Ngamp Ngangk Minangan Wukalan Thee'āmp Thant Wiyantan
81Ngurp ngatharam niiyalang, ngan kaangk wik waa'ān niiyanta pam wanch al-alantaman aak churches aak Macedonia.angana. Nil God.angan ma'-aath thananga ngangk minang paththam anman iiy-iiyayn thant wiyantana. 2Aak wayan ma'-yotam wamp-wamp thantweya, puth thananiya ke'-ngoongkam anman God.ana ngangkangan pi'-pi'in nunanga a' putha ngangk kuupamin paththam. An puth nanpalana, thanan putha thaa'pin iiy-iiyin a' wukal thakan erkam thee'-thee'in thant pam wanch Christians wiy al-alantan than wukal ke'anangan wunin aak Jerusalem.angana. Nungkway than wukal manyan pi'-pi'in-a, than pam wanch min-miniy ngangk minangam wukal thee'-thee'in thantwey. 3Ngay kan-kanam waa'ang niiyanta, thananiya ngangk minangam thee'in. Ngay ke' thawang thant wukalan thee'ayn thantan ya'a, than wukal thanttaman thee'in, thananiya wukal ke'anang ngul wunina ma'mangkam anman thee'in thantanwey. 4Thananiya ka'athaman puth-putham thawin ngant thanan yipam ma'-aathayn thanang, pam wanch Christians wiy anangan aak Jerusalem.angan wun-wuntan, thanan puth kaangk kan-kanam ma'-aathayn thanang. 5Puth thananiya wukal yot paththam thee'ina, ngan kan ngaantam-ngeeyan thanang ke' wukal chil-chilan thee'aynana puth ya'a, wukal yot paththam thee'ina. Anman thonakam ya'a, than ka'athangamana ngangk thanttaman thee'in nungant God.antana, a' thawin nungant than kan-kanam monkan wakayn nunanga. A' putha than thawin ngant than kaangk wik nganttaman ngeeyayna ke' nil God.an thaw thant ngeeyayn nganangana. 6Ngant ngangk min wunan thanttam al-alantaman than puth wukalan ngangk minangam thee'in. Putha ngan Titus.antan nyiingk thawan nil aak nangan wampow niiyant, nil yipam niiyant thampa thawowa niiy yipam wukal thakan ngangk minangam thee'ān thant Christians wiy al-alantan aak Jerusalem.angan wuntana. Nil ka'athangaman wamp niiyant, nil inan yumpa wukalan yal-yalmatha, puth ya'a, yotan ke'am yalmatha, puth inman-a, nil wukal wiy anangan yalmathowa niiyantamana. 7Niiy ngeen nathan yumpaniy-a, niiy minam yumpaniya, puth niiyaniya God.an kan-kanam ngangkangam pi'-pi'aniy nunang, niiy kan-kanam minam ngaantam-ngeeyaniy nunang a' wik nungantam anangan thampa, puth niiy minam thaa'-aathaniya. A' niiyiya ngangk minang work iiy-iiyaniy piip God.antan a' putha niiy kaangk paththam wunaniy nganta. Puth ngan kaangk niiyana min anman iiy-iiyān thampa, a' ngangk minang thamp thee'ān wukalana.
8Ngay ke' thaw-thawang niiyant niiy ngangk minangaman iiy-iiyāna thant, wukal thakan thee'ān thantanweya. Ngay lat inan umpang niiyanta waa'āng niiyant pam wanch anangan aak Macedonia.angan wuntan wukalan thee'antanweya niiy yipam ngaantam-ngeeyān woyan thanttaman wakāna, niiy meenathān niiy kaangk paththam wunaniy pam wanch wiyantanwey. 9Puth niiy kan mee'miy nil Lord Jesus Christ.an ngangk minangam paththam iiy-iiyan ngampar. Nil ma'mangkiy iiy-iiy aak heavenangan wun-wuna, puth nil aak earth iikanakan uk-a, an nil ke' pam ma'mangkiy ya'-ngul ween. Puth anpalana, nil God.an ngangk minangam iiy-iiyan ngampar a' kalow ngampang aak umpuyam yipam wunāmp nungantang.
10Yaa, ngay puth inan waa'ang niiyant wukal amanamana. Kaap alangan want ngampang-a, niiy wukalan yal-yalmathana, yimanang kan-ngul wantan ey? Ngay kaangk niiy putham yalmathāna wukal ananganiya. In min niiy yimanangan yumpāna. Niiyiya ka'atham ngangk minangam thee'ana putha niiy ka'athamwey wukalan yal-yalmathana, puth pi'an ya'a, many anmana! 11Yaa, niiy ath-ath wukalan yalmathāna! Niiyiya ka'athamana ngangk minangam wik yumpan niiyama wukalan yal-yalmathānweya, yaa, niiyiya wukal pi'-pi'anam yalmathān ngula! Niiy ngangk minangam thee'ānwey, niiy wukal pi'-pi'anana ke' pi'ān niiyantakamana, niiyiyweya wukal chil-chil pi'ān mayaka thonakam putha way min wiy anangan piiyānweya. 12Niiyweya ngangk minangan thee'in wukal pi'anaman-a, niiyana God.an ngangk min paththam yumpin nunang. Nil puth God.an mee'miya than pam wanchang wukal ko'alaman pi'antanan-a, an ke' thee'iythan wukal pi'anana, ya'a, an wukal many thee'iythan. Puth niiy puungk wiyangan nath ep wukal pi'an pi'aniya niiyantakama. Niiy wukal ko'alam thonakam nath thee'inan-a, nil piip God.an ngangk min ke' wuniy nungant ya'a, niiy paththam wukal yot thee'inweya, an nil ep ngangk min wunow.
13Ngay puth inan ke'am thaw-thawanga niiy wukal niiyantaman ma'mangkaman thee'ān wiyantana niiy yipam wukal ke'anang may ke'anang thakan wunānwey, an yimanangan ya'a. 14Puth in-inmana niiy wukal, may, way min yot pi'-pi'aniya, yaa, niiyiy paththama ma'-aathān thanang anangan wukal ke'ananganwey. Niiy ngul-ngulan nathwey-a, wukal ke'anangana wunin-a, puth maya way min ya'wey-a, thananiya puthangkana ma'-aathayn niiyang. An min yimanangan niiyanta niiy ma'an aathwuniy. 15An ke' piip God.angan waa' pam wanch nungantam anangan keenkanamana aak pintalangan wun-wunin, a' thananiya may manna anangan maay-maayin aakaman ngaa' thon-thonanwey may mungkanakana. Nil puth God.an thaw, “Than wee'-wee'anangana may manna yot-yotaman maayin-a, an than may yot ke'am pi'in thanttakaman ya'a; puth than anangan may manna chil-chilan maayinan-a, an than meech ke' wunin ya'a,” puth thananiya ep-paththam aathwin thanttakaman.
Ngay Inan Waa'ang Niiyang Titus A' Puth Ngurp Nungantam Anangan
16Ngan thankyou paththam thawanan nungant God.antan Titus.antamana. Nil God.angan Titus.an ma'-aath nunang nilan yipam ngangk minangam paththam niiyangan ma'-aath-aathow ke' nganaman ma'-aath-aathanan niiyang. 17Nganan thawan nungant Titus.antan uwow niiyangan-a, nil ee' thaw. Puth nil thamana kanam ngaantam-ngeey nil iiyow niiyantana nil kaangk paththam ma'-aathow niiyangana. 18Nganiya ngurp nganttam thonangan ngul kuchān niiyant nungantangana. Pam wanch yotangaman churches thon-thonangan minam waa'-waa'antan nunang wik minaman waa'-waa'an thant. 19Puth anman thonakam ya'a, than pam wanch Christians wiy al-alangan nunang mi'in nganttangan iiyow ngan wukalan kalān aak Jerusalem.akana. Than pam wanch Christians al-alangan wukal inangan ngangk minangam thee'in. Ngan wukal anangan kan-ngulan kalān-a, than pam wanch wiy anangan mee'miy weenayn nil God.an min paththam a' than kan-ngul mee'miy weenayn ngan kaangk ma'an aathān thanang.
20Ngan ngul wukal anangan minam paththam pi'āna, ngan kaangk ke'a wiyangan ma'-pithayn nganangweya wukal amanamana, a' putha ke' thawayn thampa ngan ke' wukal wiy anangan nganttakam pi'inweya ya'a. 21Ngan kaangk ma'-thayan iiyān mee' piip God.antangana, a' putha mee' pam wanchantangan thampa.
22Ngan pam thonangan ngul kuchān nunang nungantangan iiyow Titus.antanganweya. Ngan puth thathan nunang minam anman iiy-iiyana. Nilana kan-kanam paththam work piip God.antan iiy-iiyowa. Niliya wik min ngeey niiyantamana, ke'-paal nilana ngangk minang iiy-iiyan, puth amanamana, nilan kaangk paththam puy iiyow niiyant a' ma'-aathow niiyang. 23Niiy kan mee'miy nunang Titus.ana, ngan work karpam iiy-iiyanan piip God.antana, puth niiyang ma'-aathanan. Puth kucham anangan pula nungantangan wampowpul-a, than pam wanch aak churchaman al-alangan kuchin pulang niiyant. Pulaniya work min iiy-iiyowpula puth ngampaniya thaa'-kuumpāmp nunang Christ.ana anpalman. 24A' niiy ngangk minangam iiyān thant Titus putha pam kucham al-alantana than pam wanch Christians church thon-thonangan al-alangan yipam ngeeyayna. Puth amanamana thanan mee'miy ngul weenayn ngan kan-kanam thaw-thawanan, waa'-waa'anan niiyang niiy min paththaman iiy-iiyaniya.