41Niiy pam moom ananganiya, niiy minam a' man-thonam iiy-iiyān pam al-alantan than workan iiy-iiyantan niiyantan. Niiy inan tham ngaantam-ngeeyān, niiyana moom pi'an thamp aak in kenyan wun-wunana.
Niiy Wik Inangan Ngeeyāna
2Niiy ma'-yotam mee'-wuth-wuthanamān. Niiy mee'an wuth-wuthanamān-a, mee' anhan weepakan ke' wampow niiyant, puth minam thawāna, a' thankyou thawān nungant God.antan. 3A' puth niiy ngant thampan mee'-wuth-wuthanamāna. Niiy thawān nungant piip God.antana nil kuchow nganang wik min nungantam yipam waa'-waa'ān thant pam wanch wiyantana. Nganan kaangk waa'ān thantan nil Christ.an ngangk thanttamangan kaangk wunowa. Puth ngay aak in-ngul wun-wunang jailanga anpalan ngay puth wikan waa'-waa'ang thant pam wanchantan. 4A' niiy mee'-wuthanamān ngathar ngayan yipam wik engkanang waa'-waa'āng thant.
5-6Niiyan min-min ngaantam-ngeeyān, niiy want-wanttakan iiyān thantan than anangan than ke'aman yippak ngangkangaman pi'antan nunang piip God.ana. Niiy uwān thanangwey-a, niiyan wik min-minam thawān thant. A' puth niiyan wik kan-kanam ngangk minangam thaw-thawān thantwey, a' than wikakan engkayn niiyantwey-a, niiyiy-a, kan mee'miy ngul wik min koyaman thawān thant.
7Nil Tychicus, kuunch ngamparam alangana wik ngul waa'ow niiyant ngayangana. Nil puth work minam iiy-iiyan God.antana. 8Ngay ke'-paal kuchang nunang niiyantana nil yipam waa'ow niiyant nganangan a' puth nilan yipam ngangk thayanathow niiyangweya. 9Nil Onesimus.an thamp nungantang wampow niiyanta. Nil pam kampan niiyantama, an nil thamp kuunch ngamparam thampweya. Pul kucham al-alangan wik ngul waa'-waa'owpul niiyant wik ma'mangkamana ngan wanttakan iiy-iiyanan.
10Nil pam Aristarchus.ana, nil jailang inman ngatharang karpam wun-wunanweya, nil wik inan kuchan niiyanta nil puth ngaantam-ngeey-ngeeyan niiyang, a' putha nil Mark alangan-a, kuunch Barnabas.antamana, wik kuch thamp niiyant nil thamp ngaantam-ngeey-ngeeyan niiyangwey. Niiy wik nungantam Mark.antam kanam ngeeyan. Nil wampiy niiyantwey-a, yaa, niiyan ngangk minangam iiyān nungant. 11Nil Joshua.ana, namp thon nungant Justus inana, nilwey ngaantam-ngeey-ngeeyan niiyang thampa. Than pam ko'alam inangana, pam Jews thanam thonakam karpaman work iiy-iiyantan ngatharangan nungant God.antana. Than piip God.an ngangkangam pi'-pi'antan nunang a' puth than work pi'an iiy-iiyantan ngatharanganweya.
12Nil pam Epaphras.angan yimanang thamp ngaantam-ngeey-ngeeyanwey niiyangana. Nil pam kampan niiyantamweya a' nil tham work Christ Jesus.ant iiy-iiyana. Nil ma'-yotam mee'-wuth-wuthanaman niiyantan niiyan yipam thayanam iiy-iiyān God.anta, niiyan yipam min-minam ngaantam-ngeeyān nil God.angan kaangk niiy want-wanttakan iiy-iiyāna, a' niiy ma'-yotaman wik ngeeyān nungantamana. 13Ngay mee'miy puth in kan-kanam nil Epaphras.an work pi'an paththaman iiy-iiyan niiyantana a' puth thant pam wanch Christians aak Laodicea.ang wuntan a' puth aak Hierapolis.angan wuntan al-alantan thampana. 14Nil Luke, nooyan ngamparamana, a' puth Demas.angan pul tham niiyangwey ngaantam-ngeey-ngeeyanpula.
15Niiy waa'ān Christians al-alantan thant aak Laodicea.angan wun-wuntana, ngay thanang tham ngaantam-ngeey-ngeeyanga, puth nunang thamp kuunch ngamparaman, Nympha.an a' thanang thamp pam wanch Christians anangan aak nungantamangan yalmathwuntana. 16Niiy lat inan kanan readimpungān-a, ngulana niiy thant pam wanch God.antam al-alantan readimpungān thamp aak Laodicea.angan wuntan. Than ngurp ngamparam al-alangan aak Laodicea anpalan lat thonangan ngul kuchayn niiyant ngatharamana niiy yipam readimpungān thampa. 17Niiy Archippus alantan thawāna, nil kan-kanam minchathowa work nil piip God.angan thee' nunganta.
18Lat inana, ngayam Paul.ang umpang wik ko'alam inangan ma' ngatharamang hello thamp thawanga. Ngay kaangk niiyangan ke' kon-ngathow ngay puth inman jailang wun-wunanga. Nil God.ana min anman iiy-iiyow niiyant yotamantana, puth anman kan.
Paul.