HEBREWS
Lat Inan Pam Wanch Hebrews Al-Alantan Umpin
Nil God.angan Puk Nhengk Nungantam Kuch Wik Min Thamp
11Aak keenkanamana nil God.angana wuut mangk ngamparam al-alantan wik many-manyam waa' thant. Nil wikim kuch thanttang, pam prophets nungantam al-alantang, than wikan yipam waa'ayn pam wanchantan. Wiyiya God.ana pithang thaw thant, puth wiyiya ngaantiyongk wampin thant. A' ngul-ngulana than wik chil yot ngul waa'-waa'in thanta pam wanchantan, nil yimanamana. 2A' aak ngul-ngulana God.angana puk nhengk nungantam anan kuch nunanga wik min thampa, nilan-a, waa'-waa' ngul ngampara. Aak keenkanam anpalmana, nil piip God.an thawa nhengk nungantam alantan aakan yumpow thamp, aak inman umyompanamana putha aak in kenyan, a' putha nil God.an thaw yuk way min aak an kenyana a' putha yuk way min aak inpalana an nungantam thamp puk nhengk ngatharamantam. 3Nil nhengk nungantam ke' piip God anmana, thonam anman pulaniya, pam pi'ana a' pam minam paththama. Nil nhengk God.antam alangan aak inmana ma' thayanang pi'-pi'ana. Nil puth uthama a' putha thaa'-pant thawan ngamparam nil God.angan yipam ngangk pachathow ngampang way anpalan a' amanamaniya nil aak keny ngulan mat, pam pi'an karpam iiyanpul God.anga ke' thonam yimanangana.
Nhengk God.antaman Wuut Pi'an, Ngaantiyongk Anangan Ya'a
4Nil God.angan pam thonam anman nhengk waa'an nunang, nil ngaantiyongk nungantam anangan puk nhengk ke'am waa'an thanang ya' paththam. Nil nhengk nungantamana wuut pi'an thampa yump nunang -- ngaantiyongk anangan ya'a. 5Nil God.an wik inangan ke'am thaw thant ngaantiyongk al-alantanweya,
“Niiy nhengk ngatharama.
Ngay niiyangan mi'ang moom pi'an iiyān ngatharangana.”
A' putha nil wik inangan ke'am thaw thamp ngaantiyongk al-alantanweya,
“Ngayiya piip niiyantam ngul iiyāng,
niiyiya nhengk ngatharam ngula.”
Ya'a, nil God.an wik yimanangan Christ.antan ep thaw, puth ngaantiyongk al-alantan ya'a. 6A' puth inan thampa, nil God.angan puk nhengk nungantam kaa'-thonaman kuch aak iikanakan-a, nilan thaw ngaantiyongk al-alantana,
“Niiy ma'mangkaman thuchān nungant a' putha thaa'-kuumpān nunang Christ.ana.”
7Nil God.angan mi' thanang ngaantiyongk anangana workan iiy-iiyayn nungant. Nil thamp thawa:
“Thananiya ke' wunt yimananga,
puth ke' thum nganthan pench-penchan yimanang thamp iiy-iiyantan.”
8Puth nil wik inan thawan nungant puk nhengk nungantam Jesus.antana:
“Nint ke' ngay anmana Goda putha nintana moom pi'an paththam wun-wunangan ngatharang aak umpuyama.
A' nint moom min-minam paththam iiy-iiyangan thant pam wanch nungkaramakana.
9A' nintam thonam anman min paththaman iiy-iiyangan,
way anangan nint kaangk ke'an.
Nintan puth kaangk thathān thanang pam wanch anangan minan iiyayn,
nint kaangk ke'-ke'am paththam thathān thanang wayan iiyayn.
Puth anpalmaniya ngaya piip nungkaram God.angana ngangk min paththam yumpāng nintang, ke' pam wiy yimanangan ya'a.”
10A' nil God.an inan thaman thawa nhengk nungantamak:
“Ayyang! Lord-ang! Aak keenkanamana, nint aak an kenyana yumpan a' putha aak inmanan yumpan.
11Aak inmana putha aak an kenyana ngul wayamowpul puth nintana ep aak umpuyamak wun-wunān.
Putha aak an kenyana a' aak inmanana an ke' kulich kath yimanangan ngul wayamowpul,
12a' nintana ke' kulich way kath yimanangan puyamam ngul thee'ān pulang.
Puth ngulaniya aak inmana putha aak in kenyana aak nyiingkanam wiy-wiyam weenowpul.
Puth nintana wiy-wiyamana ke' yumpin nungkamangan ya'a,
an nint anman wun-wunān aak umpuyamakan.”
Nil God.an wik yimanangan thaw nhengk nungantamakana. 13A' thon inan, nil God.an ke'am thaw ngaantiyongk nungantamakana:
“Niiyaniya moom pi'an ngatharang iiy-iiyāna
a' ngay ngul maalathāng thanang than niiyangan ngangk-wayangaman kal-kalayn.
Niiyaniya moom karangk paththam iiy-iiyān thanta.”
Nil God.ana wik yimanangan ep thaw nhengk nungantamak Jesus.antan.
14Puth ngaantiyongk ananganiy-a, thananiya oony min-miniy paththama nil God.angan kuchan thanang ma'-aath-aathayn thanang pam wanch anangan nilan kaa'-piichanathow thananga.