31-2Ngan kaangk paththam thathān niiyangweya, puth ngananiya aak Athens angman ngul wunan a' ngan Timothy kuchan nunang niiyangan yipam thathow. Nil Timothy ananiya kuunch nganttamweya. Nilwey nganttang work iiy-iiyan nungant God.ant ngan yipam pam wanch yotamant wik min Christ.antaman waa'-waa'ān thant. Puth nganan nunang kuchan nil yipam thayanathow niiyang a' ma'-aathow niiyang, niiy yipam kan-kanam paththam thiichān nunang God.an. 3Niiy yipam ke' too wantān nunang God.an ke'-ngoongkam anman monkan-wakān nunang niiy ke' yipam mel enchān woyan min anpalan way aakanakan puth anpalan pam wanch wiyangan way-wayathantan niiyang. Niiy mee'miy wik God.an thaw wiyangan way yumpayn niiyant pam wanch nungantamakana. 4Ngan aak nangan yippakan wunan niiyantangan-a, nganiya kan waa'an niiyant, than pam wanch wiyangan way ngul yump-yumpayn ngampar, puth anpalan ngamp God.an monkan-wak-wakanamp nunang. Niiy puth kan mee'miy than pam wanchangan ma'-yotaman way anman yump-yumpantan ngamparwey. 5Ngay puth yaaman ke' kuuping wik niiyantaman ngeeyāng, niiy wanttakana natha, yaam anman ngangkangaman pi'-pi'aniy nunang God.ana nath ya'a, oony way alangan kan nath weentath niiyang woyan way aakanakan nungantamakana, niiy God.an kan nath wantan nunanga. Ngay puth nanpalan kuchang nunang Timothy.an nil yipam thathow niiyang nath God.an yaam monkan-wak-wakaniy nunang, nath ya'a. Niiy nath oony way alantaman wik ngeeyinwey-a, a' God.an wantān nunang ngul-a, yaa, an puth nganan wik min God.antaman ya'angam waa'-waa'anan niiyantweya.
6Puth ya'weya! Nil puth Timothy.an wik min thamp wamp, wik min niiyantama. Puth ngangk ngantan min paththam wuna wik minan ngeeyan niiy piip God.an yaaman ngangkangam pi'-pi'aniy nunanga a' niiyaniya anman kaangk wunaniy niiyantakamanwey. A' puth nil Timothy.angana palam wampa a' waa' ngant niiyantaman wik mina niiy yaaman ngaantam-ngeey-ngeeyaniy nganang a' puth kan-kanam puthaman kaangk thathān nganangana, ke' nganana kaangk thathān niiyangana. 7Nungkway than wiyangan wayan yumpantan ngant-a, a' ngangk ngantweya way-wayam paththam wunana, puth ngan ngangk minang anman iiy-iiyanan niiyantaman puth niiy God.an monkan-wak-wakaniy nunang. 8Niiy puth ngangk thayanam ngul iiy-iiyaniy God.anta, ke'-paal niiy ngangk min yumpaniy nganang. 9Nil God.angan nganang ngangk min yumpan puth niiyantam anpalan niiyan monkan-wak-wakaniy nunang. Ngan God.antan thankyou paththam thawanan niiyantamana. 10Ngan God.antan ma'-yotam mee'-wuthanamanana kinchang a' puth ngutang, thawanan nungant ngan yipam putham thathān niiyangana. Ngan puth kaangk wik min God.antaman puth-putham waa'-waa'ān niiyant, wik yotam anangan waa'ān niiyant.
11Ngan inan mee'-wuthanaman nungant piip ngamparamant God.ant a' puth Lord Jesus.ant woyan meenathowpul ngant ngan yipam wampān niiyantweya. 12Ngan mee'-wuthanamanan niiyant, nil Lord.angan ngul ma'-aathow niiyangan, niiywey puy-puyam kaangk paththam wunān niiy-niiyantakamana. Niiy kaangk paththam wunān niiyantakam a' puth thant pam wanch wiyant tham yimanang kaangk wunān ke' ngan yimanangan kaangk wunanan niiyant. 13Niiy yimananganwey kaangk wunin niiyantakaman-a, yaa, nil piip God.angan ngul ngangk thayanathow niiyang yipam nunang anman wik ngeey-ngeeyān. A' puth anpalaniya, nil piip God ngamparam alangana ngul thathow niiyang min anman iiy-iiyān ke' nilan kaangk thathow niiyang niiy wanttakan iiyān aak an-aniyangan nil Lord Jesus ngamparam anan putham palaman ngulan wampow aak earth iikanakana. Nil Jesus palaman wampow-a, an nil pam wanch nungantam ka'athaman uth-uthaminan-a, nil palam ngul ukathow thanang a' puth ngaantiyongk nungantam tham palaman ukathow thanang.