Ngamp Ma'-Aath-Aathāmp Thon-Thonana
61Ngurp ngatharam niiyalang, niiy wee'-wee'anangana wik nungantaman ngeeyaniy Ngeen-Wiy Min God.antam alantaman-a, niiyiya thawān thant pam wanchantan than wee'-wee'anangan wayan yumpantan. Ma'-aathān thanang than thampan yipam wik ngeeyayn nunang Ngeen-Wiy Min anana, puth niiyiya ngangk minangam wik itangam thaw-thawān thant. A' putha niiyiya mee' we'-we'ar iiy-iiyān, aak min-min thathāna, puth niiy thampana way ngul yumpana. 2Nil wee'-nathwey ngangk way-wayam paththam iiy-iiyiy-a, ya'amiy-a, natha oony way Satan alangan thaach-thaachiy nunangwey way yumpanakan-a, yaa, niiyiya pam wanch anangan ma'-aathān thanang min yumpanakana a' putha ngangk thayanathān thanang ngangk wayan wuntan. Puth aak yimanangan wunan wik thayan Christ.antaman ngeeyāmpa! 3Nil wee'wey thawiy puth ngaantam-ngeeyiy thamp nil pi'ana, an ya'a nil many iiy-iiyan mee' God.antangan, an nil yaan ulpathan nungamang ke' nil pi'anan, an ya'. 4Ngamp ma'mangkamangan thathāmp ngamparakamanwey ngamp pok-pokkapang ngeenan yumpanampa. Ngampwey nath min yumpimp-a, anpalaniya ngamp ngangk min ngul iiy-iiyimp. Ngamp ke' thath-thathāmp wiy ananganwey a' ulp-ulpanangan ke' thawāmp ngul, “Ngay ep mina.” An puth ngamp min ya'a. 5Ngamp ka'athamana ngamparakam thathāmpweya ngamp nath min anman yumpanampa nath ya' way anman yumpanamp, pam wanch wiy ananganweya ke' thathāmp thanang than ngeenan yumpantan, ngamp ngamparakam thonakam thathāmp.
6Ngampiya way min anangan thee'āmp thanta al-alantan thanan thaa'-aathantan ngampangan wik God.antamana.
7Nil wee'-nath thawiya, “Nil God.an ke' mee'miy ya'a ngatharamana ngay ngeenan yump-yumpanga, ngay muukamathang nunang God.ana,” an nil wik uuy-uuyaman nungantakamweya. An nil ke' muukamathiy nunang God.an, ya'a. Ya' paththam. Ngamp God.an ke' muukamathimpa, a' ke' thaa'-thengkathimp nunang, ya'a. Nil wee'angweya wayan yump-yumpan-a, ngul-ngulana an aak way ngul wampow nungantan. Nil God.angan um nungantang thanathowana a' way yumpow nungant ngul. 8Niiy nath niiyantakam anman ngaantam-ngeey-ngeeyaniy way yaam yump-yumpān-a, an niiy ngul uthamana. Puth niiyiya Ngeen-Wiy Min God.antaman wik ngeeyin nungantamanwey-a, a' min anman yump-yumpin-a, niliya ma'-aath-aathow niiyang a' kalow niiyang ngul ngangk aak umpuyam wun-wunān aak nungantang God.antangana. 9Yaa, niiyiya ke' eenchāna minan yumpaniya. In ngeeyiya, niiy woyan minana ke' wantāna. Niiy kan mee'miya niiy min anman yump-yumpinan-a, ngul-ngulana niiyiya aak umpuyam wunān nungantang piip God.antanga. 10Yaa, niiyana min anman iiy-iiyāna pam wanch thon-thonantanweya a' puth niiy min iiyān paththam thant pam wanch God.antam al-alantanwey.
Wik Inangan Min Paththama Ngeeyāmpa!
11Ngay ma' ngatharamang wik ko'alam inangan ump-umpanga, lat inan thathāna pi'-pi'anam umpanga. 12Than pam wanch al-alanganweya than kaangk yaan thaachiythan niiyang yipam wik thayan Jews al-alantamanwey ngeeyān thanan puth ulp-ulpanang iiy-iiyantan, thanan kaangk pam wanch wiy al-alangan ke' min waa'ayn thanang, puth ya'a. An puth thananiy waa'antan ke' than Christ.an kan-kanam ngaantam-ngeeyantan nunang nilan utham yipam thanangan kaa'-piichanathow, puth thananiya wik thon thamp thaa'-aathantan thanang puth thananiya winynyang mo'antan Jews al-alantamana than ke'an ngangkangan pi'-pi'antan nunang Christ.ana. Puth thanan winynyang mo'antan than nath piikiythana thanang. 13Than nathwey thaachiythan niiyang wik thayan Jews al-alantaman erkam yipam ngeeyāna a' ee' thawān yipam wiyangan pe'an umpayn niiyantaman ngeen-wiyana, a' thananiya wik pi'an ngul thawayn a' ulpayna, “Thathiya, an ngamp pam pi'-pi'anama! Ngamp puth anangan thaachamp thanang Jews ya' anangan, thana wik thayan ngamparaman ngeeyina!” Puth than thampana ke'am wik thayan ma'mangkaman minam ngeeyin ya'a. 14Puth ngayiya ep-paththama, ngay wik pi'anam thawang ulpanang thampa, ngeenam puthe? alantaman thonamantam thonakam Lord Jesus Christ.antam nilan utham yuk wuuyanangan ngayangan kaa'-piichanatha. An ke' ngay thamp uthamangan nungantangan yuk wuuyanangan puth anpalana way min aak inana ngay yuk pi'an min-minam paththam ke'am ngangkang pi'-pi'ang thanang, ya', an ya'-ngul, Jesus Christ.ana ngay ep ngangkangam pi'-pi'ang. 15Nungkway ngeen-wiy pe'an ke' umpin niiyang-a, nath ya'wey-a, kan umpin niiyang-a, an kana, an ke'-ngul ngaantam-ngeeyanaka. Inan ep-paththama niiy wik ngeeyān nunang Ngeen-Wiy Min God.antamana. An nilaniya thayan paththam yumpow niiyang niiy yipam pam wanch puk nyiingkanam iiy-iiyāna. 16Niiywey wik ngeeyin Ngeen-Wiy God.antam alantaman-a, puth niiyaniya kan-kanam pam wanch piip God.antam iiy-iiyin. Ngay kaangk God.angan ngangk enyanam pi'ow niiyang a' putha min iiyow thamp pam wanch puk manyiy ma'mangkamantana than kan-kanaman monkan-wakantan nunang God.ana.
17Ngay wik inangan wantang niiyantweya: puth niiyana ke' wayamān ngul ngatharaniya. Ngay inaniy iiy-iiyanga pam God.antama, ngayana kemp kompan thamp, il-ilangan meenathananya ngay pam God.antam than puth anpalan piikin ngayang ngay wik God.antaman waa'-waa'ang.
18Ngurp ngatharam niiyalang, ngay kaangk Lord Jesus Christ.angan ngangk minangam iiy-iiyow niiyant yotamant, yey, kan-kanama.
Anman kan,
Paul