Chaapar Minhantam Alangan Ke' Kaa'-Piichanathiy Ngampang Way Ngamparam Amanaman, Ya'a
101Nil Jesus Christ.angan woyan nyiingkanam wampath pam wanchant thanan yipam minam iiy-iiyayn. Nil wampan-a, nil yipam ngampang kaa'-piichanathow ngampan yipam woyan min nungantaman wakāmp a' nungantang ngul yipam aak umpuyaman wunāmp. Wik thayan keenkanam Moses.antamangan waa' ngampara nil Jesus.an ngul-ngulan wampowa, a' waa'ow ngampar woyan min paththam nyiingkanam alantamana. Puth wik thayan keenkanam alangana woyan chil min meenath ngamparweya, yotaman ke'am meenath ngampar, ya'a, manyam anman meenath. 2Thananiya minh-a, puth yuk way min thakan kal-kalin tabernacle.akan, puth ngangk min ke' yippak wun thant, thanan ngeechanin ngangk thanttamang than ngul-nyaa'im iiyin. Ngangk thanttam pachan wuniy-a, an epa thananiya ngul-nyaa'an ke' wuniythan, a' putha minha yuk way min thakan ke' kal-kaliythan piip God.antan. 3Puth thananiya, kaap thon-thonana yaam yippak minha yuk way min thakan kal-kalin God.antan. Yaa, puth amanamana thananiya anman kan ngaantam-ngeeyin thanttakaman thanan pam wanch min ya'an, way yippakan iiy-iiyin, 4puth minh bulls.antam-a, a' putha goats al-alantaman chaapar alangan ke' kaa'-piichanathiy ngampang way ngamparam anpalan, an ya'a.
5Puth nanpalana, nil Christ ngulan uk aak inpal kenyan aak iikanakan-a, nilan thaw piip-kunch God alantan:
“Nint kaangk ke'wey ngayan minh bullocks, goats a' yuk way min thakan thee'āng nungka.
Nintan pamak ngulan yumpan ngayang ngayan puth koyam ngul theetathāng ngathamang thant pam wanchantan mak mul wunāng.
6Than pam wanchangan minh anangan wampathantan aak ngench thayan nungkaramakan
a' than priests al-alangana kiingkantan ngul,
nint yipam ke'-ngul ngaantam-ngeeyān way thanttamana thanan yump-yumpin.
Minh wiy anangan-a, puncham kiingkantan.
Puth ngangk min ke'am wun nungkar minh al-alantaman, ya'a.”
7A' nil Christ.an thaw ngul,
“Ayyang, God-ang, ngay ina,
ngay puth aak ingan wampangana nintang yipam wik ngeey-ngeeyāng nint ngeenan nathwey thawān ngathara ngay yumpāng nungk,
ke' than aak keenkanaman lat ngench thayanangan umpin, ngayangan waa'in.”
8Nil Christ.an ka'atham wik inangan thaw God.antan, “Than pam wanchangan minh anangan wampathantan aak ngench thayan nungkaramakan a' than priests al-alangana kiingkantan ngul, nint yipam ke'-ngul ngaantam-ngeeyān way thanttamana thanan yump-yumpin. Puth ngangk min ke'am wun nungkar minh al-alantaman ya'a.” Nungkway nil Christ.an mee'miy nil Moses.an thaw pam wanchantan minhan wampathayn God.antan-a, nil wik anangaman thawa. 9A' amanamaniya nil Christ.an thaw piip-kunchantan, “Ayyang, God-ang, ngay ina, ngay puth aak ingan wampangana nintang yipam wik ngeey-ngeeyāng nint ngeenan nathwey thawān ngathara ngay yumpāng nungk.” Yaa, puth amanamana piip God.an thaw pam wanchantan minh ke'-ngul wampathayn aak ngench thayan aakanakan. Ngeenam puth minhan ka'athaman wampathin e? Nil yipam God.angan way thanttam anangan ke'-ngul ngaantam-ngeeyow. A' nilaniya puk nhengk nungantam ngul kuchan ngampar aak iikanakan uthamow way ngamparamakan. 10Nil Jesus Christ.angan wik ngeey nungantam piip-kunch God.antaman, nil puth theetath nungamangwey uthamow ngampar yuk wuuyanangana, nil puth piip God alangana nanpalan ngangk pachath ngamparamana. Puth nil Jesus.ana ma'-yotaman ke'am utham ya'a, ma'-thonam anman utham kana.
11Puth priests yot anangana work iiy-iiyin ngaa' thon-thonan aak ngench thayanang angana. A' thananiya than-thanin um altar aakanakan a' minhan kiingk-kiingkin ngul ma'-yotam. Puth anpalan pam wanch anangan ke'am kaa'-piichanath thanang way thanttam anpalana, ya'a. 12-14Puth nil Christ.angan ma'-thonam anman theetath nungamang uthamow ngamparan yuk wuuyananganwey, nil God.angan yipam kaa'-piichanathow pam wanch ngampangwey way ngamparam anpalan, a' ngangk pachathow ngampang, a' min yumpow ngampang, aak anpalman pam wanch wuut mangkangan aak wakin-a, aak iikanakaman pam wanch nyiingkanamang ngulan aak wak-wakantan, a' puk thanttamang ngulan aak wakayn-a, puy-puyam ngul. Nilaniya ke'am puth-puthaman theetath nungamang ngampar an ya'a, ma'-thonam anman kan utham ngampar. Nil kanan utham-a, niliya piip-kunchantang God.antangan ngul nyiinan a' moom wuut pi'an ngul pul karpam God.angana. Nil Christ.an kuup-kuupan ngul aak in kenyan aak-aakanakaman nil piip God.angan pam wanch maalathowan thanang, than anangan ngangk-wayangaman kal-kalin nunang Christ.an, puth thananiya meek ke'-ngul iiyayn.
15Nil Ngeen-Wiy Min God.antam alangan tham waa' woyan God.antam nyiingkanaman. 16Nil puth ka'athamana wik inangan thaw:
“Nil Lord.an thawana: aakan ngul wampow ngay ngulan wik nyiingkanam wiy-wiyam anangan waa'-waa'āng thant pam wanch ngatharamakan,
a' putha ngayaniya ngul wik yump-yumpāng thanttanganwey, wik inangana:
ngayiy wik ngul thaw-thawāng thant pam wanch ngatharamakanwey,
a' puth wik ngatharam ngangkang ngul ngoonchow thanttang
a' than woyan ngatharaman ngul wak-wakayna.”
17A' nil inan thaw thamp, “Ngayana ke'-ngul ngaantam-ngeeyāng way thanttaman thanan yump-yumpin, an ya'-ngul.” 18Yaa, ngamp imanaman ngula, ngampaniya ke'-ngul may minh thakan kalāmp ngul aak ngench thayan piip God.antamakan nil yipam kon-ngathow nunang way ngamparam anangan ngampan yump-yumpanamp an ya'-ngula, nil puth kanam kon-ngath nunang God.an way ngamparam anangan. Nil ke'-ngul ngaantam-ngeeyow way ngamparam ananganiy ya'a -- amanamana, ngamp ke'-ngul minh kalāmp aak ngench thayanakana.
Ngamp Ngangk Thayanam Thinth-Thinth Ngul Iiyāmp Nungant Piip God.antan
19Yaa, ngamp pam wanch Christians inangana, ngampiya ngangk thayanam thinth-thinth ngul iiyāmp nungant piip God.antan, aak in kenya aak ngench thayan paththam, nil puth Jesus.anganweya chaapara nungantaman theetath ngamparwey ngamp yipam nungantang iiy-iiyāmp. 20Nil kanam utham yuk wuuyanangan-a, yaa, puth nanpalan nil woyan nyiingkanaman meenath ngampar God.antaman ngampan yipam wampāmp nungant God.ant. An ke' nil Christ.angan yuk curtainan maay ngul aak um-menhangan waanchin aak ngench thayan God.antamangan, ngamp yipam thinth-thinth wampāmp nungant God.antan. Woyan keenkan wun-a, kan-ngul minch thanttam, puth nil pam Christ anana man-yetham aak umpuyam wun-wunan, nil meenath ngampar woyan nyiingkanaman aak want-wanttakan wunowwey. 21Nil Christ.aniya priest wuut pi'an paththam, nil ma' nungantang pi'-pi'an ngampang pam wanch yot God.antam anangana -- 22yaa, puth ngampana ke' winynyang mo'āmp God.antamana, ngamp ngangk minangam iiy-iiyāmp nunganta. Ngampana mee'miy ngula nil Christ alangan woyan min nyiingkanaman inan yump ngampara, a' putha nil pachath ngangk ngamparam inangan ngotanamana pach yipam wunow, ngampan yipam ke'-ngul ngul-nyaa'an wun-wunāmpwey way yot ngamparam anpalan. Thanana kootra kuungkin ngampang, an kan meenathan aniya pach ngul iiyanamp. 23Ngampaniya in keny ngaantam-ngeey-ngeeyāmp ngampan puth mee'miy nil God.angan yipam kalow ngampang aak minak, yaa, ngampiya ngangk thayanam anman monkan-wak-wakāmp nunang Christ.an, nil puth God.an man-thonam, niliya ke' wik uuy-uuyaman ya'a, nil kan-kanam kalow ngampang nungantakamana ke' nilaman kaa'ngak ngampang. Yaa, ngampaniya ke' mel enchāmp woyan min nungantam anpalan. 24A' putha ngampiya ngaantam-ngeeyāmp ngamparakamweya a' ma'-aathwump thamp, ngangk minangam iiy-iiyāmp ngamparakamana, a' putha ma'-aathāmp thanangwey pam wanch anangan. 25Pam wanch puungk wiyiya ke'am yalmathwuntan yipam karpam mee'-wuthanamanakan God.antan putha thaa'-kuumpayn nunangan ya'a, ngampaniya murkanam anman yal-yalmathwump karpam mee'-wuthanamanakan piip God.anta puth ngaantam-ngeeyanakan wik nungantam anangan. Puth ngampaniya kan-kanam ngangk minangam kon-aathwump ngamparakaman ngamp yalmathwumpana, puth ngampan mee'miy ngul Christ.an palaman yaam ke'anam ngul wampow ngampar.
26Niiy in ngeeyāna: ngamp kan-kanam mee'miy ngul wik min Christ.antaman an kan-kanam paththam. Ngampwey koyaman iiyimp woyan way aakanakana a' Christ.an wantimp nunangan-a, nil wee' uthamow ngampar a? way ngampan yump-yumpanamp a? An ya' paththam a! Pam thon ke' Christ yimanangan ya'a. Ngamp nath Christ.an wantimp nunangwey-a, nil puth piip God.ana ke' kon-ngathiy nunang way ngampan yump-yumpanamp, ya'a. 27Ngamp wee'-wee'anangan nath way paththaman yump-yumpimpwey-a, ngampana ngangk winy-winynyang kuup-kuupimp nungant God.antan, nil nath kuchow ngampang aak nungantam anpalan aak wayaka, an puth way-wayam ngamparaniyweya. Nil God.aniya ngangk kul karkan weemow thant pam wanch al-alantan than thaampantan nunangan a' puth than ngangk-wayangan kal-kalantan nunang, nil puth piip God.angan ngul wayathow thanang. 28Aak keenkanamana, pam wee'ang nathwey wik thayan pipiwa Moses.antaman, kaangk ke'an ngeeyow-a, pul nath pam kuchamang waa'iypul nunang wuut manth-thayan al-alantan, nath than pam ko'alamangweya, thananiya mulathiythan nunang pam nil wik thayanan pip, an than ke' ngangk mamiythan nunang ya'a. 29Kan niiy in ngeeyāna: nil nath wee'angweya Moses.antaman woyan minan wantow-a, yaa, an puth way nungant, puth nil wee'anganweya ngangk-wayangam kalow puk nhengk God.antaman-a, yaa, an puth ep way-wayam paththam nunganta. Pam anan nath thawiy chaapara Christ.antamana ke' way-wayam paththam ngampara, an puth ya'a, nil Christ.angan chaapar nungantam theetath ngamparwey nil yipam piip God.angan ngangk pachathow ngampang, ke' nil keenkanaman kaa'ngak ngampang. A' puth pam wiyangan nath aak-ya'ang waa'iythan nunang Ngeen-Wiy Min God.antaman, nilan puth min anman iiy-iiy ngampara, thanwey konchiythan nunang, a' thaa'-thengkathiythan nunang thakana. Puth amanamana, nil God.angan wayathow thanang, way-wayam paththam yumpow thantwey pam al-alantaniya. 30Puth ngampan God.an mee'miy nunang, puth nil wik thaw yimanangan, “An puth work ngathara ngayan wayathāng thanang pam wanch anangan. Ngayam thonakam wayathāng thanang pam wanch wayan iiy-iiyantan.” Puth nil piip God inan thampa thaw, “Ngay piip God niiyantam ilangana um ngatharang thanathāng niiyang pam wanch ngatharam inangan, ngayaman ngul thawāng ngay nath wayathāng niiyang, nath ya'a.” 31Pam wanch wee'-wee'anangana nil God.angan wayathow thanang-a, an way-wayam paththam thant, ngangk akangam thanayna, nil puth God.an murkanim anman man-yetham wun-wunan.
32-33Niiy kan niiyantakaman ngaantam-ngeeyāna: niiy ka'athaman ngangk niiyantaman thee'an Christ.antan-a, than pam wanch anangan way-wayam paththam iiy-iiyin niiyantwey way thak yumpin niiyantan. Wiyiya than thaa'-thengkathin niiyang mee' yotantangwey, wiyiya piik-piikin niiyang. Wiyiya than pam wanch wayanang al-alangana than way tham yump-yumpin thant pam wanch puungk wiy God.antam al-alantan. Niiyan puth ngangk maman thanangweya, a' niiyan puth thanttang ngul nenchananweya. Puth an-aniyangana niiyan ke' wantan nunang Christ.an ya'a, niiyana ngangk thayanam monkan-wak-wakan nunang. Niiyang wik anangan ke' kon-ngathow, kuchekangam pi'-pi'ān. 34A' than Christians puungk wiy anangan jailang thenchin thanangan-a, niiyiya ngangk maman thanangwey a' minam pi'-pi'an thanang. Than puungk wiyangan-a, way min thak ma'-kuchathin niiyantam, puth niiyan ke' thawan way min amanaman putha niiyantan man kulan ke' wamp, ya'a, niiyana ngangk minangam iiy-iiyan an puth niiy mee'miy nil piip God.an min iiy-iiyan niiyant, an niiyana aak umpuyam wunān aak God.antamang -- in min paththam niiyanta. 35Yaa, puth anpalana, niiy ngangk thayanam anman iiy-iiyān Christ.antang, ke' wantān nunang Christ.an. Puth nil God.angan thath-thathan niiyang, anpalan nila ngangk minangam iiy-iiyow niiyant, aak min nungantamak kalow niiyang. 36Niiy ke' eenchān, ngangk thayanam puy-puyam iiy-iiyān niiy yipam minam iiyān ke' God anman thaw niiyant. A' amanamana, nilaniya min iiy-iiyow niiyant ke' nilaman thaw niiyant. 37Puth nil God.angan wik inangan waa'an lat ngench thayanangan:
“Yaam ke'anaman-a, nil Christ.an palaman wampow niiyant,
puth aak yaaman ke' kuupiy, ya'a.
38Pam wanch min-miniy ngatharam al-alangana wik ngul ngeeyayn ngayang, puth ngangkangam pi'-pi'ayn ngayang,
a' putha aak ngatharang ngul wunayn.
Nil wee'angweya ngayangan wantow-a, woyan min anpalan weentow-a, man-mangkaman thee'owar-a,
ngangk min ke' wunow ngathar nungantam anpalana.”
39Puth ngampaniya ke' man-mangkam thee'āmp God.antan, putha ke' wantāmp nunang, ya'a -- yaa, puth amanamana, nilan ke' kuchiy ngampang aak nungantam anpalana. Ngampaniya ep-paththam murkanam anman ke'-ngoongkam ngangk ngamparamangan pi'-pi'āmp nunang, a' putha monkan-wak-wakāmp nunang thamp a' nilaniya ngul kalow ngampang aak nungantamak.