Nil God.an Piip Ngamparama
121Yaa, ngampaniya ngaantam-ngeeyāmp pam wanch anangan than keenkan monkan-wak-wakin nunang God.an, than ke' yaman than-thantan ngamparangwey a' thath-thathantan ngampang Christians.ana. Yaa, ngampaniya min-minam iiyāmpa. Ngamp ke' race yimanangan mo'-mo'anampa, kamp othamayan yuurpaman mo'-mo'anamp. Kulich yotan kempangan ke' ngoonchāmp putha way min ma'angan ke' kalāmp thamp, an puth anhan yumpiy ngampang. An puth ke' aak yimanangan wuna: pam wanch wiyangan way min min-miniy ngaantam-ngeeyantan, ke' puth wantiythan. Wik God.antaman kon-ngathan thanang, ngangk thanttamana way min aakanakaman wun-wun thant. Pam wanch wiy anangan-a, kaangk way anman yump-yumpayn. Kulich yotan ke' ngoonchimp race.angan, an ke' way al-alangan koyam wich-wichan ngampang, othamayanan kamp ke' mo'imp. Yaa, ngampanwey-a, Christ.an monkan-wak-wakāmp nunang minam anmanweya, wayana wantāmpa, ke'-ngul yumpāmpa, ngangk thayanam yuurpam anman woyan min wak-wakāmp God.angan meenath ngampar. 2Ngampan ke'-ngoongkama wik ngeey-ngeeyāmp nunangana Jesus.ana. Woyan min ka'athaman nilaman wak-wak, -- yaa, ngampaniya woyan nungantam anman wakāmp. Nilam thonakam ngul ma'-aath-aathow ngampang woyan min God.antaman wak-wakāmp. Nil puth Jesus.angana ke'am week kemp nungantaman; nil aak thaampwey yuurpam iiy yuk wuuyanakan a' utham ngampar chaapar nungantam theetath ngamparwey. Thanan yuk wuuyanangan waanchin nunang nil yipam ngul-nyaa' wunow, puth ya'a, nil ke'am ngul-nyaa'an wun yuk wuuyananganwey ya'a, puth nilan kanam thiich nil ngangk min ngul iiyow. A' amanamana nil koyam ngul mat aak heavenak in kenyana a' nilana moom wuut pi'an ngul iiy-iiyan nungantang God.antangan.
3Niiy nathwey eenchin ngula a' ngaantam-ngeeyin ke' woyan min God.antaman wantanakana. Puth niiy ngaantam-ngeeyān Jesus.ana niiy yipam ke' eenchānweya. Than pam wanchangan God.an ngangk-wayangama kal-kalin nunanga, thanana thaa'-thengkathin nunang Jesus thampan, puth nilana anman God.an monkan-wak-wakan nunang. 4Pam wanch wiyangan thaachantan niiyang woyan minan yipam wantāna, puth niiyana ke' ngeeyān thanang, niiyan thaampān thanang. Putha niiyana ke'am yippak way anangan thaampan ke' nil pam Jesus alangan ep thaamp way anangana, puth than pam wanchangana mulathin nunang, niiyangan ep ke'am mulathin ya'a. 5Puth kan kon-ngath niiyangwey ey? wik min anangan lat ngench thayan anpalan ey? Nil piip God.an wik inangan thaw-thawan niiyantan niiy yipam ngangk minangam iiy-iiyāna. Nilaniya ke' piipiy wunpanam wik inangan thawan puk nungantamakana:
“Ayyang puk ngatharam-ang, niiy nath wayan yumpān-a, ngay God ilangana wakāng niiyang.
Niiy min-min ngeeyān ngayang, puth ngay thaa'-thengkanang ke' waking niiyang ya'a.
Niiy puth ngangk wayan ke' wunāna.
6Nil piip God.an wee'-wee'antan kaangk wunanweya a' putha puk nungantaman waa'an thanangwey-a,
an nil wakan thanang puth nil kaangk wunan thantwey, nanpalan.”
7Yaa, nil God.angan nath wakow niiyangan-a, niiyaniya ngeeyān nunang a' aak thaampānweya, nil mak wakow niiyang, yaa, puth amanamana, niiyan ngaantam-ngeeyān niiy puth puk nungantam paththamweya. Nilaniya ma'-aathan niiyangweya pam wanch puk minam yipam iiyāna ke' piip thanttamangan puk thanttaman ma'-aathantan minaman iiy-iiyayn. Than puth puk thanttamangan wayan yumpantan-a, yaa, piipiy al-alangana wakantan thanang, wiyiya thepantan thanang, wiyiya aak nath kuchantan thanangweya. 8Nil piip God.angan ke'an wakiy niiyangweya ke' nil puk nungantam wiy anangan wakan thanangwey-a, yaa, an puth meenathan niiyangana, niiyan ke' puk nungantam ya'ana. 9A' putha wik thonangan ina ngeeyāmpa: piipiy ngamparam aak imanamana thananiya wak-wakin ngampang puk wayan iiy-iiyampa, yaa, ngampaniya mee'miy ngul iiyamp thanan ma'-aath-aathin ngampang puk min yipam iiyāmpa. Puth nil piip God.angana ngangk ngamparaman yumpa. Nil wakiy ngampangan-a, yaa, ngampaniya wik nungantaman ngeeyāmp paththama, a' anpalaniya, ngampaniya aak min nungantamang angan wunāmp. 10Piipiy ngamparamangana wak-wakin ngampangwey, wiyiya piik-piikin ngampangwey, aak anpalman ngamp puk manyiyan iiy-iiyampa than yipam pam wanch min yumpayn ngampang. Puth wiyiya than ke' mee'miywey want-wanttakan woyan minangan wunpayn ngampang, ya'a. Nil puth piip God.an epa mee'miy want-wanttakan minaman ma'-aath-aathow ngampang, wak-wakow ngampang thakan, ngampan yipam min iiyāmp ke' nil anman min iiy-iiyan. 11Nil God.angan wak-wakan ngampangan-a, an ngamp ngangk way wunanamp, ngangk minang ke'am iiyanamp ya'a. Puth anpalaniya, ngampaniya ngaantam-ngeeyanamp ngula nilan ma'-aathan ngampang minaman iiy-iiyāmp a' anpalaniya ngampana ngangk minangam ngul woyan nungantaman wak-wakanamp.
Ngamp Wik Inangan Ngaantam-Ngeeyāmpa!
12Yaa, ngampaniy putha ke' eenchāmpweya -- ngamp ke' ma' punth mich a' yangk mich ke' iiy-iiyāmpa, ngampaniya ngangk thayanam iiy-iiyāmp, ke'-ngoongkam anman monkan-wak-wakāmp nunang Christ.an. 13Puungk wiyanganiya woyan Christ.antamana min-minam ke'am wakantan, puth than mich yippak iiy-iiyantana, ngampaniya koochanam anman iiy-iiyāmp woyan Christ.antamang nilan meenath ngampara, ke' kung-enchan thu'āmp ya'a, ngamp yipam thanang wiy anangan ma'-aathāmp than yipam woyan min Christ.antaman minam wakayn.
14A' putha niiy ke' kulangan wakwun, ke'-ngoongkam ngangk minangam iiy-iiyānwey niiyantakam, a' minam anman iiy-iiyān. Puth pam wanch anangan thana way-wayaman iiy-iiyantan-a, thananiya piip God.an ke' thathiythan nunang a' putha aak min nungantamangan ke' wuniythan ya'a. 15Niiyiya pam wanch Christians.angan min-minam pi'wuna niiy yipam ke' wantān nunang piip God.an, puth niiy wee'-wee'anangan wantān nunangwey-a, nilan ke' ma'-āathow niiyang. Niiy ma'-aath-aathwun niiy yipam wayan ke' yump-yumpān, a' putha wik thaa' poch-pochaman ke' thawān, a' putha niiy kul kath anangan ke' ngangk niiyantamangan pi'-pi'ān. Puth niiy yotaman way paththam ngul weenan. 16Niiy ma'-aath-aathwun niiy ke' yipam way-wayam paththam ngul weemāna ke' pam Esau.ana nil way paththaman iiy-iiy aak keenkanamana. Nilaniya meech-meecham weena, nil thaw pont-kunchantan, “Nint ngayang mayan aathān-a, a' putha nintaniya ke' puk kaa'-ngeecham yimanangan iiyāna a' nil piip God.ana min iiy-iiyow nungkar ke' nil puk kaa'-ngeechamantan min anman iiy-iiyan thantweya.” Nil Esau.angan may thonakam ngaantam-ngeey, God.an ya'a. 17Niiy mee'miya ngul-ngulana, nil Esau alangan kaangk piip nungantamana wik min thawowant nil God.an min yipam iiy-iiyow nungant. Nil puth piip-kunchan “ya'” thawant. Nil Esau.an peey-peey ngul piip-kunchant puth nilana kaangk koyam puk kaa'-ngeechaman iiyow puth ya'a, nil kan waa'ant pont-kunchant.
18Niiyiya pam wanch piip God.antam ngul iiy-iiyaniya, puth niiy ke' Jews anangan keenkan wunin ya'a. Niiyiya ke'am um yoyk Sinai aakanakan than-thanan, ke'am thathan thum nganth karkanangan pench-pench; niiyaniya ke'am ngeey-ngeeyan ngakana wik othamayanan peey-peeya; a' puth niiy ke'am thathan aak ngaa' paththaman ke' thanan keenkan thathina. 19-20Puth niiyaniya ke'am ngeeyan yuk trumpetan ke' thanan keenkan ngeeyin, a' putha niiyaniya man awal God.antaman thampa ke'am ngeeyan. Than Israelites.angan man awal God.antaman ep ngeeyin. Thananiya ngangk winynyang paththam mo'inwey, puth nilan thaa' thayanam thaw thant, “Niiy yoykana ke' ma'angan mamāna. Nil wee'angan mamow-a, niiyiya mulathān nunang paththam. A' puth minh al-alangan tha'angwey maakayn-a, niiyiy paththama kunttow maayān a' piik-piikān thanang mulakama.” A' thananiya Moses.antan thawin, “Ngan kaangk ke'-ngul man awal God.antaman ngeeyān.” 21Nil Moses.ang yoykan thath-a, nilan thamp winynyang ween a' thaw ngul, “Ngay in akangam than-thanang a' winynyang paththam weemang.”
22Puth ngamp Christians inangan ep-paththam thintham wampanamp nungant God.antan nil man-yethaman anman wun-wunan aak umpuyamana ke' uthamiy ya'a, ngampiya ngul iiyāmp aak-aakanakan nilan wun-wunan aak in kenyan. Aak anganiy ngaantiyongk thaa'-wantanamana wun-wuntan. Thananiy aak ananiy waa'antana Jerusalem ngench thayan paththaman, wiyiya Mount Zion waa'antana. 23Ngampaniya pam wanch God.antam karpam iiyanamp aak-aakanakaman ngamp yotam karpaman yalmathwump piip God.antangan a' putha ngangk minangam wun-wunāmpwey. Ngampaniy yotama ke' puk kaa'-ngeecham God.antam yimananganwey. Nil God.angan puk nungantam waa'an ngampangan a' putha namp ngamparamana kanam latangan ump aak in kenyan ngamp yipam aak-aakanakan iiyāmp. Ngampaniya aakanakan iiyāmp God.antana, nilan um nungantangan ngul thanathow ngampang a' mep-mepow ngampang pam wanch yotam anangan. A' puth ngampaniya karpam ngul wun-wunāmpwey pam wanch wiy al-alantangan than keenkan matin nungant. 24Ngampaniy Jesus.antang ngul iiyāmp, nilan utham ngampar nil God.an yipam wik nyiingkanaman thawow ngamparan, wik anangan ya'a nil keenkanaman thaw Moses.antana an ya'. Nil Christ.ana ke' pam Abel anan ya'a, an nil-nila. Nil Abel.an utham-a, an ke' chaapar nungantam aakaman pech, “Cain anan mulathān nunanga, nil puth ngayang mulatha.” Puth Christ alangan chaapar nungantaman theetath ngampar nil God.an yipam kon-ngathow nunang way ngampan yump-yumpamp, a' puth puk nungantam ngulan waa'ow ngampang.
25Yaa, ngampaniya ke' thaampāmp nunang piip God.ana, nil anman thaw-thawan wik nungantam anangan ngampara. Aak keenkanamana, than pam wanchangan ke'aman wik God.antaman pi'-pi'in-a, wik anangan pam Moses alantangan want-a, nil piip God.angana way paththam yump thant, thanan puth ke'am appenchin ya'a. Puth ngampaniya kanam wik God.antaman ngeeyamp nilaman kuch ngampar Christ.antangan aak anpal kenyan. Ngamp ke'wey ngeeyimp wik anangan-a, nil God.angan paththam wayathow ngampang, ngampaniya ke' puth wuth-wuthanangan ngoonchimp nungantaman ya'a. 26Nil piip God.angan waa' pam Moses alantan wik thayan paththam nungantam anangan-a, wik nilan thaw Moses.antan-a, wik nungantamangan-a, aak ya' wunyath. Puth anpalan-a, nil thaw ngampar, “Ngay aak inan puthaman ngul wunyathānga. Ngayaniya aak umyompanam inana putha aak in kenyan wunyathāng ma'-thonam ngula. A' amanamaniya, ngayaniya ke'-ngul aakan wunyathāng ya'a.” Ee'a, nil piip God.an kan-kanam thaw. 27Ngayiya wik inangan God.antam engkanathāng niiyant. Nil God.angan waa'an yuk way min ma'mangkam nilaman yump aak umyompanam inmana putha aak in kenyan, nilaniya wuny-wunyathow, amanamaniya aak umyompanam aniya minchow ngul. Puth nilam piip God.ana a' putha pam wanch nungantam anangan than ep minam wunayn, ke' minchayn putha aak nungantam thamp minam wun-wunow.
28Yaa, ngampaniya ngangk minangam iiy-iiyāmpwey a' thaa'-kuump-kuumpāmp nunang piip God.an puth nilan kalow ngampang aak nungantam aakanakan, ke'an minchow, aak anana ke'an wunyathow ya'a. Yaa, ngampana ngaantam-ngeeyāmp nil piip God.an moom wuut pi'an paththama, nilam anman thonakama, wiy ya'a. Yaa, ngampana wik ngeeyāmp nunang a' monkan-wak-wakāmp nunang thama nil yipam ngangk min wunow. 29Yaa, ngampana inan ngaantam-ngeeyāmp: nil piip God.an ke' thum yimanangan, nilana wayathow thanang pam wanch wayanang anangan than ke'an kaangk wuntan nungant.