Ngay Wik Inan Thawāng Niiyant Puk Manyiyant A' Kaath Piipant Thamp
61Niiy puk manyiy-ang, inan ngeeyāna: niiy wik ngeeyān kaath piip niiyantam nanangana, niiy puth puk God.antama. An min niiyant wik ngeeyān thananga. 2Wik thayan inan nil God.angan keenkan thee' ngampar, “Niiy ngangk minangam iiy-iiyān kaath piip niiyantamak. Niiy wik min thanttaman erkam ngeeyān, a' ma'-aath-aathān thanang.” 3A' nil kaa'ngak ngampang thamp, wik inangan thaw, “Niiy nath yimanangan iiy-iiyinwey kaath piip niiyantamakan-a, niiy anman ngangk minangam iiy-iiyān a' yaam wun-wunānwey aak ingana.”
4A' niiy kaath piipang inan ngeeyāna: niiy wayan ke' iiy-iiyān thant puk manyiy niiyantamaka, niiy puth man kul ke' yumpān thanang, ya'a. Waa'ān thant wik Christ.antaman, a' meenathān thant woyan minana. Than wayan iiyiythan-a, wakin thanang a' ma'-aathin thanang than yipam ngeeyayn wik Christ.antaman.
Ngay Wik Inan Thawāng Niiyant Slavesant A' Moomant Thamp
5A' niiy slaves nanangana a' niiy pam workan iiy-iiyaniy moom niiyantam al-alantan, niiy inan ngeeyāna: niiy wik ngeey-ngeeyān moom niiyantam al-alantama, a' ke' wayamān, puth work ngangk minangam anman iiy-iiyān thant ke' niiy work Christ.antan iiy-iiyaniya. 6Nil moom niiyantamang nath thath-thathan niiyang, nath ya'a, puth niiyan ke'-ngoongkam work minam anman iiy-iiyān, ke' wayamān, puth ngamp ngangk min yumpāmp moom ngamparam thonakam ya'a, puth Christ thampa nil puth moom pi'an ngamparam, a' ngampaniy work nungant iiy-iiyanamp, yaa, niiyan puth min iiy-iiyin mee' God.antangan. 7Niiy workan iiy-iiyān-a, ke' ngaantam-ngeey-ngeeyāna moom niiyantam thonakaman ya'a, Christ thaman ngaantam-ngeey-ngeeyān nunang. Niiy work ngangk minangam iiy-iiyān thant, moom niiyantam al-alantan niiy ke' Christ.antan work iiy-iiyaniya. 8Niiy wiyiya slaves puth moom niiyantamang wukalang kanam piiyin niiyang workak, puth niiy wiy ananganiya wukal uw-uwaniya workamaniy. Puth niiy yotamanganiya inan thiichān: niiy nath min iiy-iiyān-a, yaa, nil God.ana puthangkan min ngul iiy-iiyow niiyanta.
9A' niiy tham moom thanttam ananganiya, minam iiy-iiyān thant, slaves niiyantam al-alantana a' pam al-alantan workan iiy-iiyantan niiyant, ke' thaa'-pathān thanang piikanakan work yipam iiyayn niiyanta. Niiy konangam pi'-pi'ān ngampar yotamantan moom pi'an thonam in kenyana. Nil God.an ke'am thawa ke' pam moom anangan than mina, puth slaves a' pam workan iiy-iiyantan, min ya'a. An ya'a. Nil ngangk thath-thathan yotamantana, moomant-a, slavesantan-a, a' pam workan iiy-iiyantan thanta nil yipam thiichow ngampang nath min iiy-iiyanamp, nath way iiy-iiyanamp.
Niiy Ma' God.antang Iiy-Iiyān Nil Yipam Ngangk Thayanathow Niiyang
10Ngay wik inan tham thawāng niiyanta: niiy ma' Christ.antang iiy-iiyān nil yipam ngangk thayanathow niiyanga, nil puth thayan paththama. 11In ke' ngamp soldiers God.antang iiy-iiyanampa. Nil oony way alangan thaach-thaachan ngampanga way yumpanakan, nil ngampang thaamp-thaampan ke' war kul pi'anang yimanangan pekwuntana. Ngamp God.antan thawāmp ma'-aathow ngampanga puthangkan yipam umang thaamp-thaampāmp nunang oony wayana nil ke' yipam wayathow ngampanga. 12Ngamp thaampanamp pam wayanang anangan, putha thanang thonakam ya'a, puth oony way al-alangan minchalam thakana, than tham kaangk thaachayn ngampang wayan yumpāmpa. Thanan puth karangk ngampar iiy-iiyantan, thanan mee'-wichantan ngampang way yumpāmpana, puth ngampaniya wik thayanam thawāmpa, a' kenthāmp thanang, umang thaampāmp thanang thampa. 13Puth ngampaniya wik minam paththam ngeeyāmp God.antaman, ngamp yipam umang thaampāmp thananga. Nil oony way pi'an alangan thaachow niiyang-a, yaa, niiywey God.an ngeeyān nunanga, a' kenthān thanang oony way anangana, thayanam thanāna, ke' ma' micham wakayn niiyanga. Yaa, ngamp soldiers minam iiy-iiyāmp nungant God.antan.
14Yaa, ngamp ke'-ngoongkam anman woyan God.antam wak-wakāmpa; ngamp ke' wik uuyamāmp, puth wik kan-kanam thawāmp. A' ngampiya minam anman iiy-iiyāmpa mee' God.antangana. Ngampwey yimanangan iiy-iiyimp-a, an ke' ngamp kee'-wunpanamp ngamparakam oony way al-alantaman, ke' than soldiersangan um ikangan wunpantan thanttakam yuk ironana, an ke' kee' yimanangana wunpantan thanttakaman ke' yipam wayathayn thanangweya. 15A' ngamp wik God.antaman kal-kalāmp pam wanchantan, pam wanch nungantam yipam iiy-iiyayn, ngangk minangam iiy-iiyayn God.antang. 16A' inan ngeeyāmp thama. Oony way alangan thaachanan ngampang way yumpanakan-a, an nil ke' kek thum tham yimanangan thee'-thee'an ngampar. Ngampaniya Christ.an ngangk thayanam anman pi'-pi'āmp nunangana a' ngaantam-ngeeyāmp nila thayana. Ngampwey yimanangan iiy-iiyimp-a, ngamp ke' soldiersang yimanangan yuk shieldana um ikangan wunpantan yipam oony way pi'an alangan ke' wayathow ngampang. Yuk shieldan kek thum thamana aakanakana kee'-wunpāmpa. 17A' ngamp ngulakam ngaantam-ngeey-ngeeyāmp nil God.angan kalow ngampanga aak nungantamaka. Ngamp wik inan ngaantam-ngeey-ngeeyimp-a, in yimanangan ke' soldiersang helmetan kuchekangan wunpantan wiyangan yipam ke' wayathayn thananga, thanan yipam minam pentayn pam wayanang al-alantaman. A' ngamp ngeeyāmp wik God.antam anangan lat ngench thayanangan, than puth ke' sword yimanangan ngampar, ngamp yipam umang thaampāmp oony way pi'anan. Nil Ngeen-Wiy Min God.antam alangan wik koochanathow ngampara. Yaa, niiy min-minam iiy-iiyān niiy ke' soldier min yimanangan umang thaampān nunang oony way pi'anana, niiy ma'lip ke' umang wakān nunang, ya'a.
18Ngay inan tham thawāng niiyant: niiy ke'-ngoongkamana mee'-wuth-wuthanamāna, ke' wantāna. Niiy piip God.ant thawān ma'-aath-aathow niiyang, a' mee'-wuth-wuthanamān Christians wiy al-alantan tham. Ngeen-Wiy Min God.antamangan ngul ma'-aath-aathow niiyang mee'-wuthanamanakan. A' niiyiy kon kenyangk wunān God.anta, a' ke' eenchān mee'-wuth-wuthanamān anman. 19A' ngathar tham mee'-wuth-wuthanamān, yipam God.angan ma'-aath-aathow ngayang minam waa'āng thant wiyantan, ngay yipam ngangk thayanam waa'āng thant, koochanathāng thant wik min God.antamana. 20Nil puth God.angan work inan thee' ngathar wik nungantaman waa'āng, nil wik thamang kuch ngayanga. Ngay aak in jailang wun-wunanga, puth ngay aak want-wantting nathan wun-wunāng-a, ngay kaangk ngangk thayanam anman wik waa'-waa'āng. Yaa, niiyan puth mee'-wuth-wuthanamān ngathara.
Ngay In Thaman Waa'āng Niiyanta
21Pam namp Tychicus.angan wik min ngul wampathow niiyant ngatharama, ngayan wanttakan iiy-iiyanga. Nil pam God.antam ke' kuunch ngamparam nilaniya. Nil work min iiy-iiyan God.anta. 22Ngay kuchang nunang niiyant niiy yipam wik thoo' ngeeyān nganttamana. Anpalana, niiyiya ngangk min ngul iiyāna.
23Ngay mee'-wuth-wuthanamang niiyantak nungant piip God.antan a' Jesus Christ.ant moom pi'an ngamparamanta. Ngay thawang pulant ngangk min yump-yumpowpul niiyang, a' ma'-aath-aathowpul niiyang kaangk wunān wiyantana, puth niiy Christ.an ngangkang pi'-pi'aniy nunanga. 24Ngay kaangk God.ana min iiy-iiyow pam wanch yotamantan, than wee'-wee'anangan kan-kanaman kaangk wuntan moom pi'an Jesus Christ.antan, ke'an wayamantan nunganta.
Anman kan.
Paul.