TITUS
Lat Inan Paul.angan Ump Titus Alantan
11Ayyang, Titus-ang, ngay puth Paul.ang lat inan umpang nungkara. Ngay God.ant work iiy-iiyang a' God.angan ngayang kuchany nath-nathan iiy-iiyāng a' wik min Jesus Christ.antaman waa'-waa'āng thant pam wanch nungantam al-alantan nil God.angan ump thanang yipam monkan-wakayn nunang. Nil ngayang kuchanya ngay yipmam ma'-aath-aathāng thanang yipam thayanam iiyayn, a' puth thaa'-aath-aathāng thananganwey wik kan-kanam God.antaman. Anpalana than puth ngul ngaantam-ngeeyayn thanan want-wanttakan woyan min nungantaman wakayna. 2A' than kan-kanam paththam ngangkang pi'ayn nunang God.an a' ngaantam-ngeeyayn wik min nungantaman kan-kanamana puth nilam kaa'ngak ngampangan ngamp nungantangan wunāmp aak umpuyaman. Nil God.an kan-kanam paththam thaw-thawana. Ka'athangaman-a, nil aak inan ke'aman yippak yump-a, nil kaa'ngak ngampangan puth ngamp nungantangan wunāmp aak umpuyamana. 3Ngul anpalaniya, aak anan nil God.angan mi'-a, nil God.angan wik min nungantaman waa' ngul. A' nilan puth wik min thampan kuch ngayangan yipam waa'āng niiyant nilan puth kaangk ngampan nungantang wunāmp aak umpuyaman. Puth nilam thonamang ngampang kaa'-piichanatha.
4Ngay lat inan umpang nungkara, Titusa, nint puth ke' puk ngatharama, ngay puth nungkar kan waa'angan wik Jesus.antamana, ngay wiy nhengk waa'ang nintanga. Nint kan-kanam ngangkang pi'-pi'angan nunang Jesus.ana, ke' ngay yimanangan ngangkang pi'-pi'ang nunang nilan ngampang kaa'-piichanath. Ngay kaangk piip God.angan a' Jesus Christ.angan pul minam pi'owpul nintanganiya, a' ngangk min paththam yumpowpul nintang.
Nint Work God.antaman Iiyān Aak Crete.angana
5Ngay wantang nintang aak Crete Island angana nint yipam work ngatharaman minchathān ngay ka'athaman workan iiy-iiyangan. Ngay kan thawang nungkar nint pam wanch anangan mi'-mi'ān thanang aak thon-thon anpalan, churches anangan yipam pi'-pi'ayn. Niiy wik inangan ngaantam-ngeey-ngeeyān ngayan waa'-waa'angan niiyant: 6niiy pam anangan mi'ān thanang ngangk minangaman wuntana, a' than wanch thum thon-thonam anman pi'ayna, yotan ya'a. Than puk thanttam anangan-a, than thampang puth God.an monkan-wakayn nunang, kulliyan ke' weenayn, puth than wik ngeeyayn kaath piip thanttamantaman. 7Nil God.angan work inan thee' thant pam wanch al-alantan churchan pi'-pi'ayn, puth thananiya minam anman iiy-iiyayn, than wiyangan ke' yipmam waa'ayn thanang. Puth thananiya kuchek thayan ke' iiyayn a' ke' ulp-ulpanang iiyayn puth man kul erkaman ke' wampow thant. A' kuchek ke' wayamow thant ngak way anpalan. Than kulak ke' wenkayn pam wanch thon-thonantan. A' than puth ke' yangkan weenayn wukalakana. 8Than nath pam wanch aak nathpalan wampaynwey-a, than minam pi'ayn thanang. Thanan paththam ngangk minang iiyayn thant pam wanchant a' ma'-aathayn thanang. Thaniya min-min ngaantam-ngeeyayn than want-wanttakan yumpayn. Than minaman iiy-iiyayn ke' God.angan kaangk than wanttakan iiyayn, than yipmam ngangk min paththam God.an yumpayn nunang. Than ngaantam-ngeeyayn min yumpanakan a' kan-kanam paththam minan yumpayn. 9Wik piip God.antamana kan-kanam paththam, an wikan anmana ke' Jesus.antamana. Than pam wanch al-alangan churchesan pi'-pi'antan-a, than ke'-ngoongkam wik God.antaman ngeey-ngeeyayn, a' wik anman thonakam waa'-waa'ayn thant pam wanch wiy al-alantan yipam ngangk thayanathayn thanang, a' than yipam wakayn thanang pam wanch wiy anangan God.an thaampantan nunang thanan yipam ngaantam-ngeeyayn thanttakaman than wayan iiy-iiyantan.
10Than pam wanch Jews chil yot anangana puth thaw-thawantan ke' than ngangk thanttaman kanaman thee'in God.antan, nil ya'a, than pam wanch wayanang iiy-iiyantan. A' thanwey thaa'-thengkathantan thanang pam wanch anangana churchan pi'-pi'antan, a' puth than ke'am wik ngeeyantan thananga. Than wik way-way thamp thaa'-aath-aathantan thanang pam wanch wiy anangana. Than puth wik uuyamantana. A' pam wanch wiy anangana Jews ya' anangana than thampang way iiy-iiyantan. 11Nint puth thawān thant than ke'-ngul thaa'-aath-aathayn thanangan wik way-way thampang anangan. Than nath wik way-wayan waa'antan-a, a' wik uuyamantanan-a, than pam wanch puk wiy anangan thamp wayathantan thanang. Than yaan thaa'-aath-aathantan than yipam wukal yalmathayn pam wanch ngangk min al-alantamana. 12Nil pam thonam inan aak Crete Island punchan thaw, “Than pam wanch aak Crete Island anpalaniya than wik uuy-uuyamantana. A' thananiya ke' minh kulliy paththam yimanangana. Than way-wayam paththama, work kaangk ke' iiyayn a' mayakan ep yangkamantan.” 13Wik nungantamana kan-kanam. Nintan puth wakān thanang a' thanan ngul yaaka' ngeeyayn wik God.antaman. 14Than pam Jews al-alangan wik God.antaman kan wantin. Than wik kath keenkanam anman ngaantam-ngeey-ngeeyantan than pam Jews wiy al-alangan waa'-waa'in, thanaman ngaantam-ngeey-ngeeyin kuchek thanttamangan. Nint wakān thananga pam anangan wik thanttaman ngeey-ngeeyantan than yipam wik God.antaman ngeeyayn. 15Than wee'-wee'anangan nath ngangk minangam anman iiy-iiyantan-a, an than min paththama, puth than wee'-wee'anangan nath ngangk minangam ke'wey iiy-iiyiythanwey-a, an than min ya'a. Than ke'aman God.an ngangkangam pi'-pi'antan nunang, an than kuchek wayangam paththam ngaantam-ngeeyantan. Than wayan yumpantan-a, thanan ngaantam-ngeeyantan ngul than ke' min iiy-iiyantan, puth ya'a, way thak ngaantam-ngeeyantan. 16Than thaw-thawantan ke' than mee'miy nunang God.aniya, puth ya'a than wik uuy-uuyamantana, ke' meenathwuntan ke' than wik God.antam mee'miy, puth way iiy-iiyantan. Than ke'-ke'am paththam thanang pam wanch wiy anangan a' putha than ke'am wik ngeeyantan God.antaman ya'a, than wik ngeengkantan. Than min ke' yumpiythan, ya'-ya'am.