61Niiy Christians puungk wiyiy-a, slaves iiy-iiyaniy, niiy pam ma' wiyantang ngul work iiy-iiyaniy, than puth wukalang piiyin niiyang ke' yaraman anangan piiyantan wukalangan, niiy yipam yaam anman work iiy-iiyān thant. Niiywey-a, moom niiyantam anangan-a, ngangk kulangam ke' kal-kalān thanang, puth minam iiy-iiyān thanttang. Puth niiywey nath way iiy-iiyin thantan-a, than pam wanch wiyangan God.an nath way waa'-waa'ayn nunang, puth wik min nungantam anangan way waa'-waa'ayn thamp ngampan thaa'-aath-aathanampweya. 2Moom niiyantaman nathwey Christian ngul iiy-iiyiywey-a, yaa, niiyana work minam iiy-iiyān nungant, puth niiyana ke' ngaantam-ngeey-ngeeyāna ke' niiy work manyam anman iiy-iiyāna, an ya'a, puth nilana ke' kuunch niiyantam ngula. Puth niiyana work puy-puyam minam anman iiy-iiyān nungant moom niiyantamakan nil puth Christ.an monkan-wak-wakan nunang ngul, a' nil puth God.an kaangk wunan nungant. Niiy puth work min nath iiy-iiyin nungantanwey-a, yaa, an ke' niiyana kuunch niiyantaman ma'-aath-aathaniy nunangana -- inan min a!
Than Wee'-Wee'anangan Kaangk Ma'mangkiy Anman Iiy-Iiyayn-a, Nil Oony Way Angan Thaach-Thaachan Thanang Way Yumpanak Thakana
Timothy-ang, nint wik inangan waa'-waa'ān thant, pam wanch nal-nalantan, a' thawān thant wik ngeey-ngeeyayna! 3Puth pam puungk wiyangan-a, kaangk ke' ngeey-ngeeyayn, man-ngeeyantan wik min anangan nil Jesus Christ.angan waa'-waa' thanta, a' putha kaangk ke' ngeey-ngeeyayn wik min God.antam anangan, lat ngench thayanangan waa'an ngampar ngamp want-wanttakan minam iiy-iiyāmp mee' God.antangan. Puth anpalan-a, than wik kan-kanam nungantaman ke'am waa'-waa'antan, ya'a, than puth wik thonang ngul thaa'-aath-aathantan thananga! 4Puth pam nanangan-a, ulp-ulpanang iiy-iiyantana, than ngaantam-ngeey-ngeeyantan thanttakam ke' pam pi'an yimanangan, puth than ke' mee'miy wik God.antamana, ya'a. Thanan putha kaangk wik wayamana mep-mepwayn thanttakam, thaa'-thay-thayanamayn thakan. Anpalmaniy-a, thaniya mee'-wun-wuntan wiyantan, puth than ma'-yotam kul thaw-thawantan, kul-weenth iiy-iiyantan; than way waa'-waa'antan thanang, pam wanch wiy anangan a' ma'-pith-pithantan thanang. 5Than puth wik kan-kanam God.antaman ke'-ngul min-minan ngaantam-ngeey-ngeeyantan, ya'a, puth kuchek thanttaman kan-ngul wayamantan. Than ngaantam-ngeey-ngeeyantan thanttakam ke' than wee'-wee'anangana Christians.an iiy-iiyaynan-a, than puth wukal tha'iy thamp wun-wuntan, puth an ya'a!
6Nil pam Christian.ang wukal anman ke'wey ngaantam-ngeey-ngeeyiyan-a, a' nil kan-kanaman woyan God.antaman wak-wakiywey-a, an nilan puth ngangk minangam ngul iiy-iiyowa. 7Ngul ngamp puth way min thamp aak-ngeey-ngeeyamp kaath ngamparamantaman ey? An ya'a, ngamp ma'lipam anman aak-ngeey-ngeeyampa. Puth ngamp uthamāmpan-a, ngamp puth ngeen ngul karpam kalimp aak inpalan aak kenyakana? An ya'-ya'am paththam a! 8Ngamp nath may thakwey mungk-mungkimp-a, kulich thak pi'-pi'impan-a, ngamp ngangk minangam ngul iiy-iiyāmpa. 9Puth pam wanch puungk wiyiya kaangk ma'mangkiy anman iiy-iiyayn, anpalana nil oony wayangan thaach-thaachan thanang way yumpanak thakan, thanan yipam woyan nungantaman wak-wakayn. Thanan putha way yot-yotam ngul yump-yumpantan, yipam wukal uw-uwayn. Anpalan-a, than wayamantan ngul, way thakan ngaantam-ngeey-ngeeyantan, thaniya aak wayak ngul iiy-iiyayn, piip God.antangan aaka ke' wun-wunayn, ya'a. 10Nil pamwey kaangk wukal-weenthan iiy-iiyow-a, an nilana woyan way ngul wak-wakana, a' puth anpalana nilan way-wayam paththam ngul iiy-iiyow. Than wiy al-alangana woyan God.antaman kan want-wantin, a' thanan ngangk way-wayam ngul yump-yumpwin thanttakam, puth than wukal tha'iy anman ngaantam-ngeey-ngeeyantan.
Nintiy-a, Ke'-Ngoongkam Minam Anman Iiy-Iiyāna
11Nintiy-a, pam God.antama, nint wayan ke' iiy-iiyina, nint ke'-ngoongkam minam anman iiy-iiyāna, a' ke' eenchān thampa, puth pam koy' anman iiy-iiyān mee' God.antangana. Nint God anman ngangkangam pi'-pi'ān nunang, a' puth ngangk minangam iiy-iiyān pam wanch wiyantan; a' putha, aak waywey wampow nungkaran-a, nint ke' wayamān, puth God anman monkan-wak-wakān nunang, a' puth thaa' itangam anman thaw-thawān thanta, ngangk minangam anman iiy-iiyān thant wiyantan. 12Ngamp Christians.an iiy-iiyanampan-a, an ke' ngamp kamp othamayan race.an mo'-mo'anamp yimanangan. Ngamp race.an mo'anampaniy-a, an ngamp kamp othamayan mo'-mo'anamp, itangam ya'a, chip-chipamana ke' than-thanāmp, ya'a, ke'am thak eenchanamp, puth anman murkanam mo'-mo'anamp yuk tape aakanakaman. Aak inana yimanangan wunana: ngamp ke' yippak aak God.antamangan in kenyan wunampa, ya' yippaka. Puth nint Timothy anman murkanam ngangkangan pi'-pi'ān nunang Christ.an, work minam anman iiy-iiyān nungant aak-aakanakaman nintan aak nungantamangana ngulan wunāna. Nil God.angan thaa'-palath nintanga nungantangan wun-wunān aak umpuyamana; a' puth nint ka'athamana, pam wanch yotantang waa'-waa'an thant nint kan-kanaman ngangk thee'an nungant Jesus Christ.antan.
13Wik ngayan thaw-thawang nungkar-a, nil God.angan ngeey-ngeeyan ngayang, nil God ilangaman way min ma'mangkam man-yethaman pi'-pi'an thanang. Puth nil thamp Jesus Christ.angan ngeey-ngeeyan ngayang. Nil Jesus ilangamana wik min anangan kan-kanaman thaw nungant Pontius Pilate alantana. 14Nintiy putha, wik ngatharaman ngeey-ngeeyāna, ke' wayamān, puth kan-kanam paththam wik ngeey-ngeeyāna, nil God.angan pam way ke' yipam waa'ow nintang. Wik ngatharaman ngeey-ngeeyāna aak-aakanakaman, nil Jesus Christ.an moom ngamparaman palaman ngulan wampow aak iikanakana. 15Nil piip God.angana aak kanam mi' nungant Jesus.antan nil palaman wampowa, a' nil aak an-aniyangan ngul wampowa. Nil puth piip God.ana, pam min-minam paththama, nilam thonam anman moom pi'an paththam a! Niliy-a, moom pi'an iiy-iiyan thanttam, pam pi'-pi'anam al-alantamana, a' kings al-alantaman aak nath-nathan wun-wuntan. 16Nil anman thonam ke' uthamiy, ya'a, murkanam anman man-yetham wun-wunowa; aak nungantaman park-parkan anman, ngaa' ke'am wun-wunana, ya' anman, murkanam anman nganth pi'an paththam park-parkana, pam wanch puth ke' wampiythan thinthamana, an ya'a. Pam wanchang aak keenkanamana ke' thathanam nunang; puth in-inman ngamp ke' thathimp nunang, ya'a. Ngamp thaa'-kuump-kuumpāmp nunang, a' putha min waa'-waa'āmpan a! Niliya thay-thayanam anman wun-wunan, an kan-kanam paththam a!
17Timothy-ang! Nint thawān thant pam wanch ma'mangkiy al-alantan, ulp-ulpanangan ke' iiy-iiyayn, a' puth-a, wukal anangan ke' ngaantam-ngeey-ngeeyayn, an erkam ngul wayamayn aak ingan earthangana. Than puth ngaantam-ngeey-ngeeyayn nunang God.ana, puth nilama God.angan way min yot-yotam thee'-thee'an ngampar, ngamp yipam ngangk min iiy-iiyāmpa. 18A' thawān thant thampa, ma'-yotam anman min iiy-iiyayn pam wanch wiyantan, a' thaa'pin iiy-iiyayn, way min thakan thee'-thee'ayn thant, wiy al-alantan. 19Thanwey min yimanangan iiy-iiyiythan aak inganiy-a, thanan kan-ngul thiichiythan than kan God.an ngangk min yump-yumpantan nunang, thanan yipam kan-kanam paththam aak umpuyangam wun-wunayn nungantangana, ngangk minangam wun-wunayn.
20Timoth-ang, nint wik in ngeeya: nint wik God.antaman min-minam waa'-waa'ān thant, a' min-minam pi'-pi'ān thamp, puth nil God.angan work inan nungkar waa'a. Than wiyangan ke' wayathayn. Nint ke'a ngotan ngoonch-ngoonchān pam way al-alantangana wik way thakan thaa'-aath-aathantan thanang wiy anangan. Thanan puth thaw-thawantan ke' than wik God.antaman kan-kanam mee'miya, an puth ya'a, than yaan thaw-thawantana! 21Puth pam puungk wiyangan-a, than God.an ke'-ngul ngangkangan pi'-pi'antan nunang, ya'a, than woyan min God.antamana too kan-ngul wantin.
Yaa, Timothy-ang, ngay kaangk nil piip God.an ngangk minangam iiy-iiyow nungkar.
Anman kan,
Paul.