21Ngay inan waa'āng niiyanta, ngay work pi'an paththam iiy-iiyangan yipam ma'-aathāng niiyanga a' than pam wanch anangan aak Laodicea.angan wuntan, a' puth than pam wanch anangan than ngayang ngoongk-ngoongkamanweya. 2Ngay work pi'anan iiy-iiyangana, niiy yipam ngangk thayanam iiy-iiyān a' puth kaangk wunān niiyantakama niiy yipam wik minan kan-kanam thiichān Christ.antamana, kan-kanam ngaantam-ngeeyān wik inan kan-kanam paththama. Aak ka'athamana, nil piip God.angana wik thenchanam pi'-pi' nungantakam wik Christ.antamana puth nil God.angan-a, kan-ngul waa' ngampara. 3Ngamp puth-puthamana yaaman wik ngeey-ngeeyimp Christ.antaman-a, yaa, an putha ngamp God.an puy-puyam ngul thiichimp nunang.
4Ngay wik inan waa'ang niiyant, niiy yipam wik wiyantaman ke' ngeeyān an yaan wik uuy-uuyamantan niiyantanweya. Nungkway an ke' wik minan waa'-waa'antan niiyant-a, an ya'a, niiy wik thanttam ke' ngeey-ngeeyāna. 5Nungkway ngay aak kech wun-wunang niiyantaman-a, an ke' ngay aak niiyantang nanman wun-wunang, puth ngay ma'-yotam ngaantam-ngeey-ngeeyang niiyanganweya, a' puth ngangk ngatharaman min wunana wik minan ngeeyang niiyantamana niiy ma'mangkamang ke'-ngoongkaman ngangkangaman pi'-pi'aniy nunang Christ.an a' ke'aman eench-eenchaniy nungantamana.
Niiy Minam Wunān Ke' Nilaman Kaangk Min Iiyānweya
6Niiy puth kan ngangk thee'an nungant Jesus Christ.antan puth niiyam mi'an nunang moom wuut pi'anan iiy-iiyow niiyantana. Yaa, niiyan karpam ngul nenchanān iiy-iiyān nungantang Christ.antangan. 7Nil yukana tha'-kuman nungantaman aakangan pal-puy kuchan aak nath pekakam ngakak, yipam thayanam than-thanow, yukaniya. Ngamp yimanang thamp thayanam iiy-iiyāmp, nil ngulan Jesus.angan thayanam pi'ow ngampang. Niiy wik min nungantam anman ngeey-ngeeyān a' puth nunang anman ngangkang pi'-pi'ān niiy thayan ngul yipam weemān. Than pam wanch wiyangan kan thaa'-aath-aathin niiyang wik God.antaman, puth yimanang ngulana thayanam paththam puy-puyam iiy-iiyān a' niiy thankyou.ana ma'-yotam thaw-thawān nungant piip God.antan.
8Wiyangan nath way-way thaa'-aathiythan niiyanga, than-thanaman ngaantam-ngeeyantan ke' kuchek waap min thana, puth ya'a. Niiy puth ke' ngeeyān thanang, an wik God.antam ke'am waa'-waa'antan ya'a. Niiyangan ke' muukamathaynweya. Niiy min-minam iiy-iiyān than yipam niiyangan ke' muukamathayn, wik wayanang al-alangan. Than wik anangan ngul waa'-waa'ayn niiyant than pamang aak keenkan waa'-waa'ina, puth wik ananganiya thanttama pam al-alantaman wik God.antaman ya'a. A' puth wiyiya than nath wik way anangan oony way al-alangan wantin thantan, anangan waa'-waa'iythan niiyantana, puth wik ananganiy God.antam thamp ya'a. Niiy nath wik anangan ngeeyin thanttamwey-a, yaa, niiyaniya ma' thanttang ngul iiy-iiyina. Puth niiyaniya, ke' wik ngeeyān thanttaman. 9Nil Christ.aniya, pam iiy-iiy ke' ngamp yimanangan, aak inganiya. Nilaniy-a, ke' God anman thamp. Pulaniya, thonam anman. 10Nil Christ.an ngangk niiyantang nanman wun-wunan, a' puth ma'-yotam anman niiyang thay-thayanathan niiyang, niiyan yipam ke' nilam yimanangan iiy-iiyān, puth niiyan pam wanch nunganta. Nil Christ.ana moom wuut pi'an paththam oony yotamantan, than oony pi'-pi'anam anangana, a' puth than oony chil pi'an anangana, nil Christ.ang yotam anangan thanang ma' nungantang pi'-pi'an thanang.
11Niiyaniya, Christ.antang karpam ngul iiy-iiyaniy a' puth-a, niiyaniya pam wanch nungantam ngul iiyaniy. Nil thayanathan niiyang niiy yipam thawān niiyantakaman, “Ngay wayan ke'-ngul yumpānga ya'a, woyan wayan ke' wakānga, way yumpanak thakan ke' ngaantam-ngeeyāngweya.” Than pam wanch wiyangan ke'am yalmathin niiyang niiyan yipam pam wanch nungantakaman iiy-iiyinwey ya'a, nil thonamang Christ.angan ep-paththam koyam yalmath niiyang pam wanch nungantakamana. Nilam thonakam Jesus Christ.ang niiyangan thayanathan way ke'an yumpān nilan ke'-paal pam wanch nungantakaman yalmath niiyang. 12Niiyangan ngakang kuungk-kuungkin kootran-a, an ke' niiy karpaman uthaman nungantang Christ.antangan, a' putha ke' niiyiy karpam ngul ekan mulaman nungantang thampa. Anpalaniya, niiy pam wanch ke' nyiingkanam ngul iiy-iiyaniy, way thaa'-thaa' ke'am yump-yumpaniy, niiy puth kan thiichan nil God.an pam pi'an nil puth Jesus mulaman ekathan. 13Keenkan ep niiy ke' pam mul yimanangan iiy-iiyan, niiy puth way thaa'-thaa' yump-yumpan, a' putha niiy wik thayan God.antaman ngoongk-ngoongkaman yippak iiy-iiyan, puth yimanangan ep ngul an ke' nil God.angan mulam ekath niiyang ke' nil Christ.an mulaman ekathana, an puth nil kan kon-ngathan way niiyantaman ngul. 14Ngamp pam wanchangan wik thayan Moses.antaman ke'am pi'-pi'anamp minama, ya'a. Ngamp wik nungantaman pip-pipanampa. Nil puth Christ.an utham-a, an nil God.angan way ngamparaman ke'am ngul konangaman pi'-pi'an ya'a. Nil Christ.an utham-a, an ke' nil wik thayan anangan yuk wuuyanang angan pung thanang. 15Nil Christ.angan oony wayanang yotaman tha'ang maak-maak thanang, nil mee' yotamantang meen-meenath than oony wayanang anangan way kan-kanam mich pongama. Puth nilan ep thayan paththama, kulana nil minchath puth nil yuk wuuyanangan utham. Thanana ya'a, than ma'-wayamin.
16Than pam wanch wiyana ke' thawayn niiyant, “Nanana, may ngench thayana,” a' “Aak inana, ngench thayana,” ke' aak thanttam Jews.antaman may pi'anan mungkantan week thon-thonangan a' putha kep thon-thonangana. 17Wik thayan ananganiya, ke' maany yimanangan. Puth maany pamantaman an maany thonak pam paththam ya'a. Ngamp maany pamantam thathāmp-a, ngamp mee'miy pama nanpal. An puth yimanang wik thayan inangan ke' maany yimanangan, puth an meenathan ke' pam Christ anan ngulan wampow. Puth nil in kan wampa. Ngamp nunang thonakam wik ngeey-ngeeyāmp, wik thayan anangan ya'a. 18Pam teachers wayanang al-alangan an pi'an yumpwuntan a' ulp-ulpanang iiy-iiyantan puth thanan waa'wuntan than pithang min-miniy pithantan. An than yaan muukamantan, than ke' pam wanch mochan iiy-iiyantan, puth ya'a, a' puth than thaa'-aath-aathantan niiyang ngaantiyongk anangan thaa'-kuumpān thanang. Puth than thawantan niiy way iiy-iiyaniya, an than yaan wik uuyamantan. Niiy ke' wik ngeeyān thanang. Than thanttakaman ngaantam-ngeeyantan than ke' kuchek min yimanangana, puth than kuchek min ya'a. 19Aakan yimanangan than pamangan ngaantam-ngeeyantana, than nath God.an ke'-ngul ngangkangan pi'iythan nunangana. Than pam teachers wayanang anangana, ke' kuchek ke'anangan yimanangan iiy-iiyantan, ke' kemp thonakam kalantan. Ngamp pam wanch ma'mangkam God.antamana ngamp karpam ke' kemp Christ.antam yimanangan iiy-iiyanamp a' puth nilaniya, ke'a kuchek ngamparama nil puth moom pi'an ngamparama, an nil ke' may aath-aathan ngampang a' em-emathan thamp ngampanga. Nil waa'an ngampar, nil ngeenan kaangk ngampan yumpāmp nungantan a' nil ma'-aathan ngampang work karpam iiy-iiyāmp nilan kaangk ngamp work ngeenan iiy-iiyāmp nungantanwey. Nil puth moom ngamparama, nil thawan ngampar pam wanch nungantamakan ngamp ngeenan yumpāmp a' puth ngamp pam wanch yotaman karpam ngul work iiy-iiyāmp.
Ngamp Karpam Christ.antang Nenchanampa
20Ngamp karpam Christ.antang nenchanampa. An ke' ngamp ma'mangkaman nungantang uthamampa, puth inpalana, ngampaniya wik thanttam oony way al-alantam a' pam way al-alantaman ke'-ngul ngeey-ngeeyāmp. Ngamp ngul wik thanttaman ngeenak ngul ngeey-ngeeyāmpe? Ke'a! 21Thanan thawantan, “Inan ke' maayāna,” a' “May inan ke' paathāna,” a' “Nanan ke' mamāna.” 22Ngul than pam wanchangan may anan mungkantan ngulan-a, an ya'-ya'am ngul wunana. Ya' paththam ngul wunanweya. Wik thanan waa'-waa'antan-a, an piip God.antamana an ya'a, than kuchek thanttamangan ngaantam-ngeey-ngeeyantanan-a, wik ananganiy waa'-waa'antan. 23Wik thanttamana an ke' wik min paththam ey? An ya'a waya, puth wik inanganiya min ya'a, puth than pam wanch min-min ke'am thaa'-aath-aathantan than yipam kan-kanam thaa'-kuumpayn nunang God.an, ya'a. Than yaan pam wanch thaa'-aath-aathantan than yipam ngaantiyongk anangan thaa'-kuumpayn thananga, a' than thaa'-aath-aathantan thanang yipam than yaan muukamathayn ke' mochan iiy-iiyantana, a' puth than thaa'-aath-aathantan thanang yipam kemp thanttaman wayathayn. Wik thayan thanttam anangan thanaman thaa'-aath-aathantan thanang wiy anangan-a, an thanang ke'am ma'-aath-aath minan iiyayna, ya'a, an than ke'-ngoongkama way anman ngaantam-ngeey-ngeeyin way yumpanakana, a' an yaam ke'anamana way paththam yump-yumpin.