Pam Way-Wayam Paththam Ngul Wampow
21Ngan kaangk waa'ān niiyant nil Lord Jesus Christ.an palam ngul ukow aak iikanakana, a' nil yotam yalmathow ngampanga, pam wanch nungantamana, karpam nungantang ngul wunāmp. 2Than pam wanch wiy anangan thawantan ke' nil Lord.an kanam wampa, puth ya'a, than yaan wik uuy-uuyamantana. A' than pam wanch wiyangan ngaantam-ngeeyantan ke' ngan waa'an thant ke' nil Jesus puthaman kan wamp aak inganiya, nil ya'a, ngan ke'am waa'an thant. Than wiyangan ngaantam-ngeeyantan ke' ngan wik anan latang umpan niiyanta, puth ya'a, ngan wikan ke'am umpan niiyant ya'a. Than wiyang ngaantam-ngeeyantan ke' nil God.ang wik anan meenath ngant, puth ya'a, nil ke'am wikan meenath nganta. Ngurp ngatharam niiyalang, ngay thaa'-mamanang thaw-thawang niiyanta, puth ngangk niiyantaman a' kuchek niiyantaman way ke' wunow wik alantaman. 3Than pam wanchangan ke' muukamathayn niiyang. Inan kan-kanam ep nil Jesus.an palam ngulan ukow aak iikanakana. Puth ka'athamana than pam wanchangan man-mangkaman thee'ayn God.antan a' thaampayn nunangan. An-aniyangana nil pam way-wayam paththam ngul wampowa. Pam nil inmanan-a, nil God.angan ngul wayathow nunang aak angan aak wayangana. Puth ka'athamana nil pam wuut pi'an paththam iiyow a' nil thaampow nunang God.an puth wik ngench thayan nungantam anangana thaampow. 4A' yuk ngeen-wiy anangana pam wanchangan thaa'-kuump-kuumpantan-a, an nil thaampow thanang. Nil nungamangan ke' wuut pi'an yimanangan waa'ow, nil God-a, a' puth-a, oony way anangan-a, ke' ya'a. A' nil pek ngoonchow aawuch God.antamangan a' angman nyiinow a' nil thaa'-kuumpow nungantakaman a' nil ke' God waa'ow nungantakam.
5Ngay niiyantangan wun-wunang-a, ngay anman murkanam waa'-waa'ang niiyant aak ngeen nathan wampow nil Jesus.an palam ngulan wampow. Ngamp ngaantam-ngeeyāmp wik inangana a' puth ke' kon-ngathow ngampanga. 6Niiy puth mee'miy nil thonamanga koyaman ak-wichan nunang pam way paththamana, nil kaangk ke' yippak kuchowana. Puth ngulan ep nil God.angan aak mi'-a, than pam wanchangan kaa'wal ngurp paththam thathayn nunang pam way paththam anana. 7Than pam wanch wiyangan God.an nunang kaangk ke' paththama, than puth pam wanch anangan way iiy-iiyantan. Puth nil thonam ilangan-a, ak-wich-wichan thanangan than ke' yipam way-wayam paththaman iiy-iiyayn. Ngulaniy-a, an nil ke'-ngul ak-wichow thanangana, puth lam-lam ngul ya'amowa. 8Anpalaniy-a, than pam wanchangan ngul thathayn nunang pam way paththamana pam nil ngangk kulangaman kal-kalan nunang God.ana. Nil Jesus thonakam moom pi'an ngampar yotamantana. A' nil Jesus.an ngul wampow a' mulakam wuu'ow nunang puth pam alangan nganth nungantam thampan thathow an nil mul ngul wunow, pam way ananiya.
9Puth ka'athaman nil pam way inmanan wampow-a, nil oony way Satan.an moom pi'an iiyow nunganta. Nil oony way alangan ngul ma'-kunch yumpow nunangan work pi'an wiy-wiyam meen-meenathow, puth min ya'a, an work way paththam, than pam wanchangan min-min ke' thiichayn, a' than winynyang mo'-mo'ayna. 10Nil work pi'an way paththam anangan meenathow thant nil yipam muukamathow thanang pam wanch way anangan ke' nil pam pi'an, ma'-kunch yimanangan. Pam wanch way anangaman-a, aak wayakan iiyayn, than puth wik God.antaman kaangk ke' ngeey-ngeeyayn, ke'am ngangkangan pi'-pi'antan, ya'a. Nil God.angan nanpalan ke' kaa'-piichanathiy thanang, ya'a. 11A' anpalaniya, nil God.an thawow ngul, “Yaa, an kana, than mak ngaantam-ngeeyayn nil pam way paththaman ke' mina.” 12Than pam wanch al-alangan wik min nungantam kaangk ke'an ngeeyayn. Than puth ngangk minangam way anangan yump-yumpayna. A' puth anpalan-a, nil God.an ngul thawow thant, “Niiy way paththam iiy-iiyaniya. Ngay wayathāng niiyang ngula.”
Nil God.angan Mi' Niiyang A' Kaa'-Piichanath Niiyang
13Ngurp nganttam niiyalang, ngan anman mak thankyou thaw-thawān nungant God.antan niiyantamana. Nil Lord.an moom ngamparam yotamantamana, nilaman kaangk wunan niiyanta. Nil keenkam anman mi' niiyang nilan kaa'-piichanathow niiyang. Nil puth Ngeen-Wiy Min nungantaman kuch min yipam yumpow niiyanga niiyan puth wik kan-kanam God.antam anangan ngangkangaman pi'-pi'aniy. 14Ngan ka'athaman wik min God.antaman niiyant waa'-waa'an-a, nil ump niiyang wampān nungantana, niiy yipmam woyan min nungantamana wak-wakāna, a' niiyaniya ke' pam wanch nyiingkanam ngul iiyāna. Nil kaangk nganth nungantaman Lord Jesus Christ.antam parkow niiyantanga. 15Ngurp nganttam niiyalang, niiyan nanpalana anman ngangkangam pi'-pi'ān nunang God.an a' niiyan woyan way ke' wak-wakān. Niiy ke'-ngoongkam ngangkangam pi'-pi'ān wik yotam anangan nganan thaa'-aath-aathan niiyangan. Ngan wik anangan waa'-waa'an niiyantana a' puth latang anangan ump-umpan niiyanta.
16Nil Lord Jesus Christ.ana pul piip God.angan kaangk wunanpul ngampar yotamantana. Pul ngangk minangam iiy-iiyanpul ngampar, ke'-paal pul ngangk thayanam pi'-pi'anpul ngampang, puth ngampana anman yipmam ngangk thayanam iiyāmpa, ngamp puth kan mee'miy an pul kan-kanam paththam min iiyanpul ngamparaniya. 17Ngan mee'-wuthanamanan pul God.angan a' Jesus Christ.angan ngangk thayanathowpul niiyang a' puth thayanam anman yumpowpul niiyang puth niiyaniya yipmam min anman yump-yumpān a' puth wik min anman thaw-thawān.