Nint Minam Pi'-Pi'ān Thanang Christians Wiy Anangan, Wukalongk Wee'anangana
51Than Christians wiy al-alangan nath wayan yump-yumpiythan-a, nint itangam thaw-thawān thant wayana kan wantayna, ke' nint kampan nungkaram al-alantan wik thaw-thawangan yimanangan. Pam manth-thayan al-alantan-a, kul ke' thaw-thawān thant, ya'a, nint wik itangam thaw-thawān thant wayan wantayna, ke' nint piip nungkaramant yimanangan itangam thaw-thawangan. Pam komp al-alantan-a, itangam thaw-thawān thant thampa, ke' nint kuunch nungkaramantan thaw-thawangan yimananga. 2Puth wanch manth-thayan al-alantan-a, nint wik itangam thaw-thawān thant ke' nint kaath nungkaramant yimanang itangam thaw-thawangana. Wanch kom-koman al-alantan-a, itangam thaw-thawān thant ke' nint wiil nungkaramant itangaman thaw-thawangan; puth nint minam anman iiy-iiyān thant, way thakan ke' ngaantam-ngeey-ngeeyān.
3Puth nintiy-a, minam pi'-pi'ān thanang, wanch wukalongk anangana, than kampan ke'anangana. 4Nilwey wukalongkan puk thampwey-a, nath kemiyanga, putha ngechiyang thampwey-a, yaa, than ep-paththam pi'ayn nunangweya, puth nil piip God.ana wik thayan yimanangan thawa. Than puth kaath piip ngamparamang ka'athaman pukaman pi'-pi'in ngampang, minam em-emathin ngampang puth ngamp puthangkana minam pi'-pi'āmp thanang, kampan ngamparaman. Inana min-minama mee' God.antangana. 5-8Wik ngatharam inangana, waa'-waa'ān thant, pam wanch Christians al-alantan, than yipam wukalongk thanttamanwey pi'-pi'ayn thanang, than wiyangan ke' yipam wayan waa'-waa'ayn thanang. Puth nil wee'ang nathwey kampan nungantaman ke'an pi'-pi'iy thanang-a, kaath-kuncha puth kemwayyow-kuncha a' puth kampan wiy anangan thaka minam ke'an pi'-pi'iy-a, an ke' nil Christ.antan man-mangkam thee'-thee'an nungantana, an nil pam way-wayam paththam iiy-iiyan, nil ke' pam Christian ya' yimanangan.
Wukalongk wiy anangana, kampan ke'anangwey, puth pokkapang wun-wuntanwey, puth than God.an kan-kanam ngangkangam pi'-pi'antan nunangana. Than ngaa' thon-thonan-a, mee'-wuth-wuthanamantan nungant, kinchang-a, puth ngutangana than thaw-thawantan nungant ma'-aath-aathow thanang. Than wukalongk anangaman-a, pam wanch Christians al-alangana pi'-pi'ayn thanangweya. Puth than wukalongk wiy al-alangana, thanttakam kaangk ngaantam-ngeey-ngeeyayn, woyan God.antaman ke'am wak-wakantana, Ngeen-Wiy Min God.antaman ngangkang ke' pi'-pi'antan, ya'a.
9Ngay nungk inan tham thawang: wukalongk Christians al-alantan namp ump-umpān thant latangan, than yipam work iiy-iiyayn churchakan, puth Christians wiy al-alangan minam yipam pi'-pi'ayn thanang. Puth namp yotantan latangan ke' ump-umpān thanta. Wukalongk al-alantakam thonakam nampan ump-umpān: than wukalongk kaap sixty.angan wantan thanangan-a, puth maarich pam wiyantangan ke'aman kee'-kee'ina; 10puth than minam anman iiy-iiyin pam wanch wiyantana puth puk thanttam anangan minaman em-emathin thanangweya; a' puth pam wanch Christians wiy anangan aak nathpalan wampin-a, minam pi'-pi'in thanang, may-a, ngak thakan aath-aathin thanang, a' puth ma'-aath-aathin thanang pam wanch ngangk wayan wun-wunina, a' puth wiy anangan ma'-aath-aathin thananga; niiy puth wukalongk il-ilantan-a, namp ump-umpān thant latanganweya.
11Puth wukalongk kom-koman anangan-a, namp ke' umpān thant latangan, ya'a. Than nath ka'athamana Christ.an kaa'ngakiythan nunanga than nungant thonakam workan iiy-iiyayn; puth ngul-ngulan-a, than nath kaangkwey puthaman pam ngentayn, 12a' wik ngul nath pipayna, wik thanan kaa'ngakin nunang Christ.antan thonakam work iiy-iiyayn, a' anpalana pam wanch wiyangan waa'-waa'ayn thananga. 13Than putha, wukalongk kom-koman wiy anangan-a, ma'minam nath nyiin-nyiinayna, ke' nath work iiy-iiyayna, ya'a, than nath yuup anman iiy-iiyayn, aawuch thon-thonangan wamp-wampayna. Inan thampa, thanan wik nath kal-kalayn pal-puya, kaa' ngoonch-ngoonchayn aawuch thon-thonantangana, a' than nath wik wayanang thak aak-ya'ang waa'-waa'ayna. 14Ngay inan ke'-paal kaangk than wukalongk kom-koman al-alangana pam kan ngent-ngentayn, puk yipam uw-uwayn, puth aawuch way min thakan minam pi'-pi'ayn, than yipam pam wanch wiyangana piip God.an kaangk ke'an nunanga, ke' yipam ngampang Christians.an way waa'-waa'ayn ngampangan ngula. 15Puth wukalongk kom-koman wiy al-alangana, God.an kanam wantin nunang, oony wayan ngul monkan-wak-wakantan nunang.
16Ngay inan putham ngul thawāng niiyanta: nil wanch Christian wee'anwey kampan nungantamwey wukalongkan iiyow-a, yaa, nil pi'-pi'ow nunang. Than puth Christians wiy al-alangan churchangana ke' pi'-pi'iythan nunangweya, ya'a, wukal thakan ke' thee'-thee'iythan nungant, ya'a, than wukalongk wiy al-alantan ep thee'-thee'ayna, than kampan ke'anang al-alantan.
17Pam wuut manth-thayan wiy al-alangan-a, minam ma'-aath-aathantan niiyang Jesus.an monkan-wak-wakān nunang. Niiy minam ngaantam-ngeey-ngeeyān thanang thanan puth wik God.antaman waa'-waa'antan, thaa'-aath-aathantan thakan, a' niiy wukal yotwey thee'-thee'ān thanta. 18Nil puth lat ngench thayanangan waa'-waa'ana, wik inanganiy: “Nil minh bullockan work iiy-iiyiy niiyantan-a, may wheat thakan aakang maak-maakiy pe'anan yipam pent-pentayn-a, niiyaniy-a, thaa' nungantaman ke' kathān nunangweya, ya'a, nil yipam may wiy thampan mungk-mungkowa.” A' putha, lat ngench thayanangan waa'-waa'an thampa, “Nil wee'-nathweya workan iiy-iiyiy-a, an nil ep wukal uw-uwiya.”
19Wiyiy-a, pam wanch wiyangan nath waa'-waa'iythan nunang pam wuut manth-thayan nil wayan yump-yumpan. Nil pam thonamangan nath waa'-waa'iy nungkan-a, nint ke' ngeeyān nunanga. Nath pam kuchamangwey-a, nath pam ko'alamangweya mee'miy nil wayan yump-yumpa, an waa'iythan nungk-a, anan ep nint wik ngeeyān thananga. 20Nil nath kan-kanam wayan yump-a, yaa, nintan wak-wakān nunang, wik thayanam thaw-thawān nunganta, mee' yotantangan churchangan nyiin-nyiintan, than yipam pam manth-thayan churchakan wiy anangan-a, nyaa' yipam iiy-iiyayn, ke' yipam wayan yump-yumpayna.
21Timothy-ang, wik ngayan ump-umpang nungkar-a, nil God.angan-a, puth Christ Jesus.angan-a, puth ngaantiyongk God.antam al-alangan-a, than puth thath-thathantan ngayang, puth nint wik ngeey-ngeeyān ngayanga! Nint puth aak-ya'angan ke' wak-wakān thanang, pam manth-thayan churchakana, puth than wee'-wee'anangan wayan yump-yumpiythan-a, nint ep wak-wakān thanang, wik ke' thenchān pam manth-thayan wiy al-alantaman, ya'a. 22-25A' putha nint ke' kerkāna, paman erkam ke' mi'ān nunang pam manth-thayanan iiyow churchakan. Puth nil pam anman nath way iiy-iiyiywey-a, an nilwey kenchathiy nintang, nint puth mi'an nunanga, pam manth-thayanan iiy-iiyowa. Puth nintan way ke' iiy-iiyāna! Pam wanch wiyangan-a, way yump-yumpantan, a' yotan mee'miy ngul iiy-iiyantan thanttamana, thananiy putha courtak ngul iiyantan; puth pam wanch wiyangan-a, wayan mee' thenchanam yump-yumpantan, pam wanch wiyangana ke'am thiichantan -- aak ngul-ngulana an ep wikan kan pentan ngul thanttamana. Inan thamp yimanangan wun-wunan: pam wanch wiyangan-a, min yump-yumpantan mee' engkanangweya, a' yotan mee'miy ngul iiy-iiyantan thanttam; puth pam wanch wiyiy-a, ngamp ke' thiich-thiichimpa than minan yump-yumpantan -- aak ngul-ngulan-a, an ep thiichanamp ngula than minan yumpantan. Nintan puth pam erkam ke' mi'ān nunang pam manth-thayanan iiy-iiyow, ya'a, nint kan kuupān thath-thathān nunang, a' ngaantam-ngeeyān ngul nil pam min nath iiy-iiyan, nath ya'a.
(Timothy.weya, nathpalman nint ngak thonakam mungkana, puth in-ngulana nint may wine many pattakam ngul mungkānweya, puth nintang ma'-yotam thipan weech-weechan, in puth opar min nungka.)