Ngay Kaangk Wik Jesus.antam Anman Ngeey-Ngeeyānga
31Ngurp ngatharam niiyala, ngay kan inan wik waa'āng niiyanta, ngay wik ka'athangaman waa'-waa'angan niiyanta. Ngay puth ke' eenchinga, puth niiy nath wik ngeey-ngeeyān ngayangwey-a, yaa, niiyaniya ke'-ngoongkam anman monkan-wak-wakān nunang Jesus Christ.an. Yaa, kan in ngeeyāna! Niiy ngangk min-minam iiy-iiyān nil puth Lord Jesus Christ.ana ngangk minangam iiy-iiyan ngampar. 2Niiy pam wanch wayanang al-alantangan ke' iiy-iiyāna. Than ke' ku' kulliyangana wik God.antaman way-wayathantan, wik way-way thampan thaa'-aath-aathantan. Than puth thawantan pam Christians ma'mangkam al-alangan aak woyan Jews.antam wakayn, ngeen-wiy pe'anan ump-umpwayn thanttakam ke' than Jews.angan ngeen-wiy pe'anan ump-umpwuntan, puth ya'a, niiy wik thanttaman ke' ngeeyāna. 3Ngamp puth inanganiya Christians kan-kanam paththam iiy-iiyanamp, nil puth Ngeen-Wiy Min God.antamana ngangk ngamparang wun-wunan, ma'-aath-aathan ngampangwey, God.an yipam thaa'-kuump-kuumpāmp nunang, puth ngamp ngangk min iiy-iiyanamp, nilan puth Jesus Christ.angan kaa'-piichanath ngampang a' ngamparang karpam ngul wun-wunan. Ngamp puth mee'miy ngamp ngamparakamana ke' kaa'-piichanathwimpa way ngamparam anpalan, ya' anman. Ngamp nath kemp kompan thamp iiy-iiyimpwey-a, nath ya'weya, ngamp nathwey workwey iiy-iiyimp-a, nath ya'weya, al-alangan than ke' kaa'-piichanathiythan ngampang, ya'a. 4-6Pam wanch wiyangan nath ulpanang wik pi'anang thanttakam waa'-waa'wiythan. Puth ngay ep-paththam ulpanang waa'ing ngatharakaman. In ngeeyāna! Ngay puk manyaman kinch eightangan want ngayangan-a, thananiy-a, ngeen-wiy pe'anan umpin ngayang, ngay kompan tham ngul iiy-iiyang. Ngay putha pam Jew iiy-iiyang, pam wanch anangana nil piip God.angan keenkanaman mi' thanang thanan pam wanch nungant yipam iiyayn. Wuut mangk ngatharamaniya Benjamin. Wik thaa'nganth Hebrew ngayan thaw-thawanga, thanttam Jews.antam. Ngay iniya pam Pharisee, ngay wik thayan Moses.antamana kan-kanam mee'miya. Puth ngayana keenkana pam wanch Christians anangana wayathang thanang, ngayan ngaantam-ngeeyanga ke' ngay min yumpang mee' God.antangan, puth ya'a. Ngayan putha anman wik thayanan Moses.antaman pi'-pi'ang, ngay wik ke'am pipang, ya'a.
7-8Puth ngayana nanpalan pam min ke'am iiy-iiyang mee' God.antang, ya'a. Ngayan keenkan ep ngaantam-ngeeyangan ngatharakam ngay ke' pam min iiy-iiyangan, nil God.angan ke' puk nungantam waa' ngayang, puth ya'a. Puth yimanangana ngayan mee'miy ngul ngay ka'athaman way-wayak ngaantam-ngeeyang ngatharakam. Ngayiya karpam ngul Christ.antang iiy-iiyang, in min paththam ngathara, -- anpalmana ngay ngangk min paththam iiy-iiyang ngul. Ngay puth ngaantam-ngeeyang ngula yot ngayan keenkan yump-yumpang-a, an ke' wook way paththam yimanangan. 9Yaa, ngayaniya ke'-ngul ngaantam-ngeey-ngeeyang anangana, ya'a, ngayan yipam Jesus Christ.ana, ngangkang pi'-pi'āng nunang ngula, a' karpam anman iiy-iiyāng nungantanganiya. Ngay ke'-ngul ngaantam-ngeeyang ngatharakam nil God.angan ke' puk nungantam waa'an ngayang, puth anpalan ngay wik thayan Moses.antaman minam pi'-pi'ang. Nil puth piip God.angana ke' puk nungantam kan waa' ngayang puth anpalan ngay ngangk thee'angan nungant, Jesus Christ alantan, puth nilam God.ang thonakam min yump-yumpiy ngayang. Nil puth piip God.angana puk nungantam waa'an thanang pam wanch anangan ngangkangan pi'-pi'antan nunang Jesus Christ.an, nilan min yump-yumpan thanang.
10Yaa, an ngay kaangk paththam anman ngaantam-ngeey-ngeeyāng nunang Jesus Christ.an, min-min thiichāng nunang. Nil puth God.ana thayan paththam, nil mulaman ekath nunang, a' nil Christ.ana man-yetham ngul iiy-iiyana, puth thayan paththam thamp. Ngayana kaangk nil ma'-aath-aathow ngayang nil puth pi'an paththam. Than wiyangan nath way yumpiythan ngatharwey-a, an kana, an min ngathar, puth than nungant ka'athaman way yumpin, thaa'-thengkathin nunang thakan. Ke' nil Jesus.angan wik God.antam anman ngeey-ngeey-a, aak-aakanakaman mul ngulan wun-a, ngay thamp yimanangan kaangk wik nungantam anman ngeey-ngeeyānga, a' puth wayana kan-ngul wantāng. 11Ngayan kaangk yimanangan iiy-iiyāng aak ingana, puth ngayana ngaantam-ngeeyang aak ngul-ngulana nil God.angan mulaman ekathow ngayang thampa a' aak nungantang angman wunāng.
Ngampiya Woyan Thonam Anman Wak-Wakāmpa
12Ngay putha ke'am thawanga ngayan ke' pam min-minam paththam iiy-iiyang ke' Jesus yimanangan ya'a, puth ngayaniya anman monkan-wak-wakang nunang, koochanama, ngayan puth kaangk iiyāng ke' Jesus Christ yimanangana nilam puth woyan wayamana weentath ngayang woyan minakan, ngay yipam monkan-wakāng nunangana. 13Niiyala, ngurp ngatharam-ang! Ngay puth mee'miy ngatharakama ngay pam min yippak ya'a, ke' Jesus Christ.ana, ngay puth anman ngaantam-ngeey-ngeeyanga ngay ngulan wunāng nungantangana, nanpalana ngay kaangka pam min-minam paththam iiy-iiyānga. Ngay anman thonakam ngaantam-ngeey-ngeeyang: ngayan ke'am ngul ngaantam-ngeeyang ngatharakama ngay want-wanttakan keenkan iiy-iiyang, ya'a. 14An ke' aak yimanangan wunan ngathar: ngayaniya ke' kamp mo'-mo'ang yuurpam woyan wakanang ke' race yimanangan mo'-mo'ang, ngay yipam prize uwānga God.antamana, yuk prize.ana inana, nil God.angan kalow ngayang aak iikanak kenyan nungantang wunāng Jesus Christ.antang.
15Ngamp wee'-wee'anangan Jesus.ana minaman monkan-wak-wakanamp nunang-a, ngamp ke' ngaantam-ngeeyāmp ngamparakam ngamp ke' min iiy-iiyanamp ke' Jesus yimanangana, ya'a. Niiy wee'-wee'anangan nath wik thonan ngaantam-ngeeyinwey-a, yaa, puth nil piip God.angana engkanang ngul meenathow niiyant niiya pam wanch min paththam ya' yippaka. 16Puth ngampaniya anman woyan thonam anman wak-wakāmpa, ngampaniya anman paath-paathāmp, nil yimanamana, pam wanch min yipam iiy-iiyāmp ke' Jesus Christ anmana.
17Niiyala, ngurp ngatharam-ang, niiyaniya woyan ngatharamana anman wak-wakāna. A' putha niiyan min-min thath-thathāna pam wanch wiy anangana woyan min anana wak-wakantan -- niiyaniya woyan thanttam thamp wak-wakān. 18Puth ngay kan nathpalman waa'-waa'ang niiyant than pam wanch yotana ke' Christians waa'wuntan, puth ya'a, than yaan muukamantan, than puth woyan way wak-wakantan. Ngay in putham waa'āng niiyant, ngay puth ngangk way-wayam wunanga, a' peey-peeyangan thanttama. Puth than ke'-ngoongkam iiy-iiyantan, ke'am ngaantam-ngeey-ngeeyantan nil Christ.an yuk wuuyanangan utham. 19Nil piip God.angan ngul wayathow thanang, aak way aakanakan kuchow thanang, puth thanan kaangka way anman yump-yumpayna, may-weenthiya a' puth maarich thakan kee'-kee'antan, a' than ngangk minangam way yump-yumpantan; thanana ulpantan ngula, than ngul-nyaa' ya'a, than ke'am ngaantam-ngeeyantan thanttakam than wayan yump-yumpin, ya'a a' than way min aak inpalmana anman ngaantam-ngeey-ngeeyantan. Thanan ke'am ngaantam-ngeey-ngeeyantan aak min in kenyan God.antaman, ya'a. 20Puth ngamp epa pam wanch God.antamana, aak nungantaman an ngampar thamp aak in kenyana, a' putha ngampaniya ngangk minangam kuup-kuupanamp moom ngamparamaka, Jesus Christ.antan, palaman wampow ngampar aak inpal kenyan -- nil puth ngampangan kaa'-piichanatha way ngamparam anpalan. 21Nil palaman wampow-a, nilaniya kemp ngamparam inangana wiy-wiyam yumpow ngampang, kemp min paththam ngula, ke'-ngul wayamow, ke' kemp nilaman kal-kalan aak in kenyana, ngampanganiya yimanangan yumpow puth nilaniya moom pi'an paththam iiy-iiyan ngampar, putha thayan paththam iiy-iiyan, way min ma'mangkamana ma' nungantang pi'-pi'an.