Than Wee'-Wee'anangan Pam Manth-Thayan Churchakan Iiy-Iiyantan-a, An Than Minam Iiy-Iiyayn
31Ngay wik inan kan-kanam waa'-waa'ang nungk. Nint kan ngeeyāna, puth inan wik min a! Nil wee'-nathwey kaangk pam manth-thayanan iiy-iiyow churchakan-a, an nil work minan ngaantam-ngeey-ngeeyan iiy-iiyowana. 2Nil manth-thayan churchakana yimanangan iiy-iiyowa: nil pam min iiy-iiyow, a' nil pam koy' thamp iiy-iiyow God.antan; a' nil wanch thonam anman pi'-pi'ow, nil wanch kuchamana ke' pi'ow, ya'a; a' nil minam anman ngaantam-ngeey-ngeeyow, kuchek wayan ke' wun-wunowant, ya'a. Nil ngangk minangam iiy-iiyow thant pam wanch wiyantan; a' nil wik God.antaman minam thaa'-aath-aathow thanang; a' puth pam wanch aak nathpalanwey wampaynan-a, nil kalow thanang aawuch nungantamaka. 3Nil ngak way mungkanan-a, ke' iiy-iiyow; a' nil kulakan ke' wenk-wenkow; puth pam maal iiy-iiyow, kul-thinthamak iiy-iiyow, kul ke' uwow thant wiyantan, a' putha wukal-weenthana ke' iiy-iiyow thampa. 4Nil wanch thum nungantam-a, a' puk nungantam anangan minam pi'-pi'ow thanang, nil minam iiy-iiyow thant yipam than wik ngeey-ngeeyayn nunang, a' ngaantam-ngeeyayn nunang nil pam mina. 5Nilwey kampan nungantaman minam ke'an pi'-pi'iy thanangwey-a, nil puth pam wanch churchangan want-wanttak minaman pi'-pi'iy thanang a? An ya'a! 6Nil pam Christian nyiingk-nyiingkan iiy-a, niiy ke' yippak mi'ān nunang pam manth-thayan churchakan iiy-iiyowa, ya'a. Nil puth ulp-ulpanang nath iiy-iiyiya, nath pam pi'an ngaantam-ngeey-ngeeyiy nungantakamana, a' nil puth God.angan pam way ngul waa'iy nunangana ke' nil oony wayan ka'athaman pam way waa' nunang. 7Inan putha, nil minam anman iiy-iiyow, pam manth-thayanana, yipam pam wanch wiyangan-a, Christians ya' al-alangana thath-thathayn nunang, a' ngaantam-ngeey-ngeeyayn nunang nil pam min. Nil nath oony way pi'anan ngeey-ngeeyiy nunangwey-a, an nil pam min ke' iiy-iiyiya, nil nath man-mangkam thee'iy God.antan, amanaman-a, thanan nath waa'-waa'iythan nunang, ngul-nyaa' yump-yumpiythan nunang.
Than Wee'-Wee'anangan Ma'-Aath-Aathantan Niiyang Churchangan-a, Than Thampana Minam Iiy-Iiyayna
8Ngay kan pam wiy anangan waa'āng nungka, thanan ma'-aath-aathantan niiyang churchangan, deaconsan waa'-waa'antan thanang. Nil wee'-nath kaangk deaconan iiy-iiyow-a, nil pam koy' iiy-iiyow, a' nil pam min anman iiy-iiyowa, a' nil ngak way mungkanan ke' iiy-iiyow, a' wukal-weenthan ke' iiy-iiyow thamp. 9Niliy-a, kan-kanam ngaantam-ngeey-ngeeyow wik God.antam anangan nilan want ngampar, nil pal-puy ke' ngaantam-ngeey-ngeeyow, ke' muukamow thakan, puth woyan God.antam anman wak-wakow. 10Than pam wee'-wee'anangan kaangk ma'-aath-aathayn niiyang churchangan-a, nint thath-thathān thanang, nathwey minam iiy-iiyantana, nath ya' yaaka'a! Thanwey nath minam iiy-iiyiythan-a, a' kan-kanam paththam God.an ngangkangam pi'-pi'iythan nunanganiy-a, yaa.wey, niiy thawān thant than ep ma'-aath-aathayn niiyang churchangana.
11Wanch thum thanttam anangan thampa, than thamp minam anman iiy-iiyayn; wikana ke' kal-kalayna, waa'-waa'ayn thant, pal-puyana; ngak way mungkanan ke' iiy-iiyayn, puth kuchek waap minangam iiy-iiyayn, a' ma'-thayan iiy-iiyayn. 12Pam nil deacon alangan-a, wanch thonam anman pi'-pi'ow, kuchamana ya'a; a' nil minam pi'-pi'ow thanang, wanch thum nungantamana a' puk manyiy nungantam thamp. 13Pam deacon anan work minaman iiy-iiyiy God.antan-a, wiyangan thathayn nunang pam nil minam iiy-iiyan; a' puth nilaniy-a, wikan minaniy ngangk thayanam waa'-waa'iy thant wiyantana, Jesus Christ.antamana.
Wik God.antaman Engkanang Ngul Wun Ngampar, Nil Puth God.angan Jesus.an Kuch Nunang Aak Iikanakan
14-15Timothy-ang, ngay kaangk thathāng nintang, ngay puy yipam erkam wampāng nungkara. Ngay ke' nath erkaman wampingan-a, nath aak ingman yaaman wun-wuningan-a, ngay puth lat inan umpang nungkara, ngay yipam waa'āng nungka niiya pam wanch Christians anangana want-wanttakan minam iiy-iiyān, mee' God.antangan puth-a, pam wanch wiyantangana. Niiy ke' aawuch nungantam yimanangan nil God.an wun-wunan niiyantangana, nil puth God anan-a, man-yetham anman wun-wunan, nathpalman, in-inman, ngulakaman wun-wunow. Ngamp pam wanch nungantam al-alangana wik nungantam anman ngangkangam pi'-pi'anamp, a' puth-a, waa'-waa'anamp pam wanch wiyantan. 16Puth wik God.antamana ngamp ngaantam-ngeey-ngeeyanamp an wik min paththam a! Nil puth waa' ngampar ngamp want-wanttakan minaman iiy-iiyāmp mee' nungantangana. Nil ka'athaman-a, wuut mangk ngamparamantana manyam thaa'-thanpanam waa' thant, puth nil nyiingk-nyiingk ngulana an ep-paththam wik yot ngul waa'-waa'ana, engkanang ngul wun-wunan ngampar, nil nhengk nungantam Jesus.an meenath ngampar, nilan aak iikanakan ke' ngurp ngampam yimanangan uk; inan putha, nil Ngeen-Wiy Min God.antam alangan mee' yotantang meenath ngampar nil Jesus.an nhengk God.antama, a' puth ngaantiyongk God.antam al-alangan thathin nunang; puth inan thampa, nil God.angan kan koyam matath nunang, aak iikanak kenyan. A' pam wanchangana kan waa'-waa'in nunang pam wanch wiyantana, aak umyompanamakan, thaa'nganth thon-thonantan. Aak nath-nathan wun-wuntan-a, pam wanch wiy al-alangan kan-kanam ngaantam-ngeey-ngeeyantan nunang nil nhengk God.antaman.