Nint Wik God.antam Thonakam Waa'ān Thant, Wik Wiy Ya'a
21Puth nintiy Titusa, wayan ke' iiyān ke' than pam anangan way iiy-iiyantan. Nint puth waa'ān thant pam wanchantan wik min God.antamana puth nilaman thaw ngampar, ngamp minam want-wanttakan iiyāmpa.
2Nint thawān thant pam wuut manth-thayan yotam al-alantana nil God.angan kaangk thathow thanang than minangam anman wunayn. Than kuchek min anman iiyayna a' ngak wayan pi'anam ke' mungkayna, drunk ke' iiyayn. Than putha ngangk minangam paththam wunayna than pam wanch wiyangan yipmam thathayn thanang a' waa'ayn thanang pam min kan-kanama. Than woyan min God.antam paththam anman wakayn, woyan thon ya'a. A' than puth thayanam iiyayn monkan-wakayn nunang God.aniya a' than ke' koy-koyaman weentayna. Thanan puth kaangk wunayn God.antana puth wanch pamant kaangk wunayn.
3A' thawān thant wanchinth al-alantana nil God.angan kaangk thathow thanang than minangam anman wunayna. Than ngaantam-ngeeyayn nunang God.aniya a' wik min nungantaman ngeeyayn. A' than puth ke' waa'-waa'ayn thanang pam wanch wiy anangan, ke' puth kulakan wenkayn. Ngak wayakan ke' iingkamayn, nil ngak way alangan ak-wichan thanang God.antaman. Than thaa'-aath-aathayn thanang wanch kom-koman anangan than min anman yipmam iiyayna, 4a' puth wik ngeeyayn puth than kaangk wunayn pam thum thanttamaka a' puk manyiy thanttamak. 5Than woyan min wakayna, pam thon-thon ke' mee'ang wakayn maarichak. Puth than ngangk minangam paththam iiyayn wiy al-alantan, ma'-aathayn thanang. Than puth minam pi'wayn thanttakamaniya a' than wik ngeeyayn pam thum thanttam ananganiya. Wanch anangan puth minam wunaynweya yipmam than wiy al-alangan ke' wik wayan waa'ayn wik God.antamana.
6A' nint anman thawān pam komp al-alantan nil God.angan kaangk thathow thanang than minangam anman wunayna. Than woyan min paththam anman wakayn, thon ya'a, a' kuchek minangam anman iiy-iiyayn. 7Nintiy Titusa minam wunāna than pam wanchangan yipmam thathayn nintang, than woyan nungkaram anman wakayn. Nint ma'an-aathān thanang-a, nint wukalak ke' work iiyāna. Nint kuchek minangam ngaantam-ngeeyāna nint wik thakan minam yipmam waa'ān thant. 8Nint wik min anman waa'ān thant, puth wiy al-alangan ke' yipam waa'ayn ke' wik way thak yimanangan waa'-waa'angan. Nintan putha ngangk minangam paththam wun-wunān a' wik min kan-kanam waa'ān than kuchek nyaa' yipmam wunayn pam wayanang anangan kulan thaw-thawantan ngampar. Koyaman ke'-ngul yipam thawayn ngampar.
9A' nint thawān thant slaves al-alantan wik moom thanttamantaman ngeey-ngeeyayn, a' work iiyayn puth ngangk min yumpayn thananga, moom anangan, koyaman ke' wik thawayn thant. 10A' puth ke' yuk way min ma'-kuchathanak thanttamana, work min anman iiyayna a' than ngul moom al-alangan ngaantam-ngeeyayn thanangan minaman iiy-iiyantan. A' pam wanch wiy al-alangan ngul wik anangan ngaantam-ngeeyayna wik God.antaman min kan-kanama, wik anangan nunang God.an waa'an nil ngampangan kaa'-piichanathan way ngamparam anpalman.
11Nil God.angan meenath ngampar, nilan kaangk wunan ngampar pam wanch yotantakam, a' puth nilan kaangk ngampangan min-minakam pi'ow, a' way ngamparam al-alantaman kaa'-piichanathow ngampangan. 12Nil kan-kanam minam pi'-pi'an ngampang, puth anpalana ngamp way anangan aak keenk-keenkan yump-yumpampa an too ngul wantimp. Ngamp keenk way thaa'-thaa'an yumpamp, ngamp puth anman ngaantam-ngeey-ngeeyamp way yumpanakan, maarich kee'anakan, yangk mo'anamp thakana. Nil God.angan thaa'-aath-aathan ngampang ngangk minangam iiy-iiyāmp, woyan min wakāmpa, a' wik nungantaman ngamp ngeeyāmp, ngamp yippak man-yethaman iiy-iiyanamp. 13Nil Jesus.angan kaa'-piichanath ngampang a' kaa'ngak ngampang aak nungantangan wunāmp. Ngampana aak inman kuup-kuupanamp nungant aak-aakanakan nil palaman wampow ngampar. Aak an-aniyangan, ngamp nganthan thathāmp parkowan, aak anman nilan wun-wun. A' ngamp ngul thathāmp nil God.an min paththaman a' thayan paththam. 14Nil Jesus.angan theetath nungamang uthamowan ngampar. Ke' ngampan uthamimpa, puth ya'a, nil utham ngampar. Nil ngangk pachath ngampang chaapar nungantamangan wayan yumpampa, ngampan kan-kanam ngul iiyāmpa pam wanch nungantamaniya. Nil ma'-aathan ngampangan min yumpanakana.
15Wik inangan-a, anman waa'-waa'ān pam wanchantan, ke'-ngoongkam anman waa'ān thant than yipmam ngangkangam pi'ayn wik inanganiya. A' wakān thanang pam wanch ananganiya than ke'aman wik ngeeyantan. Wik inan God.antama, thayanam thawān thant. Than ke' ngaantam-ngeeyayn nintang ke' pam many yimanangan, ya', nint pam wik God.antaman waa'-waa'angan thant.