Nil Christ.angan Karpath Ngampang Ma' Nungantanga
41Niiyalang, ngay in jailang puth ngayan workan iiy-iiyang nungant Christ.antan. In ngeeyāna: nil God.angan waa' niiyang pam wanch nungantamana, yaa, niiyaniya minam iiy-iiyān mee' nungantangan. 2Niiy ke' ulp-ulpanang iiy-iiyāna, ke' erkaman man kul wampow niiyanta puth niiyiya thaa' mich-micham thawān thant wiyantana. Than wiy al-alangan nath ngangk way yumpiythan niiyang-a, niiyaniya, anman ngangk minangam iiy-iiyān thant. 3Nil Ngeen-Wiy Min God.antamang kanam yalmath niiyang pam wanch God.antam yipam iiy-iiyān. Niiy ngangk min anman iiy-iiyān Christians wiy al-alantan, a' anpalana niiyan karpam ngul iiy-iiyān, ke' yaarkathwuna. 4Nil Christ.ana, a' pam wanch nungantaman ke' thonam yimanangan iiy-iiyantan ngula. A' puth Ngeen-Wiy Min God.antam thonam thonaka. Ngampiya, pam wanch Christ.antama, aak thonamaka kuupāmp ngamp yipam aak God.antangan wunāmpa. Nil kanan mi' ngampang pam wanch nungantakaman-a, nil thaw nilan ngul kalow ngampang nungantakaman. 5Nila moom pi'an thonama, ngampiya ngangk kan thee'amp nungantakam thonakam. Than kuchek kanam kuungkin ngampangan-a, an than meenathin ngampar ngampaniya pam wanch God.antam thonakam, wiyantam ya'a. 6An God thonam thonakama, nil piip thonam thonakam ngampara, Christians.antana. Nil moom pi'an ngamparama. Nil aak thonamang ke'am wun, nil aak umyompanam wunan, ma' nungantangan pi'-pi'an ngampang. A' Ngeen-Wiy Min nungantamana ngangk ngamparang ngoonch.
7Ngamp Christians yotam inangan-a, nil Christ.angan ma'-aath-aathan ngampang thon-thonan ngamp yipmam work iiyāmp nungant nilan thee'ow ngampar. 8Lat ngench thayanangan inan waa' Christ.antama, wikan yimanang thawa:
“Nil Christ.an kenyan mat-a, nil pam wanch yotaman ma' nungantang pi'-pi'an thanang,
ma' thayanam anman pi'-pi'an thanang.
Nil keenk mat, a' anpalana, nil ma'-aath-aathan thanang pam wanch nungantam anangan than yipmam work nungantan iiy-iiyayn aak ingana.”
9-10Ngay wik inan koochanathāng niiyanta: nil Christ.wey ka'athaman ke' ukiy aak iikanakan-a, nil kenyana ke' matiy, ya'a. Puth Christ.an ka'athama pal uk aak iikanakan, a' ngulaniya nil keny mat. Anpalana nil aak umyompanam wun, moom pi'an ngamparam yotantakama. 11Nil work thee'an thant pam wanch nungantamakan. Nil wiyantan work thon thee'an, wiy al-alantan thonangan thee'an. Nil mi' thanang pam wiy anangan a' kuch thanang thaa'-thayanam thawayn wik waa'ayn God.antamana. Nil wiyaniya kuch thanang pal-puyan iiy-iiyayn wik min we'-we'arathayn. Wiyantaniya, thaw thant aak thonamang angman wunayn a' pi'-pi'ayn thanang pam wanch God.antam anangan, a' wik min God.antam engkanang waa'-waa'ayna. 12Nil pam inangan kuch thanang pam wanch God.antam al-alantan yipam ma'-aath-aathayn thanang ngangk thayanam iiyayn. A' anpalana than thamp nungant Christ.antan work iiyayn, a' than thamp wiy anangan ma'-aathayn thanang than yipam monkan-wak-wakayn nunang Christ.ana.
13Anpalana, ngamp ngulana karpam minam mee'miy nunang Christ.an a' ngangkangan pi'-pi'āmp nunang. A' anpalmaniya, ngamp ke' Christ yimanangan iiy-iiyāmpa, nil God.angan kaangk ngampang ke' Christ yimanangan iiyāmp. 14Amanamana, than pam wanch wiy al-alangan ngampang ke'-ngul muukamathiythan ke' ngamp puk manyiy yimananga ya'a. Than waa'wuntan ke' than wik Christ.antam waa'-waa'antan, puth ya'a. Ngamp ke'-ngul ngaantam-ngeeyāmp wik thanttam, puth an kan-kanam ya'a. Ngampwey nath ngaantam-ngeeyimp wik thanttaman-a, ngamp ke' dinghy yimanangan yeelal pi'anang pal-puyan thee'-thee'an, ngamp koochanam ke' iiy-iiyanamp, ya'a. Than ngampang kaangk muukamathayn wik minan yipam wantāmpa. Puth ya'a, ngamp kan-kanam minam ngaantam-ngeey-ngeeyāmp wik Christ.antamana, 15a' wik waa'-waa'āmp wiyantana. Ngamp puth kaangk wunāmp thanta a' thaa' mich-micham thawāmp thanta. Ke' Christ.an minam iiy-iiy-a, ngampan yimanang iiy-iiyāmpa. Ngamp puth woyan Christ.antam anman wak-wakāmpa. 16Nil pam wanch nungantam thon-thon pi'-pi'ana, nil karpath ngampangan ma' nungantamanga. Nil ma'-aath-aathan ngampang ngamp ke' nil anman weenāmpa. Ngamp kaangk wunāmp ngamparakama, a' ngamp wik ngeey-ngeeyāmp nunang Christ.an, a' ngamp work min iiy-iiyāmp nungant a' anpalaniy-a, ngampaniy-a, ma'-aath-aathwump.
Woyan Niiy Ka'athaman Wakan-a, Wantāna, Niiy Pam Wanch Nyiingkanam Ngul Iiyāna
17Ngay wik thayanam thawang niiyanta -- in wik ngatharam ya'a, in wik Christ.antam. Ngeeyān a! Niiy ke' iiyān ke' pam wanch wiy anangan than ke'aman thiichin nunang God.ana, than puth way anman ngaantam-ngeey-ngeeyantana. 18Kuchek thanttamana ke' ngaa' wunan yimanangan than puth ke'am thiichin nunang God.an. Thana waankam iiy-iiyantan nungantama, puth than way anman ngangkangan pi'-pi'antan, kaangk ke' ngaantam-ngeeyayn nunang, kuchek thayan weenin nungant God.antana. 19Than ke' weekwuntan woyan way anpalan ya'a. Than ke'-ngoongkam way anman iiy-iiyantana. Than wayan iiy-iiyantan-a, than ngul-nyaa' ke'am weentan, ya'a. Than way anman yump-yumpantan, than kaangk way thon-thonan yumpayn, way anangan kaangk ke' wantayna.
20Puth ngananiya ke'am meenathan niiyant wayana, ngan woyan minan meenathan Christ.antamana. 21Ngan keenk wik min Jesus.antam kan-kanam waa'-waa'an niiyanta, Christians al-alantan, a' niiy kanam ngeeyan a' min anman ngaantam-ngeeyan. 22A' inan tham ngeeyāna: woyan niiy ka'athaman wakan-a, an waya, niiy way-wayathwun niiyantakama, niiy puth ke'-ngoongkam wayim ngaantam-ngeey-ngeeyan. Niiy paththam kan-kanam wayan wantāna. 23Niiy ma' God.antang iiy-iiyān nil yipam weentathow niiyang niiy yipam min anman ngaantam-ngeey-ngeeyāna. 24Niiy woyan min anman wak-wakān, koochanam iiy-iiyān ma' God.antanga nil yipam min yumpow niiyang ke' nil anman iiy-iiyana.
25Yaa, niiy Christians nanangan ke' wik uuyamāna. Niiy wik kan-kanam anman thawān, Christians wiy al-alantan puth niiy yotam nanangana ke' thonam yimanangan iiyaniy karpam nungantang Christ.antangana. 26-27Man kul nath wampiy niiyant wiyantan-a, way ke' yumpāna, a' kinch ongkana man kulana ke' pi'āna. Kinch ke'an yippak ukow-a, kulan wantāna, ngangk minangam iiy-iiyān thanta, yipam oony way alangan ke' thaachow niiyang wayan yumpān. 28Niiy puth Christians ke'aman yippak iiyan-a, niiy nathwey ma'-kuchathana way min wukal thakan pam wanch wiyantama. Niiy ke'-ngul ma'-kuchathāna, niiy kan wantāna. Niiy work min anman iiy-iiyān, a' min-min pi'wuna, niiy yipam wukal-a, may thakan thee'ān thant than wukal ke'anangan wuntan. 29Niiy wik thaa' poch-pochan ke' thaw-thawān thant wiyantan, ya'a. Niiy min iiy-iiyān thant. Thaa' mich-micham thaw-thawān thant, niiy yipam ma'-aath-aathān thanang ngangk thayanam iiy-iiyaynweya. 30Niiy ngangkangan Ngeen-Wiy Min God.antaman ke' wayathān puth nil God.angan kuch ngampar, ngamp mee'miy yipam iiy-iiyāmp ngamp pam wanch nungantam inangana. Nil Christ palaman wampow-a, nil Ngeen-Wiy Min God.antam alangan ngul meenathow ngampar yotamant ngamp pam wanch wee'-wee'anangan nungantama, a' nil God.angana ngampang minam ngul pi'-pi'ow pam wanch nungantam anangan. An kan-kanam paththama. 31Yaa, niiyaniy-a, ke' thaa' poch-pocham thaw-thawān a' ke' man kul wampow niiyant, ke' ngangk kul pi'-pi'ān niiyantakamana, ke' akān thanang wiy anangana, a' puth wayan ke' yumpān thanta. 32Nil Christ.an utham niiyant nil God.angan yipam ke'-ngul ngaantam-ngeeyow way niiyantamana. Yaa, niiyaniya, yimanangan ngangk minangam iiy-iiyān thant wiy al-alantan, ngangk mam-mamān thananga. Way thanan yump-yumpin niiyant-a, niiy ke' ngaantam-ngeeyān, kon-ngathow niiyang ngula.