2 THESSALONIANS
Lat Thonangan Inan Paul.angan Ump Pam Wanch Aak Thessalonica Punchan Al-Alantana
11Ngan pam ko'alam inangan Paula, a' Silasa a' putha Timothy.ang lat inan umpanan niiyanta pam wanch Christians aak Thessalonica punchan nal-nalantan, puth niiy wee'-wee'anangan ngangkangan pi'-pi'aniy nunang piip ngamparam God.an a' puth moom ngamparam Jesus Christ.an.
2Ngan mee'-wuthanamanan pulant piip God.angan a' Lord Jesus Christ.angan minam paththam pi'owpul niiyangan a' ngangk min yumpowpul niiyang.
Nil Jesus.an Palam Wampow Ngampar A' Umang Thanathow Ngampang
3Ngurp nganttam niiyala, ngan anman mak thaa'-kuump-kuumpān nunang God.an niiyantam yotamantamana. A' an ngant mina thankyou thawanan God.antan niiyantam puth niiy min-min anman ngangkangan pi'-pi'aniy nunanga a' puth niiy kaangk paththam anman wunaniy niiy-niiyantakaman. 4Than pam wanchangan thaa'-thengkathantan niiyangan, way yumpantan niiyanta, puth anpalman niiy monkanan-wakaniy nunang piip God.an. Puth aak way niiyant ma'-yotam wamp-wampana. Nganan puth wik min waa'an niiyantam pam wanch churches wiy al-alantan, ngan waa'an thant niiy aak wayan thaampaniy a' anman ngangkangaman pi'-pi'aniy nunang God.an, niiy ke'aman koyam weentaniy God.antaman.
5Inan meenathan ngampar nil God.an anman min paththam iiy-iiyana. Niiyan anman monkan-wakaniy nunang God.ana, ke'-paal than pam wanchang thaa'-thengkathantan niiyang a' kulakan wenkantan niiyant. Puth nil God.an kan-kanam min paththama a' nil ngul thathow niiyang pam wanch min paththaman a' nil kalow niiyang aak nungantangan wunān aak umpuyamana. Nil ma' nungantangan ngul pi'-pi'ow niiyanga. 6Nil God.ana minam anman iiy-iiyan. Than wee'-wee'anangan thaa'-thengkathantan niiyang-a, a' kulan uwantan niiyant-a, an nil ep wayathiy thanang. 7A' ngul-ngulana nil Jesus.ana, nil moom pi'an ngamparamana, nil inpal kenyan ukow aak iikanakana. Aak an-aniyangan nil palaman ukow-a, nil kulaman ngangk maalam ngul pi'-pi'ow ngampang, niiyang a' puth nganang thamp. Nil ngul palam wampow ngampar ke' thum nganth yimanangan a' ngaantiyongk nungantam thayan anangan than karpam palan ukayn nungantangana. 8Aak an-aniyangana nil kan-kanam ngul wayathow thanang pam wanch anangan kaangk ke'an nunang God.ana a' kaangk ke'an wik ngeeyayn wik min nungantam Jesus.antamana. 9Nil ngul kuchow thanang nath aak umpuyama. Aak way anman ngul wampow thant aak umpuyamana. Than il-ilangana kaa'wal nungantam God.antaman ke' thathayna park-parkow ke' nganth yimanangan, than puth ke' wunayn nungantang, nil pam pi'an a' thayan paththam, alantangan ke' wunayn. 10Aak pi'anan wampowan-a, nil Jesus.an palam ngulan ukow aak iikanakan-a, aak an-aniyangan-a, nil God.angan pam wanch wayanang anangan ngul kuchow thanang. Than pam wanch wee'-wee'anangana than monkanan-wakantan nunang Jesus.an-a, than ngul thathayn nunang nil min-minam paththaman a' putha wuut pi'anan thampa. Nganth nungantam parkow ngamparang Christians al-alantangan, ngamp ngulan parkāmp nganth nungantam alantaman a' ngamp yotamangana puth thaa'-kuumpāmpana. Niiy thampan ngul thaa'-kuumpān nunangana, puth anpalman niiy wik nganttam ngangkangan pi'-pi'aniy.
11Nganan paal ngaantam-ngeeyanan niiyang a' mee'-wuthanamanan niiyanta. Ngan thawanan God.antan nil niiyang thayanam yumpow niiy yipmam minam iiyān ke' nilan kaangk niiy iiyān. Puth niiy God.an ngangkang pi'-pi'aniy nunang puth anpalana niiyan kaangk min anman iiy-iiyāna, nganan puth nanpalan thawanan nungant God.antan nil thayanam paththam yumpow niiyanga niiy yipmam min anman iiy-iiyāna. 12Ngan mee' anman wuthanamanan niiyant than wiy al-alangan yipmam pam wanch min thathayn niiyang, a' anpalana thanan-a, Lord Jesus nunang min waa'ayna a' thaa'-kuumpayn nunang niiyantam anpalan. A' puth ngan mee'-wuthanamanan nil Lord Jesus.angan ngul ma'-aathow niiyang than pam wanchangan yipam thathayn niiyang min paththama. A' piip God.angan pul Lord Jesus Christ.angan pul kaangk ngangk min yumpowpul niiyanga.