Niiy Wik Inangan Ngeeyāna
41Yaa, ngurp ngatharam niiyalanga, niiyaniya ngangk thayanam anman monkan-wak-wakān nunang, Jesus Christ.an. Ngay puth kaangk niiyang paththam, iingkamang niiyant. Niiy ngangk min yumpaniy ngayang a' ngayan ulpang niiyantama.
2Ngay in kan thaa'-mamanang thaw-thawāng wanch kucham al-alantan Euodia pulant Syntyche.angana; pul ke' thaa'-thay-thayanamowpula, kul kan wantowpul, puth pula karpa Jesus Christ.an monkan-wak-wakanpul nunanga. 3Ayyang, nintar puth ngatharang karpam work iiy-iiyangana, ngay inan thawāng nungkar, nintan ma'-aathān pulang karpam nenchanathān pulang puth ngan karpam workan iiy-iiyan, wikan waa'-waa'an God.antaman, wanch kucham nanangan pula, a' Clement-a, a' than wiy anangan thampa. Than inanganiy pam wancha ngangk aak umpuyam wunayn piip God.antanga, nil puth namp thanttamana lat nungantamangan kan umpa, than aak nungantamangan yipam wunayn.
4Kan in ngeeyāna! Niiyiy putha ngaa' thon-thona ngangk minangam iiy-iiyāna nil putha Jesus.ana anman iiy-iiyan niiyantanga. Ngay kan putham thawāng niiyanta: ngangk min paththam iiy-iiyāna! 5Niiy minam iiy-iiyān pam wanch wiy al-alantan, ngangk minangam iiy-iiyān thant -- yaa, than yipam pam wanch anangana mee'miy wunayn niiyana pam wanch mina. Nil puth Lord Jesus.ana yip-yipam wampowa. 6-7Ngeen nathwey wampow niiyant-a, min nathwey-a, nath ya'a, way natha, an niiyana kuchek way ke' wunān, niiyiya mee'-wuthanamān piip God.anta, a' thawān nungant minam pi'-pi'ow niiyanga, a' putha niiyaniya thankyou thaw-thawān nungant God.antana, a' amanamaniya, nil God.angan yipam ngangk maal pi'-pi'ow niiyang, a' kuchek minam pi'-pi'ow niiyang yipam ngangk wayan ke' wunow niiyanta, puth niiy ma' Jesus Christ.antang iiy-iiyaniy. Puth ngampaniya ke' God yimanangan ya'a, ngamp min-minam paththaman ke' ngaantam-ngeeyimp nunangan nil God.angan want-wanttakan minam paththam pi'-pi'an ngampang.
8Ngurp ngatharam niiyala, ngay inan tham thawāng niiyanta: niiyiya minam anman ngaantam-ngeey-ngeeyāna, way anangan ke' ngangkangan pi'-pi'ān, ya'a. Than pam wanchwey minaman iiy-iiyiythan puth nil God.angan ngangk thay-thayanathan thanang-a, yaa, puth niiyana thaa'-kuump-kuumpān thanang. Than nath wik kan-kanaman waa'-waa'iythanwey-a, niiy wik anangan ngaantam-ngeey-ngeeyān thanang. Than nath koy'an iiy-iiyiythan-a, anangan tham ngaantam-ngeey-ngeeyāna. Thanwey ngangk minangaman pam wanch wiyantan iiy-iiyiythan thantan-a, anangan tham ngaantam-ngeey-ngeeyān thanang. Min anman ngaantam-ngeey-ngeeyān, wayan ya'a. 9Ngay niiyang wik min ka'athaman Jesus Christ.antaman thaa'-aath-aathangan niiyang -- niiyan putha wik minam anman ngeey-ngeeyān. Niiyan puth kan thathan ngayang, ngay pam want-wanttakan iiy-iiyang -- niiyan putha woyan ngatharam anman wakāna -- puth amanamaniya nil piip God.ana niiyantangan ngul iiy-iiyow, a' ngangk min yump-yumpow niiyang.
Ngay Thankyou Thawang Niiyant, Niiy Puth Ngaantam-Ngeey-Ngeeyan Ngayang
10Yaa, ngay thankyou thawang niiyant, niiy puth ngaantam-ngeey-ngeeyan ngayang, a' wukal thakan kuchan ngathar. Ngay ngangk min paththama a' thankyou thawang nungant Lord ngamparamant puth niiyana putham meenathana niiyan ngaantam-ngeey-ngeeyan ngayang; niiyan ke' anpalman ma'-aath-aathin ngayang-a, puth ya'a, niiyan puth want-wanttak ma'-aath-aathin ngayangana. 11Ngayan wik inangan ke'am thaw-thawang niiyant puth ngayan wukal ke'anang inan wun-wunangan, ya'a, ngay puth inan kan-ngul thiichang: ngeen nathanwey wampow ngathar-a, natha way natha, ya' natha, min nath wampowar-a, yaa, puth ngayaniya ngangk kuup-kuupamang anman. 12Wiyiya ngay way min ke'anangweya, puth wiyaniya ngay way min yot pi'-pi'ang. A' wiyiya ngay ngangk meech wun-wunang, puth wiyaniya ngay ngangk oth wun-wunang. An puth kana, ngayan puth kan-ngul mee'miya ngangk min iiy-iiyanakana. 13Ngeen nathanwey wampow ngathar-a, nil Christ.angana ngangk thay-thayanathan ngayang ngayan yipmam ngangk min iiy-iiyāng.
14Niiy puth ka'athaman min iiyan ngathar a' putha ma'-aathan ngayang aak wayan wamp ngathar. 15Niiy nanangana aak Philippi.angana mee'miy ngay ka'athamana aak Macedonia.an wantangan-a, niiyam thonakam ma'-aath-aathan ngayang, a' wukal thamp thee'-thee'an ngatha, aak an-aniyangan ngay ka'athamana wik min God.antaman waa'-waa'angan niiyant. Pam wanch Christians wiy al-alangana ke'am ma'-aathin ngayang, ya'a. 16A' putha ngay wukal ke'anangan yippak wun-wunangan aak Thessalonica angan-a, niiy ma'-ko'alam ma'-aath-aathan ngayang. 17Puth ngaya ke'am ngaantam-ngeey-ngeeyanga wukal thakan uwāng niiyantama. Puth ngay inman thonakam ep ngaantam-ngeey-ngeeyanga: ngayan kaangka nil piip God.an min anman iiy-iiyow niiyant, niiyan puth ngayang ma'-aath-aathana. 18Wukal niiyan kuchan ngathar-a, ngay kanam uwang, ngay puth thankyou thawāng niiyantweya. Nil Epaphroditus.angan wukal niiyantamana kanan wampath ngath-a, ngayaniya wukal yot ngul pi'-pi'anga. Nil piip God.angan thathan niiyangana wukalan thee'-thee'aniy ngath-a, nil ngangk min paththam wun-wunan niiyantamana, an ke' niiy yuk way min nungant thee'-thee'aniy God.antana.
19Nil piip God ngatharamangana minam ngul pi'-pi'ow niiyang, an puth niiyana pam wanch nungantam Jesus Christ.antam, puth nilana yot ma'mangkam pi'-pi'an ma' nungantamanga. 20Yaa, ngampaniy putha anman thaa'-kuump-kuumpāmp nunang piip God ngamparaman, aak umpuyam. Yey, an kan-kanama!
21Niiy waa'ān pam wanch Christians yotam nal-nalantan, ngan ngaantam-ngeey-ngeeyanan niiyangweya, ngay-a, puth thanar wiy il-ilangan ngurp min niiyantamanga. 22Putha Christians wiy al-alangan thampa than workan iiy-iiyantana aawuch moom King Caesar.antamangana, than thamp ngaantam-ngeey-ngeeyantan niiyang. 23Ngay kaangka Lord ngamparamangan Jesus Christ.angan ngangk min yumpow niiyang, a' puth niiyantangan nangman iiy-iiyow.
Anman kan,
Paul