Nint Thawān Thant Woyan God.antaman Minam Wakayna
31A' putham kon-aathān thanang pam wanch anangan than yipmam wik ngeeyayn moom thanttam al-alantaman, pam pi'-pi'an al-alantaman. A' thawān thant min anman ngaantam-ngeeyayna a' min yumpayn, a' ma'-aathayn wiy anangan pam wancha. 2Wik inangan thawān thant, “Niiy ke' waa'ān pam wanch wiyaniya, niiyiya monkanam iiyān kulamana. A' min paththam iiyān pam wanch wiy al-alantan a' wik minam thawān thant.” 3Ka'athamana ngamp way anman thaa'-thaa' yump-yumpampa. Ngamp mee'miy nunang God.ana ya'ana a' ngamp ke'am wik erkam ngeeyamp nunang. Than wiyang wik way thakan waa'in ngampar, an ngamp ke' kan-kanam yimanangan ngaantam-ngeeyamp. Ngamp thaa'-thaa' wayan yump-yumpamp ngamp puth kaangk anman way yump-yumpampa. Ngampan ke' pam wanchanta way yumpimpa. A' pam wanchangan ngangk kulangam kalin ngampanga a' ngamp puthangkan ngangk kulangam kal-kalamp thanang. 4A' anpalaniya nil God.angan kan thathan yot ngampan way thaa'-thaa'an yump-yumpanampa, a' nil kan meenath ngampar nil kan-kanam paththaman kaangk wunan ngamparaniya a' putha ngangk minangaman iiy-iiyan ngampar. A' nilam kaa'-piichanath ngampang. 5Nil God.angan kaa'-piichanath ngampangan puth ngamp ke' min ey? Ya'a. Nil kaa'-piichanath ngampangan puth nil ep min a' ngangk maman ngampang yotamana. God.angan Ngeen-Wiy Min nungantaman kuch ngampar yipmam ngangk pachathow ngampangana anpalman wayan yump-yumpampa, ngampana yipam pam wanch nyiingkanam iiyāmp, ngampana ke' puk nyiingkanam yimanangan aak-ngeeyampa. 6Nil God.angan Ngeen-Wiy Min nungantaman kuch ngampar puth anpalan Jesus.angan kaa'-piichanath ngampanganiya. Nil God.angan ngangk minangam kuch nunang ngangk ngamparamangan ngoonchowa, a' ma'-aathow ngampangan min-minam paththama. 7Puth anpalaniy-a, nil God.angan min-minam paththam pi'-pi'an ngampanganiya a' ngampaniya ke' puk nungantama. Nungkway ngamp way iiy-iiyamp ka'athaman-a, nil puth min iiyan ngampar, a' kan kon-ngath nunang way ngamparam anpalana a' nil thathan ngampang ke' min ngula. A' ngamp kan ngaantam-ngeeyanamp ngamp puth wunāmp nungantangan aak umpuyamana. 8A' puth wik inangana kan-kanam paththama.
Ngay kaangk ninta wik inangan anman waa'-waa'ān pam wanchantan than wee'-wee'anangan ngangkangan pi'-pi'antan nunang God.an, than yipam anmana ngaantam-ngeeyayn min yumpanak ma'-aathayn thanang pam wanch wiy anangan. 9Than pam wanchang wik way-way thakan waa'antan a' puth thaa'-thay-thayanamantan thakan-a, nint al-alantangan thanttang ke' ngotan ngoonchāna. Thanan wuut mangkantam namp thath-thathantan, lat ongkangan wuntana anpalana than kul yumpantan namp anpalman. Than wik thayan anpalmana thamp kul yumpantan. Wik thanan thawantan-a, wik wayanang paththam thawantan, aak-ya'ang anman thaw-thawantan. 10Nil wee'ang nath kulan yumpow-a, nint wakān nunang, ma'-thonam ya'a, ma'-kuchama, nil ke' yipam puth-puthaman kulak wenkow thant. Nil ke'wey wik ngeeyow nintang-a, nint kan wantān nunang. 11Nint kan mee'miy nunang nil pam ilangan kan mee'miy nil min wanttakan iiyow, puth nilaniy-a, kaangk way anman iiyow. An nilam mi' wayan yumpanaka.
Ngamp Christians Yotaman Minam Iiyāmp Ngamparakam
12Ngay pam Christian yiip kuchāng nungkar Artemus, ya'amiy-a, Tychicus yaaka'a, a' nil ngulan pam wanch pi'ow thanang aak angan Crete Island.angan. Work nungkaraman iiyow. Nil thonam wee'-nathan wampow-a, nint pal kaaw iiyān ngathara aak town angan Nicopolis.angana. Ngay puth onchan minangan-a, angman wunāng. 13Nintiya minam pi'ān pulang pam kucham anangana, Zenas a' Apollos.angan, nil Zenas.angan-a, wik thayanan pi'-pi'an. Pulan wampowpul nungkaran-a, nint may thee'ān pulant, a' aak mi'ān pulant wunanakan. A' puth ma'-aathān pulang minam iiyowpul woyan wakanan. 14Ngamp Christians yotamana minam iiyāmp ngamparakam a' minam work iiyāmp, may ngamparakam piiyāmp, a' wiy al-alantan thee'āmp. Ngamp ke'an ma'-aathāmp pam wanch wiy anangan-a, ngamp way-wayam paththam iiyanamp.
15Than pam wanch Christians il-ilangan wik kuchantan nungkar puth thananiya ma'-yotam ngaantam-ngeey-ngeeyantan nintang. A' nint nganang waa'ān thant pam wanch nal-nalantan ngan ma'-yotam ngaantam-ngeey-ngeeyanan thanang, pam wanch nananganwey than piip God.an ngangkangaman pi'-pi'antan nunang, a' putha nanangan thamp ngantan kaangkan wuntan. Ngay kaangk nil God.angan ngul min-minam paththam pi'ow niiyang yotam nanangamana.
Anman kan,
Paul