Niiy Yal-Yalmathwuniy Aak Churchangan-a, Niiy Wiyantan Mee'-Wuth-Wuthanamān Thaka
21Ngay wik min ngul waa'āng nungkar, nint wik inangana ngeey-ngeeyāna! Ngamp mee'-wuth-wuthanamāmp God.ant, pam wanch yotamantweya, a' ngampaniy-a, thankyou thamp thaw-thawāmp nungant God.antan. 2Ngamp thamp mee'-wuth-wuthanamāmp thant, pam pi'-pi'anam al-alantan, puth pam pi'-pi'anam kings al-alantan thamp, ngamp yipam aak minang wun-wunāmpwey, kul ke'anang, ngamp yipam min-minam paththam iiy-iiyāmp ngamparakamana, mee' God.antangana. 3Ngampan mee'-wuth-wuthanamāmpa pam wanch yotamantan-a, an min ngampara, puth God.antana ngangk min ngul wun-wunow nungant. Niliy puth-a, nhengk nungantaman kuch nunang kaa'-piichanathow ngampang way ngamparam anpalana. 4Nil puth kaangk pam wanch aak umyompanamana kaa'-piichanathow thanang way thanttam anpalan; a' nil kaangk thanan wik nungantaman wik kan-kanam ngaantam-ngeey-ngeeyayna. 5Nil puth God thonam anmana! Wiy ya'a! Puth ngamp yotaman pam wanch waank ngul iiy-iiyanamp nungantama piip God.antamana, ngamp puth way anman yump-yumpanamp, nanpalman. Nil puth pam thonam anman thaa'-pant thaw-thawan ngamparaman, Jesus Christ.an, ngamp thintham yipam iiy-iiyāmp nungant God.antan. 6Nil puth Jesus.angan theetath nungamang uthamow ngampar, pam wanch yotamantan, nil God.angan yipam way anpalana kaa'-piichanathow ngampang. Aakan kan wamp nungantan uthamowan-a, nilan mi'an God.angan-a, nil Christ an-aniyangan utham, nil yipam meenathow ngampar nil God.angan kaangk kaa'-piichanathow ngampang, pam wanch aak nath-nathan wun-wunanamp. 7Inan ke'-paala nil God.angan ngayang kuch ngay yipam iiyānga pam wanch Jews ya' al-alantan. Ngay inan kan-kanam waa'-waa'ang niiyantana, ngay ke' wik uuy-uuyaminga, ya'a, nil God.angan kan-kanam kuch ngayang thantana, ngay yipam wik inangan God.antaman kan-kanam waa'-waa'āng thant, niiy yipam Christ.antan ngangk thee'āna.
8Ngay puth wik inangan ngul waa'āng nungkar: than pam wanch want-wanttinan yalmathwuntanan-a, aak churchangan-a, ngay kaangk than pam anangan mee'-wuth-wuthanamayna, puth thanana pam min ngul iiy-iiyayna, God.an monkan-wak-wakayn nunang, ngangk kul ke' pi'-pi'ayn wiyantan, a' kulak ke' yipam wenk-wenkayn thanta. 9Ngay inan waa'āng nungk thampa: ngay kaangk ke' than wanch Christians anangan ulp-ulpanangan iiy-iiyayn, than menth-menthaman ke' yump-yumpwayn thanttakamana. Than yangan thakan ke' min-minam yump-yumpwayn thanttakaman, yuk way min min-miniyan ke' kal-kalayn, kulich thakan wukal pi'anang ke' piiy-piiyayn, ya'a! Than puth kuchek minang iiy-iiyayna! 10Than wanch anangan Christians.an waa'-waa'wuntanan-a, than al-alangan ke' ngaantam-ngeeywiythan ke' menth-menthaman iiy-iiyayna, an ya'a, puth thanan pam wanch wiyantan minam anman iiy-iiyayna.
11Than aak churchangan-a, wanch anangana appap nyiin-nyiinayn, wik God.antaman ngeey-ngeeyayn. Than ke' ngaantam-ngeey-ngeeyayn thanttakam than ke' moom pi'an yimanangan, an ya'a, than wik ngeey-ngeeyayn thanang pam wuut manth-thayan anangan. 12A' than wanch al-alangana ke' wik thaa'-aath-aathayn thanang pam anangan, a' putha moom pi'an ke' iiy-iiyayn pamantana, an ya'a. An min ya'a, ngay nanangan kaangk ke'a! Than wanch anangan-a, appap nyiin-nyiinayn aak churchangan, 13puth nil God.angan ka'athaman-a, pam Adam.an yumpan, amanamaniy-a, nil wanch ngul yumpan, Eve anan. 14Nil puth oony way alangan-a, pam Adam.an ke' muukamathan, ya'a, nil wanch Eve anan ep-paththam muukamath nunangweya, nanpalan-a, nil wanch alangan wik God.antam pip-pip. Ngay puth namanaman wik inaniy thaw-thawang wanch al-alantan. 15Than wanch al-alangan nath God.an ngangkangaman pi'-pi'iythan nunangan-a, than pukan kalaynan-a, pi'-pi'ayn thanang thakan-a, nil God.angan ngul kaa'-piichanathow thanang. Puth than wanch anangana pam wanch wiy al-alantan ngangk minangam iiy-iiyayn, a' minam iiy-iiyayn thamp mee' God.antangan, a' putha than kuchek minang anman iiy-iiyayn.