Ngamp Min Iiy-Iiyāmp, Piip God.an Ngangk Min Yumpāmpan
41Ngurp ngatharam-ang, ngan kan waa'an niiyant keenkanaman nil God.angan kaangk niiy want-wanttakan iiyān. Niiyiya minam iiy-iiyaniy. Ngan inan thaa'-thayanam thawanan niiyant, niiyaniya puy-puyam minam anman iiy-iiyān ke' nil God.angan kaangk niiy wanttakan iiyān. Nil Lord Jesus.an nil thamp kaangk niiy min-minam iiyān. 2An puth niiy mee'miya nil thaw ngant wik inangan waa'ān niiyant. 3Nil God.angan kaangk niiyang pam wanch nungant iiyāna, a' wik thayan ngeeyān nungantamana. Niiy ke' maarich kee'athān wanch pam thonantamana an puth wanch niiyantam ya'a. 4Niiyiya oony wayan wik ke' ngeeyān nunang, niiyiya minam anman iiy-iiyān wanch thum niiyantamakan. Nil God.angan kaangk niiy wanch niiyantamantang anman wunān, niiy minam kaangk wunān thantwey. Nil God.ang kaangk ngamp yimanangan iiyāmp puth ngampaniya pam wanch nungantam. 5Ngamp ke' ngaantam-ngeey-ngeeyāmp woyimpiy thakan kee'āmpa. Ngamp ke' pam wanch way yimanangan ke' iiyāmp, an puth than God.an nunang ke' mee'miy ya'a ananganiya. 6Nil God.angan kaangk ke' niiy pam Christians wiy anangan man-monkan thenchān thanang wanch thanttamakan. An puth ngul-ngulaniya nil God.angan way-wayam paththam yumpow niiyant puth niiyan way yump-yumpaniy, pam wanch thonantangan wun-wunaniy. Ngan wik inangan kan waa'an niiyant ka'athaman. 7Nil God.angan ke' mi' ngampang way-way thamp ngaantam-ngeeyanakana, woyimpiyak thakana. Nil kaangk ke' ngamp yimanangan iiyāmp. Nil aakanakan ke' yump ngampang. Nil kaangk ngamp wik thayan nungantaman pi'-pi'āmpa, ngamp minam paththam iiy-iiyāmpa. 8Than wee'-wee'anangan wik inangan ke'aman ngeeyantan-a, an puth thananiya God.an ke'am ngeeyantan nunang. Wik inangan pamantam ya'a. An wik God.antam kan-kanam. Nilam God.ang Ngeen-Wiy Min nungantam kuchan ngampar.
9Ngan wik inangan umpanan niiyant: niiy pam wanch Christians anangan kaangk wunān niiy-niiyantakaman. Puth ngananiy-a, yot ke' umpin niiyanta nil puth God.angan kan meenath niiyant niiy want-wanttakan kaangk wunān niiy-niiyantakaman. 10Ngay puth keenkan kan thathang niiyang niiy Christians wiy nal-nalantan kaangkan wunaniy aak nanman wunaniy, Macedonia.angan. Ngan inana thayanam thawanan niiyant, niiyaniy kan-kanama ngangk pal-pekkuwamana kaangk wunān niiy-niiyantakaman a' ngangk minangam iiyān niiy-niiyantakaman. 11Niiy ngangk minangam wunāna, kul ke'ananga. Niiy kulakan ke' kaa' ngoonch-ngoonchān wiy-wiyantanganiy. Puth niiyiya niiyantakamwey work iiy-iiyān, may minh yalamathān, ke' ngan keenkan thawan niiyant. 12An niiy yimanangan iiy-iiyān-a, an pam wanch Christians ya' al-alangan an min thathayn niiyang. A' anpalaniya niiyana ke'-ngul ma'-minaman iiy-iiyān pam wanch wiyantan.
Nil Lord Jesus.ana Palam Wampow
13Ngurp ngatharam niiyalang, ngan kaangk niiyan mee'miy iiyān Christians anangan want-wanttakan wunayn thanan uthamaynan ngula. Ngan kaangk ke' niiyan ngangk wayan wunān ke' than pam wanch anangan than God.an nunang ngoongk-ngoongkaman. Than Christians uth-uthamantanan-a, than aak God.antamak iiyantan. Puth than pam wanch anangana God ke'aman ngangkangan pi'-pi'antan nunangan-a, an than nungantangan ke' wunayn, ya'a. 14Ngampan kan ngaantam-ngeeyanamp nil Jesus uthamana a' koyam ngul ek a' man-yethaman anman. A' puth ngamp inan thamp kan mee'miy nil Jesus palam ngulan wampow-a, than Christians kanaman uth-uthamin-a, than thamp palam karpam nungantang ngulan wampayn aak iikanakan.
15Wik inan waa'anan niiyanta nil Lord.an thaw: nil Lord aak iikanakan palam ngulan wampowan-a, than pam wanch kanaman uth-uthaminan-a, thananiy-a, ka'atham umang wampayn nungant. Anpalana ngamp man-yethaman inangan iiyanamp-a, ngamp ngul umang wampāmpanta. 16Nil Lord.an heavenaman ngul palaman ukow a' nilan umpow ngampang. Ngampana wik ngaantiyongk mooman ngeeyāmp pechowan a' puth trumpet God.antaman tham ngeeyāmp. Than Christians anangan kanaman uth-uthaminan-a, thananiya ka'atham mulaman ekayn a' umang wampayn nungant ngul. 17Anpalaniya, ngamp man-yethaman inangan yippak iiy-iiyanampa, an nil God.angan erkam kalow ngampangan kenyam yuwakan, an ngamp karpam ngul wunāmp thanttang al-alantangan ka'athaman uth-uthamin. A' anpalaniya, ngamp nunang Lord.an ngul umang uwāmpan yuwang. Ngampana, nungantang Lord.antang aak umpuyam wunāmp ngul. 18Wik il-ilangan ngangk thayanathwun niiy-niiyantakam.