Niiy Mee'-Wuthanamān Piip God.antan Ngantak
31Ngurp nganttam niiyalang, niiy mee'-wuthanamān ngantaniya God.anta. A' putha niiy thant thamp mee'-wuthanamān pam wanch aak nath-nathan wuntana wik God.antaman yipam ngeeyayn, a' monkan-wakayn nunang God.ana, ke' niiy ka'athaman wik minan ngeeyan-a, monkan ngul wakaniy nunang. 2Than pam way al-alangan kaangk wayathayn nganang niiyan puth mee'-wuthanamān nganta, nil God.angan yipam minam pi'ow nganang thanttaman, puth than God.an ke'am ngangkangan pi'-pi'antan nunang, ya'a.
3Nil Lord.an moom ngamparam yotamantama nil anman iiy-iiyan niiyantangan. Nil ngul thayanaman pi'ow niiyang, a' nil ngul minaman pi'ow niiyang, niiy oony way alantaman yipam wik ke' ngeeyāna. 4Ngan kan-kanam mee'miy niiyang niiyan wik kan-ngul ngeeyaniy nganttamana a' niiy ngul ke'-ngoongkam anman wik nganttaman ngeey-ngeeyān, niiyan puth pam wanch Christ.antam ngula.
5Ngay kan mee'-wuth-wuthanamang Lord.antan niiyanta, niiy kan-kanam paththam yipam ngaantam-ngeeyān nil God.ang kaangk niiyant paththam, a' puth niiy yipam ngaantam-ngeeyān thamp nil Christ.an thayan paththam, nil ngulan ma'-aathow niiyang yipam niiy anman monkan-wak-wakān nunang God.an, a' ke' wantān nunang.
Niiy Kemp Woopanam Ke' Iiy-Iiyān Workaka
6Ngurp nganttam niiyalang, nil Jesus Christ.an moom pi'an ngamparama, nil thawan niiyant niiy waank iiyān thanttam Christians wiy al-alantaman kemp woopanan iiy-iiyantan workaka puth wik nganttaman ke'am ngeey-ngeeyantana nganan thawan niiyant niiy wanttakan wunāna. 7Niiy mee'miy niiyan minam anman iiy-iiyin ke' nganaman woyan minan meenathan niiyanta. Ngan niiyantangan wun-wunan-a, ngan workak kemp woopanaman ke'am iiy-iiyan, ya'a. 8A' puth ngan may niiyantangan mungkan-a, ngan puth wukal thee'an niiyant mayak. Ngan work pi'an paththam iiy-iiyan kinchang a' ngutang anman workan iiy-iiyan ngan yipmam wukal uwān may piiyanakan. 9Puth niiyan nganang minam anman pi'-pi'ina, ngan puth wik God.antaman waa'-waa'an niiyant, puth nganan ke'am thawan niiyant way minakana, mayak thakana. Puth nganana work anman iiy-iiyan niiy yipmam woyan min nganttaman wakāna. 10Ngan niiyantangan wun-wunan-a, ngan kan waa'an niiyanta, “Nil wee'-nathan kaangk ke'an work iiyow-a, yaa, niiy may ke' thee'ān nungant, nil ke' mungkow.”
11Than pam wanch wiyangan waa'antan nganta puth niiy wiy anangan woopan paththam iiyaniy workaka. Niiy wiy anangan work ke' iiy-iiyaniya, puth niiy kulakan kaa'-ngoonch-ngoonchaniy. 12Ngan inan waa'an niiyanta nil Jesus Christ.an wik inangan thawan niiyant, “Niiy ke' pal-puyan iiy-iiyāna. Niiy minam anman work iiy-iiyāna, a' niiy may anangan wukal niiyantamangan piiyān.”
13Ngurp nganttam niiyalang, ngay niiyant yotamant thawāng: niiy min ke'-ngoongkam anman iiy-iiyāna, niiy woyan min anpalan ke' mel enchāna. 14Nil wee'angan nath kaangk ke'an wik min nganttaman ngeeyowa ngan latangan umpanan-a, niiy ma'-yotaman nungantangan ke' nyiin-nyiināna, nil yipam ngul-nyaa' iiyow puth nil wik nganttaman kaangk ke' ngeeyow. 15Niiy ke' ngangk kulangaman kalān nunanga, niiy wik thawān nungant ke' ngamp kuunch ngamparamakan thawanamp. Niiy thaa' mich-micham thawān nungant nil yipam wik nganttaman ngeeyowa.
Ngay Kaangk Nil Piip God.angan Minam Pi'-Pi'ow Niiyang
16Nil Lord.ang thonakam ngangk ngamparaman min yumpana. Ngeen nath wampow niiyant-a, aak min nathwey-a, nathwey aak way wampiy-a, ngan kaangk nil Lord.angan ngangk min yumpow niiyang, a' angman iiyow niiyantang.
17Ngay Paul.ang wik inangan umpang niiyanta, ngay ma'-yotam ngaantam-ngeey-ngeeyang niiyang, niiyana yipmam kan-kanam ngul mee'miy lat ngatharamana.
18A' ngay ngul mee'-wuthanamāng nungant Lord Jesus Christ.antan nil ngul thath-thathow niiyang a' min iiyow niiyanta.
Anman kan,
Paul