71Ngurp ngatharam niiyala, anpalmana wik nilan ngampar thaw-a, ngamp wayan kan wantāmp, a' putha ngampiya ke' ngotan ngoonchāmp thanttang al-alantangan wayan yump-yumpantanwey. A' ngamp ke' ngaantam-ngeeyāmp way yumpanakana. Puth ngampiya ngaantam-ngeeyāmp nunang God.an nil min pi'an paththam a' wik ngeeyāmp nunang thamp ngampaniya yipmam min anman iiy-iiyāmp.
Ngangk Ngatharaman Min Paththam Wunar
2A' ngay wik inan thawang niiyant: niiy ngangk pal pekkuwam kaangk paththam wunān ngantwey. Ngan ke'am way yumpanan niiyant ya'a, a' putha ngan ke'am thaachanan niiyang way yumpanakan ya', ngan ke'am mee' thenchanan niiyang ya'weya. 3Ngay wik inangan thaw-thawang-a, ngay ma' ke' weechang niiyanganwey ngan puth kaangk paththam niiyant wunānwey, ngan yaam nath man-yetham wunānwey-a, nath ya', erkam nath uthamānwey, puth ngan niiyant anman kaangk wunāna. Ngay ka'athangaman kan thawang niiyant. 4Puth ngan kan mee'miy paththam niiyantamanwey niiy woyan minan ngul wakān. Ngangk ngatharaman min-minam paththam wunar niiyantam anpalanwey. Nungkway way yot wamp-wampan ngantanwey-a, puth ngayiya ngangk thayan iiy-iiyang a' ngangk min paththam iiy-iiyangwey.
5Ngan aak Macedonia.akan wampan-a, ngangk kuchanam ke'am wun, ya'a, kul anman uw-uwin ngant. Nganan aak wanttinakan iiyan-a, than aak an punchaniya, kul thaw-thawin ngantwey a' wiyiya piikin nganangwey. Than al-alangan nganangan thaampin, a' putha nganwey niiyang anman ngaantam-ngeey-ngeeyan. 6Puth nil God.ang alangamana ngangk thayanathan pam wanch anangan thanangwey ngangk wayan iiy-iiyantana, a' putha nganang thampa ngangk min yump nganang nil puth Titus kuch ngant. 7Ngan ngangk min paththam wunan amanaman nil Titus.an wamp ngant, puth ngananiya ngangk min thamp wunan wik min niiyantaman waa' nganta niiyan nunangan thampang ngangk thayanathan. Nil waa' ngant niiy iingkan wunaniy nganttamwey, a' putha niiy kanaman ngangk maalaman way niiyantam anpalan, an niiyan kaangk wik ngatharaman ngeeyān ngul. Puth amanaman ngay ngangk min-minam paththam iiy-iiyangwey niiyantamana!
8Ngay ka'athangamana lat kan kuchangan wakang niiyangana puth an ngangk way yumpangan niiyangwey. Puth ngay ngangk wayan ke'am wunangan latan kuchangan niiyant ya'a. Ka'athangamana an ep-paththam ngangk way wunangan ngayan puth wik ngeeyangan niiyantam niiy ngangk wayan wunan lat amanamanwey. 9Puth yimanangan ngulana, ngay ngangk minang iiy-iiyanga, amanaman ya'a, niiy ngangk wayan iiy-iiyan, puth imanamana niiy koyam ngulan weentan woyan God.antamakan. An kan-kanam putha, niiy ngangk way paththam iiy-iiyan, puth niiyana ngaantam-ngeeyan niiyantakam niiy wayan yump-yumpan a' puth niiy koyam ngulan woyan min God.antamakan weentan. Puth lat ngatharam alangana ke'am wayath niiyang ya'a, an puth min niiyant. 10Ngamp wayan yumpanampwey-a, ngampaniya ngangk way paththam iiy-iiyanampwey. Puth ngamp God.antan thawimpanta ma'-aathow ngampangan-a, nilaniya koyam weentathow ngampang woyan min nungantamakan a' putha kaa'-piichanathow ngampang way ngamparam amanaman ngampan yump-yumpamp. Anpalana ngamp ke'-ngul ngangk wayan iiy-iiyāmp ya'-ngul, ngampaniya ngangk minang ngul iiy-iiyāmp! Puth wiyiya than pam wanch ngangk way iiy-iiyantan wayan yumpin amanamwey, puth than ke' engkantan God.antan ma'-aathow thananga, than puth ke' ngangkangam pi'-pi'antan nunang ya'a. Niliya ke' kaa'-piichanathow thanang way thanttam anpalan ya'a, thaniya aak way aakanakan iiyayn. 11Niiy kan in ngaantam-ngeeyāna nil God.angan ma'-aath niiyang niiy ngangk wayan iiy-iiyan. A' putha nil kan ma'-aath niiyang pam anan wakān nunang aak church niiyantamangan way-wayam paththaman yump. Puth niiyan ngath kan waa'ana niiyantakaman niiy ka'athaman ke'am wakan nunang pam anan nil yipam way nungantaman wantowa. Niiy yotamana ngangk way paththam wunaniy nil puth pam alangan ngul-nyaa' yump niiyang ma'mangkam ananganwey a' puth niiyiya winynyang mo'an nil God.ang nathwey wayathiy niiyang ma'mangkaman pam alantaman. A' niiyan-a, ngayang kaangk ngangk min yumpān, nanpalan niiy wakan nunang pam anan wayan yump, niiy kaangk ke'a wayathwun niiyantakaman, niiy kaangk kan-kanam monkan-wakān nunang karpam piip God.an, puth ngay ke'-ngul waa'āng niiyang pam alantamana nil wayan yump.
12Ngay lat ka'athangaman umpang niiyant-a, ngay latangan thawang niiyant pam alantaman wayan yump, putha piip nungantam anan thamp latangan waa'ang nunang, nil puth puk-kunchang way yumpant. Puth ngay latan wik yimanangakan kuchangan niiyant: ngay kaangk niiy mee'miy iiyān niiyantakam niiy kaangk paththaman wunaniy ngant nil puth God.angan kan thathan niiyang. 13Ngant namanaman ngangk min paththam wunan niiyantaman. A' putha nil Titus.ang thamp ngangk min yump nganang! Niliya ngangk min inan wamp niiyantamana! Nil ke'-ngul kuchekan wayam niiyantamwey ya'a, nil ngangk min ngul niiyangan thath minaman wunaniya. 14Ka'athangamana nil ke'aman yippak wamp niiyant-a, ngayaniya thaa'-kuumpang niiyang nungantana, puth niiyiya ke'am ngul-nyaa' yumpan nganang ya'a, niiy minam anman wun-wunan ke' ngay anman waa'anganta. Inan meenathan ngan wik kan-kanam waa'an niiyantamana. A' puth ngan wik ma'-yotam kan-kanam thawanan niiyantanwey. 15Nilana anan ngaantam-ngeeyan niiyanganwey niiy ngangk minangan wik nungantaman ngeeyana, a' puth niiy thampan kaangk paththam ngangk min yumpān nunanga, puth amanamanwey nil kaangk paththam wunan niiyant. 16Ngay kan thiichang niiyang niiy kaangk kan-kanam paththaman woyan God.antaman wakān, puth anpalana ngangk ngatharaman min paththam wunana.