Niiy Christ.an Ngangk Minangam Monkan-Wak-Wakān Nunang
51Nil Christ.angan waa' niiyang puk God.antamana niiy yipam ngangk minangam monkan-wak-wakān nunang. A' niiy paththam ngaantam-ngeeyānwey puth ke'-ngoongkam monkan-wak-wakān nunang Christ.aniy putha niiyana koyaman ke' weentān wik thayan keenkanam anangan monkan-wak-wakān, an ya'a, -- ananiy ke'a way min anhan yimanangan paththam putham maay-maayin kal-kalanakanweya, an min ya'a.
2Niiy wik inan ngatharaman ngeeyāna. Ngay Paula, wik inan thawang niiyant niiy nath kaangkwey puy wee'angwey ngeen-wiy pe'an niiyantaman umpiythan. An ngul min yumpiythan niiyang ey? An ya'a! Puth niiyiy natha ngaantam-ngeeyaniy ke' nil Christ.aniya aak-ya'ang utham ngamparaniy ey? Ya'a! 3Ngay puth inan wik thayanathāng niiyang. Niiy nath kaangka than ngeen-wiy pe'anan umpiythan niiyang-a, niiyiya putha wik thayan ma'mangkam anangan ngeey-ngeeyānweya, manyam thonakam ya'a. 4Niiy ngaantam-ngeeyaniy ke' piip God.an min anman iiy-iiyow niiyant ey? Niiy puth wik thayan keenkanam anangan ngeey-ngeeyaniy anpalan ey? An ya'a. Niiy puth man-mangkam thee'aniy Christ.antana. Nilana puth min ke' iiyow niiyant, ya'a. 5Puth ngananiy-a, mee'miy nil God.angan ep min yumpow nganang. Nil ngangk thayanathow nganang Ngeen-Wiy Min nungantam anan kuchow ngant puth ngan ngangkangam pi'-pi'anan nunang. 6Nungkway ngeen-wiy pe'an ke' umpin nganang-a, nath ya'wey-a, kan umpin nganang-a, an kana, ngan nungantakam Christ Jesus.ant. Inana wik pi'an paththama wun ngampar: ngampiya God.an ngangkangam pi'-pi'āmp nunang a' kaangk wunāmp nungant a' ngamp puth ngangk minangam iiy-iiyāmp pam wanch wiyantan.
7Niiyaniya ka'athaman minangam iiy-iiyana! Nil ngul wee' thaw niiyant e? Wik God.antam anangan ke'-ngulan ngeey-ngeeyānwey e? 8Nil piip God.an ke'am thaw niiyantana ya'a. Nilam puth piip God.ang ump niiyang wik min nungantam anangan kan-kanam paththaman ngeeyāna. 9Wik way anangan niiyan ngeeyaniya an ke' yeasta. Yuk inan manyaman wunpiythana may aachichanganwey-a, an mayana thip ulpan ngul yuk alantamana. Yaa, in yimanang aak wunana. Niiy nath wik way ngeeyān pam thonam alantaman-a, ngul-ngulana niiy yotamaniya way ngul weenan. 10Ngay puth kan mee'miy nil Lord.angan ngul ma'-aathow niiyang min-minam ngaantam-ngeeyān wik min kan-kanam paththam ananganiya a' niiyaniya wik way anangana ke' ngeeyāna. Nil piip God.angan ngul wayathow nunang pam anan way-wayan thaa'-aath-aathan niiyang.
11Ngurp ngatharam niiyalang, than nath pam way al-alangan waa'antan ngayang niiyantanwey ke' ngay way-way thaa'-aath-aathang niiyanga ke' than wiyangan ngeen-wiy pe'anan ump-umpayn niiyang. An ya'a. Niiy ke' ngaantam-ngeeyān an ke' wik kan-kanama puth ya'a. Yaan waa'in ngayangweya. Than pam al-alangamana way yumpantan ngatharwey thampa ngay puth waa'-waa'ang nil Jesus Christ.an utham yuk wuuyanangan pam wanch puk ma'mangkaman yipam kaa'-piichanathowa. 12Ngay paththam kaangk than pam way al-alangan too wantayn niiyang ngula, ke' yipam karpam kal-kalwuna.
13Ngurp ngatharam niiyalang, wik thayan keenkanaman-a, yaaman ke' ngaantam-ngeey-ngeeyān, an ya'-ngul. A' niiyiywey-a, woyan niiyantakamana ke' wak-wakāna. Nil puth God.angan umpa niiyang niiyan yipam ngangk minangam iiy-iiyān niiyantakamana. Niiy niiyantakam thonakam ke' ngaantam-ngeey-ngeeyāna, ya'a, niiy ngangk minangam iiy-iiyān niiyantakamana. 14Niiy nath wik thayan thonam inan ngeeyān-a, yaa, an niiyana wik thayan ma'mangkam anangan monkan-wak-wakān ngula. Niiy wik thayan inan ngeeyāna: niiy paththam kaangk wunān pam wanch puk wiyantana. Ke' niiyan min-minam pi'-pi'wuniy niiyantakaman-a, yaa, niiyiya yimanangan pam wanch wiy al-alantan ngangk minangam iiy-iiyān thantwey. 15Ngay puth inan wik thayanathāng niiyanga, niiy yaaman pek-pekwinan-a, a' putha man kulan wamp-wampān niiyantakaman-a, an niiyana kan-kanam wayathwinweya. Niiy wik inan ngaantam-ngeeyāna.
Ngampiya Wik Ngeen-Wiy Min Alantaman Ngeeyāmpa
16Wik niiy inan ngatharam ngeeyāna: nil Ngeen-Wiy Min God.antam alangan ngul waa'ow niiyant niiy want-wanttakan iiyāna. Ma' nungantang iiyāna. Niiy nunang anman wik ngeey-ngeeyinan-a, niiyana way ananganiya ke' yumpin ke' pam wanchangan wayan kaangk yump-yumpayn. 17Than puth pam wanch yotangan ngaantam-ngeey-ngeeyantan way yumpanakan, puth nil Ngeen-Wiy Min God.antam alangan ep kaangk ngamp min iiyāmpa pam wanchant. Puth ngampaniy-a, ma'-yotam kaangk way yump-yumpāmpa, ngamp Ngeen-Wiy Min God.antamana thaampanamp. Puth ngampiya wik Ngeen-Wiy Min alantamana ngeeyāmp, ke' way yumpāmp ke' ngampaman kaangka yumpāmpa. 18Ngamp Ngeen-Wiy Min God.antaman ngeey-ngeeyimpan-a, an ngampana wik thayan keenkanaman ke'-ngul ngaantam-ngeey-ngeeyāmp, an ya'-ngul.
19An ngamp kan thathanamp mee' engkanangwey pam wanchangan wayan yumpantana. Puth pam wanch thon-thonantangan wuntan pal-puyanwey a' way-wayam paththaman yump-yumpantan thon-thonantangan. 20Thaniy puth thaa'-kuumpantan yuk wayanang anangan yukaman yump-yumpin thananga a' putha ma'-wop iiyantan thon-thonan pekayna. Putha pam wanchangan ngangk way-wayangaman kalwuntan thanttakaman, puth pekwuntan, an puth thaniya mee'-wuntan thanttakaman, man kul thamp wampantan a' thanttakam thonakam ngaantam-ngeeyantan, wiy ya'a. A' puth thananiya pungk-pungkalang yaarkathwuntan thanttakaman. 21Thananiya mee'-wuntan thanttakam way minam thakana. Putha than ngak way mungkantana a' than karpamim wichwuntan, weenth-weenthamantan pal-puyam. A' thana puy-puyam paththam way anangan yump-yumpantan. Ngay ka'athamana kan wik thayanathang niiyangwey a' ngayan putham ngul wik thayanathāng niiyangan than pam wanch anangana way anangan yump-yumpantan-a, than uthamaynan-a, an than ke' iiyiythan aak min God.antamakan in kenyan an ya'a.
22An puth nil Ngeen-Wiy Min God.antam alangan ngangk thay-thayanathan ngampanganiy ngamp yipam min yump-yumpāmp thant wiyantana, a' putha ngangk minangam iiy-iiyāmp ngamparakamana. Niliya ma'-aath-aathan ngampang ngangk minangaman iiy-iiyāmp God.antan, a' puth-a, niliya ngangk min yumpan ngampang thampa, a' putha nil ngangk ngamparamana enyanam yumpan. Nil ma'-aath-aathan ngampang ngampan yipam ke' wayamāmp ngamparakamanweya, ngampiya min paththam yump-yumpāmp thant wiyantanwey, min iiy-iiyāmp thantwey. Nil ma'-aath-aathan a' thayan paththam yump-yumpan ngampang ngamp yipam ma'-yotamana ma'-aath-aathāmp ngamparakamana, ke'wey eenchāmp ngamparakamana ya'a. 23Nil Ngeen-Wiy Min piip God.antam alangan thampa ma'-aathan ngampang thaa'-mochanan iiy-iiyāmpana ulp-ulpanang ya'a ke' pam wanch pi'an paththam yimanangan ulpanang iiyantan. Nil ma'-aathan, thayanathan ngampanganiya minan yumpāmpa a' puth wiy thaman ngaantam-ngeeyāmp, ngamparakam thonakam ya'a. Ngampwey min iiyimp-a, ngamp wik thayan ke' thaampanamp ya'a. Ngamp min yumpanamp-a, an puth min ngampara! 24Than pam wanch Christ.antam al-alangana wayan ke'-ngul yumpantan, an ya'-ngul, min iiyantana. Ngamp an-aniyangan ngangkan thee'amp Christ.antan-a, an ke' nungantang angman karpam uthamampa, amanamana wayana kaangk ke'-ngul yumpāmpa. 25Ngampaniya ngangk aak umpuyam wun-wunāmpa, nil puth God.angana Ngeen-Wiy Min nungantaman kuch ngampar. Yaa, puth ngampaniya wik erkam ngeeyāmp nungantamana nil ngeenan waa'ow ngampar yumpāmpana. 26Ngamp ke'wey ulp-ulpanangan iiy-iiyāmpa ke' pam wanch pi'-pi'anam yimanangana ya'a, ke' man-aathwump ngamparakamana putha ngamp ke' mee'-wunāmp ngamparakama.