way anangaman ngeeyan. Nilam God.ang thonakam ma'-aathan ngampang a' ngangk thayanan yumpan ngampang.
10-12Aak keenkanamana than pam wanch God.antamangan minhanim kiingkin nungant God.antana. Minhan kanan menchanam-a, than pam priests al-alangan wiy mungkinim, wiy ya' ke'amim mungkin. Kaap thon-thonangan uw thanang-a, nil moom thanttam priests al-alantamangana, chaapar minhantam maay-maay a' aak ngench thayan paththam aakanakan kal-kal, minh inangan ngench, ke' mungkin. Chaaparangana yuk altaran ma' thethang mak-mak yipam nil God.angan way thanttaman ke'-ngul ngaantam-ngeeyow. Anpal ngulana, thanan minh menchanan aak thonak kechak kalin, aak pam wanch ke'aman wun-wunin. Aak ang ngulana than minh yotaman kiingk-kiingkin puth minh ngench. A' nil Jesus thampa, nil aak pi'an Jerusalem angan ke'am utham, ya'a, nil aak pi'an Jerusalem amanam kech yoon uthamwey. Nil chaapar nungantaman theetath, nil God.angan yipam way ngamparaman ke' ngaantam-ngeeyowa, ngampan puth yipam God.antang wunāmp. 13Ngampan putha, woyan wayan wantāmpa, a' Jesus anman monkan-wakāmpana. A' than nath pam wanch wiyangan thaa'-thengkathiythan niiyangwey-a, a' piik-piikiythan niiyangwey-a, yaa, thanan mak piikayn niiyang a' mak thaa'-thengkathayn niiyang thanan puth Jesus.antan yimanang thamp yumpin. 14Ngamp puth aak earthang ingan aak umpuyam ke' wunimp, ya'a, ngamp kuup-kuupanamp aak God.antamang ngulan wunāmp aak umpuyaman. 15A' ngampan puth ngeen thee'āmp nungant God.antan e? Ngampan puth mak piip God anman thaa'-kuump-kuumpāmpan. A' puth ngampaniya Jesus.ant ma'-yotam thaw-thawāmp nungant, “Nint moom nganttama. Ngan thankyou thawān nungkara, puth nint ma'-yotam ma'-aath-aathangan nganang.” 16A' puth inan thamp: ngamp thant pam wanch wiyantan ngangk minangam iiy-iiyāmp a' min-minakam pi'-pi'āmp thanang. Than may a' ngook ke'anang thakanwey-a, ngampana thee'āmp thant. Nil God.angan thathan ngampang thanang ma'-aathanampan-a, yaa, nungantan ngangk min wunow.
17Than pam wiyangan ministers a' wuut manth-thayan al-alangan ma'-aath-aathantan niiyang woyan God.antam wakanakan. Niiy wik ngeeyān thanang a' ma' thanttang iiyān puth thanan ma'-aath-aathantan niiyanga, ke'aman eench-eenchantan, niiyan puth woyan minan yipam ke' wantāna. Thanan puth mee'miy nil God.angan thath-thathan thanang a' ngulana nil waa'ow thant, thanan work minan iiy-iiyin, nath ya' yaaka', than nath way iiy-iiyina. Niiyan wik ngeeyin thanangwey-a, yaa, thanan puth work thanttaman ngangk minangam iiy-iiyayna, puth niiy ke'an wik ngeeyin thanangwey-a, yaa, thanan puth ngangk way iiy-iiyiythan, puth wanttak ma'-aathiythan niiyang.
18A' niiy ke'-ngoongkamana mee'-wuth-wuthanamān nganta. Nganan puth ngul-nyaa'ana ke' wunan mee' God.antangan ya'a, puth ngangk nganttamana woyan min aakanakan kaangk wun. 19Ngay inan putham thaa'-mamanang thawang niiyanta, niiy mee'-wuthanamān ngathar God.antana, nil God.angan yipam ngayang ma'-aathow a' ngayan yipam palaman erkam wampāng niiyanta.
Ngay Niiyant Inana Mee'-Wuthanamāng Nungant God.antan
20A' ngay niiyant mee'-wuth-wuthanamang nungant God.antan, wik inangan thaw-thawāng nunganta, “Piip God.a, nint nganang karpam nenchanathān nungkarang ngangk minangam yipam iiy-iiyāna. Nint Lord Jesus.an mulaman ekathan nunang. A' nil pam wanch nungkaram min-minakam pi'-pi'an thananga, ke' nil pam shepherd minangan minh sheep nungantaman pi'-pi'an thananga. Nil chaapar nungantam theetath a' puth nanpalana, nintan thawan ngan pam wanch nungkaraman iiyāna. 21God-ang, nip Christ.angana, pam wanch inangan ma'-aathow thananga, thanan puth yipam woyan nungkaram wakayna, ma'-aathow thanang thanan minam yipam iiy-iiyayn mee' niparangana, a' puth nganan Christ.an min waa'ān nunang umpuyama. Yey, kan-kanama.”
Niiy Ngangk Minangam Wik Ngatharam Inanganiy Ngeeyāna
22A' ngay inan thaa'-mamanang thawang niiyanta, niiy wik ngatharam min-min ngeeyān, puth ngay wik inangan ump-umpangan yipam ngangk thayanathow niiyang. Ngay lat ongk ke'am umpangana, ya'a, in otang yaan umpangan niiyanta. 23A' in ngeeyāna: than pam soldiersangan ngurp ngamparam Timothy.an jail anpalan kanam kuchin nunang. Nil erkam wampowa ngatharwey-a, yaa, nganan karpam puyan wampān niiyant.
24Waa'ān thant pam wanch God.antam al-alantana, church nanana a' putha elders al-alantan, ngan ngaantam-ngeey-ngeeyanan thananga. A' than Christians aak Italy punchan al-alangan thamp ngaantam-ngeeyantan thananga. 25Ngay kaangk nil God.an ngangk minangam iiy-iiyow niiyanta, yey, kan-kanama. Anman kan.