Ngamp Ma' Min Yumpwumpa, Nil Puth Lord.an Yip-Yipam Wampowa
51Ngan wik inangan puth yotaman ke' ump-umpin niiyant Lord.an aak ngeen nathan wampow ngampar. 2Puth ngamp aak ananiy-a, ngoongk-ngoongkam nil Lord.an palaman wampowa, nilan puth ma'-pil-wayathow ngampang. 3Ngamp pam wanch inangan thaw-thawanampa, “Ngamp kan minama.” A' puth yaam ke'anamana, an aak wayan wampow ngampar, an puth ngampan ke'-ngul ma' min yumpwimp ya'a. Ngampan puth ke' mo'imp ya'a. An ke' nil wanch iimpanang yimanangan thipan pekan nunang puk kalanakan, ke' aak anan kan wampantweya puk manyan aak ngeeyowan. 4Than pam wanch al-alangana, than God.an ke'aman ngangkangan pi'-pi'in nunangan-a, an than ngangk ikayn nil palam ngulan wampow. Puth thanan ke' aak ngaa'ang yimanangan wun-wuntan. Puth niiyana, ngurp ngatharam ananganiya, an niiyan ke' ngangk ikin a' winynyangan ke' mo'inweya, ya'a. 5Niiyan puth pam wanch God.antama, niiyan ke' aak nganthang wunaniy. Niiy ke' pam wanch anangan than ya'a, than God nunang ke'aman ngangkangan pi'-pi'in nunangan. 6Niiyan man-mangkaman ke' thee'ān nungant a' puth way anangan yaam ke' iiy-iiyāna. Niiy God anman ngaantam-ngeey-ngeeyān nunang a' mee' thee'-thee'ān nungant Christ.ant nil palam ngulan wampow a' puth niiy kuchek minangam anman iiy-iiyān. 7Than pam wanch al-alangan God.an nunang ke'an ngangkangan pi'-pi'antan nunangan-a, a' way-wayam paththaman iiy-iiyantanan-a, thananiy-a, aak ngaa'ang angman wun-wuntan. 8Puth ngamp inanganiya pam wanch nungantam Lord.antam, aak nganthangan iiy-iiyanampan-a, ngamp min-min iiyāmpa. Ngamp God anman nunang ngaantam-ngeey-ngeeyāmpan, a' puth pam wanch wiyantan thamp kaangk wunāmpweya. A' puth ngamp wik inangan kuchekangam pi'-pi'āmp nil God.angan ngul-ngulan kalow ngampang nungantangan wunāmp aak umpuyaman. Ngamp yimanangan min iiyāmp-a, an ngamp ngangk thayan paththam iiyāmp a' oony wayan ke' ngeey-ngeeyāmpan. 9Nil God.angan pam wanch nungantam anangan thanang ke'am wayathan, puth nil kalow thanang ep aak umpuyaman wunayn nungantangan. Nil puth Lord Jesus ngamparaman utham ngampar. 10Nilan puth utham ngampar, ngampan yipam karpam wunāmp nungantang aak umpuyama. Ngamp man-yetham inangan iiyanampa, a' puth mulan wuntana, nil palaman wampow-a, ngamp karpam yotaman nungantang ngul wunāmp. 11Niiy wik inangan waa'-waa'ān niiy-niiyantakaman, a' puth ngangk thayanathwun niiy-niiyantakaman, a' puth ma'-aathwun niiy-niiyantakaman. Niiyan ngangk thayanam iiy-iiyān minam anman Lord.an monkan-wak-wakān nunang, ke' niiy inman iiy-iiyaniy.
Niiy Wik Inangan Kan-Kanam Ngeeyāna
12Ngurp nganttam niiyala, ngan wik thayanam thawanan niiyant niiy wik thanttam al-alantaman ngeey-ngeeyāna than niiyangan wik God.antaman thaa'-aath-aathin niiyang niiy wanttakan minaman monkanan-wakān nunang God.an. 13Niiy minam thanang ngaantam-ngeeyān a' niiy puth kaangk wunān thant, than puth thaa'-aath-aathantan niiyangweya. Niiy-niiyantakaman yimanang tham min-minam pi'-pi'ān a' puth kaangk wunān niiy-niiyantakaman. Niiy thaa' kulaman ke' thaw-thawān niiyantakamana.
14Niiy yimanangan ma'-aath-aathwun niiyantakam: than pam wanch anangan woopan wal-wayan iiy-iiyantan-a, niiy puth-putham wik thayanam thawān thant, a' puth al-alantan thamp wik thayanam thawān kulakan thakan wenkantan. A' puth pam wanch anangan tham thanang ma'-aathān winynyangan mo'antan. A' puth thanang anangan ma'-aathān ngangk winy-winynyangan iiy-iiyantan, mich ananganweya. A' niiyaniy-a, ke' kerk-kerkathwuna. 15Niiy puthangkan way ke' yumpān thant pam wanch wiyantan, than ka'athaman wayan yumpin niiyant. Niiyan ka'athaman ngaantam-ngeeyāna, niiy yipam min yumpān niiy-niiyantakamana, a' puth thant pam wanch ma'mangkamantan.
16Niiy ngangk minangam paththam iiy-iiyāna, 17a' putha niiy ma'-yotam mee'-wuth-wuthanamān anman God.antan. 18Nath aak min wampow niiyant-a, nath ya'a, aak way wampow niiyantwey-a, puth niiyana thankyou thaw-thawān nungant God.antan. Nil God.ang kaangk ngampang Christians.angan thaa'-kuumpāmp nunang puth ngampaniy-a, Jesus Christ.anta.
19Niiy Ngeen-Wiy Min God.antamana ke' thaampān nunang, nilan mak ma'-aathow niiyang. 20Nil God.an wik pam wee'antwey ngangkangan thawiy nungantan-a, puth nilan yipam niiyant waa'ow, niiyana wik ngeeyān nunang, ke' thengkathān nunang, a' mee' kulangam ke' thathān nunang. 21Nil pam nath thawiy nilan ke' wik God.antaman waa'iy-a, niiy ngaantam-ngeeyān ngul niiyantakamanwey, nath wik mina, ya' nath, wik waya. Niiy nath wik min anangan ngeeyin-a, puth niiyiya anman wik min anangan ngangkangam pi'-pi'ān thanang. 22Niiy nath wik way anangan ngeeyin-a, niiyana waank-waankam iiyāna, kuchekangam ke' ngoonchathān ngaantam-ngeeyanakana. Way yot niiyan yump-yumpan thanang-a, kan too wantāna.
23Ngay kaangk nil God.angan ngangk min yumpow niiyang. Ngayan thama nungant thawangan ma'-aathow niiyang yipam minam iiy-iiyān ke' pam wanch min nungantam anangan yimanangan. Ngay thawang nungant nil yipam min-min pi'-pi'ow niiyang, kemp a' puth ngangk, niiy ke' yipam wayan iiy-iiyāna. Anpalana, nil Lord Jesus ngamparam palaman wampow-a, min uwow ngampang. 24Nil God alangan ump niiyang niiy yipmam puk nungantaman yipam iiyāna, a' puth nilam thonam alangaman ngul minaman pi'ow niiyang a' ma'-aathow niiyang min anman iiy-iiyān. Nilan kan-kanam wik nungantaman pi'ow, wik ke' pipiy, ya'a.
25Ngurp ngatharam niiyalang, niiy mee'-wuthanamān ngant.
26Ngan wik kuchanan thant yotam nal-nalantana than Jesus.an monkanan-wak-wakantan nunang ngan kaangk paththaman wunanan thant. Niiyiya thanangan ma' thuthānwey niiy puth karpam Christ alantana.
27Nil Jesus.an thawar ngay wik inangan waa'āng niiyant: ngay kaangk niiy lataman inan wichān thant yotam nal-nalantan than Jesus.an monkan-wak-wakantan nunang.
28Ngay mee'-wuthanamang niiyantan nil Lord Jesus Christ.an ngangk minangam iiy-iiyow niiyant.
Anman kan,
Paul